馬來西亞 避暑 • 山城(完) – 英倫貴氣 金馬崙高原

馬來西亞金馬崙高原大茶園 BOH Tea Centre

馬來西亞 金馬崙高原 位於怡保市外約90km的山區，海拔約1500m，是從前英國人的避暑山城，也是馬來西亞人現時最大的避暑勝地。高原內遦下不少古舊的英式建築物，其中最擁有英倫貴氣的Cameron Highlands Resort便是從一幢英式舊建築物改建而成。每逢周末假日，大量馬來西亞人便會蜂擁而至，令這裡唯一的山路大塞車。

馬來西亞 避暑‧山城 – Day 2

<<金馬崙高原>>

繼續上一篇Day 2行程。

在Cameron Highlands Resort的Tea Room坐到19:00左右，便Book了20:30在酒店的Dining Room食晚飯，飯前出外逛一逛這裡的夜市。

Smokehouse Hotel & Restaurant – 位於Cameron Highlands Resort附近的另一幢英式古宅酒店，如果多一天時間，一定會來食個下午茶。

Night Market – 人山人海，從Cameron Highlands Resort行15min便到，賣的都是地道的食品和日用品，超過九成半是本地人來濕平。

金馬崙高原產 士多啤梨(每份RM 10) – 士多啤梨味算香，偏酸，可以一試。

烤雞翼(每隻RM 3) – 味道一流肉質就中上，部分位置烤得太燶，整體上都很好味。

金馬崙高原產 粟米(RM 4) – 超脆超甜的極品粟米，檔主話只有金馬崙高原產的 粟米才會這樣甜，佢話有些賣得較平的是怡保產的粟米，味道差很遠。

金馬崙高原產 海底椰子汁(RM 3) – 得個名，椰子味唔香又唔濃，太甜唔好飲。

逛完夜市慢慢行返酒店，啱啱夠鐘開飯。

Dining Room – 酒店的餐廳，早餐和晚餐都在這𥚃食，情調一流但食物一般，而且很貴。

澳洲紅酒(RM 35) ; 無糖百事(RM 10) – 紅酒和剛才送的那杯完全一樣。

忌廉雜菌湯(Porcini Mushroom Chowder Soap)(RM 35) – 菌味很濃郁好好飲，伴湯的脆脆是魷魚來的，很鬆脆魷魚味很濃。

法式洋蔥湯(French Onion Soap)(RM 35) – 湯底和洋蔥都很甜，不過用了大量牛油焗的酥皮太Heavy，飲到好滯。

炆羊腿 (Lamb Shank)(RM 90) – 勁大份羊腿，羊肉很腍但羊肉味不是十分濃，過得去的一度主菜。

肉醬焗意大利麵(Oven-Baked Lasagna Pasta)(RM 70) – 味道調較得唔差，不過實在是太多茄汁肉醬和芝士，太少意大利麵，攪到食剩了一半已經食唔落，太滯。

今晚間房好古雅，氣氛令人瞓得很舒服。

馬來西亞 避暑‧山城 – Day 3

今天小太熊打算09:00包部的士在附近一日遊，然之後原車返去怡保，再轉乘19:15的火車返吉隆坡。小太熊很勤力，佢一早已經睇了很多Blog，知道在 金馬崙高原包的士的公價是每1hr - RM 30，又知道在距離酒3km的小鎮Tanah Rata有的士。

  

08:00到Dining Room食早餐，是半自助餐，嘢食唔算多。

每人可以Order一份雞蛋，肯定夠飽的，味道亦唔錯。

食完早餐便到酒店Reception搵車，職員相當helpful，立即幫我打電話問車。佢報價話去Tanah Rata就RM 10 ~ 15，包的士就每1hr - RM 30 (最少包3hr)，原車繼續去怡保就要RM 240。

不知是否今天是星期日所以去怡保要收RM 240，但是比公價RM 180貴太多了，像是被人搵笨，於是決定先包車每1hr - RM 30，玩完才決定是否去Tanah Rata搵車或是再和司機講價。

司機一Call即到，凖時09:00已經可以上車。

酒店Call了這部Premium Taxi，不知道是否普通細的士才收RM 180，這部車要收貴啲呢。

上車後，小太熊把今天預算要去的地方話比司機知，包括BOH Tea House、Mossy Forest、Big Red Strawberry Farm和Cactus View Restaurant，點知司機話現在的價錢(1hr - RM 30)唔包括去Mossy Forest，因為那是條彎彎曲曲的山路，要去便要加RM 130，又話Big Red Strawberry Farm和Cactus View Restaurant唔順路，今天是星期日會大塞車所以不適宜行回頭路。

最後我決定加錢去埋Mossy Forest。今天真的很塞車，從酒店到BOH Tea Centre 只有9km路程，但足足用了1hr才去到。

  

