消遙自在去 台灣(1) – 台北 士林夜市 • 十分 美味

台灣十分 春節放天燈

台灣小鎮 十分位於台鐵平溪線的中間位置，是一個很有特色的鐵路小鎮，小店都沿鐵路兩旁開設，當冇火車時，遊人都可以走到火車軌上耍樂、放天燈等等. . . 但每當有火車經過時便要立即走鬼，十分過癮。

今次已經係第4次遊台灣了，由於唔想重覆玩過的地方，所以決定到花蓮走一走，雖然這次 台灣旅程只有5天，仲係晚去早返，但行程都非常豐富架，都係日日由朝玩到晚瞓得5個鐘。這次計劃行程如下:

Day 1

乘19：30 – 21:10長榮航空去台北，再轉乘的士往士林夜市，入住 台北商旅官邸別館。晚上行 士林夜市至零晨，今晚瞓4hr。

Day 2

06:00起身執嘢，乘的士到台北台鐵站，乘火車往 十分。今天會沿平溪線遊覽 十分、菁桐、平溪和瑞芳鎮。晚上乘台鐵往花蓮。住 康橋大飯店(花蓮站前館)，在酒店晚飯，今晚瞓7hr。

Day 3

早上在酒店早餐後，到火車站旁租單車，09:00開始沿花蓮縣兩潭自行車步道，踩單車往壽豐鄉鯉魚潭，環潭一週後回到起點。全程約70km，需時9hr。

晚上在花蓮市掃街，住昨晚同一間酒店，今晚瞓5hr。

Day 4

早上在酒店早餐後，07:30至15:30包車一日遊，到花蓮縣豐濱鄉、瑞穗鄉和光復鄉，然後乘15:39火車往 台北。

晚上到台北市 等一個人咖啡，然後到 太和殿吃麻辣火鍋。最後乘的士往 桃園機場諾富特酒店Novotel Taopei Taoyuan International Airport。

Day 5

06:00起身，乘08:15班機返香港。

 消遙自在去 台灣 – Day 1

今日全日返工，放工後乘巴士往機場。

在候機室食免費晚飯，自從搬了新位後多了好多嘢食，今日唔算太多人。

好豐富呀，沙律腸粉魚蛋粉燒賣炒麵，仲有生啤任飲呀。

<<台北>>

飛機準時21:20到台北，但排隊30min才能入境，冇辦法啦，現在全世界都有蝗蝸了，唔羣起來咬人已經好好彩了。

10:05乘的士往 士林夜市旁的酒店，約42km車費NT1060，30min便到。

台北商旅官邸別館 – 位於士林夜市對面，行5min便到捷運劍潭站，位置一流。

雙人房(含早餐) 每晚HK$1037。

從酒店過條馬路便是 士林夜市了，跟着旅遊書的介紹逐檔試。

河粉煎(NT 25) – 外皮係米粉搓製韌韌哋，冬菇豬肉餡咸咸哋，平平哋幾抵食啦。

丞祖胡椒餅(NT 45) – 用瓦缸慢火烤焗而成，外皮鬆脆，胡椒豬肉餡料充滿肉汁，新鮮熱辣很好味，值得一試。

食完2檔小食後進入大街，唔算很多人。

入到 新士林市場，小太熊話要食水果，便買了2嚿仔菠蘿比佢食，收我成NT 100，都好貴吓，但係又甜又多汁，都OK啦。

可惜今日假期，新士林市場B1地庫的美食攤檔唔開啊，食唔到忠誠號蚵仔煎。

很多遊戲檔攤，但唔多人玩，唔夠熱鬧。

新士林市場旁邊是 慈誠宮，今日香火鼎盛啊！

小太熊見慈誠宮外有條人龍，決定試呢檔 阿輝麵線。

阿輝蚵仔麵線(NT 30) – 像碗仔翅湯底加上麵條吃，蚵仔很少，但幾好味。

個個買完麵線便坐在慈誠宮外吃。

沿路全是地道小食，要精心揀選唔好浪費Quota呀。

冰餹葫蘆 – 外觀非常靚的小食，但我忍住口。

爆漿麻糬車輪餅(NT 15) – 十分懷舊的小食，以前香港都有街邊小販賣的，而且好好味。呢檔餅的外觀和香味滿分，但入口太糊口，冇乜蛋香，紅豆唔係靚貨，味道中下，勝在夠平囉。

