東京 近郊提案(1) – 熱海 煙花溫泉樂園

東京近郊 熱海市 – 2015年9月的煙花晚會

和小太熊約好了，做多2年多少少便一齊退休，遨遊世界。其實做了這麽多年嘢，身心都相當疲倦了，慳慳地應該夠我地繼續去多十幾年旅行的，最希望有健康的身體迎接未來貧窮的光輝歲月。

東京 近郊提案 – 序

心情真的很差，差到連旅行都唔想去，唔去死都冇用，幸好小太熊一早已買了好多機票，佢話要禾開開心心同佢去日本玩3日，乜都唔好理，玩完至算喎，小太熊真係乖。但要開心講就容易，其實開心同發達一樣，唔係你努力和附出後就會有，佢只會出現在少數幸運的人身上。

今次只係去東京3日，短短哋去唔到遠的地方，所以選了些即日來回東京的地點，浸吓溫泉行吓山，平平淡淡做吓運動食吓嘢，是是但但都要離開香港過3日，等將來死咗之後，都叫做多3日在旅途上的記錄。

2015年9月的3天東京近郊行山溫泉旅程路線

Day 1

凌晨坐香草航空飛東京，到埗後即往築地食早餐。

食完早餐坐火車去 熱海市，行街食飯後便到酒店「熱海後楽園ホテル」check-in，在酒店浸溫泉食晚飯，再食和牛做宵夜。飯後看煙花。

Day 2

朝早食完早餐後乘火車往 伊勢原，午餐後行上 大山山頂，來回約須5hr，落山後住山腳的「旅館あさだ」，在旅館吃飯。

Day 3

早上在旅館附近吃豆腐料理做早餐，然後返回東京，又食又買，最後乘21:15班機回香港。

出發前一日要返全日工，放工後立即回家，沖個涼瞓陣先，因為要乘凌晨機。

今天屋企看到的日落好靚。

瞓到21:45，跟著慢慢乘地鐵加巴士往機場。

今次坐cheap嘢香草航空，但每位都要成HK$2489。

在機場禁區的Plaza Premium Lounge食完免費晚飯才上機。

東京 近郊提案 – Day 1

遲了半粒鐘，要02:15才起機，上機立即瞓覺4hr，07:25才到達 東京成田空港，遲到20min啫，OK喎。

因為冇大行李，可以最快地從空港乘火車到 東銀座(每位￥1330，車程76min)。

東銀座位於 築地市場附近，出站行一會便到。

<<東京>>

  

早上09:30到達 築地市場了，但咁遲至到冇拍賣睇了，只能行吓街市。

原本小太熊想食 壽司大的，但超級多人，我們排了半粒鐘條隊只前了幾個，冇3hr都唔會排到，決定放棄 壽司大了，小太熊話下次凌晨04:00再來排過，下次實有位的。

人氣最盛的 築地壽司店<壽司大>，條龍長到轉晒彎。

附近的壽司小店都排了很多人，死火，要趕11:30前離開築地架。

最後選了這間 磯壽司，排了10個人左右，應該半個鐘有位啦。

小太熊就好乖咁排隊，佢叫我四處行吓呀散吓心呀。

築地市場外的雜貨店，有新鮮山葵賣。

賣雞蛋制成品的小店。

原來拍賣場旁邊是街市，都好旺架，海產種類亦很多。

嘩！香港街市都有咁靚嘢賣便好了。

自己一個行了30min，返回 磯壽司，剛好有位了。

磯壽司 店子很小，只能迫迫地坐11個客，幾有Home Feel。

冷清酒180ml(￥789) – 清清哋送吓壽司啦。

小太熊點了￥4460(￥3780加埋8%消費稅和加一後)的12件套餐，記得上次來築地吃的壽司極好味，今次期望好高呀。

先來4件壽司，分別係 三文魚子、海膽、鰻魚和秋刀魚。

秋刀魚和鰻魚的質素......和香港吃到的差不多咋，三文魚子太咸冇乜油香，海膽仲衰，腥腥哋的，拍得住元氣啊，頂.....