沿途經過很壯觀的大茶園。

BOH Tea Centre – 位於大茶園的高處，這裡有製茶廠和品茶店，都幾迫人。

製茶廠的規模很細，冇咩睇，和斯里蘭卡山城的大型茶廠相差甚遠，而且這裡出品的茶葉都很差，完全唔好飮。

BOH Tea Centre的品茶廳 – 位於茶園的高處，景觀開揚，設計很有心 思的建築。

這麼早已經差不多冇位了，好彩早到，相信中午的人潮更可怕。

小太熊好叻，霸了個戶外的露台位。

這裡的茶(每壺RM 4.6)就冇咩特別，很淡口，但芝士蛋糕就好出名，買了2件最特色的試一試。

Nasi Lamak Cheese Cake (RM 13.9) – 芝士蛋糕很有質感和芝士香味，唔太甜又唔滯，最古怪是鋪了辣椒碎、咸魚乾和咸脆花生在頂，咸咸甜甜味道混雜一起又幾過癮，是必試之選。

Cendol Cheese Cake (RM 13.3) – 椰子味香濃的蛋糕，好食。

望著這個大茶園View食蛋糕，胃口都好啲。

接著順路去Mossy Forest，其實部車只是行多來回共8km的山路，而且唔係難楂，收多RM 130有些過份，可惜冇時間去Tanah Rata搵車，問多幾架便知有冇比人呃。

Mossy Forest的入口，從這起點開始行個小圈大約30min。

Mossy Forest內的植物又古怪又翠綠，自然程度比得上日本屋久島。

行完山林，往另一方向行600m，會去到一個遼望台。

電力公司Telekom Malaysia Berhad – 山上的另一幢芵式古宅。

Mount Brinchang Observation Tower – 殘舊的觀景台，好天氣時話可以望見怡保喎，不過唔係今日。

由於去Big Red Strawberry Farm要行回頭路很塞車，司機便車了我們去附近的士多啤梨園，都OK好食的。

Raaju’s Hill Strawberry Farm – 可以自己入士多啤梨園任摘，然後出去按重量比錢，每0.5kg - RM 30。

士多啤梨又大粒又紅都很吸引，味道酸中帶甜，都算多汁，好食過在香港買的美國士多啤梨，勝在夠新鮮。

很快便摘了很多，這裡剛剛0.5kg。

最後一站小太熊想食金馬崙高原的特色火鍋，不過去Cactus View Restaurant的回頭路又是大塞車，司機話「西洋菜谷」都有火鍋食的，於是順路去了 西洋菜谷。

西洋菜谷(Water Cress Valley)

西洋菜谷 其實是山谷中的幾塊西洋菜田，旁邊是餐廳。

2人前特色火鍋(RM 69) – 其實唔多好食的，只可以説唔難食，菜和肉都唔靚，西洋菜湯底就普通，只吃環境。

西洋菜密(每杯RM 5) ; 糖果小食(RM  4) – 小食是強迫要的，好難食，菜蜜就普通正常菜蜜味。

西洋菜谷(Water Cress Valley) – 食完飯可以落菜田參觀一下。

食完飯已經15:30了，從這裡回到Tanah Rata要塞多1hr，即是要比多RM 30司機，而且一來一回要塞多2hr才能回到怡保，於是比多RM 240叫司機直接車我們去怡保算了，司機最後只收少了半個鐘車錢，計了我6hr包車。

<<怡保>>

15:40從 西洋菜谷出發，沒有塞車，17:15回到怡保的「安記芽菜雞沙河粉」。

安記芽菜雞沙河粉 – 在老黃芽菜雞斜對面，同樣是怡保的名食店。

雞檔放在舗的正面，廚師們都斬個不停。

怡保有3大名物，就是 芽菜、雞和沙河粉，在這𥚃可以全部食齊。

1/4隻菜園雞(RM 16) – 雞肉很嫩不過雞味較淡，雞皮唔算肥而且很香口，加了秘製豉油一齊食都算幾好味 ; 怡保芽菜(RM 4) – 和天津茶室的芽菜一樣咁爽甜，但這裡加了大量糊椒粉返而奪走了芽菜的甜味，冇咁好；淨河粉(RM 5) – 河粉的口感比天津茶室更佳，不過湯底就差很遠，沒有蝦味；吉仔冰(RM 2) – 有水準，好飲。

