樂天無價 寮國 • 越南(完) – 別離 河內

越南河內大教堂

樂天無價 寮國‧越南 – Day 5(完)

<<河內>>

今早06:00起身，專程從酒店Hotel Metropole Hanoi行15分鐘再到大教堂走一趟，因為書話教堂入面好覩喎。書又話開放時間只有05:00 ~ 07:00和17:00 ~ 19:00兩段喎

06:45入到去燈都冇開，只有十幾個亞毛唱聖詩，坐了一陣07:00便又關門，冇乜野睇，早知繼續瞓。

返酒店又路經歌劇院

朝早酒店的泳池

在酒店隔離檔河粉店食早餐先

牛肉湯河(VND 30,000) – 全無名氣的小店都賣這麽貴，好彩都幾好味。

太累了，食完野返酒店瞓到11:00至再起身執野走。把行李放在酒店，今日再行一個中午。

離開靚酒店Hotel Metropole Hanoi了

今日想坐下三輪車，但真係唔知價，2009年版的Lonely Planet話每粒鐘只收VND 40,000，如果坐兩個人就要加錢，所以我預比八至十萬盾諗住坐一粒鐘。

酒店對面剛好有架三輪車，我問佢價佢話要VND 400,000 ~ 1hr，佢都有病嘅，我掉頭就走，跟住佢自動降價至300,000 ~ 200,0000 ~ 150,0000，我冇再理佢繼續向還劍湖方向行。

中午的還劍湖，今日天灰灰。

去到湖邊很多車，車伕們大致都係想收1hr ~ VND 150,000，只有一個車伕話VND 100,000 for 1hr都OK。成交之後，佢話只包在舊城區內行，但我其實想去目的地係西湖旁的 竹帛湖，於是同佢講，佢又話太遠，要VND 150,000至肯去。唉，只係4km都多多聲氣，我自己行路算了。我話唔駛啦唔該，佢又話OK!OK!OK! ，真係麻X煩。

三輪車開行了，在電單車羣中穿來插去，幾剌激好玩架。

三輪車行了15分鐘，到了舊街羣中一條廢棄的火車軌，落車行個轉先。

路軌兩旁都係民居，幾有特色喎。

睇完火車軌上車繼續行，路經Flag Tower想話落車影張相，車伕話closed喎，都唔知堅定流。最後條車伕一口氣踩到行，飛咁快就去到 竹帛湖邊停了車一幅收工樣，由上車到目的地只係用了40分鐘，算了，當益吓佢，照比VND 100,000。點知條 北漏逗like話VND100,000只係一人價，兩個人要VND200,000喎，怕事嘅小太熊叫我比VND 150,000佢算啦，原本如果佢服務好我真係唔介意比多兩三萬開心錢佢，但條友太衰了，唔足鐘仲想屈水，我即時收起友善的微笑，目露兇光地說「VND100,000 is for two person」， 照比張十萬蚊紙佢，條 北漏逗like居然唔接啲錢仲拎轉面，我便把錢掉到車上然後一路媽佢一路離開。

賤車伕是這次行程遇到唯一的壞人。

落了車行過附近間 真武觀(門票VND 2000)。

真武觀 – 普通一間道觀，冇乜特別。

跟住沿西湖和竹帛湖中間的小路行去海鮮店 – Banh Tom Ho Tay，“閃閃書”和“飲食男女”對佢的評價都係又平又靚，所以小太熊把這午餐定為河內重點節目。

Banh Tom Ho Tay – 河內著名湖伴海鮮店，有湖伴位剩呀。

肉蟹1kg ~ VND 600,000 (上年2010年12月在胡志明市只係VND 240,000)，水草重要鬼死甘粗，差不多等於每兩HK$11，貴到儍。

這隻肉蟹重700g

蟹肉粟米湯(VND30,000) – 平平無奇只有六湯匙勁細碗，但貴到離普。

西湖蝦餅(VND 35,000) – 用西湖產的蝦毛仔(最長3cm)加脆粉炸成，普通到暈，不試也吧!

西責春卷(VND 70,000) – 香港的越南餐廳肯定炸得好味過佢。

鹽焗肉蟹(VND 420,000~700g) – 蟹肉唔夠甜，中下貨式但超貴。

結論係Banh Tom Ho Tay呢間野唔值得為佢浪費時間。

食完海鮮試試隔離間雪糕店

椰子雪糕(VND 5000) – 雪糕OK個蛋筒都夠香脆。

行到西湖伴見到有Local人唔用魚餌釣魚，但原來真係釣到大魚架。

西湖 鎮國寺

行完鎮國寺，順時針沿 竹帛湖行一個圈，路過一街市，都好多野賣。

本來想在 竹帛湖伴食埋河內特產蝸牛就散，點知幾檔賣蝸牛的食店都轉了賣高檔海鮮如生蠔、花蟹、扇貝等等，唔再賣蝸牛了。。。。。失望，唯有慢慢行返舊成碰碰運氣。

沿途都見到河內市很多舊建築物

又回到舊城36古街了，今日依然大塞車。

每個本地人或遊客都係這樣過馬路架

行行吓，比我發現一檔和蝸牛差不多的田螺店，不過好細隻但平幾倍。

檸檬葉煮田螺(VND 20,000) – 味道幾鮮甜，如果大隻就正好多。

特制鐵片比竹籤更硬更好用

河內市最後一擊，到名咖啡店Moca Café試一試。

凍牛奶越南咖啡(VND 59,000) – 飲完個口會有酸味的劣貨，垃圾。

飲完咖啡返酒店攞行李，酒店替我截了架的士(Hanoi Tourists Taxi)，車身寫着每 1km ~ VND 13,200，但酒店職員說去機場只須比USD 16司機便行了。的士行了31km，咪標跳了VND 410,000，我比了VND350,000 (約USD 16.6)司機便落車，又OK喎。其實到最後我都唔知D的士價點計。

在機場禁區吃了碗蝦肉菜河粉(VND 139,000)，有好多菜蟲呀。

返到香港已經23:00了，瞓5粒鐘又要返工。。。。在香港生活，要做到像寮國人一樣樂天真係好難，又要捱了。。。。

補充資料 :

1.    河內的三輪車叫價都唔平，如果當係點對點的交通工具比的士貴一倍，但都幾好玩。我覺得在舊城區自已行好過坐三輪車，返而在西湖和竹帛邊更適合坐三輪車。

2.    我覺得竹帛湖伴的海鮮店Banh Tom Ho Tay又貴又唔好食，雖然“閃閃書”和“飲食男女”對佢的評價都係又平又靚。

-----樂天無價 寮國‧越南(完)-----