旅居英國 • 動態移民(54) – 蘇格蘭 馬爾島(Isle of Mull)

蘇格蘭 馬爾島(Isle of Mull)首府城鎮 – Tobermory

馬爾島(Isle of Mull)是蘇格蘭西岸群島Inner Hebrides其中的第二大島嶼，僅次於最大的 天空島(Isle of Skye)，自公元前6000年開始已經有人類居住的遺跡。現時馬爾島的人口大約有3000人，大部分人口均居住在島上最大城鎮Tobermory。在每年的5～9月有大量遊客的湧入島內，期間小島對外的海上交通也開始起航，分別由Oban來往Craignure, Isle of Mull 和 Kilchoan來往Tobermory, Isle of Mull，連車過海可以選擇這2個港口，其中由Kilchoan來往Tobermory這程船不可預售船票，在起航當日才開始賣票。

旅居英國 • 動態移民 – Day 79

<<Isle of Mull>>

繼續上一篇Day 79行程。

從古堡Aros Castle駕車15km 到 馬爾島首府Tobermory，今晚和明晚住在鎮內酒店Carnaburg Guesthouse。今日揸車50km，大部分路段又窄又難揸或者單線雙程。

Carnaburg Guesthouse – 旅館是彩色屋其中一座，最左方的紅色屋便是，面向大海位置一流，海旁有大量免費車位，泊車都算方便，但日間經常爆滿，待黃昏那些即日旅客離開後便有大量車位。

雙人海景房(包早餐)每晚£105 – 房內沒有廁所，私人的廁所要行出房外。價錢很貴但環境位置都一流。

走進房間是一幅蘇格蘭高地鹿油畫。

旅館位於Tobermory中心，行街食飯都很方便。可惜Check in後開始非常之大雨，完全行唔到街。

Tobermory – 小鎮不大，短短的500m長街道上卻滿佈驚艶的彩色屋和貴價餐廳，像是全為旅客而設。

馬爾島郵政局

Fisherman’s Pier Fish & Chips – 鎮上除了超級市場之外的唯一平價外賣選擇，等外賣期間被突襲的瀑風雨吹濕晒。

去超級市場買完紅酒百事和雪糕，再買炸魚薯條回旅館食。

炸魚薯條(£7) – 味道不過不失；百事可樂(£0.6)；紅酒(£5)

牛奶雪糕500ml(£4) – 產自蘇格蘭西岸群島Inner Hebrides其中的島嶼Isle of Arran，非常香滑好食。

今日晚餐每人都要£7。

晚上雨停了一陣，出外行夜街。

Tobermory Distillery Visitor Centre – 鎮內二百多年歴史的的杜松子酒廠，一定要揾時間入去參觀一下。

Tobermory的夜景只係一般，日景靚得多。

Tobermory Clock Tower

行行吓又落大雨，明天報了下午半天團Staffa Island，希望天氣好返啦。

旅居英國 • 動態移民 – Day 80

旅館Carnaburg Guesthouse要08:00才開始早餐，所以安排活動不能太早，於是今日只能參加中午團往Staffa Island。

早餐在地下餐廳食，早到揀了窗口位。

傳統早餐逐樣Order，多少任叫，我選了乳酪、Cereals、多士、煙三文魚炒蛋、橙汁和奶茶。

幸運地今日見返藍天，出車前先沿海邊行行小鎮Tobermory影些靚相。

Tobermory – 陽光下的彩色屋靚得出奇，但天氣始終不穩定，時不時滿天厚白雲，而且很大風。

Isle of Mull Ice Cream – 留咗3日都冇開門，想幫襯都唔得。

Tobermory來往Kilchoan的渡輪碼頭，每日有5~7班船，只可以買當日的船票，先到先得。今日特登來實地視察環境，方便2日後乘船離開。

部車就泊了在Carnaburg Guesthouse對出。遠方積緊厚雲啊，大鑊。

今日參加了12:30在Fionnphort出發的3hr Staffa Island登島遊，話可以見到Puffins，由Tobermory駕車到在Fionnphort足96km，因為路窄多彎，車程預了2hr。

09:30出車，時間都預得鬆動，沿途見到靚景可以落車休息。去到半路真係有嘢睇啊。

高地牛(Highland Cattle) – 是一種原產於蘇格蘭高地的家牛品種，特徵是長毛和長角，有紅、黑、黃、褐等等顏色，很多蘇格蘭的Postcard也以牠們為主角。高地牛身體強壯，即使在天氣惡劣的蘇格蘭高地和島嶼上也能生存。