西刀魚蛋6粒 (RM 1) – 爽口彈牙有魚味，勁正。

食完飯在附近行了個大圈想揾榴槤，但是最後都搵唔到，便慢慢行去火車站等上火車。

怡保火車站 – 是一幢舊英式建築物，現在好像已經改為平價旅館。

<<吉隆坡>>

火車19:15準時從 怡保開出，但回到吉隆坡就遲到了20min，21:57才到達 吉隆坡中央站(KL Sentral)。

小太熊坐火車時又話要食榴槤，決定去「SS2」食，那裡以前幫襯過，唔會呃人的。

步出 吉隆坡中央站之後便Call Uber，今次Uber坐地起價，從火車站去「SS2」只有11km路程便收RM 36，坐的士平好多囉。

在火車站買了的士Coupon，去「SS2」定價收RM 24，比跳錶貴了幾溝，不過唔駛驚被人兜路。

來到「SS2」榴槤檔了，比上幾年來時更加新淨和光猛。

這裡的榴槤名碼實價，而且唔會呃秤，開了唔靚伙記立即換一個，唔駛客人開聲，服務一流，賣的貨都是一流。

今天只有四款榴槤：

貓山王1kg-RM 98 ;

Jantung、XO和D88 每1kg-RM 55

Jantung 和D88都未食過，今次要了一個Jantung和一個XO。

  

榴槤Jantung (0.9kg - RM 49.5) – 很重牛奶甜味和酥味，外皮乾身肉質細滑如榴槤糊，偶然一啖會有㸃甘苦味，比第一晚的天價貓山王更好食，而且很多肉，足秤抵食。

榴槤XO (0.9kg - RM 49.5) – 甜度較低甘苦味濃，不同位置的甘苦濃度又唔同，每一口都有新鮮感，是榴槤中的XO。

食完榴槤Call Uber返「文華東方酒店」，今次價錢正常返，15km距離收RM 22。離開時特然狂風暴雨，攪到上車時濕晒身。

馬來西亞 避暑‧山城 – Day 4 (完)

去到「文華東方酒店」已經是零晨00:30，酒店位於雙子塔旁，位置唔錯。

雙人房(不包括早餐)每晚 RM 730

因為是貴酒店，沖完涼唔捨得瞓住，在房內飲杯茶上上網，攪到02:30才頂唔順要上床瞓。

早上08:30起身執嘢，跟著去酒店泳池游水。

泳池唔算話好靚，游了半個鐘便走了。

09:30在酒店Check out後，Call Uber去附近的「永興城茶室」，2.5km路程車費RM 4.5，我2012年來過，啲嘢好好味的。

黑仔呀，今天茶室無啦啦唔開門，只有 蛋撻(RM 0.9)賣，而且是凍的，和上次食熱辣辣的味道差很遠啊。

好彩附近還有「新峰肉骨茶」，這裡的肉骨茶不是頂級上等貨，但味道都好過香港的肉骨茶。

肉骨茶正宗空煲(RM 18.6)；彎刀肉骨茶(RM 16.4)；豆腐卜(RM 3.2) ；油炸鬼(RM 2.1)；白飯(RM 1.9) – 味道和星加坡黃亞細始終有段距離，不過都算好味啦，藥材湯很冶味，肉骨也新鮮有豬肉味，不過部分肉很鞋。

貓山王榴槤雪條(RM 6) – 是Potong出品，雖然貴但是非常正，榴槤味道香濃，如果香港有得賣我一定買。

食埋雪條已經11:00了，Uber又坐地加價，去機場要RM 95，比第一天深夜還貴27%，搭的士算了。

滿街的士，求其上了一部，我都未話去邊司機便起錶了，真係Good，去到機場只跳錶RM 75，再加RM 10路費，總共RM 85。

KLIA2的候機室 – 冇咩嘢食，只是坐位面向跑道，歎杯啤都幾好坐。

航機Delay了2hr，早知遲些才走，可以食埋在「新峰肉骨茶」斜對面，11:30才開門的「大樹頭蘇記」。

乘Air Asia，19:40回到香港，又玩完。

補充資料 :

1.)      Air Asia香港來回吉隆坡(不包括寄行李和餐飲)每位 HK$1947。

2.)      RM 1 = HK$1.88 (永恆找換公司)。

3.)      在金馬崙高原包的士，公價RM 30 - 1hr，最少包3hr，但出車前要講清楚行程，否則可能會像我那樣，上Mossy Forest要多收RM 130，唔知有無呃我。

4.)      從 怡保乘坐火車去 吉隆坡，每位RM 35，車程約1hr45min，建議早幾天上網買票，因為假日很Full。

5.)      從 怡保市乘的士往 金馬崙高原，90km路程公價車費RM 180，在怡保的長途巴士站有價目表貼在的士站附近的當眼處。但從 金馬崙高原去 怡保，司機堅持收RM 240，唔知係咪呃我。

6.)      從吉隆坡市中心「新峰肉骨茶」乘的士去KLIA2，跳錶RM 75，加RM 10路費，共需RM 85。

-----馬來西亞 避暑‧山城(完)-----