2018年5月17日

馬來西亞 避暑 • 山城(1) – 怡保 吹不散的舊情懷

馬來西亞怡保 街頭壁畫環保叔叔
20119月的中秋節第一次到訪 怡保 這大馬舊山城,感覺好像回到30多年前一樣,舊街場內老牌茶室的白咖啡 和怡保三寶 芽菜··沙河粉令人回味多年。6年後的今天再來到 怡保,市內的老店舊物沒有太大改變,只是街頭上多了很多和檳城一樣的旅遊元素街頭壁畫,令這本來平平無奇的小城可觀性大増。


馬來西亞 避暑山城 – Day 1

從日本回來之後2星期,又出發去大馬了,因為小太熊話今年未去過食榴槤,佢見機票又唔太貴,試過在香港每人四舊幾水幫襯 榴槤BB吃馬拉榴槤放題的品質又不知所謂,所以一定要去一次喎。

今天乘Air Asia夜機,要返全日工,放工後便直接坐地鐵去機場,在機場候機室食免費晚飯。

Plaza Permium Lounge近海關那間Plaza Permium Lounge隔離開了一間新的,食物比較多,有生啤和港式奶茶,而且冇乜人知,唔需要排隊。

隻機Delay35min21:40才起機,機司嘆慢板沒有追返時間,今晚要瞓少半個鐘了。



馬來西亞 避暑山城 – Day 2
<<吉隆坡>>
飛機順延了35min,至01:25才降落,好彩入境時冇乜蝗蟲,01:55已經成工入境。行到去Taxi Coupon Booth時發現有很多Uber車,而且不用加50%的士深夜附加費,便決定Call Uber

10minUber車便來到,02:10開車,直接到Alor Street食宵夜,57km路程收費RM 72.8,已經包括公路費。

02:55去到Alor Street了,還有約一半食店營業中,不過都開始慢慢收舖了。


「黃亞華小食店」依然唔少人,次次來到吉隆坡都想食佢的 炭烤雞翅。


廚師咁夜仲不斷燒雞翅,炭火濃煙四圍飄,在腥港一定被拉人封舖,所以腥港的食店沒有可能有咁好味的 燒雞翅。


話梅吉仔冰(RM 3.5)用馬拉吉仔鮮榨的,酸酸甜甜味道非常咁好,只有在馬拉才可以飲到。


黃亞華招牌燒雞翼(每隻RM 3.3)皮脆肉嫩味道頂瓜瓜,幫襯了3次也完全沒有跌Watt,十分難得啊,下次一定再食。


黃亞華小食店對面有檔榴槤,整條街收剩佢一檔榴槤,不過這檔呃秤唔老實,認住綠色衫這個呃秤衰様啦。


小太熊決定要食一個,榴槤沒有標價的,我過去問問價,佢話貓山王榴槤1kg - RM 120XO榴槤1kg - RM 45。咁我要XO啦,一樣咁好食,㸃知個呃秤佬話:XO唔靚喎,開咗唔靚就唔好啦,食貓山王啦,明天星期六仲貴呀。」

唓!唔靚又攞出來賣?覺得佢唔係好老實,唔想幫襯佢,但小太熊緊持一定要食,於是叫佢㨂個靚的,㸃知條賤人㨂了個爛殻的想開,好彩我們立即叫停:「呢個爛架喎。」

賤精:「冇爛架,開咗見爛換過比你。」

啋你都有味啦,我即刻㨂了個約1kg的貓山王,就要呢個。

佢一秤,這麼細的榴槤居然有1.63kg,肯定係神仙磅啦,我食榴槤食了咁多年重未估錯重量,肯定佢呃秤,想唔要了,但小太熊話要喎,一場咁遠飛來,唔食可能今次旅程都食唔到了。


貓山王榴槤(RM 196)外皮乾爽脆口肉質很creamy,榴槤香味甜中帶甘苦,齒甲留香,是高品質的榴槤,只有檳城的榴槤能把它比下去,在香港有錢都買唔到。

雖然這榴槤好好食,但賤精話佢重1.63kg,我估計頂盡只有1.1kg,而且只有2舊肉加一小件發育不良的榴槤肉仔,比一般的4件肉少了一倍,上次在星加坡開了個類似的少肉貓山王,老細都立即講唔好意思,免費送返個同樣重的D101給我,賤精見這麽少肉居然仍不斷話抵食,真係抵佢食鹵味。我食完之後頂住條氣,始終被人當傻仔的感覺很差,真的非常差,差到領願唔食算了。