這段路要經常入避車處，如果開車太快入唔切便要倒車讓路。

11:30去到目的地在Fionnphort，泊車售票機壞咗食了小太熊£2，攪了半粒鐘都攪唔，冇仇報啊。

要行到老遠才有另一部正常泊車售票機，£6.25買了7hr泊車，泊車票要放在當眼處，否則抄硬牌。

Fionnphort是Isle of Mull西南部小村莊，村外的碼頭每日定期有船往對岸小島Iona。

The Creel Seafood Bar – 碼頭旁邊的食店，原本預算食少少野，不過原來好貴架，唔食了。

Staffa Tour由12:30至15:30，從Fionnphory出發往Staffa Island登島睇Puffins，每位£30，回程時可以在Iona落船。

乘這小船出海，上船前導遊話因為太大風不能登島，只可在Staffa外圍睇，所以Tour的時間只有2hr，冇得回水，同團的所有英國人都冇乜所謂。

沿途遇上海豚，佢哋好話潑，跳來跳去。

去到小島Iona對出海面依然很多海豚，好得意呀。

連那些從Fionnphory往返Iona的渡輪也圍着海豚睇埋一份，看來不是常常見到咁多海豚。

睇完海豚繼續出海，今日真係碧海藍天，可惜大風，不過蘇格蘭西岸差唔多日日都係咁，食正大西洋吹過來的強風。

經過野生海獅屋企。

斯塔法島(Staffa) – 到了到了，資料話島上有好多Puffins的，如果能上島你唔可以近距離和牠們玩。

Fingal’s Cave – Staffa島上的巨型海蝕洞。

Staffa島上有大量6000萬年前由熔岩流形成的玄武岩六角柱石。當時，蘇格蘭和北美洲大陸板塊被拉開，大量岩漿從地殼的裂縫中湧出，形成這奇特的柱石。

海鸚鵡(Puffins) – 有好多Puffins呀，不過都在海上，距離太遠根本睇唔清楚，有點失望。

三趾鷗(Kittiwake)

綠鸕鶿(Shag)

在Staffa外圍兜了一個圈便要走了，留耐啲都唔得，太懶了，呃錢。

回程時又見到海豚，仍然十分活潑。

Iona – Isle of Mull西南部村莊Fionnphory對岸的小島，島上住了超過100名居民，及建有一所聞名的修道院。

14:30散團，3hr團最後只得2hr，呃錢呀。我們選擇在Iona登島離團，自己坐船返Fionnphory。因為今日太大風，原本回Fionnphory的尾班船開17:00，現在改為16:00，只可以在Iona行90min。

Iona Nunnery – 建於1203年的修道院，是蘇格蘭現存中世紀修道院最完整的廢墟遺跡。

補充資料 :

 

1.     這次在蘇格蘭自駕21日，選擇了租車公司Arnold Clark，再經租車網站Rentalcars租最平的自動波車種Kia Ceed，在Dundee出車，21日車租 £1147 再加買全保£82。在愛丁堡出車貴大約£200。Arnold Clark是扎根蘇格蘭專賣二手車的公司，租車相對其他大車行的收費較便宜。

2.     21日後還車時被發現車門位置有非常之輕微的碰撞痕跡，估計是泊車時被旁邊的車門撞過已引致。負責的職員很好人，不用我去Claim保險，無條件收回部車。選擇Arnold Clark是正確的決定。

3.     蘇格蘭大城市以外的所有地區公路也是又窄又多彎，而且很多大貨車行走，此外英國人揸車大部份也很快，開正常車速比較大壓力，不像我在日本經常超車。

4.     在英國入油全部要自助，入完油之後自行到收費處比錢。通常大型超級市場如TESCO 和Morrison等等外邊也設有油站，油價相對比較低。

5.     Isle of Mull島上公路超過一半是多彎單線雙程，因此經常要倒車避車，即使是雙程路也因為山路狹窄更難揸。

6.     在超級市場通常可以免費泊車2hr，而且一定大把位又夠濶，唔怕被隔離車門撞花部車。

7.     £1兌HK$10.66 (HSBC網上兌換)

8.     英國電話卡Giffgaff可以網上預訂，出發前寄到屋企，再Download 官方Apps，到埗後可以立即開卡用。有1個月£10 (包15GB上網加超平打長途電話和Local call)的Plan十分抵用。

9.     在英國餐廳食飯不可以主動揮手叫職員過來，會被視為不禮貌，只能乖乖坐定定等職員主動上前才落Order，或者用眼睛望住佢哋，等佢哋注意到再自己行過嚟。之後在全英國食過很多餐廳，留意到又真係冇人主動揮手叫職員落Order的，真係佢唔講都唔知。

10.        在英國生活基本上可以完全唔帶現金，99%的消費也可以用信用卡或Applepay附款，包括所有交通工具、餐廳和超級市場。

11.        英國天氣變化極大，經常落雨，而且不時會括狂風，所以不方便用雨傘，最好全身衣物都要防水。

12.        行車記錄：第4日行車50km，第一次揸車上船過海。今日大部分路段又窄又難揸或者是單線雙程，難度甚高。

 

 

---待續---