緬甸的天與地(3) – 佛 • 普渡衆生@曼德勒(Mandalay)

緬甸曼德勒 – 過千和尚無聲地排隊攞飯和食飯，全程不發一言！！

每天早上10:00，緬甸曼德勒市郊的寺廟Maha Ganayon Kyuang內上千個和尚都會空群而出地排隊、攞飯、埋位、食飯，然後離開，但係你不會聽到他們在過程中講半句話，他們每天都靜俏俏地重覆這過程，變成了緬甸一個最令旅客感與趣的修行習慣。

緬甸的天與地 – Day 3

<<曼德勒(Mandalay)>>

昨晚租不到車，唯有今朝早些起身揾車啦。04:30起身，05:00落樓下揾車，但冇的士，只有架電單車在等客，我問價啦，去Mandalay Hill睇日出來回酒店(總共行約14km，租3個鐘)，司機開價Kyat 15,000 (約HK$150，比網上的資料市價貴HK$110)，但我瞓到儍吓儍吓的情況下對耳聽到Kyat 15,000但個腦就計少了個零，以為好平，價都冇還就話OK，最後返到酒店比錢時才發現自已計錯數。。。。。。Oh!!!on9呀!! 不過個司機服務態度又真係好好。

就係坐呢部電單車了，架車可直達山頂，坐的士就要在山脚行半粒鐘上山。

Mandalay Hill山頂的金塔和佛像

05:30已上到山頂，仲有40分鐘至開始天光，入鄉隨裕拜吓佛先。

06:10開始天光了，越來越紅，這裡的日山不算頂級，但都值得瞓少3個鐘上來看看。

勢估不到，在山頂只遇到一班强國人，卻一個老外都冇，看來强國用銀彈佔領鄰近地區已是大勢所趨，不得不接受的現實。

曼德勒市(Mandalay)的全貌

太陽在07:00從對面山走出來，由於時間緊迫，要立即落山行多一間佛寺 – Sandamuni Paya，呢間寺位於山脚，內有很多白色佛塔，係市內較有睇頭的一間佛寺。

Sandamuni Paya看下半場日出

Sandamuni Paya內的白塔和黄金塔

臨走又拜一拜佛啦

08:00返到酒店Garden Hotel，比錢司機時才驚覺自已計錯數，唉。。。。。

Mandalay市Garden Hotel

酒店包了早餐，餐廳和食物都OK。

有雙蛋、多士、蜜瓜和奶茶。

早餐雖然好食，但想起自已今早大意租了超貴車，心內總覺有種凄凄、慘慘、戚戚的感覺. . . . . .

早餐後租了部雞車一日，去Amarapura睇和尚食飯，再去Inwa，跟住去機場，都要成Kyat 28,000，唔知點解我租極都貴過其他人在網上講的價錢。

租了這部車，要打橫坐在後面食塵架，時間緊迫，租唔到正經的士。

08:30從Garden Hotel出發，25分鐘便到Amarapura，司機先帶我去一間製Longyi的纺織廠參觀。

廠內的女工都做得幾開心喎

我09:30準時到寺廟的飯堂，但原來10:00不是開飯時間，係開始預備飯菜的時間，要到約10:30和尚們才正式開始排隊攞飯。所以我到時還是靜靜的。

曼德勒市郊寺廟Maha Ganayon Kyuang的飯堂

10:00已看見旅客人山人海等睇和尚開飯

大小和尚們開始攞住個砵去行去排隊

大和尚們預備白飯

除了和尚預備白飯 ，善信也捐出不少物資和食物，有水果、糖果、日用品等等，陣間一次過分比大師們。

濶太善信們正在拆開自已捐來的糖果

大師們在飯堂內分餸，有一味係雞泥架，仲人人有份添。

呢枱圓枱係得道高僧坐嘅，見佢一邊食一邊有善信在跪下拜佢地，好鬼威架。。。

約10:30預備好晒之後，善信們開始預備派飯了。

大師們亦列好隊等攞飯，待飯鐘一响便開始。

On your mark . . . . . . . .Set . . . . . . . . 噹!!!!!!!!! 鐘聲一响，起步。

眾人都快手快脚派飯攞飯，因為成千人排緊隊。

千人赤脚排隊攞飯，壯觀呀。。。

很多大師們都閉目養神，完全唔會理外邊的世界，只係一心一意攞飯。正式啋你都儍。

千人靜靜地食飯

呢位就係得道高僧了，好多人跪低拜佢架，威過奥巴馬多多聲。

由響鐘攞飯開始到大師們食完散場，整個過程只係約25分鐘，快到無輪。

補充資料 :

1.    Mandalay景點聯票(Combo Ticket)每位USD 10，但我冇買，因為我只在Inwa一間寺廟Bagaya Kyaung入場時有人要我買，我最後冇入去。

2.    在Mandalay市租一日車，去Amarapura、Inwa再去機場，開價Kyat 35,000，最後成交車費 Kyat 28,000。

3.    進入所有緬甸寺廟都要赤脚，Mandalay Hill和山下的Sandamuni Paya都勁多積，行完對脚底黑晒。

4.    睇和尚食飯10:00去到剛剛好，可以09:30才在Mandalay市出車。

---待續---