東京 近郊提案(完) – 賞味@東京

東京築地 中拖羅壽司

從前在東京築地，吃過世上最美味的壽司後，令我每次在其他地方吃完壽司後也懷念築地那份使人感動的味道。

今次小太熊再帶我到築地，卻只是吃到和香港質素差不多的壽司，實在大失所望，估不到連築地現在也保持不了那份感動的美味了....可惜可惜。

東京 近郊提案 – Day 3(完)

<<伊勢原>>

今日是最後一日，旅館不包早餐，所以我們一早08:00行出旅館搵食。

早上整條商店街像死城一樣，只有一間餐廳剛好開門，好彩。

大山 山腳下一間吃鄕土豆腐料理的專門店。

店子面向着河谷，環境非常清幽。

冷奴(￥390) – 即係冷豆腐，黃豆味唔夠香，亦唔算滑，香港吃的豆腐好味好多。

豆腐料理 楓膳(￥1750) – 有齊山菜豆腐、湯豆腐、卵豆腐、二色豆腐田樂、湯、前菜和飯；味道一般一般啦，叫做一試當地的鄉土菜式。

手作豆腐雪糕(￥430) – 似綿綿冰，味道很清香，唔錯。

食完早餐執嘢離開，坐No.10巴士(￥310)返 伊勢原駅，再轉 小田急線返 東京新宿(￥590)。今日Target了幾間餐廳，逐間試試。

<<東京>>

第一間餐廳位於 新宿住友大廈

太早未開舖，於是上大廈的頂層展望台看看東京市，免費的。

11:30開門了，位於52/F的和牛專門店 新宿瀨里奈。

閃閃書話這裡有最頂級的神户牛供應，所以我很想可以在這裡找回2年前在 神戶市吃到的味道。

這裡吃牛可以選擇火鍋或鐵板燒，我選了鐵板燒，好味啲嘛。

新潟熱清酒(￥864) – 送牛肉味道最夾。

我地2個人只㸃了一份Lunch Set C (￥6490)，有齊 鵝肝、不標明產地的 和牛西冷、前菜、沙律、燒野菜、白飯、麵豉湯、雪糕和咖啡；另外再加 特選神戶牛西冷150g(￥18880)，即係100g要HK$815，都非常貴，上次在神戶食個Set有160g神户牛只是收￥10000。

大廚把所有主菜份量平分兩份給我們，而且沙律、前菜、湯、甜品等等都送多一份比我們，都很好啊。

前菜平平無奇

沙律特別普通

小食 煙吞拿魚 很一般

我們吃前菜時，大廚開始煎鵝肝了，好香啊！

煎到兩面都金黃香脆，約7成熟。

最後替我們cut開4份，每人分到2細件啊，真細心。

鐵板煎鵝肝 – 水準頂級，非常香口美味，送酒一流，只得少少份量更係勁吊癮。

食完鵝肝，開始食主菜了。

大廚先介紹我們今日的order，右邊是100g套餐和牛西冷，左邊是另加的150g神户牛西冷，牛油是起鑊用送的。

大廚熟鍊地把牛扒放在鐵板上，工架十足。

煎時要灑些鹽和黑楜椒吊味

煎至一面微燶約三成熟便返轉再煎另一面

大廚最後把2件牛扒切開並平分2份

左邊是 套餐和牛西冷，是好味道的牛扒，這個價錢唔貴；右邊是 神户牛西冷，牛肉味和牛油香十分平衡，肉質鮮嫩，完美的口感和味道，是最頂級的神户牛，雖然很貴，但值得。

食埋白飯飲埋湯，仲未夠飽喎。

吃完主食後店員請我們到隔離的水吧飲嘢，可以欣賞着東京的全景下食甜品。

鮮奶咖啡 – 味道就一般，景觀就一流。

錄茶雪糕 – 好得。

食完半餐午餐後再四圍搵食，住友大廈最頂幾層有很多天空食府，最後㨂了壽司店，因為在築地未能吃到好嘢，所以真係好希望可以食餐靚壽司才回家。

選了這間 壽司店<旭鮨総本店>，貪佢賣相最好。

住友大廈50/F壽司店<旭鮨総本店>

店內相當光猛開掦舒適。

2人order了一份壽司定食(￥3068)，有11件時令壽司、燉蛋、沙律和麵豉湯。

日式燉蛋 香滑好味

壽司賣相精美，但質素只和在尖咀吃HK$200一份的午市壽司定食一樣，又再失望。

食完飯和小太熊在新宿行街Shopping，小太熊要買好多嘢啊，又化裝品又Video Camera又乜乜又物物....總之就買買買。

行到攰，走去新宿駅隔離的咖啡店 但馬屋 飲嘢。

但馬屋最出名係即磨咖啡，個個入來都飲架。

熱咖啡加蘋果批套餐(￥1100) – 蘋果批水準中上，咖啡水準就中中，香港的Porkka Cafe好飲好多。

店長推介甜品 忌廉紅豆伴咖啡涼粉(￥820) – 很特別的一道甜品，可以一試，但我唔會再試。

仲有小小時間，行埋但馬屋旁邊的 小街。

小街內全是地道風味的小店，有點像福岡屋台。

東京成田機場的交通都好很複雜，我在新宿駅行來行去都研究唔到有咩最好的方法去機場，只好預鬆啲時間，17:00從新宿駅坐JR轉十九幾次車，坐足2hr15min終於到達 成田空港，車費要￥1490，比第一天的快車還貴，真係唔識搭車。

來到機場等上機，在咖啡店買個位上上網。

在咖啡店買了件 蛋糕(￥390) – 好正呀，有蛋香有口感連忌廉都有日本牛奶香，有 由布院B-speak那件蛋糕7成咁好味呀，食完後我買埋佢最後一件。

乘21:15-00:45班機回香港。

補充資料：

1.     從 伊勢原駅到 東京新宿駅可以乘 小田急線，車程63min，費用￥590。

2.     從 東京新宿駅到 成田機場書話有很多類交通，但禾只找到JR，車費￥1490，車程足2hr25min，轉車轉到暈。

  

------東京 近郊提案(完)------