日本 • 草津 周末悠行(完) – 靈氣逼人 草津溫泉鄉

日本草津 西の河原露天風呂

草津溫泉 是日本三大溫泉勝地之一，位於 本州群馬縣，距離 東京需要大約2.5hr交通。草津溫泉街以「湯畑」為中心，名勝寺廟露天溫泉和美食街全部圍繞著「湯畑」，富有傳統的日本風格特色。

日本‧草津 周末悠行– Day 1

繼續上一篇Day 1行程。

<<草津>>

昨晚在飛機上瞓得唔好，跟著又要撲車搵食未停過，現在終於可以真真正正放鬆心情嘆一嘆了。Book了20:00在酒店「草津温泉 湯宿季の庭(ときのにわ)」食晚飯，食飯前可以浸浸溫泉先。

季の庭 的室內公用温泉「季の湯」。 今天全酒店的房間爆滿，估唔到溫泉會冇人，可能個個去晒食飯了，一個人包場，正呀。

岩盤浴 – 在室內溫泉旁邊的蒸氣浴室，可以瞓在石椅上蒸，要小心瞓著了被蒸熟。

季の庭 的露天風呂 – 如果天氣好便可以一邊浸一邊睇星星了，不過現在還是毛毛雨。

浸完溫泉可以免費任食果汁雪糕條，好好味架，我食了2枝。

跟著去餐廳吃飯，吃飯的地方安排了私家房，都算幾High。

前菜6小碟 : 1.) 大浅利有馬煮 2.) 南京豆腐 3.) 蕪寿司 4.) 秋刀魚酢メ 5.) イクラとろろ 6.) 金目鯛西京焼き – 賣相很精美，味道都很好啊，收得咁貴都算冇呃人錢。

蟹肉蒸蛋(ずわい蟹の茶碗蒸し) – 蛋味很香濃，蛋蒸得很滑，蟹肉亦算好味。

清湯吉野仕立て – 湯內有南瓜饅頭、冬瓜和海老，味道很淡，冇乜特別。

海魚刺身3拚 – 油甘魚、呑拿魚和八爪魚，品質算是上乘，油甘魚和吞拿魚都很濃魚味和吃得出很新鮮，八爪魚都唔差。

河魚刺身雙拚 – 「ギンヒカリ」和「岩魚」，第一次食，肉質不及海魚鮮嫩，有點胡口，但味道唔錯的，魚油香偏淡。

群馬のおっきり込み – 是碗雜菜煮物，味道一般。

主食可以2選1，有牛肉加豬肉或海鮮拚盆，我和小太熊每人㨂了一樣。

牛肉拚豬肉 – 牛肉很廋很有牛味，唔駛食到成肚油，豬肉都幾有豬肉味，整體上不算是頂級豬牛肉，但合格的。

海鮮拚盆 – 只有2片魚，一隻中蝦和一隻40g重鮮鮑魚，鮑魚還識郁，其餘的味道普通。

鮑魚的賣相算是吸引，可以分2啖食，幾鮮美的。

天婦羅 茄子‧秋葵‧魚肉 – 味道普通，而且都飽了。

金胡麻豆腐‧鯉の南蛮漬け – 麻麻哋，只是唔難食。

蕎麥麵比中午的好食，是正常的蕎麥麵。白果蒸飯幾特別，比白飯好食。

巨峰提子雪糕 – 很有巨峰提子味，很清甜，雪糕質感幾滑，正。

甜品只有燉蛋好食，其餘的唔掂。

食完飯再浸溫泉，旅館有3個私人露天風呂「竹座」、「岩室」和「光林」，不用預約，見到有Vacancy便可以自己行人去浸，都唔係太難等，通常在外等10min便總有1個Vacancy，不過裡面沒有沖身設施。