其餘的8件都正唔過香港的貨，失望極了，連相都冇心機影。

我order的吞拿魚壽司餐(￥3760) – 共8件壽司加6件小卷

味道.......和香港吃的HK$200午市吞拿魚壽司定食差不多啦，以後唔再恨食築地了，地球上又少一處好地方。

懷着失望的心情離開 築地。

跟著從築地行路去JR新橋站，乘JR往 熱海，車程57min。

<<熱海>>

13:14到達 熱海駅，步出JR站便是典型的日本式購物區 熱海溫泉步行街。

商店都很大路，講真就冇乜睇頭了，叫做未去過去行吓啦。

熱海名物<熱海溫泉饅頭>  好吸引喎

黑糖豆沙溫泉饅頭(￥150) – 即係豆沙包，好味道的，啲包幾有質感，唔係太甜。

跟著去這間Café Kichi飲杯野坐一陣。

店內十分優雅，我們坐在小角落的二人枱。

自家製凍咖啡(¥670) – 普通味道；自家製彊檸梳打(￥670) – 冇驚喜；自家製鬆糕(¥460) – 很鬆軟糕味濃有咬口，正嘢；自家製芝士蛋糕(¥460) – 一般貨式。

這小店很好坐，但食物就一般。

沿途經過 熱海銀座，像死城多過似銀座。

順路行到Restaurant Scotts，原本想食埋佢最出名的西式燉牛肉，可惜中午截單的時間比網上資料早了半小時，14：30去到已經摸黃了。

Restaurant Scotts分店，另外有間老店位於街尾。

冇得食，便在附近再行一陣，行吓行吓又行返上火車站，然後隨手截架的士到酒店，小太熊今晚訂了熱海市的< 熱海後楽園ホテル>比我住，貪佢有向海的溫泉喎。

熱海後楽園ホテル雙人房(連雙人早晚餐，毎晚￥38490) – 是向內園的平房，向海貴好多。

在房間飲杯茶食些甜點後，即往溫泉浴場嘆一嘆。

熱海後楽園ホテル 的溫泉浴場 – 大展望風呂 海望の湯 入口

這是最靚的半戶外風呂 海望の湯，算係向海的風呂，合格啦。

酒店送的 下午茶，浸完溫泉到大堂的茶座休息食啲嘢。

話咁快又到17:30晚飯時間，酒店房間包了自助晚餐，個場激大，食物種類和味道都合格的。

熱海後楽園ホテル 大堂的晚飯廳

任食 松葉蟹腳、吞拿魚、池魚和鱆紅魚，都算好味道。

自助餐只吃了2碟便收工了，因為小太熊死心不息要食燉牛肉，於是行出去Restaurant Scotts再吃第二餐晩飯。

Restaurant Scotts本店，位於二樓。

很旺場呀，剛好有人走才有枱比我。

Set Dinner幾抵食，但太飽食唔落lur，只能散叫些招牌菜試試。

招牌菜 燉牛肉(ビーフシチュー)(￥2916) – 好淋而且牛味幾出的牛腩，汁底很襯那牛肉味，冇令人失望的一道特色菜。

特選西冷牛扒サーロインステーキ(120g)(￥6480) – Menu冇寫產地，但我吃一口已經食出係極品和牛，五成熟又香又淋，牛味和油香完全均等，非常香口好食，令人喜出望外。

非常滿意這餐晚飯，食完已經20:00了，行出海邊等睇煙花，20:20開始，只放25min。 

夜晚在海邊望返 熱海後楽園ホテル 都好靚，如果住向海的房便可在自己房間睇煙花了，唔駛同人迫。

海邊已經滿佈人頭，但未算十分迫人。

20:20準時開始了，很大形好靚啊。

熱海後楽園ホテル 大堂，在這處上陣網，房間上唔到的。

夜晚試另外一個 風呂 – みさき館 山望の湯

今日好攰，早些瞓了。

補充資料：

1.     香草航空 東京來回香港機票(不包括行李和餐飲) 每位$2489。

2.     ¥100兌HK$6.49。

3.     從東京 成田空港到築地 可以乘火車直往 東銀座，車費￥1330，車程76min，算是方便。

4.     從東京 往 熱海 可以乘JR，自由席車費￥3670，車程57min。

5.     從JR 熱海駅乘的士往 熱海後楽園ホテル，車費￥1260，酒店每30min有免費接駁巴士來往 熱海駅，只係我最初唔知。

6.     熱海市每月都有一晚放煙花。

-----待續-----