加拿大溫哥華 史丹利公園(Stanley Park) ~ 張國榮紀念長椅
史丹利公園(Stanley
Park)是溫哥華市區歷史悠久的公園，公園所在的半島曾是多個原住民族的聚居地，也曾經是軍事基地，直至1888年被列為國家歷史遺產並向公眾開放，現時仍保留了大片原始森林和原居民的圖騰柱，建有長長的海岸步道。公園內設有很多紀念長椅，由公眾團體捐助或租借後，在座位上安裝銅牌並刻上姓名以作為對故人的紀念；其中一個對香港人最大的亮點，是2006年時張國榮的歌迷在公園Teahouse前的位置，租下一張紀念長椅並刻上張國榮的名字，成為了「張國榮紀念長椅」，此後成為世界各地歌迷每年追思的聚點，很多有心的歌迷時至今日也會不時送來乾花、公仔、香煙等等祭品。
加拿大 • 瀛寰搜奇 – Day 10
行程：Banff National Park(天晴)→溫哥華(天晴)
繼續上一篇Day 10行程。
<<溫哥華>>
中午從Calgary乘機來到溫哥華，立即到市內的酒店Check in。今晚揀了Canada Place附近的酒店Auberge Vancouver Hotel，出地鐵站行幾分鐘就到。
Auberge Vancouver Hotel – 1998年開業，座落在溫哥華市中心的精品酒店，房間多可眺望港灣，步行即可到達Canada Place、溫哥華會議中心、史丹利公園和Gastown等地，鄰近Waterfront地鐵站。
雙人房(不包括早餐)每晚CAD 220 – 房間整潔面積夠大，設落地玻璃景觀開揚，可以斜望到海景。連續住2晚。
從窗外可以望到Canada Place，很滿意這景觀。
酒店住客和住宅的住客共用同一個會所，設備好面積也超大。
25m長的天窗泳池好正，啱晒喜歡正經游水的人。
平台花園又大又清靜。
健身室也大得誇張，器材種類又夠多。
今日天氣很好，爭取時間出外行街。已經下午四點，只可以到海邊逛逛，然後去超級市場買點東西，再去食晚飯。
TCC Pedestrian Plaza – 酒店毗鄰的小型公共廣場，放滿供人休息的枱椅，氣氛寧靜休閑，很有加拿大城市的慢活感覺。
溫哥華會議中心(Vancouver Convention
Centre) – 溫哥華市中心的海濱大型會展場館，是加拿大最大的會議中心，鄰近郵輪碼頭。
The
Drop – 由德國藝術團體創作的藍色水滴造型公共雕塑，於2009年設在溫哥華會議中心外，話係想提醒觀賞者反思人類與海岸、水資源和城市發展的關係喎，咁深奧，我唔明呢啲嘢同滴水有咩關係啫，而且我覺得似支針多過一滴水。
加拿大廣場(Canada Place) – 為1986年溫哥華世界博覽會而建的濱海地標建築群，後改為會議中心、酒店和郵輪碼頭，建築頂部由多個大型的白色帆狀結構組成，設計常被人拿來與雪梨歌劇院比較，其實比較的人都無叉聊，雪梨歌劇院實勁好多啦。
下一站慢慢行去唐人街買些食物，然後乘地鐵去食越南菜。
T&T Supermarket
Chinatown Store – 溫哥華唐人街的亞洲超級市場，很多新鮮的海鮮、蔬果、熟食和亞洲各地食材，貨品都很齊備。
海鮮價錢唔算貴喎，皇帝蟹每斤約HK$400，和香港差不多。壽司和水果都很新鮮。買了CAD 18食物做儲備。
