小太陽: 泰國清萊泰舒適(完) – 重遊曼谷Banyan Tree

2006年2月28日

泰國清萊泰舒適(完) – 重遊曼谷Banyan Tree

Phu Chaisia Resort & SPA ～泳池套房Pool Villa

泰國清萊省(Chaing Rai)酒店 Phu Chaisia Resort & SPA除了竹製房間之外，還有2座獨立於其它房的私人泳池獨立屋 Pool Villa。Pool Villa自成一角位處山林之中，遠離其他房間，位置隱閉中帶開揚，在那私人泳池游水時感覺擁有整個山林。

泰國清萊 泰舒適 – Day 5

<<清萊>>

今日會全日留在酒店享受，早上食完早餐之後，在酒店附近的山頭四圍行，行去一處最佳的角度觀賞Phu Chaisia Resort & SPA的全貌。

Phu Chaisia Resort & SPA – 遠望一間間獨立的竹製平房，我們住在其中一間。

生菜田的農作物是每日供應給酒店的新鮮食材。

今天會搬房到泳池套房Pool Villa，由於太貴所以只住一晚。酒店經理相當好人，安排了我們10:00Early check in和明天16:00 Late check out，賺到盡啊。

準時10:00搬房，入住Pool Villa 1。今日Pool Villa 2冇人住，我們入去看了幾眼，原來位置差好多架，泳池沒有這𥚃咁開揚的。

Pool Villa(連雙人早餐)每晚Baht 11000 – 房間不單止大，而且每個位置也很光猛，室內設計典雅，睡在床上可以望住室外的泳池和山林，好有靈氣啊。

Pool Villa户外大浴缸 – 浴缸確實係非常之大，環境亦都一流，晚上可以望住星空浸浴，可惜熱水只係夠放滿1/4，之後便是凍水，在十幾度氣溫下浸凍水不是什麼享受。

Infinity Pool – 池水好凍，不過實在太靚了，我頂硬上游了10min，浸在池中感覺自己擁有了整片山林啊。之後便凍到要走返上來曬太陽。

還未享受夠便要離開了，因為今早11:00Book了酒店的Cooking Class，自已弄兩道泰國菜做午餐，有廚師從旁協助，幾好玩的，每度菜Baht 500，最少做兩道菜。

首先自己把所有配料菠蘿蕃茄青瓜洋蔥等等切粒。

廚師已經準備好所以調味料和份量，包括油、鹽、糖、生粉、蠔油、豉油、上湯、咖喱醬、茄醬和醋等等，並逐樣介紹講解。

廚師已經預先把Sweet and Sour Fish的魚炸好。

開始炒餸了，我負責煮甜酸魚，首先把蕃茄洋蔥和菠蘿炒幾分鐘，然後加入茄醬、糖和醋，最後撈埋碟炸魚便製成。

小太熊負責煮青咖喱雞。

甜酸魚味道非常之好，酸酸甜甜很冶味，魚肉亦炸得香口；青咖喱雞亦極之好食，雞肉又夠嫩，不過辣了些，要不停飲冰水。

食完飯又返房嘆世界，時間過得飛咁快。

下午16:00~20:00 Book了4小時SPA(Baht 5885)，包括了Facial、Body Scurb、Oil Massage和足部按摩。原先以為會好享受，但原來做Facial和Body Scurb時有很多冷場，揸完面和身之後師傅便蛇了出去大半個鐘，又凍又悶都幾辛苦，早知剩做Massage算啦。

晚上2人在餐廳吃了Baht 454。

回到房間繼續嘆，可惜浴缸和泳池的水太都凍了。

晚上瞓得好舒服。

泰國清萊 泰舒適 – Day 6

今晚會乘通宵巴士往曼谷，酒店比我延遲至16:00先退房。早上食完早餐之後便出發，到附近的河流玩2hr竹伐，每船Baht 2500。

原來這河流前日騎馬時已經來過了，竹伐準時來接我們。

起行....好好玩呀，可以幫船伕手過激流。整段旅程的風景都好靚，沿途也可以感受到山中靈氣。

下午返Pool Villa嘆到16:00，要check out了，酒店車我們到巴士站。最近的巴士站位於Mae Chan，距離酒店13km。

Mae Chan至曼谷的巴士票，車程17:20～05:30，中途會停幾站去廁所和食宵夜。

巴士準時到，上車了。

巴士開到飛咁快，坐著都感覺到離心力，都好驚嚇，下次都係坐返火車或飛機算了。

23:30到達一個大車站放25min小息，可以去廁所和食嘢。

買了碗湯河粉和一串肉丸，味道一般。

上車後再瞓，不過車速實在太快，對腳要大力頂住前面才能多些少安全感。

泰國清萊 泰舒適 – Day 7

<<曼谷>>

巴士晨早05:00到達曼谷的Mo Chit，是高架鐵路的尾站N8。

Mo Chit(N8)巴士站 – 落車後在這𥚃定一定神，看看Lonely Planet，決定到14km外的Silom搵地方落腳。

乘的士到達Silom後，問了2間酒店都唔啱價，因為佢哋話現在06:15 Check in要加半日房租。最後walk-in入酒店Sofitel Silom，平價房已Full，只剩一間Club Room，06:30即刻可以check-in，而且可以把早餐改為今天吃，決定立即比錢攞房。