舊街仔檸檬愛玉(NT 35) – 愛玉晶瑩清涼嫩滑爽口，酸酸甜甜我最鐘意飲。但比不上在阿里山、奮起湖和高雄飲過的愛玉。

路過這小炒店 順來十全排骨，諗住入去食蚵仔煎，但佢落單非常混亂，等了30min都唔煎比我哋但就煎晒比遲來果的人，最後只食了碗羊肉便走了。

十全羊肉(NT 90) – 夠羊味，好食；蚵仔煎(NT 50) – 冇得食。

上海生煎肉包(NT 12) – 肉餡料充滿肉汁，包皮質感唔錯，味道中上。當然比唔上 上海舒蔡記的爆汁生煎包啦。

鐵板蚵仔煎(NT 60) – 只係普通，平平哋試吓啦。

返酒店沖完涼瞓落床都02:00了，今晚只能瞓4hr。

消遙自在去 台灣 – Day 2

06:00起身執嘢走，酒店早餐07:00才開始，今日要趕火車，食唔到酒店早餐了。

剛出酒店門口便有的士，直往台北車站只需10min，車費NT 195。

台鐵 台北車站 – 這車和高鐵混合使用，轉車很方便。

台北車站大堂古式古鄉，台灣的保育工作實在非常出色。

台北往瑞芳的車票，可在自動售票機或窗口買票。

台鐵區間車 – 全車自由席，由台北往瑞芳要50min。

<<瑞芳>>

08:25到達瑞芳車站，先寄存好行李，再在小鎮行15min。

瑞芳鎮的早市都唔冷清，街上很多地道小食一早便開檔。

平溪線一天火車票(NT 64)，可以一天無限次搭火車。

去<十分>的火車準時在09:03開出。

沿途會經過火車橋和吊橋，風景好靚。

<<十分>>

進入小鎮<十分>，火車緊貼民居地進入小鎮。

火車準時09:30到達<十分火車站>，很有鄉村感覺的小火車站。

十分幸福車站內的 幸福郵筒

山豬肉香腸(NT 40) – 夠肉味還帶輕微酒味，烤得好香好好食。小太熊最初話唔食的，但我買了之後佢都食了半條。

小太熊話我未比早餐佢食所以好肚餓喎，便入去這麵店再食。

貢丸米(NT 50)；雲吞麵(NT 50) – 兩碗都幾好食。

十分火車站旁的 靜安吊橋

很多人在吊橋上掛上寫滿願望的竹筒，新年吖嘛。

<我要真普選>真係無處不在啊！我又要我又要～

十分老街一早已經很熱鬧了，鐵道兩旁很多天燈店，不斷有人放天燈，來個新年祈福呀。

行過這間<走味的咖啡>見佢門口對公仔咁靚環境唔錯又冇乜人，便入去嘆返杯Enjoy一吓。

薑母茶(NT 120)   普通薑茶一杯，當買個位休息吓啦。

嘆完茶，沿着路牌慢慢行30min去 十分瀑布。如果夠薑，可以在大華站落車在鐵道上行10min便到，近好多。

十分瀑布   這瀑布都唔細，幾值得一遊的。有吹水佬話佢係台灣尼加拉瓜大瀑布喎，外形都有些似樣。

回到<十分老街>時已經人山人海了，相當熱鬧，很有新年氣氛。

為食的小太熊又再出動，虱目魚丸2粒賣NT 10，每人一粒。

輪到我哋放天燈了，每盞NT 150，自己寫好字之後職員會協助㸃火和放燈，仲會幫人客影很多相，好抵玩。

寫好願望了，職員替天燈㸃火，然後幫我們影相。

帶着今年的願望 成功升空了....

冇病冇痛，唔洗㸃做，大把錢洗，食得招積，住得舒適，食極都咁廋，小太熊大晒，小太熊永遠是對的，我愛小太熊10000年....

冰鎮鴨翅(NT 35)  味道唔錯架，勁抵食。

之前來了台灣3次但小太熊死都唔肯試的台灣人氣小吃<大腸包小腸>，我決定自己買一條食哂佢。

大腸包小腸(NT 60) – 好好味呀，原來大腸係糯米腸，小腸係山豬肉腸，爽些酸菜一起吃好正架。

小太熊見我食得咁開心又試了一啖，跟著分了我足足半條添，真係...十分為食。

用了2.5hr遊完十分了，但唔夠時間去煤礦場，去埋要多1.5hr。

乘12:42-13:00的火車往菁桐。

補充資料 :

1.        長榮航空 香港來回台北桃園每位HK$2503。

2.        百年HK$1 兌NT3.93。

3.        台灣機場用美金換錢最着數，USD1兌31.185，等於HK$1 兌NT4.02。

4.        桃園機場乘的士往台北士林夜市約30min車程，按錶收費NT1060，已包括假日附加費。

5.        士林夜市乘的士往台鐵台北站約10min車程，按錶收費NT195，已包括假日附加費。

6.        台鐵平溪線全日票每位NT64，台鐵台北站有售。

7.        台鐵台北站往瑞芳約50min車程，每位NT49。

8.        瑞芳車站有行李寄存，每件NT50，但必須晚上20:00前取回。

---待續---