行完超級市場已經差不多天黒，聽講唐人街入黑後治安較差，所以唔行了，乘地鐵由“Waterfront Station”去“Metrotown Station”，車費CAD 4.85，入閘時小太熊見入閘機上放了張車票，便試吓用唔用到，原來是一張還有效的1日票，應該是有人用完最後一程之後放在入閘機送給下一個人，好似下午在機場上車時也有人送了張用剩的1日票給我，温哥華的人都好好心啊。
皇燕越南美食 – 出地鐵站之後行1km來到這溫哥華幾受歡迎的越南小店，很多YouTuber介紹話好好食，聽說常常需要等位，但今晚冇乜人，唔通已經跌Watt唔再好食？有點擔心，覺得都係多數中伏。
晚餐時間全店唔夠10個客，好清靜啊～味道唔好都食得舒服啦。原本對這餐廳的期望很高，希望食到真正的越南味道。
生牛肉 牛腩 牛筋 牛栢葉湯粉(Phở Tái, Nạm, Gân,
Sách)(CAD 23.5) – 非常大碗的湯粉，金邊粉入口唔夠滑而且冇米香，完全未達在越南食到的水準，湯底一般美味，欠缺越南有的清甜鮮美，好彩生牛肉有肉味好食，牛柏葉和牛筋也好正，雖然沒有真正的越南味道，但整體尚算滿意，始終亞洲食物比較啱胃口。
春卷(Chả Giò)(CAD 6.2) – 很鬆脆的豬肉素菜春卷，味道唔錯。
蟹糕湯米粉(Bún Riêu)(CAD 24.7) – 這小店的招牌菜，但那些物體不是蟹糕，而是蒸蟹時流出的物體，有少少蟹味但口感像汽泡，湯頭加入大量番茄，湯內的燻蹄、扎肉、蕃茄和蝦肉的品質夠高，整體上味道唔錯，只係沒有蟹糕有點失望和價錢比較貴。
沙律卷(Gỏi Cuốn)(CAD 6.2) – 即係越式生春卷，用生米紙包著生菜，香草和蝦肉，比較淡口，味道沒有炸春卷咁好。
食完飯乘地鐵回酒店休息。
加拿大 • 瀛寰搜奇 – Day 11
行程：溫哥華(天陰間中有微雨及暴雨)
早上07:30起身，行700m去咖啡店Revolver食早餐。
沿途經過一些街道有大型塗鴉。
Revolver
Coffee – 位於溫哥華Gastown的一間精品咖啡館，小店從世界各地的優秀烘焙商中嚴選當季的精品豆，由資深咖啡師專業現煮現做每杯咖啡，客人能嘗到不同產區與烘焙風味。
店內唔算很迫，但每張枱也有人，而且不時有人來買外賣。
剛剛剩下兩個窗口位，可以望住街上的行人嘆咖啡，感覺很Chill。聽說嘆咖啡是温哥華的主流文化，講真咁樣望住條街飲咖啡又真係幾鬼嘆。
杏仁牛角酥(Almond Croissant)(CAD 8.1)
– 杏仁又香又脆，牛角酥加了椰糖和牛油十分香甜甘美，口感鬆脆中帶點嚼勁，吃起來很好食；Lemon Doughnut (CAD 5.8) – 檸檬冬甩鬆軟中口感紮實，包內加了清香的檸檬果醬，好好食；Big Latte(CAD 8.6)；Cappuccino(CAD 6.3) – 兩款咖啡也很香濃，好飲。
估唔到簡單的咖啡和麵包會咁好食，很滿足的早餐。食完之後行街去Maple Tree Square、Gastown Steam Clock和Seawall Water Walk，然之後去租單車踩大約3小時。
Maple Tree Square – 位於著名的歷史街區Gastown，是溫哥華市的起源地，1867年這𥚃開設了第一家酒館，後來漸漸形成一個聚落，最後發展為現今的溫哥華市。廣場四周仍保留多棟維多利亞時期風格的歷史建築，是溫哥華市的人氣景點。