Sofitel Silom Club Room(連雙人自助早餐)每晚USD 112 – 房間都好靚，有落地大坡璃和曼谷市全景，佈置亦很有格調。

窗外望到Banyan Tree Bangkok，明天一早便搬過去嘆世界。

立即沖個靚涼先，因為今日唔趕時間，所以先小睡1.5hr，09:00才起身食早餐。

自助早餐很豐富好味，煙三文魚肥美又新鮮。

食完野開始曼谷一日遊，曼谷我去過很多次了，但小太熊就只是第二次來，便決定去些大路的景點行吓，費事用腦。

行出酒店門口截Tuk Tuk，想先去River City買票今晚食Cruise Dinner。剛步出門口便有個泰國Tuk Tuk司機走埋嚟，我話想去River City，佢就話帶我哋去四圍遊覽，因為今日係Chinese New Year，佢同Chinese係Friend，所以只收我們Baht 10….我以為自己聽錯，便再三問佢真係只收Baht 10？再攞個10銖錢幣出來說 “only this?” 佢都話係，我見反正冇乜特別地方一定要去，便決定跟這Tuk Tuk看看這司機想點樣搵我笨。

上車之後，司機車了我們去附近一間很細的泰國廟，説叫我們新年第一件事要拜拜神先，還帶我們去買香燭，價錢仲最少叫貴10倍....Oh!明白了。我堅決唔買，直行入廟參觀。間廟流到咸，又細又冇野睇，心諗再咁樣落去太嘥時間，便決定比Baht 10 打發佢走，但佢竟然唔肯收錢，我們便冇再理佢講乜，自己行去對面馬路截第二架Tuk Tuk去River City。

River City – 在這𥚃買了今晚的Cruise Dinner餐卷，今次坐Royal Chaophraya Princess Cruise，是一艘西式船，供應自助餐。

Boat Taxi – 買完餐卷便在碼頭乘Boat Taxi去皇宮玉佛寺，每船Baht 300。

Grand Palace(王宮玉佛寺) - 曼谷的地標，鴨仔團必到。

入場都要排一陣隊，不過我今日穿了短褲，原來穿短褲不可以進內的，慳返入場費。

步行去下一個景點途中見到很多白鴿，又有很多人賣白鴿糧，我便去買一包，問那人how much佢又唔答，只係比了包白鴿糧比我便行開，我估頂盡Baht 20一包，便主動比Baht 20佢，佢唔要並行開，我唯有唔理佢了，自己去餵白鴿。

白鴿多得好跨張，我一邊餵一邊有賣鴿糧的人走過來隊包鴿糧比我，我唔肯接佢哋就在我面前倒晒落地引白鴿，個個都係咁做，引來超多白鴿，雖然好玩，但感覺有點古怪和不安。

我手上那包鴿糧餵晒之後想走人之際，那班賣鴿糧的人才一擁而上，個個手上拿着5～6個吉膠袋話係我剛才用了的鴿糧，每袋Baht 100…..

痴線㗎，我唔理佢哋轉頭便走，佢哋糾纏了一陣見我態度強硬，唯有離開等下一隻水魚，有些就媽义我，其中一個就指住我手上的膠袋，要我比Baht 100，我唔肯比，堅持只比Baht 20，佢最後都係冇辦法，收了我Baht 20。比多佢啦....

臥佛寺(Wat Pho) – 又係鴨仔團的至愛，不過小太熊未來過架。

China Town – 今日年初一，個個穿上紅色上衣，差點以為是泰國紅衫軍。

好快又到夜晚，要回到River City出船吃飯了。

這艘是泰式餐船，吃泰國菜的，我們坐另一艘船。

Royal Chaophraya Princess – 可以上船了，Cruise Dinner遊船河晚餐每位Baht 850，可以一邊食一邊睇曼谷夜景。

隻船好多人啊，今晚被安排坐在船中央，冇窗口位有點失望，不過算啦，氣氛都很熱鬧。

坐了一會兒，一位職員特色走過來説船頭甲板有張吉枱可以坐，問我們有沒有興趣。

這船頭甲板枱很清靜涼快啊，全船只有4張枱，價錢應該貴好多的，正呀，今晚真幸運。

自助餐的食物很普通，不過一邊食一邊欣賞曼谷夜景確係幾寫意。

Wat Phra Kaew(玉佛寺)

Temple of Dawn(鄭王廟)

不知是否今日係農曆新年，曼谷也放煙花啊。

晚上回到酒店，坐在沙發飲杯茶都幾享受。

明天早上便會轉酒店，所以今晚夜啲瞓。

泰國清萊 泰舒適 – Day 8

今日冇乜特別節目，會全日留在酒店。由於昨天已經吃了早餐，今早Sofitel Silom冇早餐吃了，於是瞓晏些。

早上10:00乘的士轉酒店，今日Book了曼谷Banyan Tree的Club Room一晚。

因為去到Banyan Tree只係10:15，Reception 話我們的房間正在清潔中，要12:00後才可以Check in，佢問我們吃了早餐未，可以免費送我們今早的自助早餐，慢慢食完才check in。嘩正呀。

Banyan Tree的早餐非常豐富，真係可以慢慢嘆。

Bangkok Banyan Tree Club Room – 房間和 Deluxe Room的房間其實完全一樣，分別是Club Room位於高層，並可專享54/F 的SPA Centre和51/F的泳池，Deluxe Room住客不可享用這些設施，只可到21/F的泳池和20/F的SPA Centre。