越南 越戰三晝夜(8) – 攻陷 胡志明市

越南胡志明市 – 西貢聖母大教堂

越南西貢聖母大教堂是 天主教胡志明市總教區的主教座堂，高58m，位於胡志明市中心，教堂所用的紅磚全部從法國進口，直到今天仍然沒有褪色。教堂建於1880年，採用法國式教堂的設計，兩座鐘樓及教堂前的聖母雕像具有濃厚的歐陸風格。據報導，在 2005 年 10 月聖母雕像曾流出眼淚，吸引了數千人圍觀。

越南 越戰三晝夜 – Day 4(完)

<<胡志明市>>

最後一日，要爭取有限時間，在僅有的最後 9個鐘向胡志明市作出最後的銀彈空襲，把胡志明市最好的一切攻陷佔據。昨晚睡足5個半鐘，今早06:30起身，Check-out後立即過對面馬路的Pho 24進攻。

越戰三晝夜 第20個進攻地點 – 胡志明市 Pho 24

Pho 24是間開24小時的越式河粉連鎖店，最近在香港也開了分店，在胡志明市內算係薄有名氣，見佢近近哋，所以來食早餐。

晨早的Pho 24完全冇客，店內亦好焗。

越式生牛河(VND 42,000) – 只係普通湯河一碗，完全冇特色，內陸機場吃的那碗好食好多。

越式雞絲河(VND 42,000) – 普通過我的普通話的普通粉，浪費Quota。

唉! Pho 24唔掂，白白浪費個肚的有限空間和有限的銀彈，早知去 濱城市場隔離，連前老美一哥 乞淫頓都去過果間Pho 2000食。

食完碗普通河之後回酒店食自助早餐，只飲了些水和果汁便再出動。

在酒店乘的士(Vinasun)VND 56,000到 西貢聖母大教堂。

晨早08:00已滿街電單車

08:15到達 越戰三晝夜 第21個進攻地點 – 胡志明市 西貢聖母大教堂。

西貢聖母大教堂 – 建於1880年，外觀宏偉，內裡較普通，不及歐洲教堂般華麗，而且四周馬路都很繁忙。

行完教堂，走過對面馬路便是 越戰三晝夜 第22個進攻地點 – 胡志明市 中央郵政局。這座郵政局建於1886年，現在仍然運作，寄一張Postcard回香港要VND 10,000。內裡有找換店，牌價同樣是官方兌換價 USD 1 = VND 19500。此外，亦可以越盾換回港幣，但很奇怪，個兌換價比金舖 VND 2700兌HK$ 1更好。

胡志明市 中央郵政局

在郵局內寫張Postcard寄返屋企做記念品。

VND 10,000寄Postcard回香港，但收唔到。

官方兌換價USD 1 = VND 19500

離開郵局後步行到附近的 越戰三晝夜 第23個進攻地點 – 胡志明市博物館。

今日好熱，行到身水身汗。

胡志明市博物館 – 館內展示了些越戰時的飛機大炮和越南的故事，入場費VND 15,000。

越戰F.5戰鬥機

仲有直升機和坦克車。

參觀了30分鐘後，行過對面馬路間法式Café 越戰三晝夜 第24個進攻地點 – La Fenetre Soleil 坐一坐，休息一會。這間Café有很多網友強列推介，話裝修靚、有Home feel、價錢平、食物質素高。所以小太陽特地來參觀一吓，也試試這裡的法式甜品。

從這木門進入，再上一層樓便是Café La Fenetre Soleil。

Café La Fenetre Soleil – 確係好靚，可惜坐在窗邊唔夠冷氣，熱到有些標汗。

人客唔多，如果夠冷氣是很好坐的。

凍咖啡(VND 45,000)；芒果波籮奶昔(VND 60,000) – 品質中上，但唔覺價錢平。

法式焦糖蛋布典(VND 55,000) – 又滑又甜又有蛋香，好食。

法式多士(VND 70,000) – 味道一般，而且幾貴。

咁就食了廿三萬，好多個月人工啊。

原本對這間Café La Fenetre Soleil印象唔錯，但不知為何有個待應一見我舉機就話No Photo，前後總共說了3次No Photo，又冇禮貌態度又差，遊客上來坐唔影相唔通剩係焗桑拿和食你啲貴嘢嗎，劣劣劣。。。。。。

食完甜品，再行幾個街口，到達 越戰三晝夜 第25個進攻地點 – 雪糕店Kem Bach Dang。又係網友強列推介的另一甜品店，在冇乜期望之下上二樓試試。

雪糕店Kem Bach Dang

坐在Kem Bach Dang二樓，邊吃雪糕邊看緊忙的街道。

椰子雪糕(左)(VND 70,000)；榴槤雪糕(右)(VND 55,000)

椰子雪糕 – 香、滑、椰子味濃，奶味和甜度較低更能食到椰子的鮮味，每種味度均異常地配合，是一客完美的 椰子雪糕，假如冇晒Cream和水果就更完美，一客小太陽食過最好食的 椰子雪糕。

榴槤雪糕 – 單看外貌已知絕非凡品，品質之高已完全不能用價錢衡量，能附出這麽少便能吃到這人間極品，開始感受到 胡志明在天之靈是如何照顧他的人民。為了這 椰子雪糕和榴槤雪糕，我會再來 胡志明市。

 

---待續---