今晚的酒店就在 阿羅街附近,從黃亞華小食店行3min便到。


Federal Hotel小太熊貪佢近 阿羅街,方便佢食榴槤和雞翼。


雙人房(不包早餐)每晚HK$306,冷氣很強,亦算整潔。

沖完涼執吓嘢已經04:30了,只可以瞓3hr,好彩在飛機叫做瞓了4hr,頂得順唔算十分辛苦。



07:15起身Check outCall Uber直接去怡保,約200km路程車費只是 RM 242,但是我上車後司機話要我多附RM 100公路費。

唓!咁咪仲貴過的士?其實公路費只是RM 20,條友唔想接我張order又唔立即Cancel佢,浪費了我成15min等佢,比佢一粒星,都費事問小太熊意見。

行出酒店門口便有幾部的士等客,司機話從吉隆坡去 怡保的Government PriceRM 280,包括公路費,這個司機就老實啲,立即出發。

從吉隆坡去 怡保的士,收費RM 280 (包括公路費)

的士10:30去到 怡保舊街場了,始終比最早的08:30火車早到了1hr,算是用RM 200買了1hr,抵買,


<<怡保>>

南香茶餐室 和對面的「新隆源茶室」同樣是怡保舊街場的人氣老店和白咖啡的起源地。


店內長期滿坐,但是都不難搵位。


怡保白咖啡(RM 1.9)咖啡味道香醇濃厚,配上鍊奶的甜味更能帶出咖啡的香味,和新隆源茶室的白咖啡一樣咁好飲,我在香港連Pokka咖啡都唔飲,但都覺得這杯白咖啡好正。


酥皮蛋撻(每件RM 2)酥皮鬆化但唔覺得太肥滯,蛋味就一般,是個好食的蛋撻,不過很細件,唔平。


咖央多士(RM 2)麵包烤得異常鬆化但又保留了麵包應有的質感,口感正到冇朋友,咖央醬就欠了些椰香,扣了少少分,不過都好好食了,下次再食。


南香茶餐室門口擺檔的 椰香粟米班㦸,香噴噴很吸引。


椰香粟米班㦸(RM 1)外皮酥脆有蛋香,加了大量椰絲和栗米溶,味道好而且口感一流,小太熊話呢件餅最好食。


食完早餐後在 舊街場附近逛逛,這裡和6年前冇乜大變啊。


在檳城畫街頭壁畫的大師早幾年受怡保Old Town White Coffee的邀請,在怡保舊街場畫了多幅壁畫,成為現在遊怡保必到的景點。

馬來西亞怡保 街頭壁畫 大蜂鳥


馬來西亞怡保 街頭壁畫 五包越喝越少的咖啡烏(即是加糖不加奶的咖啡)


馬來西亞怡保 街頭壁畫 紙飛機


馬來西亞怡保 街頭壁畫 歎白咖啡的老人


馬來西亞怡保 街頭壁畫 採礦鐵船


除了大師的作品,街頭上亦出現了很多另類的壁畫,為這舊城増添了不少生氣和活力。


舊區內的分類廣告都相當抵死玩嘢。


馬來西亞怡保 街頭壁畫 小咖啡烏


這杯地上的咖啡相當有立體感


在舊街場行了一轉,早餐已經落格了,可以食午餐。

天津茶室 怡保最人氣的茶室之一,這裡的雞絲沙河粉是全大馬最美味的湯河粉。


坐無虛席,比南香茶餐室更多人。


雞絲沙河粉(RM 6)河粉是用怡保獨有的地下水製造,質感異常幼滑,湯底用大量蝦殼熬製,鮮味無窮,絶頂好味的河粉,只是雞絲和蝦肉的味道均偏淡,失色了少許。


怡保芽菜(RM 4)用怡保獨有的地下水種植,肥大清甜爽口,令人食到唔停得口,和其他地方的芽菜完全唔同。


燉蛋布丁(RM 2.8)香滑有蛋香,高水準的燉蛋布丁;吉仔冰(RM 2.1)沖得太淡,只是普普通通。


二奶巷 在天津茶室對面,巷內全是為遊客而設的紀念品和小食商店,是近年才新發展的。


沿著舊街場行去 老黃芽菜雞,途經這條小橋。


過橋後又見到大量另類的壁畫,都很地道民生。


奇峰豆腐花 怡保的人氣小食店,小太熊的Target,經常排了幾十人,今次好彩只排了幾個人。


豆漿(RM 2.5)豆腐花(RM 1.5)豆漿的豆味十足不是太甜,濃度啱啱好。 豆腐花用怡保地下水製造,不加石膏粉便能擬固,幼滑可口豆味香濃,小太熊比10Like,食完想要多碗已經排了幾十人,因為趕時間要下次才有得食了。


