旅居英國 • 動態移民(53) – 尋找 蘇格蘭秘景

蘇格蘭秘景 斯塔法島(Staffa) – 野生海豚

英國蘇格蘭地大物博人煙稀少，是野生動物的天堂。遠在蘇格蘭西部有一世外小島 斯塔法島(Staffa)，島上除了有6000萬年前從北大西洋海床深處溶岩噴發遺留下來的六角火成岩柱石節理遺跡之外，大量野生海豚和海鸚鵡(Puffins)也以Staffa為家，因此每天也吸引不少人嘗試在暴風巨浪中，登島探訪牠們。

旅居英國 • 動態移民 – Day 78

<<Oban>>

今日唔食早餐，從Oban自駕31km到一處蘇格蘭的秘景，位於森林Glen Creran的 仙女橋(Fairy Bridge)。

泊車免費，距離Fairy Bridge大約1.5km，不過要行森林小徑上斜，都又濕又跣，要穿防水鞋。

短短的森林小徑已經仙景一樣，地上開滿野花，如果好彩會遇到鹿架。

Fairy Bridge of Glen Creran – 仙女橋建於1500年左右，是一座由手工雕刻石塊建成的拱形石橋。

Fairy Bridge真係好有仙氣呀，現場睇靚過相好多啊。雖然今日有點雨，不過完全唔影響這裡的仙氣，這景點很值得來。

繼續向前行，由另一條山徑走出山林，這段路的野花花種更多更靚。

很滿意Fairy Bridge這景點，因為之前睇相只係覺得有少少普通，估唔到咁有仙氣。

繼續自駕15km到一座古堡Castle Stalker，兜來兜去原來這景點沒有停車位的，有部份遊客四圍亂泊，但因為昨天已經瀨咗嘢所以唔敢再亂泊，來來回回最後找到附近有間Cafe有位泊車，立即泊部車入去，飲杯嘢當泊車費都抵吖。

Castle Stalker View Cafe & Giftshop – 這Cafe話明有Castle View，咁又幾好喎。

草莓牛奶雪糕(£2) – 味道唔差的雪糕，好過又飲茶包奶茶啦，食完至去行古堡。

Cafe外的山坡已經有可愛的羊仔，佢哋好Cute啊。

Castle Stalker – 在Cafe外的觀景台距離古堡太遠，根本睇唔清楚。用相機Zoom盡才勉強見到。

沿着觀景台旁邊有一條小路可以直達山腳的古堡，我們便沿着小路行落山，但小徑路面濕滑加上十分之斜，要相當小心。

Castle Stalker – 建於1320年的四層高城堡，位於Loch Laich湖上的一個潮汐小島上，退潮時很難從岸邊登上小島，是蘇格蘭著名的古堡之一。附近有船可以載旅客到古堡近岸欣賞。

今日天色太灰，顯得Castle Stalker很陰暗。睇完古堡之後，揸車25km到蘇格蘭高地小鎮 格倫科(Glencoe)。

Glencoe Lochan – 小鎮Glencoe北部外圍的一片森林和湖泊，最初是一處私人莊園，森林內的樹木是在1890年代從加拿大移植過來，現時由政府管理，森林內設有山徑，可以行吓山或者沿湖邊散步。

天色灰濛濛，又是另一種美。

森林內同樣遍地野花

Glencoe Lochan的風景比預期有落差，其實趕時間的話唔去都唔覺有損失。

今日節目完畢，揸車56km回酒店，今日總共行了127km。

總結3日共行了433km，在酒店附近的超級市場油站入油£28.62。Unleaded每1公升£1.589。

Maridon House – 今日最早返酒店，泊到個最靚位，唔駛泊馬路比人撞花部車。

Oban Seafood Hut – 又回來幫襯，今日16:10就去到，可以慢慢揀食物，而且已經揸完車，帶了支紅酒去飲。

昨天吃Grand Platter已經試了多款海鮮，今日揀的全是昨天試過最好味的，所以唔再要龍蝦。

Hot Mussels in white wine and garlic (£4.95) – 蒜蓉白酒煮青口好鬼死鮮甜，今次煮到半生熟，效果比全熟更甜，送酒一流，抵食。

Local Scallops in hot Garlic butter (£11.7) – 蘇格蘭的扇貝都係又大粒又鮮甜肉厚，而且試過多次也質素穩定，今次加了牛油焗更加多了甘香味 ; Sweet Herring(£3.5) – 醃製了的希靈魚帶有醋酸甜味，配上自身的魚油甘香更見味美。

生蠔(每隻£1.2) – 依然鮮甜爽口蠔味濃厚，臨走要再食一次。

今日仍然有微雨，但再唔入Oban市行街便以後冇得去了，濕濕地都行個圈。

Oban有傳統英國小鎮的景色。

另一檔海鮮店都冇開門。

沿着海岸繼續向前行

有旅行社可以安心到附近的團，Isle of Mull 和Staffa也是熱門地點，所以明天我們便自己揸車過去。

有創意的餐廳座位，在英國很常見。

天氣似有變差跡象，慢慢兜另一條路行返酒店。

百年杜松子酒廠The Oban Distillery

華英雄原來又移民到Oban，開了中華樓分店。

2人宵夜食 辛辣碗麵(£1.15)和辣椒鯖魚(£0.8)，再重用隻碗泡個 美極咖哩麵(£0.3)。

旅居英國 • 動態移民 – Day 79

今日中午揸車上船，前往Isle of Mull，碼頭就在酒店附近，Oban Seafood Hut隔離。早餐決定去多一次Oban Seafood Hut。

10:20剛開門不久，仲煮緊青口。今日要揸車唔可以飲酒。

老細很大方，煮好青口之後每個客派一小碗，都有8～10隻，好甜架，咁唔駛買青口了。

早餐只要了10隻 生蠔和一隻蘇格蘭麵包蟹。

生蠔每隻£1.2，今日比之前大隻，一樣咁爽甜。

蘇格蘭麵包蟹(Dressed Crab)(£10.5) – 拆埋肉起埋膏食得夠奔放，蟹膏又爆又Cream又甘香，蟹肉多又鮮甜，撈埋膏一齊食好味得難以形容，今日隻蟹超班，是睇住佢烚熟攞出來的，隻蟹賣£10，拆肉只加£0.5。

