日本 • 草津 周末悠行(1) – 輕裝漫步 輕井沢

日本東京近郊高地 輕井沢

輕井沢(Karuizawa) 位於日本本州的群馬縣和長野縣交界處海拔1000m的高原，氣溫較為清爽，是日本人的避暑勝地。區內有大型購物中心、特色酒店和美食街，從東京前往只需要70~80min火車，因此吸引不少喜歡嘆酒店和濕平的人士到來朝聖和渡假，每逢周末和假日便人山人海加塞車。

日本‧草津 周末悠行 – 序

今次的日本旅程嚴格來說其實只有2日1夜，星期六零晨機去東京星期日夜機返香港，是我咁多次坐飛機的旅程中最短的1次旅行，是小太熊決定要去咁短的。今次會乘 香草航空，星期五放工後先回家沖個涼瞓3粒鐘，瞓夠才飛的去機場。

日本‧草津 周末悠行– Day 1

Plaza Premium Lounge – 入到禁區已經是零晨時分，候機室冇人排隊，可以輕鬆地入地食完嘢才上機瞓覺。

零晨時分沒有魚蛋粉吃了，只有杯麵，不過對這些免費嘢唔會有咩要求了。

上到機立即乜都唔理便瞓覺，飛機準時02:00起機。

很快就飛到東京上空，日出了。

<<東京>>

07:30到達成田機場Terminal 3，今次入境不太多人，很順利。接著行20min到Terminal 2的火車站買車票。

JR East Travel Service Centre – 位於成田機場Terminal 2，開早上08:30，行到去啱啱開門。這𥚃可以買到JR TOKYO Wide Pass (3-Days東京近郊)。

JR TOKYO Wide Pass (3-Days東京近郊) – 每張￥10000，只限國外遊客，可以即時免費預訂埋 指定席，可以乘坐由 成田機場去到 輕井沢的JR。

出完車票後，先乘JR從機場去 東京駅，車程60min。

10:32在 東京駅轉JR新幹線往 輕井沢，車程67min，這程車的指定席Full了，只能坐自由席，但是非常多人，遲些排隊都上唔到車，好彩剛剛有位坐。

牛奶(￥157)；飯團(￥150) – 在成田機場火車站7-11買的，牛奶香味濃郁，飯團的紫菜都很新鮮。

<<輕井沢>>

11:39到達 輕井沢駅，天氣很灰而且還不斷落著毛毛細雨，心情都灰埋，難得週末來這裏2日都要落雨，唔通連個天都唔鐘意我？

我就冇乜心機，不過小太熊就很得戚地啍歌 :「在毛毛夜雨裡 顯得一片慘淡 重讀你的信裡 覺熱情未冷 信中你聲聲說再會. . . . . .」。

小太熊Book了酒店的Suttle Bus 13:15送我們去 草津的酒店「草津温泉 湯宿季の庭(ときのにわ)」，今天只有90min時間在 輕井沢觀光，只能食啲嘢再逛逛商場。

