旅居英國 • 動態移民(05) – 自由 • 生活 • 倫敦

英國倫敦 白金漢宮(Buckingham Palace)

白金漢宮(Buckingham Palace)是事頭婆位於倫敦的宮殿和辦公處。白金漢宮由白金漢公爵於1703～1705年建造，1762年被當時的君主買了下來作為宮殿。二戰期間，宮殿禮拜堂曾經硬食了一枚德國的炸彈。宮殿坐落於倫敦西敏市的大型公園旁邊，差不多每天早上都會進行禁衛軍交接典禮，多年來也是倫敦一處主要旅遊景點。

旅居英國 • 動態移民 – Day 07

<<倫敦>>

繼續上一篇行程，漫步倫敦市。

Twinings倫敦總店 – 英國的名牌茶葉老店，內有幾款不同的茶葉試飲，真係唔買都要入去試吓英國的品味。未來幾個月差唔多日日都飲佢的茶包。

店舖很細，近門口位置放了不同味道的茶葉，不過一般超級市場都有得賣。

試飲的位置都好繁忙，個個都試返幾杯，不過英國人好斯文的，唔會爭先恐後咁失禮。

Royal Courts of Justice (皇家司法院) – 英格蘭和威爾斯的上訴法院及高等法院的所在地，在Twinings 總店對面。

Jubilee Market Hall – 非常之旺場的市集，個個人在室內都唔戴口罩，英格蘭人就係有四個自信，三個堅持，已經完全視肺炎如無物，果然體格強健。

Covent Garden Market (柯芬園市集) – 市集內全是餐廳和小食店，每間餐廳也人山人海，行街的人也多，氣氛相當熱鬧。

St Paul’s Church – 在Covent Garden Market旁邊的小教堂，長期也有賣藝者在這裡作街頭表演，圍觀者多打賞亦都多。

Flat Iron (Covent Garden分店) – 小太熊的心水店，佢話呢度最出名係10磅牛扒，以前真係£10便可以在這裡食牛扒，就算現在也只是加到£12一塊。

我哋冇訂位所以要等，攞位時只需在門口留下電話號碼給職員，有位時便會收到短訊，等了約20min。

室內裝修就普通啲，不過真係坐滿人的，下次要上網Book定位。

爆谷免費的，呢間餐廳可以要杯Tap Water唔叫嘢飲，感覺依然自在，唔同大部份餐廳一坐低就問你飲乜。

牛扒Flat Iron Steak的確係£12，但如果加埋Side Dish、飲品和12.5%服務費，每人都要廿幾磅架，不過都算好抵食。餐具有一把小菜刀，夠特別又好玩啊。

Flat Iron Steak (£13.5) – 約有150~200g，用牛油煎香，肉味夠濃，五成熟時肉質也夠細嫩，加埋蘑菇汁(£1.13)更美味，超級抵食；水牛芝士焗茄子(£5.06) - 是自選Side Dish，好食香口但係好滯；意大利紅酒(175ml)(£6.25) - 是最平的紅酒，配牛扒都好好味架。

另外再加了一份Side Dish薯條(£3.94) - 夠粗又夠香脆，十分好食，加茄汁仲免費。

呢餐覺得平靚正，一定會再來食。埋單之後每人送了一把迷你菜刀，可以用小刀去門口換一杯雪糕。

朱古力雪糕 – 好味道，因為冇預佢會送甜品，所以好有驚喜好開心。

Leicester Square – 廣場的中央是專售賣即日特價歌劇門票的TKTS London，行到呢度想買特價孤星淚門票，不過套套都有剩係冇呢套同埋 歌聲魅影，都係自己上網買算了。

倫敦唐人街 – Leicester Square隔離便是非常熱鬧的倫敦華埠，這裡有熟悉的港式菠蘿包(£1.5)，出名態度差的老店旺記大酒家和法輪大法好。

天福行 – 唐人街內相對比較平的雜貨店。

難得來到唐人街，立即在這裡入啲貨先，買了Mama冬陰杯麵(£0.5)、農心辛辣大碗麵(£1.55)和越式碗牛肉湯河粉(£0.89)。

行完街乘地鐵(£2.5)由Piccadilly Circus去Tower Hill，回到The Tower Hotel攞返行李。

碰巧今天日落天色極美，見到咁靚的夕陽倫敦塔橋真幸運。

攞完行李再坐地鐵(£2.6)到Hammersmith，出站後行1km到今晚的酒店Holiday Inn Express London-Hammersmith，今次會連續住5晚。

Holiday Inn Express London-Hammersmith – 酒店外觀像是古宅，但內裡裝修很摩燈的。

雙人房(連早餐)每晩HK$618 – 派了間1/F的低層冇View房，窗外是平台頂好肉酸，只比G/F好少少。房間算整潔新淨，空間夠大卻奇怪完全冇位掛衫，私隱度高，整體上是抵住的。

