星馬布吉 • 動態移民(02) – 星加坡 亞洲美食之都

 新加坡 松發肉骨茶(Song Fa Bak Kut Teh)

肉骨茶(Bak Kut Teh)是星馬地區的一道名菜，以新鮮帶肉的豬骨伴以多種中藥(例如枸杞、黨參、當歸、玉竹和川芎等等)和香料熬製多個小時的濃湯，新加坡風味的肉骨茶比較偏重胡椒味，通常伴白飯或油條蘸湯來吃，味道濃香獨特，令人一試難忘。

星馬布吉 • 動態移民 – Day 02

<<新加坡>>

時差關係，早上瞓到09:00仍然很攰，不過都照起身，行1km到Clarke Quay Central食早餐，這裡有新加坡70年老店 亞坤咖椰吐司分店。

亞坤咖椰吐司(Ya Kun Kaya Toast) – 於始創於中國海南島的移民 黎亞坤。1926年黎亞坤隻身到來新加坡尋找更好的生活，並在一家咖啡檔工作，其後在1944年創立這品牌，專門售賣吐司和咖啡。亞坤幾十年均是由黎家經營的小檔口，直至1999年黎亞坤的兒子接手生意後，在新加坡及另外七個國家開了超過70家分店。

2個人點了一份套餐再另加些小食。

咖椰吐司Set A (S$6) – 有咖椰吐司、生熟雞蛋和咖啡，這裡的咖椰漿椰香味濃，吐司的口感太脆，似食餅多過麵包，咖啡幾香滑，生熟雞蛋再熟一點會更好，始終都係太鐘意食鼻涕。

咖椰球(S$3.4) – 似雞蛋仔加了咖椰漿，好食。

薑奶茶(S$2.9) – 太甜蓋過了奶香和茶香，星馬泰的奶茶也有這個弊病。

食完早餐回酒店泳池游水。

Riverside Hotel Robertson Quay – 終於有時間在泳池游水，早上很少人好好遊，只可惜天灰灰。

冇嘢做在酒店Hea到12:00Check out，跟著乘地鐵從 福康寧(Fort Canning)(DT20) 到 烏節 (Orchard)(NS22/TE14)，車費S$1.15。

烏節站非常之大，像迷宮一樣，揾出口揾了好耐才揾啱位置，出地面後行3min便到今晚的酒店。

YOTEL Singapore Orchard Road – 酒店被這座大廈擋住，Reception要從這座大廈商場乘升降機上幾層才到，幾古怪。

房間在20/F，走廊有點似時鐘酒店。

今次連續住2晚，小太熊分了2個網站訂房。第一晚Klook包括早餐HK$848，第二晚Agoda沒有早餐HK851。

雙人房 – 房間面積細但設計實用有心思，張床好舒服。

沖涼位置有落地玻璃景觀開揚，啱晒露體狂。

廁所也是一樣，排毒時一定很舒𣈱，不過對面樓應該望到架。

休息一會兒便出去食午餐，從 烏節(Orchard)(NS22 TE14) 乘地鐵到 花拉公園(Farrer Park)(NE8)，車費S$0.95。出站後向小印度方向行。

Muthu’s Curry – 小太熊想試這間咖哩魚頭，是50年老店，好出名架喎，以前次次來新加坡時間都太趕輪唔到食呢間，今次大把時間，可以逐間試。

人客都唔少，希望好食啦。

老虎生啤500ml(S$15.8) – 新加坡的酒貴得好跨張；可樂(S$4.6)

咖哩魚頭 (S$30.4) – 魚頭肉冇味又鞋口，唔新鮮，魚頭之中佢都算差，咖哩汁底味道Ok，很有印度風味。

白飯和醃菜免費

印度無烤餅(Plain Naan)(S$4.6)

餐飯麻麻哋，不過食印度嘢都冇乜期望，只係見佢咁多人贊試吓啫。

小印度(Little India) – 充滿印度色彩的新加坡小區，比印度清潔得多，四處也是彩色屋，印度壁畫和印度朝，仲有印度裔新加坡人。

天氣太熱行得滿身大汗，小太熊話不如去附近的 結霜橋叻沙坐吓。

結霜橋叻沙 – 名氣很大的新加坡個性小店，多年來也堅持以炭火煮製叻沙，取其温文的熱力持續熬製湯底，使叻沙的味道和口感達至最佳狀態。結霜橋叻沙只賣一種食物，就是叻沙。