唔理個天鐘唔鐘意我了，先去美食街擦餐勁嘅。

築地ハレの日 – 小太熊Target了這間，碰正午餐最多人時間，排了十幾人，等了20min才有位。

山形縣 純米大吟釀(￥972) – 酒質都幾醇厚，酒味濃時又幾易入口，送刺身很夾。

三色吞拿魚飯(贅沢まぐろ丼)(￥2895) – 吞拿魚很新鮮，拖羅入口即溶魚油香味濃郁，連飯都軟熟有飯香好好食。

海膽三文魚子飯(うにいくら丼)(￥2570) – 三文魚子甘香脆口咸味適中，海膽很新鮮，味道甘苦中偏苦，餘韻不及馬糞海膽，但亦算是高品質的海膽，好正。

火炙海膽(¥756) – 試完新鮮海膽覺得好正，但冇得散叫的。於是叫了這 火炙海膽，但是唔新鮮唔好食的，早知唔叫。

食完飯還有少少時間在購物中心兜個細圈。

 購物中心內的湖上餐廳「晴れた空のテラス」，可惜今日沒有晴空，只有灰灰的天。

餐廳爆滿了，唔訂都幾難有位，不過小太熊冇預响度食，只是進來看看。

餐廳外有很多零食賣，一場來到便幫襯吓啦。

買了一罐 輕井沢啤酒，不過最後都係冇Quota飲，留了在酒店的雪櫃。

長野縣水蜜桃 – 買了一個，很清甜多汁，不過在香港HK$35都買到差不多品質的，不用老遠跑到這裏買。

酒店的巴士13:15在火車站附近開出，要70min才去到 草津温泉 湯宿季の庭(ときのにわ)。

<<草津>>

草津温泉 湯宿季の庭(ときのにわ) – 外觀古式古鄉的温泉酒店，小太熊話平日平一倍架，今天是周末所以貴一倍，應該改名叫「貴の庭」。

酒店要15:00才可以check in，現在還有30min冇咩好做，啱啱又有班酒店的巴士去 草津溫泉街，於是便上車出去行街先。

酒店去 草津溫泉街的免費接駁巴士，約每1小時1班。

草津町温泉資料館 – 巴士車到這裡，行3min便到 草津溫泉街的中心「湯畑」。

這裡滿街都是温泉饅頭，有些可以免費試食添。

草津溫泉街的中心 湯畑，這裡有日式建築，也有歐陸式的建築。

湯畑 是温泉街中心的溫泉，不過只可遠觀而不可褻玩焉。附近有大量食店，乜都有得食。

平野家 – 小太熊㨂的草津食店，專賣喬麥麵，佢話有啲Blog話好好食喎。

中午15:00還是全店滿坐，味道應該唔會差啦。

群馬縣野菌天婦羅冷烏東(舞茸天ざるうどん)(￥1600) – 野菌的菌味很濃郁而且爽口大件，幾好吃，不過天婦羅的炸粉太厚同埋唔夠鬆化，扣晒分。冷烏東只算一般品質，和四國的烏東完全冇得揮。

野菌蝦天婦羅冷蕎麥麵(天せいろそば)(￥1950) – 炸蝦的味道合格，有蝦味，不過炸粉始終太厚大大減分，蕎麥麵流到嘔，麵質甚差，直情是難食。

食完咁流的一餐後，繼續四圍試。

見到隔離間饅頭店有人排隊買即蒸溫泉饅頭，便PatPat痕買個試試。

豆沙溫泉饅頭(￥120) – 皮非常薄，豆沙餡料都有豆香，味道唔錯但質感較弱。

光泉寺 – 在 湯畑温泉旁邊的傳統日式佛寺。

草津長壽店 – 是區內的老牌溫泉饅頭店，每逢有人行過，店員便立即送上熱騰騰的饅頭和熱茶給路人，完全免費，我和小太熊每人拿了一個。

長壽店溫泉饅頭 – 比剛才的饅頭好食，很有質感和咬口，甜味亦啱啱好，品質很高的温泉饅頭。

溫泉蛋 – 呢味太高膽固醇，唔試了，要慳住啲Quota。

小太熊還想試埋這兩間區內名店「靜貴娘」和「燒肉 吾妻」，今天都是16:00才開始營業。

「靜貴娘」是串燒専門店，16:15去到已經排了幾十人，老闆唔憂做，燒得極度慢，睇怕最少要排個幾鐘才買到，唯有下次至食了。

「燒肉 吾妻」就冇咁旺，不過20min後亦冇位了，星期六真係旺場。

烏龍茶(￥216)；生啤(￥648)

和牛舌 国産タン塩(￥2052) – 份量很細，質感很怪，牛香和牛油香都是一般，味道比不上以前在日本吃的牛舌，但是價錢卻是最貴，唔抵食。

厚切國產A5和牛(厚切カルビ)(￥2376) – 肉質很腍牛肉味OK，不是十分油口，不過只有約100g，這價錢太貴了。

這裡最大好處是用炭火燒，令牛肉都帶有炭火香味。

群馬縣野菌()(￥540) – 和剛才的天婦羅同種，菌味濃郁帶點微苦。

儘管味道不算是頂級，但賣相完全唔失禮的。

食完牛肉燒啱啱趕到17:10回酒店的巴士，返到去可以Check in了。

小太熊Book了「季の庭」最平的房，但房內的露台都有温泉浴桶，都好貴架。

房間外的日式走廊。

雙人露台房(連早晚餐)每晩￥74000 – 以這種價錢而言，房間的面積非常細小，露台的温泉浴桶也很細。

長野縣 巨峰提子(￥380) – 剛才在溫泉街買的，現在先嘆幾粒，宵夜再食。

房間送的甜點心，味道都好的。

酒店在18:00~19:00有免費茶㸃供應，過去八一八有咩食先。

點心有 菜肉包、九菜粿和咸蒟蒻，味道幾唔得掂。

小太熊話喎，呢間酒店和Dormy Inn是同集團的，所以有好多免費嘢，包括每天都送免費的 拉麵宵夜。

食完Tea去浸溫泉了。。。

  

補充資料 :

1.)      香草航空 香港來回東京成田機場，每位HK$1240。

2.)      ￥100 兌HK$7.22 (永恆找換公司)。

3.)      2人3天保險費共HK$242。

4.)      東京 JR TPKYO Wide Pass 3天火車證每位￥10000，可以免費預訂指定席，只是一程從 成田機場到輕井沢的火車已經差不多返本。

---待續---