旅居英國 • 動態移民(52) – 蘇格蘭21天風馳電掣自駕遊

蘇格蘭秘景 仙女橋(Fairy Bridge of Glen Creran)

蘇格蘭(Scotland)是英國的構成國之一，位於大不列顛島北部，被大西洋環繞包圍，西部地區因為地理關係，經常括起超強風勢，容易影響海上交通，大大增加了來往各小島渡海輪班次的不確定性。蘇格蘭境內甚多高地，海拔介乎600～1,000m之間，其中最高的山Ben Nevis更是英國最高的山峰。蘇格蘭境內很多仙氣自然景色，包括有高地行山徑West Highland Way、天空島Isle of Skye、天涯海角John O’Groats、北岸沿海公路NC500和Isle of Mull等等。由於蘇格蘭面積大人口稀少，很多景點也沒有公共交通可到達，因此自駕是深度到訪蘇格蘭袐景所必需的。

旅居英國 • 動態移民 – Day 76

<<Dundee>>

今日好緊張，因為要開始揸車21日了，為了這次自駕遊我出發前補了10堂貨Van棍波，好有誠意好安全架，盡力開慢啲希望唔好有乜碰撞啦。10:30 Check out 之後行800m去租車公司Arnold Clark。

去到Arnold Clark門口剛剛有2位女士還車，佢部車撞到凹晒啊….. 好驚

早前住在愛丁堡時上網用租車網站Rentalcars租了21日車。

車行：Arnold Clark

車種：Kia Ceed 自動波

21日車租 £1147 再加買全保£82

Arnold Clark是扎根蘇格蘭的租車公司，相對其他大車行的收費較便宜，最初考慮直接到Arnold Clark租車順便買全保，那便可以有意外時不用Claim來Claim去，但Arnold Clark的全保條款相當辣，寫到很多情況都唔賠，所以最後決定經Agent買全保順便租埋車。此外，出車地點不同收費也相差很大，所以揀了在Dundee出車，因為專程坐火車來出車都慳唔少，而且可以順便玩多處地方。

派了部Toyota比我，部車被Upgrade了，最好係倒車時Screen可以望到車後面，和車身有Sensor方便泊車，原本租那部車冇架，真係幸運，否則今次一定Claim硬保險。

雞手鴨腳摸清楚部車之後，戰戰兢兢地開車，只係比正常慢了一些，大致上都安全啊，先行2km去TESCO入足貨先。

買了£60貨，小太熊買了44 包Walkers薯片，我一路揸車佢一路食，食完就瞓覺，佢食得晒架。

今日目的地係Callander，條路冇乜特別，用嚟練車唔錯。

原本路經一處觀鳥區Argaty Red Kites，可以睇人餵大麻鷹，不過我揸得比較慢，要Skip了。現在先揸84km去一間沿路經過的古堡Doune Castle。

Doune Castle(£9入場) – Doune在1361年與Margaret Graham結婚時獲贈了這座城堡。今日維修進行中，冇得入場，第一個景點就已經泡湯，真失敗。

再揸12km便到酒店，快到埗時行錯路轉了入180度急彎超級落斜路，因怕部車浪底扭少了軚盤，差點兒撞牆，今次好彩冇事，下次要加十倍小心。

<<Callander>>

Abbotsford Lodge – 距離小鎮Callander大約1km的英式古它酒店，大屋外面可以免費泊車，在這裏住一晚。

今日第一日揸了96km，無風無險到達目的地。

酒店的住客休息室靚到無倫，一陣在這𥚃沖杯茶坐吓。

沿着這條樓梯行上房間。

雙人房(包括早餐)每HK$1062 – 房間幾整潔，但價錢比較貴，現在蘇格蘭的物價已經沒有20年前那樣便宜，已經追貼倫敦。

放下行李，行到小鎮Callander中心逛一逛街，沿途已經見到不少紅葉。

Callander是蘇格蘭Stirling區的一個小鎮，位於River Teith河畔，Loch Lomond and The Trossachs National Park的東門，是往返蘇格蘭高地的熱門旅行停留點。小鎮寧靜古雅，適合悠閑漫步半天。

St Kessog’s Church – 位於Callander最中心，建於1883的教堂。

Callander War Memorial

Fudge Shop – 1926開業的糖果店，人氣旺盛，入去望望。

很多人排隊買雪糕，我哋又趁熱鬧買杯食。

二球雪糕(£4.5) – 冧酒提子和蜜糖味，唔係太甜很香滑，普通高質的雪糕，可能小鎮生活比較Dry，所以咁多人排隊。

小鎮沒有特別景點，但只是閒逛已經很舒服。

黃昏回到酒店食晚飯，Check in時訂了個窗口位嘆吓。

餐廳幅油畫係蘇格蘭高地的鹿呀，早前行山時已經見過。

紅酒175ml (£4.85)；可樂(£1.85)