沿着Water Street行去蒸汽鐘，開始有點毛毛細雨。
蒸汽鐘(Gastown Steam Clock) – 溫哥華最具代表性的歷史地標之一，位於老城區Gastown的Water Street與Cambie Street交界。這座蒸汽鐘於1977年建成，設於地下蒸汽管線之上，用以遮蓋多餘蒸汽的出口。現場所見有蒸汽不斷地從鐘頂噴出，很像蒸氣火車頭。
Seawall
Water Walk – 位於Coal Harbour Seaside Park的海堤步道，很多市民會來跑步放狗踩單車。步道起自溫哥華會議中心和Canada Place，緊鄰Downtown，沿著海岸線一路向西延伸，環繞整個史丹利公園(Stanley Park)，再向南折向English Bay，進入False Creek內灣，最終抵達溫哥華西區的西班牙海灘(Spanish Banks Park)。整段路風景優美，最適合單車一日遊。
沿着海堤步道設置了很多甚有特色的藝術品。
LightShed
– 這小木屋藝術品由加拿大著名藝術家於2004年創作，按1:2的比例模擬1880年代溫哥華Carrall Street的老舊貨運棚，向溫哥華過去的勞工階級工業歷史致敬。木屋設在行人路中，非常吸睛。
海堤步道上種了很多楓樹，七彩的落葉飄散在地面，仲靚過藝術品。
Urban
Waves Bike Rentals – 位於Seawall Water Walk的租單店，今日租單車3小時去Stanley Park兜個圈，每人CAD 24.2，租完之後覺得佢啲單車幾好踩，下次會再幫襯。
10:30起步，預計慢慢踩3hr大約11km，環繞史丹利公園一個圈，沿途有些景點例如Brockton
Point Lighthouse ; 圖騰柱(Totem Poles) ; Siwash Rock和張國榮紀念長椅等等。
史丹利公園(Stanley Park) – 公園沿途也有藝術品，啲藝術品真係好得，我這些只識條鐵的蛋散也覺得好睇，温哥華這城市都幾有色彩。
開始行了唔夠15分鐘便落狗屎，在大樹下避雨避了成廿分鐘才見雨勢減弱，可以淋着細兩繼續去。
進入史丹利公園後的單車徑採用單向逆時針行駛，所以如果要去 張國榮紀念長椅便必須踩足一個大圈。
11:20才踩了3km，去到一個景點停下行吓，好彩只係毛毛細雨，行程可以繼續，不過見到附近全部黒雲蓋天，好有危機。
Brockton Point Lighthouse –
建於1914年的航海燈塔，座落於重要的航道轉折點，曾經保護路過船隻的安全，2008年正式停止航海導航功能，現在僅作為裝飾與歷史地標之用，是海堤步道上受歡迎的打卡點。
睇完燈塔之後，上車踩到去附近的圖騰柱又下起超級暴雨，幸好有座公廁外可以避雨，小小的空間企了十多人避雨，全部都係單車友。亦有唔少老外唔怕濕透全身繼續踩，真係叻，其實做人太多身外物都幾煩，相機電話Passport都唔濕得，都係老外活得瀟灑。又等了十幾分鐘，變返毛毛雨，可以起行了。
圖騰柱(Totem Poles) – 這批圖騰柱一共有9根，全部堅唔係歷史文物只係淘寶A貨。正版貨由1920年代開始由溫哥華政府向加拿大西岸原住民部落收購，現存在溫哥華的博物館。這9根圖騰柱是後期由原住民雕刻大師製作的一比一複製品，把當年的深厚文化展示在自由的天空之下。
S.S.
