韓國雪嶽山最高峰 大青峰(대청봉)(1708m)
韓國雪嶽山 大青峰(대청봉)高1708m,從雪嶽山公園入口來回 大青峰約須12hr,中途和近山頂也有少量廁所和糧水供應,整段山路的難度是中等,大約等同上落鳳凰山3次,只要行慣山夠腳骨力的都可以上到山頂。要成功攻頂,必須穿上行山鞋,最少一支行山杖和足夠糧水,最好帶多對勞工手襪。這段山徑每逢假日都非常之多人,行山客有超過98%韓國人,外國人甚少。
韓國初秋 青峰雪嶽 – Day 2
繼續上一篇Day 2行程。
<<雪嶽山公園>>
在陽瀑待避所排完毒休息了15min,08:45繼續上路。
從 陽瀑待避所(Yangpog Shelter)到下一站 喜雲閣待避所(Huiungak Shelter)只有2km,但足要90min腳程,因為這段路要不斷上斜上梯級完全冇得回氣,比預期辛苦。
風景越來越靚,金秋紅葉也開始密集地出現。
09:00來到瀑布下的天然游泳池,夏天游水真係會好爽。
繼續不斷上天梯,瀑布和泳池多過7-11。
雪嶽山野生靈芝
接著一段山路全是金秋紅葉,雖然要趕路,但都冇辦法唔停下來影多幾張相。
因為上星期韓國出現巨風瀑雨水災,現在仍然有些上山路段像小河一般,如果對鞋冇防水就大鑊了。
上山的過程中耐不耐便會遇到韓國行山隊,通常一行15~30人,要不斷避開他們。
10:00上到這個指路牌,又遇到大團韓國人。
來到中段有個觀景台,四周全是 雪嶽山巍峨聳立的山峰,這𥚃開始感覺有些冷了,因為已經差唔多海拔1000m高。
上觀景台要排隊啊,真跨張。
喜雲閣待避所(Huiungak Shelter)(1082m) – 10:15終須上到這𥚃,人山人海好多人在這𥚃煮麵食,相信晚上很多人紮營。網上傳聞話這𥚃可以補給食水,但我冇Check過堅定流。
原來只有8℃,唔怪之得一停低啲汗就立即變冰汗啦。
下一站就係 小青峰(소청봉)(Socheongbong),高1550m,距離1.2km,這段山路又係不斷上斜,需時75min。
這段路的紅葉和綠水冇剛才咁多了,樹木較多已經枯乾。
上上上.....上上上,好chur呀,腳都軟,小太熊開始冇乜电,下一站要食啲嘢义义電先。
偶然停低,我就四圍走來走去影相,小太熊就休息休息。
途經一個風景好靚的山腰,在這𥚃休息10min,和小太熊影張合照先。
接下來開始大霧和有點雨粉,希望唔好落出雨啦,否則真係好有挑戰性。
小青峰(소청봉)(Socheongbong)(1550m) – 小青峰是一片小平地,除走上來的一條路和上大青峰的路之外,另外有一條下山路通往 九曲潭溪谷。
我們就揀這條路上 大青峰。
最後一段路易行好多了,不過就十分大霧,乜風景都睇唔到。
來到最後一個路口,右轉就係 中青峰(중청봉)(Chuncheongbong),向左再行600m便到終點 大青峰。
這段山路較之前的更加易走,向前行多100m便是雪嶽山最高的留宿處 中青旅舍(Jungcheong Shelter)(중청대피소)。
如果要過夜,一係在屋外紮營,一係在這裏打地舖,其實都容納唔到好多人。
這家旅社真係有食物賣,連廁紙和手套等等都有,價錢仲唔係太貴添。
開始最後上升100m的攻頂旅程,由這裏上山頂只需要大約20分鐘。
接近山頂的一段路生長了很多奇異的高山植物。
將近到山頂的時候,天氣變幻莫測,時天晴時大霧,終於看見今日第一過藍田了。
藍天只出現了三數分鐘,又變回大霧。
12:30終於登上 大青峰,山頂部分是一堆亂石,天朗氣清時可以遠眺日本,頂峰的標誌岩石寫有韓文「大青峰」。
大青峰(Daecheongbong)(1708m) – 很多人都排隊和岩石拍照,我們都排埋一份,等了15分鐘才輪到影相。
個個韓國人都勁興奮,眾多排隊人士之中除了我們兩個外國人之外,就只見兩個鬼佬,其他全是韓國人。
因為想天黑之前回到起點,不敢在山頂逗留太耐,12:45開始落山。
下山時雙腳已經開始疲累,腳步有點虛浮,好彩帶了行山柺杖,下山的時候真是非常之有用。
---待續---
見到咁多梯級真係怕怕,你地好勁呀!
回覆刪除行了足足12hr,行完之後全身肌肉都酸痛了幾日啊~
刪除好紅! 好正!
回覆刪除撞正紅葉秋色,唔比日本差啊😬
刪除覺得山頂有霧先係正常,當然天色好係靚,有霧有想像空間
回覆刪除都係,有霧和天晴都係各有各好。
刪除