慢煮牛臉頰肉(Slow Cooked Beef Cheek)(£18.5) – 好食，牛肉很腍口感一流，肉味香濃帶有油香，薯蓉和雜菜都唔錯，比預期好得多。

Grilled Organic Salmon Fillet (£16.95) – 三文魚很新鮮肉嫩，廚功不俗，好食但不及慢煮牛出衆。

晚上沖了杯茶到在地下休息室坐低慢慢嘆，把放了證件、信用卡和現金的小背包放在地下，離開時忘記攞返。

臨瞓時發現自己遺忘了証件和銀包，立即匆忙跑落樓下想攞返，但因為已過23:00，酒店所有門口已經上鎖，冇辦法，唯有明天一早才入去攞返，應該冇問題的，希望啦，不過都擔心的。

旅居英國 • 動態移民 – Day 77

08:00開始食早餐，開門後我第一個衝入去攞返背囊先，冇比人郁過。

早餐十分豐富，我點了新鮮水果、乳酪、牛角酥、英式鬆餅、粟米片牛奶、橙汁和奶茶，Menu有乜叫乜，不過食得晒架。

加埋煙三文魚炒蛋，好好味，午餐可以唔食了。

今日09:15準時出車，由Callander 到Oban，全日大約行210km。

今日進入蘇格蘭的山區，公路開始非常之窄而且多彎，更加時不時有對頭大貨車踩線，對我來講十分難揸，試過轉彎時遇上大車要耷車等佢慢慢過，好鬼危險，估唔到英國的公路咁窄，接下來還要揸20日，有難度了。

第一站先去12km路程的高地湖Lake of Manteith，原本想乘船出湖中小島Inchmahome，不過唔知咩事今日冇船出，唯有又Skip啦，沿湖邊行吓睇睇風景。

特然想起，忘記還鎖匙，又要揸12km返酒店還匙。還匙之後都係返Lake of Manteith，因為今日條路一定經過這𥚃，所以順便落車行吓。

Lake of Manteith – 右邊是環境清幽的湖畔酒店Karma Lake of Menteith，靚到小太熊立即就早知昨晚住呢間，佢即時上網睇價錢，佢話原來唔貴架，走寶了。

Port of Menteith Parish Church – 酒店旁邊是湖畔古教堂。

再揸車10km路經另一景點Loch Ard Forest，可以行75min。

Loch Ard Forest – 這森林位於Loch Lomond and the Trossachs National Park，沿湖畔有一條行山徑，因為今日大霧有微雨，景色都幾仙氣。

時間有限，否則這𥚃可以行一日山，如果我長住在蘇格蘭便可以行晒段路。

再行22km到一個絕景幽谷Devil’s Pulpit，這裡很近West Highland Way的小鎮Drymen。景點附近最近的免費停車場只有8個車位，全部滿晒，遠多500m的公路邊旁有位泊，雖然好似唔係停車位，但見已經有三部車泊緊，又係最後一個位，所以照泊了。