又自己一個在酒店附近行吓了解一下這個社區，一落街便見滿街都係送外賣員飛快的單車，原來附近好多嘢食的，較有睇頭包括日本餐廳Eat Tokyo，中式餐廳Steam和快餐店Fish & Chips，過2日可以試吓。

今晚在房內食唐人街買的杯麵，每人有2個，因為中午食了貴嘢，夜晚要慳錢。

Mama冬陰杯麵(£0.5) – 味道酸酸辣辣，好食又抵食，下次去開唐人街一定再添貨。

VIFON越式牛肉湯河粉(£0.89) – 湯底清甜有牛肉香，河粉都好滑，好食，品質之高在預期之外。

今日2人晚餐只係£2.78，酒店房內送有Twinning茶和包裝牛奶，都夠飽了。

晚上用手機上網買Les Miserables(孤星淚)門票，£22.5的票賣晒了，最平只能買到每張£35，貴啲都決定去睇啦，因為小太熊未睇過現場，而我上一次睇已經係1999年了，又係在倫敦睇。

旅居英國 • 動態移民 – Day 08

今日全日天晴，天色藍爆靚到不得了，聽人講香港的天氣很差啊，已經連續多日落大雨。其實唔只天氣差，其餘好多嘢仲差，而且沒有最差只有更差，唯一冇轉差就只有食物。

Holiday Inn Express London-Hammersmith – 如有派到近大街的房便好了，最衰我哋間房近後巷火車軌，成日聽到火車聲。

早餐06:30便開始，我哋07:00落去地下餐廳食，很清靜舒服。

Holiday Inn的早餐雖然款式較少，但幾好味的，而且有生果，可以攞些少返房慢慢食。

食完早餐之後去乘地鐵(£2.6)白金漢宮睇換兵。

白金漢宮(Buckingham Palace) – 事頭婆的屋企和辦公室，今日11:00有禁衛軍交更儀式。

10:30去到時已經企滿晒人等候，因為太多人，好難有一個位置可以睇到整個儀式，大部分時間都係冇嘢睇，都有點悶。

等到11:00禁衛軍準時從遠處行去白金漢宮，不同類型的士兵都有。

士兵們步操入白金漢宮，交接完之後有人可以離開收工了。

越睇覺得越悶，決定早點走了，慢慢行20min去Regency Café食倫敦的貼地平價平民早餐。

首先要穿過 聖詹姆斯公園(St James's Park)，因為白金漢宮被這公園包圍。

Strutton Ground – 路過這St. James's Park附近的一條街道，全街都係熟食小販檔，行過都香噴噴，如果長住英國一定搵日來掃街。

Regency Café – 小太態介紹的平民餐廳，佢話呢度啲早餐好抵食架，係倫敦的平價早餐，價錢非常之貼地喎。

入到餐廳第一件事係立即搵位坐低，點知一坐低老細便大聲話未還食物唔準霸位。

唯有乖乖排隊買早餐先。

裏面真係規舉多多，未買食物唔準坐位，買完食物比完錢又冇單冇據，剩係問你叫咩名，食物Ready便叫名，我就覺得有點混亂囉，好彩我唔係叫Peter、David….否則可能佢一叫名就有幾個人同我搶早餐。

一份早餐只係£6.75，包埋飲品又唔駛加一，在英國算係數一數二的平價早餐了。

比完錢立即有嘢飲，可以坐低等了。

奶茶(£1.1)；咖啡(£1.3) – 早餐包了的飲品，散叫都唔算貴，不過只係咖啡機貨式，好流；奶茶是Twinning Earl Grey Tea。

Set Breakfast (£6.75) – 有齊番茄煙肉香腸煎蛋多士和奶茶/咖啡，煙肉煎得很香口，是英國少有好味的煙內，多士也算厚身好食，這價錢在英國而言真係好貼地。

食完第二餐早餐之後，慢慢沿泰晤士河漫步倫敦。今日雖然陽光普照，但依然凍到入骨，雙手凍到有點刺痛，影相都有點生硬困難。

路過這間Kennington Lane Cafe，小太熊話呢間早餐都抵食，不過冇Regency Cafe咁好食喎。

現在倫敦都有共享單車，不過我覺得只適合高手。

泰晤士河(River Thames) – 河畔有好多心心，個個都支持烏克蘭，寫低打氣字句。

西敏宮(Palace of Westminster) – 又叫 英國國會大廈(Houses of Parliament)，是英國國會(包括上議院和下議院)的所在地，1987年被列為世界文化遺產；毗鄰的 大笨鐘(Big Ben)是1858年建成的倫敦市地標，官方名字是Elizabeth Tower(伊利沙伯塔)，是倫敦西敏市一座古鐘樓。

我就第三次去呢度了，但小太熊還是第一次來。

補充資料 :

1.     £1兌HK$10.66 (HSBC網上兌換)

---待續---