怡保 打捫柚 6年前要賣RM 80一個的,今天RM 40便有了,平了很多。


鴨仔燈鹹涼茶(RM 0.8)咸咸濕濕味道幾過癮的,是怡保一代名物,老板成日被傳媒訪問和上電視架,佢一定係飲得呢杯咸嘢多,樣子和6年前完全冇變。


飮完涼茶便Call Uber 金馬崙高原,90km距離收費RM 94,但司機又拒載,話要收Double至肯去喎,又迫我比佢一粒星。

接著問了一架的士,馬拉司機話要收RM 180,和我預計的價錢有些距離,便決定問多幾架車。

跟著問了架華人司機,佢都話價錢要RM 180,而且佢嫌遠唔去添,佢仲話15:00有班巴士,教埋我去坐巴士。

想話再問多架車,收RM 180都殺了,㸃知忽然冇晒的士......等呀等呀,又見返個華人司機架車駛過,有個客坐了在車頭,佢停了架車在我前面話:「上車啦,車埋你去金馬崙高原啦,啱啱有人包車去,順路兜埋你地啦,唔收錢呀。」

我:「唔該晒,我比返RM 100車錢你吖。」

司機 : 「唔洗了,見順路啫,要比求其比RM 8我啦。」

以上是廣東話對話,完全沒有言語不通的誤會問題。

上車後司機便又馬雲又黃之峰逐個品評吹個不停,的士行了約20min,就這樣被車去了......怡保的長途巴士站 >___<

司機話:「到啦,行入去裡面有車票賣,15:00有巴士,去到金馬崙都係17:00左右。」

頂!真係.....簫都比佢吹攣。

今天原本打算16:00前要去到Cameron Highlands Resort歎個高貴的High Tea,現在被這司機浪費了40min,可能食唔到Tea了。巴士站旁邊有的士等客,司機都是企硬要RM 180才肯上金馬崙高原,我信這是公價了,立即上車起行啦。

14:20乘的士出發,因為司機要兜路去入油,加上在金馬崙高原塞了40min車,要17:00才能去到Cameron Highlands Resort


<<金馬崙高原>>

Cameron Highlands Resort金馬崙高原的住宿首選,單是外觀已經是一憧古舊的英式建築。


Jim Thompson Tea Room酒店內充滿英倫貴氣的酒吧,有現場鋼琴演奏,原本在這裡High Tea的,現在太夜唔食了。


Check in時送的Welcome Drink是暖菊花茶,都可以在Tea Room歎一會才上房。


雙人房(連早餐)每晚RM 762小太熊話因為今天是星期六所以至咁貴,平日平好多的,而且連續住2晚會送SPA和燭光晚餐,抵好多架。


房外有個小露台面向哥爾夫球場,不過隔了條馬路。


在房內休息了一會兒,返落去Jim Thompson Tea Room慢慢歎。


因為就快食晚飯了,所以決定唔食Tea,飲杯 金馬崙高原出產的茶算了。

熱情果茶(每壺RM 15)茶味渣到暈,而且飲到條脷很鞋、是劣質的茶葉,當買個位舒服地坐吓。


坐了一會兒,酒店有位職員話今天酒店為住客在晚餐前供應免費的小食和餐酒及啤酒。嘩!Check in時職員又唔講,早知RM 30茶錢都慳返,好彩冇叫Tea Set啫。

我要了杯 紅酒,自己Order每杯要收RM 35,現在免費任飲,不過唔貪心的小太熊唔要了,佢飲茶。


免費小食的味道OK啦,用來送酒都唔錯的。

金馬崙高原是一處氣候怡人的的地方,只是今天間中下毛毛雨,天色總是灰灰暗暗。




補充資料 :

1.)      Air Asia香港來回吉隆坡(不包括寄行李和餐飲)每位 HK$1947

2.)      RM 1 = HK$1.88 (永恆找換公司)

3.)      24天保險費共HK$200

4.)      深夜在 吉隆坡國際機場KLIA2 Uber往吉隆坡市中心,58km路程車費RM 72.8,已經包括公路費和不收50%深夜的士附加費,比的士平差不多一倍。

5.)      吉隆坡市中心乘的士到 怡保,200km路程公價RM 280 (已經包括約RM 20公路費)

6.)      怡保市乘的士往 金馬崙高原,90km路程公價車費RM 180,在怡保的長途巴士站有價目表貼在的士站附近的當眼處。





---待續---

6 則留言:

  1. 黃亞華招牌燒雞翼. Recall very delicious. Ipoh appears worth visiting and will be included in my travel wish list next time.

    回覆刪除
    回覆
    1. 這隻燒雞翼食咁多次還是一樣咁好味,很難得啊。怡保真是很值得去的,除了好食,舊城外圍的石灰岩洞也很精彩。

      刪除
  2. 未去過怡保, D 畫一樣咁靚

    回覆刪除
    回覆
    1. 怡保的壁畫和小食都比得上檳城,唔錯架。

      刪除
  3. 行程好豐富緊密,比我一定熊貓眼,哈哈!D司機同老闆都係騙子,好驚呀!怡保未去過,從吉隆坡坐的士去要幾耐?

    回覆刪除
    回覆
    1. 可以請少日假,值得呀。
      去怡保足足有200km,要2.5hr的士才去到。
      果檔榴槤真係衰,以前在阿羅街幫襯過另一榴都老實的。

      刪除