Empress of Japan Figurehead Replica – 這件色彩鮮豔的雕塑是 日本女皇號(S.S. Empress of Japan)船頭像複製品，聽講日本女皇號以前好巴閉架，係1891年已經投入服務的豪華遠洋郵輪，服役31年期間多次往返溫哥華與橫濱、神戶、長崎、上海和香港之間，1922年郵輪退役後被拆解，巨大的木製龍形船頭像被送進溫哥華的博物館，這件一模一樣的A貨就放在公園繼續乘風破浪。
正在欣賞條鐵的時候，特然看見一隻海鳥捉到一條魚仔，佢好慘呀，其他海鳥不斷搶佢條魚，差少少便被搶去，好彩最後保得住，自己走埋一邊慢慢嘆。
Girl
in Wetsuit – 1972年揭幕的青銅藝術雕塑，靜靜地坐在史丹利公園離岸約30m的一塊巨大花崗岩石上，第一眤望佢還以為是美人魚，令人想起丹麥哥本哈根的「小美人魚」雕像。原來最初藝術家真係想仿製丹麥美人魚架，但丹麥唔肯授權複製，藝先生最後唯有變陣，設計出這一位女性潛水員，細心啲睇，雕塑真係腳上穿了蛙鞋，身上穿了Wetsuit，額頭還有一副Mask，咁樣丹麥又真係吹佢唔脹囉～
Lions
Gate Bridge – 溫哥華著名的懸索吊橋和國家歷史古蹟，橫跨溫哥華市中心和北岸市鎮，好似香港條青馬大橋，不過應該話係香港抄人至啱，呢條橋1938年已經存在了。
Prospect
Point Lighthouse – 起源於1888年時一艘當年勁巴閉的蒸汽船在這𥚃遇上強烈渦流而失控擱淺沉沒，之後便催生了這第一代的燈塔，是一座具有百年歷史的航海燈塔，真係唔問過AI都以為係流嘢。
看看時間已經12:00了，原本打算去Teahouse嘆杯茶，不過落大雨用了成45分鐘避雨，應該要放棄，過幾日有時間再來。
沿着海旁單車徑繼續踩，如果天氣好真係幾爽。
Siwash
Rock – 行過仲on99以為係普通石柱，原來大有來頭架，AI話佢有成3200萬年的歷史，是由一塊極其堅硬的火山岩經過無數世代平行時空的海浪風雷雨電侵蝕下而形成，最終只剩下這塊硬過屎坑石的物體仍然孤傲地挺立於海中，最神奇仲係頭頂生了一棵像椰菜花的松樹，聽講已經存活了數十年，其間受到盡強勁海風與鹹水鹽霧吹襲仍然屹立不倒，好令人敬佩啊。
繼續一段路有很多楓樹，似足我認知的楓葉國。
張國榮紀念長椅(Leslie Cheung Memorial
Bench) – 終於去到這個大景點，今次單車旅程的目的地。這張紀念長椅是由張國榮的粉絲在2006年左右向公園承租，聽說粉絲當時集資了CAD 4000作為租用10年的費用。唔知仲可以維持幾耐呢。
看看椅上的祭品，有很多都是韓國Fans留下的，原來張國榮在韓國仲有咁多長情Fans。
網上流傳，張國榮居住在溫哥華的期間，常到Tea House嘆茶並和朋友小聚，也會坐在這張椅子上呆呆的望海…秋天該很好，你若尚在場。
只係懷念得一陣，12:45要返去還車了，踩多3km回到單車店已經差不多13:30，剛好3小時。還完車行1.7km去米芝連餐廳食下午茶。
Riley’s Fish & Steak – 米芝連推薦的高級西餐廳，14:00～17:00有抵食的Happy Hour餐酒和生蠔小食，啱晒我這些又想食好西又冇銀用的窮L。
House
Wine白酒(150ml 每杯CAD 9.2)
今日精選生蠔12隻(每隻CAD 2.6) – 沒有交代產地而且超細隻，入口鮮甜中帶點肉味，第一次吃這種味道的生蠔，很特別值得一試，但太細隻所以唔覺得十分抵食。
Spicy
Tomato Cream Mussels & Clams(CAD 23.5) – 這辣汁番茄青口大蜆好正，青口和大蜆都很鮮甜，蒜蓉法包吸了番茄辣汁非常好食，冇叫錯。
Wagyu
Beef Carpaccio(CAD 20.9) – 這道意式生牛肉又係一流，鮮嫩的生牛肉加上意大利芝士碎又香又夠肉味，伴碟的洋蔥圈和蒜蓉法包也香脆美味。