在英國可以令人去三次的餐廳很少，除了倫敦Flat Iron，就只有Oban Seafood Hut。

食完早餐回酒店攞車，好緊張呀，未試過揸車上船，昨天已經在外圍不斷觀察上船程序，晚上在思想上Rehearsal了很多次。

渡輪由Oban到Craignure, Isle of Mull，每日由07:10-19:35共有10班船，5日前買要已經買唔到早船，最早只能買到12:00船，玩少半日。

去Mull的船票 乘客每位£3.9，私家車每輛£14.7。

揸車入閘時展示電子船票，職員便會話你知排那條Lane，冇乜難度，不過職員會叫你盡量貼住前車尾，要小心咪隊親人籮柚。

揸車落船之後有職員指示向左向右和幾時停車，慢慢行便可以，難度不高，無風無險泊好車，可以上甲板坐。

今日又落雨，討厭。天台冇人坐。

個個都座入船艙和餐廳。

渡輪準時開船，12:30左右便差不多到埗，路過Duart Castle。

<<Isle of Mull>>

Duart Castle – 位於 馬爾島(Isle of Mull)海旁的一座古堡，歷史可以追溯到13 世紀。在微雨濃霧的天氣下在船上觀賞，更顯得似夢迷離陰風陣陣。

在Craignure港口落船之後立即向南揸車6km直往Duart Castle，近距離欣賞。Isle of Mull的公路超過一半是多彎單線雙程，因此經常要倒車避車，即使是雙程路也因為山路狹窄更難揸，挑戰很大，只能出絕招 ～ 揸慢啲，但一陣後面便排了條車隊，真係你有壓力我有壓力。

Duart Castle – 近觀反而沒有在船上睇咁宏偉，感覺也不是那麼陰森。

下一站自駕28km到另一古堡Aros Castle，14:50去到，行來行去也找不到公共泊車位，最後只能泊在Aros Mains Accommodation外，要快快行完，否則都唔知有冇伏。

Aros Mains Accommodation外路旁只有一個位可泊車，落車後行3min便到古堡。

Aros Castle – 蘇格蘭 馬爾島上的一座 13 世紀城堡廢墟。這座城堡由當地私人家族擁有，多年來轉換過幾次主人，現在已經成為日久失修的廢墟。

城堡外圍也沒有人打理，長滿了野花。

不要嘗試進入城堡內，真係有危險隨時冧，唔係吹水。

天氣實在差透，決定早點驅車到酒店Check in，今次會在Isle of Mull停留3晚，今明2晚會住在島上首府Tobermory，第3晚搬到島上一座古堡Glengorm Castle。

 

 

 

補充資料 :

 

1.     這次在蘇格蘭自駕21日，選擇了租車公司Arnold Clark，再經租車網站Rentalcars租最平的自動波車種Kia Ceed，在Dundee出車，21日車租 £1147 再加買全保£82。在愛丁堡出車貴大約£200。Arnold Clark是扎根蘇格蘭專賣二手車的公司，租車相對其他大車行的收費較便宜。

2.     21日後還車時被發現車門位置有非常之輕微的碰撞痕跡，估計是泊車時被旁邊的車門撞過已引致。負責的職員很好人，不用我去Claim保險，無條件收回部車。選擇Arnold Clark是正確的決定。

3.     蘇格蘭大城市以外的所有地區公路也是又窄又多彎，而且很多大貨車行走，此外英國人揸車大部份也很快，開正常車速比較大壓力，不像我在日本經常超車。

4.     在英國入油全部要自助，入完油之後自行到收費處比錢。通常大型超級市場如TESCO 和Morrison等等外邊也設有油站，油價相對比較低。

5.     渡輪由Oban到Craignure, Isle of Mull，星期一至五每日由07:10-19:35共有10班船，船票 乘客每位£3.9，私家車每輛£14.7，因車位有限，連車上船必須最少5日前買票。

6.     Isle of Mull島上公路超過一半是多彎單線雙程，因此經常要倒車避車，即使是雙程路也因為山路狹窄更難揸。

7.     在超級市場通常可以免費泊車2hr，而且一定大把位又夠濶，唔怕被隔離車門撞花部車。

8.     £1兌HK$10.66 (HSBC網上兌換)

9.     英國電話卡Giffgaff可以網上預訂，出發前寄到屋企，再Download 官方Apps，到埗後可以立即開卡用。有1個月£10 (包15GB上網加超平打長途電話和Local call)的Plan十分抵用。

10.        在英國餐廳食飯不可以主動揮手叫職員過來，會被視為不禮貌，只能乖乖坐定定等職員主動上前才落Order，或者用眼睛望住佢哋，等佢哋注意到再自己行過嚟。之後在全英國食過很多餐廳，留意到又真係冇人主動揮手叫職員落Order的，真係佢唔講都唔知。

11.        在英國生活基本上可以完全唔帶現金，99%的消費也可以用信用卡或Applepay附款，包括所有交通工具、餐廳和超級市場。

12.        英國天氣變化極大，經常落雨，而且不時會括狂風，所以不方便用雨傘，最好全身衣物都要防水。

13.        行車記錄：第3天行車127km，在超級市場油站入油£28.62。Unleaded每1公升£1.589。

 

 

---待續---