7年冇見，老闆黃大姐老了很多啊。

結霜橋叻沙(S$3) – 湯底充滿椰汁香甜味，用細長型的米粉，用匙羹連湯一起食。配料有魚蛋、花枝片、血蛤和襯出香氣的班蘭葉，血蚶非常鮮甜。

桔子梅(Mas Lime with Prune)(S$2.2) – 在隔離店買的消暑凍飲，酸酸哋幾好飲的。

乘地鐵由 小印度(Little India)(DT12 / NE7)去 烏節(Orchard)(NS22 TE14)返酒店休息，在Newton站出閘轉線，被扣多一程錢S$0.95，估唔到新加坡地鐵不像香港尖沙咀轉尖東站不扣錢，以後也不在Newton站轉車，揾笨實的。

沖個涼瞓陣覺，好快又天黑，出去揾食。小太熊覺得昨天的 松發肉骨茶好啱食，想再飲胡椒湯，今晚揀了另一間分店，位於Clarke Quay。

乘地鐵由 烏節(Orchard)(NS22 TE14)去 克拉碼頭(Clarke Quay)(NE5)，車費S$0.95。

松發肉骨茶(Song Fa Bak Kut Teh) – 位於11 New Bridge Road的街舖，呢間似總店多啲。

排骨肉骨茶(Pork Rib Soup)(S$9.7) – 排骨肉骨茶的味道依然咁正，肉味香濃湯底冶味。

特級龍骨湯(Premium Loin Rib Soup)(S$10.4) – 反而貴價的特級龍骨湯肉質太瘦偏硬冇咁好食，下次唔叫。

炸墨魚蝦餅(S$8.1)

油炸鬼(S$2.3)

鹵豆腐(S$2.1)

菜心(S$5.3)

冰水(S$0.4)；薏米水(S$2.8)

白飯(S$2.8)

食完再逛 克拉碼頭，發現人龍店，小太熊立即又要排埋一份。

麻布茶房(克拉碼頭店) – 專賣北海道雪糕，奇怪點解咁多人。問了兩位站着食緊的當地人，佢哋話好好食，不過好貴喎。

雙球雪糕(S$8) – 揀了黑芝麻和椰子味，味道濃郁口感軟滑，好食但偏甜了些，可能是當地人喜歡甜。

夜晚行一陣間又成身汗，回到亞洲要一日沖兩次涼，相信英國人會覺得浪費。

星馬布吉 • 動態移民 – Day 03

<<新加坡>>

昨晚不是太夜瞓，但因為還有時差，今朝一早瞓到10:15才醒來，自助早餐的時間已過，比了錢冇得食，好on9呀，小太熊話YOTEL Singapore Orchard的自助早餐好好食架。

安樂醒之後乘地鐵(S$0.95)從Orchard(TE14) 到Esplanade(CC3)，出站後展開今日即興行程。

喜園(YY Kafei Dian) – 新加坡人氣老店，好多人排隊架。

這店非常之奇怪，完全沒有餐牌和價錢，連有咩食都唔寫，點落Order呀大佬，只好看看附近人客食緊乜。

咖椰包、生熟雞蛋、椰絲娘惹糕、馬來拉茶和凍咖啡，我剩係識叫呢啲，好彩收銀識廣東話，全部收了S$8.3，味道唔錯的，值得一試這古怪的食店。

食完早餐立即轉入Purvis Street，揾地方食午餐。

逸群雞飯 – 小太熊的選擇，又係新加坡著名老店，可惜已經執笠。

對面馬路見有間食店又係排緊隊，過去望望。

津津餐室 – 海南雞專門店，啱食啊，剛有張街枱，立即坐低先。

雞髀飯(S$5.5) – 雞髀的雞味偏淡，肉質鮮嫩度一般，勝在油飯很美味香口；羅漢果龍眼(S$1.5) – 消薯解渴，不算太甜，好飲。

補充資料 :

1.     星航機票由 倫敦飛去 檳城，中途停留 新加坡3晚，每位HK$5045。

2.     AXA 365日雙人旅遊保險HK$2816。

3.     新加坡圓S$1 兌 HK$5.742，HSBC網上兌換價。

4.     新加坡地鐵比以前減價了，從機場往 福康寧(Fort Canning)-DT20，車費S$1.94，但必須用 交通儲值票(Stored-Value Smartcard EZ-Link / NETS FlashPay)，單程票會貴20%以上。儲值票每張S$10，沒有按金不可退票，內有S$5儲值，等於比S$5買儲值票，儲值金額亦不可以低於S$1。

5.     上網在KKday買新加坡遊客電話卡(Singapore Tourist Pass STP)，每張HK$77可用一星期，這張STP可以上網和用作 新加坡交通儲值票，再送S$3車費在卡內，等於回贈了S$8，十分抵用，壞處是一定要用FaceID來開卡。

6.     Singapore Tourist Pass (STP) – 把電話卡取出後，剩餘部份可以用作新加坡交通儲值票，可以隨時增值。

7.     新加坡地鐵不可以出閘轉線，否則當重新乘第二程扣錢，因此在Newton轉車唔着數。

 

---待續---