這個位置其實幾fit，又有咁多人泊，點知玩完之後瀨晒嘢。

泊好車的沿着Maps.me的小徑行，很快找到落山谷的石級。

落山谷的石級又濕又斜又跣腳，要手腳並用，最好有勞工手套。

直落到山谷底部，好多人呀，估唔到這蘇格蘭秘景咁多人。其實這山谷相當隱世，如果冇人的話簡直係世外桃源。

河水非常之冰冷，不過人人都赤腳落河行，小太熊又想我完全自己自願地行，咁我唯有完全自己自願地落水啦。

河水凍到入骨水，個個就係為了看看這塊蘑菇石。

零污染的河水，應該飲都唔怕生蟲掛。

玩了個幾鐘都夠喉了，由原路爬返上去。

回到部車之後…收到告票呀，成排車都有。

每部車罰款£60，早鳥優惠就收£30，不過要14日內比錢，咁就牡得上訴。唉…. 今晚上網比錢算了，唯有當入場費。

<<Oban>>

今日節目完畢，揸多143km 直往蘇格蘭西部小鎮Oban。

今日總共揸車210km。

Maridon House – 位於Oban的旅館，會住2晚，旅館外可以泊4部車，再多車便要泊出馬路。

我係第六部車到，所以要泊在斜坡上。

雙人淨房(每晚£70) – 是1/F房，景觀開揚。

Oban的重點節目就係去Oban Seafood Hut食餐好野，這海鮮店每星期開足七日，每日10:00 -18:00，英國很少咁勤力的商店。

Oban Seafood Hut – 位於碼頭旁邊的平價海鮮店，好彩17:45去到都仲做緊生意，要即刻買海鮮了。

龍蝦和蘇格蘭麵包蟹力好吸引。

生蠔青口和帶子都想試，仲有蘇格蘭西部特產 海螯蝦(Langoustine)。

見有2人套餐Grand Platter £38.5，就叫佢啦，再加些生蠔。

生蠔每隻只係£1.2，終於在英國見到抵食的生蠔了。

買完食物便自己揾位坐底，食物預備好職員便送上枱。

生蠔(每隻£1.2) – 叫了6隻，鮮甜爽口，蠔味清新，好食抵食，明天再來。

Grand Platter (£38.5) – 有全隻龍蝦、全隻蟹、牛油焗帶子、青口、希靈魚、蝦和海螯蝦，整體海鮮的味道不是最頂級，只係一般偏好，龍蝦肉比較淡令人失望，好彩蝦膏非常甘香，都值得明天再來食。

Oban Seafood Hut的好處是可以自己帶酒去飲，慳返好多呀。食完都18:30了，走剩我們2人，這時才發現原來有個職員等我們走埋才執嘢收工，小太熊叫我明天一定要早些到呀，18:00前一定要走，佢話阻人收工猶如殺人父母喎。

食完海鮮在Oban市逛逛，不過已經開始天黑，又有毛毛雨，還是明天再行。

返房食個 辛辣杯麵(£1)做宵夜。

後日會乘船到對岸的大島Isle of Mull，瞓覺前上網Book 埋往小島Staffa個2.5hr Tour，在Mull出發每位£30。

 

補充資料 :

 

1.     這次在蘇格蘭自駕21日，選擇了租車公司Arnold Clark，再經租車網站Rentalcars租最平的自動波車種Kia Ceed，在Dundee出車，21日車租 £1147 再加買全保£82。在愛丁堡出車貴大約£200。Arnold Clark是扎根蘇格蘭專賣二手車的公司，租車相對其他大車行的收費較便宜。

2.     21日後還車時被發現車門位置有非常之輕微的碰撞痕跡，估計是泊車時被旁邊的車門撞過已引致。負責的職員很好人，不用我去Claim保險，無條件收回部車。選擇Arnold Clark是正確的決定。

3.     蘇格蘭大城市以外的所有地區公路也是又窄又多彎，而且很多大貨車行走，此外英國人揸車大部份也很快，開正常車速比較大壓力，不像我在日本經常超車。

4.     在英國入油全部要自助，入完油之後自行到收費處比錢。通常大型超級市場如TESCO 和Morrison等等外邊也設有油站，油價相對比較低。

5.     在超級市場通常可以免費泊車2hr，而且一定大把位又夠濶，唔怕被隔離車門撞花部車。

6.     £1兌HK$10.66 (HSBC網上兌換)

7.     英國電話卡Giffgaff可以網上預訂，出發前寄到屋企，再Download 官方Apps，到埗後可以立即開卡用。有1個月£10 (包15GB上網加超平打長途電話和Local call)的Plan十分抵用。

8.     在英國餐廳食飯不可以主動揮手叫職員過來，會被視為不禮貌，只能乖乖坐定定等職員主動上前才落Order，或者用眼睛望住佢哋，等佢哋注意到再自己行過嚟。之後在全英國食過很多餐廳，留意到又真係冇人主動揮手叫職員落Order的，真係佢唔講都唔知。

9.     在英國生活基本上可以完全唔帶現金，99%的消費也可以用信用卡或Applepay附款，包括所有交通工具、餐廳和超級市場。

10.        英國天氣變化極大，經常落雨，而且不時會括狂風，所以不方便用雨傘，最好全身衣物都要防水。

11.        行車記錄：第1天 行車96km，在轉入180度急彎超級落斜路時，因怕部車浪底扭少了軚盤，差點兒撞牆。第2天 行車210km，在窄彎路轉彎時突然殺出大貨車踩着中線，我技術有限立即要剎掣停車讓大車慢慢過。之後每次窄彎路轉彎時也要預有大車殺出來，加倍小心，但揸車時更加傷神。下午亂泊車收到告票，罰款£60，早鳥優惠就收£30，不過要14日內比錢。

 

 

---待續---