法國 初夏(完) – 終結不完美的法國旅程

小太陽在享用頭等飛機餐

國泰頭等機位在2007年時每架機有8個位，在2011年時已減至6個位，令坐位的空間更大。現在國泰頭等來回巴黎機票毎張連稅及附加費要HK$121133，坐位非常寬濶，足有7至8個經濟位的空間，餐飲全是貴價香檳和紅酒，食用是高級魚子醬，整個旅程都非常舒適，真有點坐到唔捨得落機。

難怪懵太都為了個區區1A位發晒爛渣，秋官黃見秋都為了張區區來回歐洲頭等機票攪到自已臨老時一褲都係。

法國 初夏 – Day 12

<<巴黎(Paris)>>

繼續上一篇行程。

小太熊在出發前話過，巴黎鐡塔可以唔去，但一定要去老佛爺朝聖喎，所以揀了間近老佛爺的酒店Hotel Darcet，步行距離只20min。

巴黎老佛爺百貨公司(Galeries Lafayette Haussmann)

Shopping我一向嘛嘛哋，所以行吓行吓又行了去超市，又買了些鵝肝醬，再行入些發現有Jamón Ibérico賣呀。

老佛爺賣西班牙黑毛豬火腿(Jamón Ibérico)專門店

有Tea Set食，一杯餐酒加一小碟Jamón Ibérico只收€15。如果㨂雜肉腸就€10。

Jamón Ibérico味道頂級，比得上西班牙吃到的。雜肉腸嘛嘛哋，小太熊唔肯食。

小太熊覺得Jamón Ibérico好好食，食吓食吓特然有位香港靚太問我好唔好吃，我梗實話實說啦，一個字Excellent講晒。靚太立即找職員講價，買晒全隻返屋企慢慢嘆，見佢咁豪，我同小太熊又忍唔住跟咗佢買了全隻火腿反屋企慢慢嘆。

原隻西班牙黑毛豬火腿(Jamón Ibérico de Bellota)重8kg – €700

買完火腿都八點幾了，個個都話唔想行，算了，去Hotel Darcet職員介紹的餐廳食生蠔。

法國餐廳Charlot Roi des Coquillages – 法國麵包蟹和生蠔都靚。

晚飯高峰時間都包場了，有古怪。

500ml新鮮Rosé(€7.8) – 價錢超平但一樣好飲。

免費小食 西班牙凍湯 – 番茄味濃，凍凍哋好醒胃。

我Order 1份3道菜的Set Dinner(€48) – 有6隻生蠔，焗海鱸魚和水果批。

小太熊就散叫 6隻Belon(€26.4) 和1隻法國麵包蟹550g(€21.2) 。

生蠔和麵包蟹都好靚呀！

Belon好正，蠔味金屬味海水味均重，肉質爽脆有口感。法國麵包蟹€21.2一隻好抵食味道亦好得，蟹膏爆滿全身，入口甘香Creamy，送酒一流。

主菜 焗海鱸魚 – 普通魚肉一塊，冇油香冇魚香，淡口過食齋。

甜品 士多啤梨批 – 士多啤梨清甜新鮮批底亦有質感，好味道。

食完飯21:45，原本想帶小太熊去巴黎鐵塔睇夜景浪漫吓，點知佢叫攰話唔去了，要返酒店瞓覺。。。。。吓！第一次來法國玩足12日都唔去巴黎鐵塔，小太熊真係另類，我細個去法國時剩係識巴黎鐵塔咋。

法國 初夏 – Day 13

今日要走了，08:30起身執嘢去機場，早到早享受。

小太陽的頭等登機証。

在機場禁區見到有“Laduree”，於是買了6件Macaron返公司做手信。

巴黎的國泰頭等及商務侯機室

侯機室要和商務人一起坐，而且裝修和食物都好渣。

全候機室最好只有呢支香檳

其餘食物只能說唔難食

12:45準時上機，空姐立即送上對拖鞋，換咗佢先。

再送上香檳和小食

小食係香濃的鵝肝醬，唔駛再同商務人Share，伙食都當堂高檔晒。

13:15起機了，天氣好到不得了。

15:00開飯了，又係美酒佳餚宴。

麵包籃 – 依然新鮮好食

魚子醬 – 伴香檳一齊食，外皮入口會慢慢溶化，魚油味出衆且不太咸，濃香幼滑。

帶子中蝦沙律 – 帶子和中蝦肉都很鮮甜，配上香檳，味道絕配。

西洋菜豬肉湯 – OK啦，唔知係咪鴻福堂啲包裝湯呢。

烤牛扒 – 叫5成熟卻整了9成熟，肉質唔括，味道亦講唔出個好字，太興肯定好過佢。唉！收人咁貴好心佢比和牛啦，最多咪講緊三舊水。

配牛扒的波爾多紅酒 – 試了多日酒，飲得出係€50以上的貸式，再高價就分唔出了，因為這個Group試得太少。

甜品 杏仁朱古力批伴雪糕 – 只係普通，晒了個胃的Quota。

甜品 紅荳沙 – 呢味又OK喎。

食飽飽要瞓了，唔係落機就冇精神返工。

法國 初夏 – Day 14(完)

一瞓就6個鐘，加埋時差，醒來已是第二日零晨了，隔一會又食早餐，唔肥就奇。

橙汁和水仙荼 – 行貨來的。

鮮焗吐司 – 加牛油蜜糖食，唔錯。

鮮果碟 – 水果幾新鮮

凍肉冷盤 – 全部火腿、芝士、麵包、菜和肉腸都好難食。

帶子蝦球粥 – 粥底合格，配料都鮮甜

港式奶茶 – 唔掂，用粉開的。

早餐比2011年時差了。

回到香港，天光了。

準時06:45降落，即刻要趕返工了。。。。如果係有錢濶少唔駛撈就好了。。。

返到屋企我和小太熊又要分工合作，我就執相整理好今次旅程的點滴，小太熊就預備下一次旅程。。。裝裝小太熊睇緊咩資料先. . . . 喎！

<<法國初夏 紫‧醉‧金‧迷(完)>>