這餐下午茶真係唔錯，下次有機會可以再來。食完下午茶之後的節目，就係立即行1.5km趕去下一站食下午茶2.0，癲到呢～
Fanny Bay Oyster Bar &
Shellfish Market – 又係米芝蓮推薦的海鮮餐廳，又係主打食生蠔，這餐廳的生蠔有標明產地的，主要每日由溫哥華島的生蠔家族品牌Fanny Bay送到，加拿大咁乾淨，食多多生蠔都唔怕生蟲啦。Happy Hour期間，餐廳的每日精選生蠔(Featured
Oyster)每隻CAD 2.6，日日唔同視乎那一款蠔最多貨，另外更抵食的精選高級生蠔(Featured Premium Oyster)每隻CAD 3.6。
16:20趕到，店內唔少人但仍然有少量吉枱，Happy Hour還有個半鐘，可以用較Happy的價錢慢慢嘆。
門口放了大量活生生的蝦蟹和海貝類，標價仲平過Happy Hour，好彩冇立即叫一大堆嘆下啫，睇真啲原來係外賣價，差啲賴嘢～
House
Wine白酒(150ml～CAD 13)；Rosé(150ml～CAD 13)；Featured Oyster 12隻 (每隻CAD 2.6) – 今日精選生蠔的名字叫是Sunseeker，蠔身飽滿甘咸美味，餘韻帶點Belon的金屬味，很少食到這種味道，高質好食。
特價生蠔的味道已經咁正，小太熊只吃了3隻，我隊完9隻仲未夠喉，試吓其他大隻的生蠔。
Fanny Bay Medium Oyster (每隻CAD 6.5) – 只要了2隻，體積最少是剛剛的乘三，這蠔非常之甘甜爽口卜卜脆，蠔味鮮濃，今日最好食係呢隻。
Featured
Premium Oyster 6隻(每隻CAD 3.6) – 再加碼試多6隻，同樣是Sunseeker但大一倍，味道冇變，雖然稍有比不上Medium Oyster，但最抵食。
食完2餐下午茶，食唔落晚餐了，早點回Auberge
Vancouver Hotel休息，明天晨早租車去溫哥華島玩4日。
出前一丁黑蒜油豬骨湯麵(CAD 1.1) – 回到酒店煮個麵沖杯奶茶做宵夜，食太多生蠔個胃都幾虛，加個湯麵舒服好多。
補充資料 :
1. 持有HKSAR護照進入加拿大不須要簽證，但入境前要先在網上申請ETA(Electronic Travel Authorization)，費用CAD 7，每次入境最多可停留6個月。
2. 在HSBC換現金CAD
1=HK$5.713 。加拿大很流行信用卡，今次旅程95%是俾信用卡，Visa
Card滙率大約CAD
1 = HK$5.76。
3. 加拿大的電壓是120V，一般使用雙扁直插頭或者一圓雙扁直插頭。
4. 在加拿大餐廳或商店消費也要額外再附政府稅項(每地方也不同，一般收6～12%左右)和服務費(15~25%左右)，有關費用不會顯示在價錢牌上，要到最後附款時才會知道實際數目。一般情況下，把見到的價錢再加30%便是最後需附的費用。
5. 文中列出的價錢已經包括所有稅項和服務費。
6. 溫哥華的公共交通卡叫Compass
Card，主要可用於SkyTrain、巴士和SeaBus，類似香港八達通，90分鐘內轉乘SkyTrain、巴士和SeaBus不會再收一次車費，先買卡再儲值，比單次付費划算。另外也有單程票和DayPass這類選項，適合短期旅客。Compass Card可在車站自動售票機、客服中心及7-Eleven購買，按金CAD 6元，退卡時可退回。因為我的停留時間短，所以只是每次用ApplePay入閘。
7. 在Urban Waves Bike
Rentals租單車可以在還車時才按時間才計數，租用1hr
– CAD 12.6；3hr
– CAD 24.2；6hr
– CAD 33.6；全日(09:00-19:00) – CAD 47.3。
8. 温哥華有啲區域治安很差唔適合旅客去，例如Downtown的東部，唐人街入夜之後，特別係East Hastings Street，日間也滿佈海量流浪漢，十分可怕。
---待續---
沒有留言:
張貼留言