星馬布吉 • 動態移民(04) – 味覺移民 檳城(Penang)

馬來西亞檳城壁畫 追風少年

檳城(Penang)又稱為檳州，位於馬來亞半島西北方的島嶼，是馬來西亞十三個聯邦州之一側。1957年馬來亞獨立之後，檳城成為聯邦其中一州，檳城州政府最高行政長官從那時起一直由華人擔任。檳城是馬來西亞經濟發展重鎮之一，首府 喬治市(George Town)更於2008年被列為世界文化遺產。檳城美食多籮籮，街頭小食、海洋和榴槤也是必食之選，除此之外，近年大量舊建築改建而成的酒店也是體驗檳城的上佳選擇。

<<檳城>>

繼續上一篇Day 04行程。

今次會在檳城住10日9晚，出發英國之前已經預備有可能去大馬，所以帶了所有現金馬幣RM2298在身，加埋簽卡一定夠用了，不用再換錢。

入境檳城之後馬上在機場買張電話卡，上網連打電話Sales話要RM35，但封套上寫RM30，小太熊覺得是Sales落了格，唔老實。

在機場用Grab叫車，去George Town19km路程只係RM27，比定額收費的士平了RM18。

Le Dream Boutique Hotel – 今次住George Town這間2016開業的酒店，在汕頭街隔離，新開時住過一次覺得好抵，今次連續住2晚。

大堂依舊冇變，只係殘舊了很多。

雙人房(不包括早餐)HK$260 – 連續住2晚，房間沒有景觀，冷氣夠凍和熱水水力十足，6年前包早餐一晚都要HK$421，今次大平賣。

放下行李立即出去食飯，檳城大把好嘢食，以前食過好多餐廳都話要下次再食，今次有排食。

汕頭街 – 滿街小販和茶室，不過今晚唔食住。

今晚日落好橙呀，天色勁靚。

德成飯店(TEKSEN Restaurant) – 以前叫德盛飯店的，晚晚都旺到爆，19:20去到排隊等了50min才有位。

全場爆滿，連門口都坐滿人。

等到20:10終於有位，但同時有大量人離開，這時已經唔駛等位，去到可以立即坐低，下次20:00前去到已經可以，唔駛等咁耐。

大虎啤(RM21.2)

冬瓜排骨湯(RM10.6) – 好耐冇飲這些正經湯水，食件冬瓜不知幾舒服，排骨也很有肉味。

馬來風光(RM14.8) – 馬拉盞炒通菜，味道香辣濃郁，重口味好食。

招牌豆腐(RM14.8) – 豆腐夠滑有豆香，汁底味美，正。

梅子雞(RM21.2) – 炒得稍為過火太乾身，雞肉冇乜雞味，梅子醬味就好正，下次試第二味。

白飯(RM1.6) – 送梅子雞一流。

行完飯天黑了慢慢行返酒店。

Campbell House – 小太熊認得佢，細個有一次來檳城時肚痛，入去借過御手洗啊。

正豆精 – 回到汕頭街這豆漿老店，幫襯下先。

正豆精(RM2.5) – 即係凍豆槳，豆味清淡少甜，味道像細個時放學後在街邊飲的豆槳一樣，用膠袋包走飲，夠晒懷舊。

光大大廈(Komtar Tower) – 檳城地標建築。

阿德榴槤(Ah Teik Durian Stall) – George Town的榴槤名店，幫襯佢超過10年了，從未見過像今日咁少貨和冷清，而且睇檔的人不是德哥，有古怪。

榴槤和三年前一樣標了價，黑刺RM95/kg，貓山王RM75/kg，價錢比其他檔貴RM10左右。

紅蝦(Red Prawn) 1.35kg (RM50) – RM38/kg，乾包爽皮，睇樣覺得有些硬肉幾樣衰，口感卻唔錯，黏喉度有70%，味道濃郁甜度中等部份有甘苦味，果肉帶輕微紅蝦獨有的花香，算是好食有水準，70分。

這榴槤不屬於頂級貨，只係用來頂住先，過幾日入榴槤園住一晚，歎真係好嘢。

用Grab叫車回酒店，2km路程收RM5。

星馬布吉 • 動態移民 – Day 05

早上起床後上網Search附近有什麼好食，小太熊揀了福建蝦麵。

瀹泉軒福建蝦麵 – 位於Jalan Sungai Ujong，從酒店Le Dream Boutique Hotel行2分鐘便到。

福建蝦面(RM6) – 湯底蝦味濃郁很鮮美，麵質都唔差，好食，可以回頭再食。

紅毛榴槤果汁(Joyseel Soursop Juice)(RM6) – 紅毛榴槤屬番荔枝科的熱帶水果汁，味道酸中帶甜十分醒胃，類似台灣所產的釋迦，果肉呈乳白色，酸甜多汁，種子黑色散在果肉紋理中。這支果汁很好飲。

多春茶座(Toh Soon Cafe) – 在檳城已經有60多年歷史，隱身在後巷內，不過衞生情況還可以，長期要排長龍，今日也是，不過大把時間，照排。

枱枱都坐滿人搭晒枱，視老漢廢鹽如無物，所以都好易傳染傷風。

多春茶座的名物就係 炭烤多士，好有風味好正架。

椰漿飯(Nasi Lemak)(RM1.5) – 是在馬來西亞十分流行的點心，由椰奶蒸飯、斑斕葉、辣椒醬、沙典魚和半個煮雞蛋製成，味道可以，未食過值得一試。不過檳城其他茶室有更好的椰漿飯。

牛油咖椰多士(RM3) – 多士中的極品，麵包脆軟充滿炭火香，醬料比較少，牛油厚些更加好；凍咖啡(Cold Kopi)(RM2.3)；熱咖啡(Kopi)(RM1.9) - 咖啡質素沒有明顯特出，都好飲的。

食完早餐正式Hea遊George Town。

補充資料 :

1.     馬幣RM1=HK$1.82，HSBC Visa Card兌換價。

2.     檳城現在市面上已經沒有的士，連George Town也沒有，只有機場還有Coupon Taxi。雖然有幾個叫車Apps，但只有Grab可以真正叫到車，其他Apps次次都話冇車。

3.     用Grab叫車的價錢像買股票一樣，不斷升升跌跌，最高和最低價錢可以相差3倍，全馬來西亞也是這樣，非常之不便。

4.     檳城巴士班次不太疏，每小時也有1～3班車，而且可以用Google查到巴士時間表，不比Grab車差。

 

---待續---