越南 越戰三晝夜(完) – 解放胡志明市 凱旋而歸

胡志明市 濱城市場

濱城市場是胡志明市的地標，位於第一區的大型室內市場，也是西貢時期少數保留至今的建築物，市場内有大量地道小食、手工藝品店鋪和乾濕貨檔口。濱城市場在 17 世紀早期已經開始成型，最初只是街頭小販聚集在西貢河附近，最後於1859 年由法國殖民政府正式建立。

越南 越戰三晝夜 – Day 4(完)

<<胡志明市>>

繼續Day 4銀彈空襲行動。食完Kem Bach Dang雪糕，又行幾個街口，到達 越戰三晝夜 第26個進攻地點 – 濱城市場。濱城市場位於胡志明市第一區市中心，是個典型的大市場，內裡有齊乾貨、濕貨、水果、茶葉、地道越南小食灘檔等等。由於市場都幾大，小太陽參觀了45分鐘。

濱城市場入口很有睇緊花樣年華的感覺。

濱城市場內的菜檔

濱城市場內的各類食店，雖然好想試，但自已個胃實在太細，要留肚。

果乾糖果的款式都唔少。

濱城市場內的水果檔，買個榴槤即開即食。

越南榴槤(重1kg – VND 85,000) – 即場在街市食，味道十分香濃，肉質Creamy不太甜，好好食。

濱城市場外的魚檔，冇乜靚魚，最靚只見到青斑。

市場外的馬路非常之多電單車，要過馬路真係有些難度。

從街市沿大路步行到西貢河，途經 越戰三晝夜 第27個進攻地點 – Nhu Lan，買了半條 法式三文治試試。

小食店Nhu Lan

法式三文治半條(VND 20,000) – 食落都幾外脆內軟，配料都好味，但味道不及2日前在Trai Mat火車結那一條法式三文治，而且價錢貴1.7倍。

小太陽沿西貢河步行，由於天氣太熱，於是走上對面馬路間 越戰三晝夜 第28個進攻地點 – Breeze Sky Bar嘆返杯可樂加冰。

從Breeze Sky Bar可望見西貢河，飲杯可樂加冰消一消暑先。

飲完可樂，小太陽乘的士(Mai Linh Group) VND 27,000到 越戰三晝夜 第29個(最後一個)進攻地點 – Tib Restaurant。

Tib Restaurant – 食順化菜的餐廳，連前老美一哥Mr. Bullshit都佢係坐上客，可想而知佢有幾得。

進入門口之後原來還要行一大段橫街窄巷。

穿過條長長的小港，才是Tib Restaurant的真正入口。

行入大廳便見到Mr. Bullshit張相。

Tib Restaurant像間中式酒樓

冰凍椰青(VND 40,000) – 幾清甜。

越式蒸餅(VND 65,000) – 餅底夠煙韌有米香，伴上的蝦乾碎非常香脆有蝦味，加上魚露同吃，美味可口到極點，不可不吃。

越式烤肉蒸粉卷(VND 70,000) – 粉皮夠滑又夠韌，包着炭火蜜糖烤的豬肉和青菜同吃，又是一款美味可口，不可不吃的經典越南小食。

炸蟹鉗(每件VND 95,000) – 非常貴，而且味道只係一般，上個月在又一城翰騰閣吃的炸蟹鉗好食好多。

炸糯米糕(VND 85,000) – 似炸年糕，幾特別，值得一試。

甘庶蝦(每件VND 85,000) – 又係貴嘢，伴着青菜用米紙包着一齊食，味道雖然不算出衆，但好過炸蟹鉗，值得一試。

魚扎肉湯(VND 95,000) – 普通貨式，試過就算。

吃完餐飯便完結 越戰三晝夜 行動了。乘的士回酒店攞行李，再去機場，乘19:10航班回香港。

最後去到胡志明市機場的離境大堂，發現可以用 VND 20,883換回 USD 1。那麽我昨睌在金舖用USD 1換VND 21,070，再在機場換回美金，每USD 1便可賺VND 187了。

返到屋企已是零時，在露台看一看香港的夜景，始終都係屋企最舒服。

今次在短短 72小時內成功攻陷了南越的 山城大叻及胡志明市，把當地最有特色的食物和景點全部據為己有，凱旋而歸。

未出發前聽很多去過越南的人都話越南冇嘢玩，又熱又悶，啲的士又衰，成日兜路，所以開始時冇乜期望。但現在總結整個行程都算好玩又好食，越南的士其實唔算太差，因為全世界的士都有兜路和唔識路的情況，包括星加坡和日本。而且越南人整體上都很有禮，治安亦唔錯。

下次一定帶備更多銀彈再戰越南，到時必定能一舉统一南北越。

 

-----越南 越戰三晝夜(完)-----