東京 近郊提案(2) – 攻山之旅@神奈川 大山

日本神奈川縣 大山山頂(高1251m)

日本的 大山位於東京近郊的神奈川 伊勢原附近，只有1251m高，從巴士總站來回山頂行一轉約須5hr，整段路都是急上急落，極少平路，沿途經過 阿夫利神社，可以順道試埋當地的 手製甘酒和豆腐料理，幾適合即日來回東京的行山旅程。

如果真係有緣去到大山就多些幫襯山下那些小店吧，否則真係怕佢哋會執笠，永遠再試唔到這些當地的本土特色。

東京 近郊提案 – Day 2

朝早在酒店浸完溫泉食完早餐後，乘酒店的免費接駁巴士到 熱海駅。到站時，大頭蝦小太熊特然發現漏了個Video Camera在酒店，慘了，我又做漏嘢臨走時冇跟一次，害小大熊又唔見嘢，於是立即坐的士回酒店，好彩搵得返。

這麽一阻，遲了起步行山啊，要行快啲至得。

從熱海乘JR往 伊勢原，車費￥1560，車程55min。

<<伊勢原>>

10:30到達 伊勢原市，在火車站附近行行街先。

U乜加仙介紹了火車站附近這間小店「めで鯛や」，裝飾得像玩具店，內有一款 紅豆鯛魚餅 賣，記者吹到好好味，所以順道來一試。

「めで鯛や」 – 專賣軟雪糕和格仔餅等小吃

紅豆鯛魚餅(10件 ￥290) – 還熱的，甜甜哋真係幾好味，像香港的街頭小食。

跟著到火車站附近的 咖哩豬扒人氣餐廳<麻釉>食午餐，食飽至有力行大山。

咖哩豬扒飯(￥1300) – 勁大碟2個人都夠食，咖哩汁㡳好好味，小辣，豬扒炸得很鬆化，可惜冇乜肉味，而且唔係原塊豬扒來的，是用豬肉片一層層疊厚再炸，失了分。

烤汁豬腩肉飯(￥750) – 豬肉味極濃，烤汁亦好好味，連飯底都勁正，必吃。

食飽飯乘No.10巴士往 大山，車費￥310，車程25min。

巴士站位於 伊勢原駅北口

總站落巴士後行去今晚的旅館放下行李，立即開始行山。

12:30從這 大山山腳起點出發。

首先會穿過商店街，那裡真係遊客唔多，商店都冇乜生意，很慘。這裡有很多 豆腐專門店，可以食完至上山。

在這裡有2條路可以上山，我選擇了行女坂上山，由男坂下山。

女坂路段相當元始，空氣都很清新。

嘩！毒蜘蛛，被咬一口今年就可以和天父一起過新年了。

沿途都有很多 泥菩薩照住啲行山客，實冇意外啦。

很多泥菩薩的屋企都荒廢了，佢地原來都自身難保。

沿這天梯上到頂是 大山寺，行男坂就冇得睇了。

大山寺 – 日本所有寺都是同一個樣子。

13:10上到 阿夫利神社下社，不停上了40min，可以在這裏休息休息。

神社內有很多小茶屋，售賣一種手製的 熱甘酒，是一種米酒，甚有本土特色，但我當時醒唔起on99冇試到，攪到小太熊話我冇用。

阿夫利神社下社 – 完全冇人，實在寧靜得過份。

在神社內看見這幅行大山的地圖

13:30 在神社旁邊開始登山，行90min便到山頂。

從 阿夫利神社下社開始，山路分段為28段，從1丁目開始，山頂是28丁目。

上山的路不斷上、上、上.....，完全沒有平路回氣，還有點雨粉，全身濕到透。

山上有很多巨形的的杉樹，氣氛亦有些陰森。

行到8丁目了，這巨杉樹名叫 夫婦杉，聽講話已經600歲了。

越來越似進入了鬼域，加上氣溫很低，感覺陣陣寒氣飄來。

20丁目的 富士見台，天氣好的日子可以望見富士山。

差不多到山頂了，在這裡小休一會，再上埋條樓梯便到。

進入這神社門口便到達山頂範圍。

大山 山頂上的 阿夫利神社本社，原來已經荒廢了。

山頂上的茶檔都唔開門了，遊人實在太少。

15:00上到山頂，這裡可以看到見壯觀的 富士山，但今日大霧所以乜都冇。

在山頂停留了一陣，見冇咩好睇便落山，落山用了1hr45min，唔係快上山好多。

16:45回到山腳下的購物街，商店全都關門了，只有幾間店還在關門中。

在這小店食 豆腐軟雪糕(￥260) – 幾清香軟滑。

今日住的「旅館あさだ」，位於山徑的起點，非常方便行山，店子小小有些像民宿。

旅館あさだ 的大堂，傳統的日式大宅。

和式雙人房(連雙人晚飯 每晚￥28080) – 有個面向花園的小露台，可以一邊聽着流水聲一邊品茶。

房間外面是個小花園，晚上可以聽着流水聲睡覺。

旅館あさだ  有個私家戶外浴池，每間房也可以免費預定45min，另外有一個室內公共浴場。

剛行完山全身臭到嘔，立即訂17:15-18:00的私人浴池洗個澡先。

「旅館あさだ」的 私人露天熱水浴池，環境都好好，被樹林圍繞著。小太熊話係普通熱水來的，因為這區冇溫泉架。

由天光浸到天黑，夠鐘開飯。

18:00開始在地下飯廳食晚飯，今晚又係包場。

飲品不另收費，小太熊飲冰烏龍茶，我飮清酒。

前菜有梅酒和地道的冷豆腐，甚有本土風味。

日式燉蛋很香滑有蛋香。

刺身有吞拿魚、章紅魚和蛋卷，比想像中新鮮，有水準。

豬肉雜菜火鍋 – 失望，冇乜豬肉味，而且肉質鞋口。

燒河魚 – 以為唔好食，但原來又OK喎，好味過在 高山市吃的燒河魚。

最後食碗飯，完全補充今天消掉的energy。

飯後甜點有 布甸和雪梨，好食既。

飯後去公共浴池再沖個涼。

今日又係好攰，瞓得好舒服。

補充資料：

1.     乘JR從熱海市到伊勢原，車程55min，車費￥1650。

2.     在伊勢原駅北口乘No.10巴士往大山登山口，車程25min，車費￥310，20-30分鐘一班車。

3.     從大山登山口來回大山山頂約須5hr，全程都係上斜落斜，冇平路。

-----待續-----