私人露天風呂「竹座」

私人露天風呂「光林」

今天浸到差不多甩皮了，明天再努力。

酒店22:00開始有免費宵夜，不單止有 拉麵，還有生啤任飲呀，雖然只是少少着數，不過認真有驚喜。

自助宵夜生啤任人飲，啱晒啲酒鬼，不過這裡的人客都很斯文。

拉麵味道幾好架，我覺得好食過中午的蕎麥麵。

晚上瞓個靚覺，明天要早起浸溫泉啊。

日本‧草津 周末悠行 – Day 2

今早Book了08:00食早餐，所以07:00便要起身浸溫泉，浸完至食。

私人露天風呂「岩室」

私人露天風呂「光林」

私人露天風呂「竹坐」

公共 露天風呂

浸完之後有免費 益力多任飲，酒店都很細心呀。

早餐在昨晚的餐廳食。

蜂蜜加原味乳酪 – 很開胃好味的頭盆。

早餐的味道只是普通，求其食飽個肚就算了。

坐08:45頭班車出「湯畑」，早上會再在溫泉街行多2hr，乘10:40的車回酒店Check out。

從 湯畑 沿著「西の河原通」步行15min到「西の河原露天風呂」，沿途是古廟和地熱區。

西の河原露天風呂(入場費￥600) – 是草津溫泉的著名景點，露天溫泉位處山林之中，靈氣逼人，浸得多肯定延年益壽啦。這裡沒有沖身，要自備毛巾。

浸完溫泉，小太熊話要飲 士多啤梨奶(￥120)，我就覺得奶味唔夠香味只有士多啤梨糖水麻麻哋，不過佢話好好飲喎。

慢慢行返去 湯畑，乘10:40的接駁巴士回酒店Check out，再乘11:10的接駁巴士回到 輕井沢。

<<輕井沢>>

因為今天是星期日加上落雨，輕井沢大塞車，接駁巴士遲了20min，12:40才到 輕井沢。原本今天有3hr在 輕井沢玩，打算租單車到附近景點，去 輕井沢舊銀座通食嘢行街的，現在因為塞車落雨，要取消了。

在火車站附近漫無目的行了一會，發現有架巴士(￥150)去 舊銀座通，13:00開車，我便走上車諗住坐車去行一會。開車後才醒覺今天大塞車，慘了，浪費晒啲時間在巴士上，小太熊開始話我啲決定唔好。巴士用了20min才能從 輕井沢駅南口去到北口，碰巧有個站，便決定落車算了，都唔知要塞多幾耐才能到目的地。

還剩有大約2hr，又落雨濕濕，決定在火車站附近的Outlet行街濕平食飯算了。

輕井沢酸奶(￥206) – 微酸又夠奶香，唔係太杰，好好飲。

在Outlet買了幾對鞋都夠鐘食飯了，間間食店都大排長龍，真大鑊。

拉麵店「らーめん福栄」– 佢聲稱自己的拉麵好正，湯底和义燒都是秘製喎。排了廿幾人，估唔到咁都等了40min。

半炒飯餃子套餐(￥630) – 有一細碗炒飯和5隻餃子，味道只是普通好食，完全稱不上特出。

鹽味拉麵(￥900) – 算是好味的拉麵，但並非很出位，不值得排隊來食。

醬油味拉麵(￥900) – 比鹽味拉麵好些少，但仍然是不值得排隊。

食完飯啱啱好趕到15:32 JR-新幹缐 離開，去到成田空港Terminal 3已經18:23。

今次沒有行李，可以自助Check in。

Café Bene – 成田空港Terminal 3的咖啡店，2年前在這𥚃食過Roll Cake覺得勁正，今次再食。

Bene’s Roll Cake(￥421) – 質感軟綿綿甚有咬口，忌廉的牛奶味濃郁，只是蛋糕的雞蛋味沒有以前咁香，跌了Watt，但整體上還是好好食，下次仍然會再食。

21:00起來航了，這樣就完結日本2日之旅，實在有㸃兒短。小大熊話2個星期之後再和我去大馬食好西喎，不過都冇乜心機睇資料，攪到最後比小太熊鬧，早知話唔去算了。

日本‧草津 周末悠行– Day 3(完)

01:10返到香港。今天要準時返工啊。。。。

補充資料 :

1.)      香草航空 香港來回東京成田機場，每位HK$1240。

2.)      ￥100 兌HK$7.22 (永恆找換公司)。

3.)      東京 JR TPKYO Wide Pass 3天火車證每位￥10000，可以免費預訂指定席，只是一程從 成田機場到輕井沢的火車已經差不多返本。

4.)      草津温泉 湯宿季の庭(ときのにわ) 每小時有1班免費接駁巴士來往 湯畑。

5.)      季の庭 也有免費接駁巴士來往 輕井沢，但要預約。

-----日本‧草津 周末悠行(完)-----