星馬布吉 • 動態移民(01) – 瞬間飄移 星加坡

星加坡河夜市～五光十色 駁船碼頭(Boat Quay)

駁船碼頭(Boat Quay)位於星加坡河流出口位置，毗鄰The Fullerton Hotel Singapore，北邊連接 克拉碼頭(Clarke Quay)，南邊是 濱海灣 (Marina Bay)，這裡雲集 新加坡最受歡迎的河畔食店，五光十色的酒吧和露天餐廳滿佈河畔步行街，全部設計古典中帶時代感，夾雜了東西方文化，完全散發出 新加坡獨特個性。

星馬布吉 • 動態移民 – Day 01

<<新加坡>>

昨天早上從倫敦出發，今日飛機08:05降落新加坡。今次星航機票的目的地是 檳城，會在新加坡轉機，因為5年未到過新加坡了，所以順便路過停留3晚。

入境時遇到一位大白。

早兩日在倫敦上網買了新加坡圓SGD 1 兌 HK$5.742，小太熊又上網在KKday買了新加坡電話卡(Singapore Tourist Pass STP)HK$77，這張STP可以上網和用作 新加坡交通儲值票(Stored-Value Smartcard EZ-Link)(價值S$5)，再送S$3車費在卡內，十分抵用，壞處是一定要用FaceID來開卡。

在機場換了電話卡，攪了好很耐才開到卡，好彩時間多，今日冇特定節目，完全唔趕時間。入境後見新加坡98%的人還是載着口罩，雖然唔慣，但都要入鄉隨俗繼續載着了。

乘地鐵從機場往 福康寧(Fort Canning) DT20，車費S$1.94。出站後行350m到今晚的酒店，好熱呀，而且立即濕濕立立成身汗，唔記得幾耐冇試過呢種天氣，雖然辛苦但依然有種熟悉親切的感覺。

Riverside Hotel Robertson Quay – 位於星加坡河畔的酒店，不過今次只係住平房，冇河景架。

Riverside Hotel Robertson Quay泳池

雙人房(不包括早餐)每晚HK$803 – 派了低層房，好彩有半泳池景，冷氣夠勁水力夠強，唔駛再捱英國的超弱花灑了。

立即沖個涼先，好多個月未試過沖涼咁爽，水力又勁熱水又穩定，淋浴間十分寬敞，這幾樣條件在英國比較難遇到。

唔趕時間，可以瞓下先，張床都好舒服啊，英國大部份床褥都太軟。

起身之後揾嘢食，自然想起肉骨茶了，上網Search了最近的一間名店是在 唐城坊的 松發肉骨茶。

從酒店行1.2km到 牛車水(ChinaTown)的商場 唐城坊(Chinatown Point)，松發肉骨茶在商場內，碰巧午餐時間，等了15min位。

松發肉骨茶(Song Fa Bak Kut Teh Chinatown Point) – 新加坡50年老店，以前未幫襯過的，終於有機會試試，原來好正的。

肉骨茶午餐A (S$14.6) – 星期一至五的午市限定套餐，包括 排骨肉骨茶、油炸鬼、咸菜、白飯和蜂蜜綠茶 ; 雞腳腐皮(S$5.3)；滷水豆腐(S$2.1)；冰水(S$0.4)。

肉骨茶的排骨很濃豬肉味，湯底是胡椒湯，胡椒味和肉味均出衆，飲完令人有熱血沸騰的感覺，而且這店的伙記好好人，會不斷為客人加湯。因為太耐冇飲湯了，我不斷地飲，以前次次飲肉骨湯小太熊都會教育我話冇益唔準我飲，飲一啖教育一次，飲兩啖教育兩次，估唔到今次連佢都不斷飲，一邊飲一邊話好正，這餐飯加了6次湯。

這餐飯期待已久，大滿足啊，食完之後漫無目的地四圍行街。

牛車水(ChinaTown) – 街上人流不少，感覺市面上已經回復正常了，只係仍然要大熱天時載着口罩。

牛車水的保育工作做得很好，建築物古舊之餘卻翻新得宜。

自從檳城壁畫空前成功之後，現在全亞洲都滿街壁畫了，牛車水也不例外，壁畫充滿本土色彩。

佛牙寺(Buddha Tooth Relic Temple) – 牛車水的一座佛教廟宇，由釋法照大師於2002年11月30日創設，目前是新加坡規模較大的幾座佛教寺廟之一。

麥士威熟食中心(Maxwell Food Centre) – 新加坡其中一個著名的高人氣美食中心，內有多間本土人氣排隊食店，今日路過當然要入去朝聖了，以前次次也是專程坐車來的。

可能剛過了午餐時間，今日唔算太多人，中心和往日一樣，中午時份十分之酷熱。

天天海南雞飯 – 很高名氣的食店，以前試過摸門釘，既然今日有開門，一定要食。

雞髀飯(S$6) – 雞肉淡而無味，肉質說不上鮮嫩，油飯也不香口，上次食是好食的，看來老闆太好生意所以冇乜誠意了，可以除名。

麥士威 – 印象中以前幫襯過，天口太㷫要飲杯冰凍飲品。

甘蔗汁(S$2) – 真材實料甘蔗味清甜，加了冰所以冇咁甜更加好飲。

福順(錦記)燒臘麵家 – 小太熊話呢間都好出名，以前幾次都冇Quota試，今日終於食得落。

叉火撈麵(S$3.5) – 叉燒和燒肉也很有肉味，燒肉的皮也夠香脆，撈麵加了豬油勁香口，算好食，值得一試，但不會再試。

老伴豆花(Lao Ban Soya Beancurd) – 熟食中心另一名店，見今日未食甜品，買碗試吓。

原味豆腐花(S$1.9) – 第一個感覺係好細碗好很貴，味道和口感似百福豆腐花，比百福豆腐花好少少。

乘地鐵(S$0.95)回酒店沖涼再瞓一陣間，行程Hea到暈。

一覺醒來已經天黑，到河邊行吓揾嘢食。

渡橋(Ord Bridge) – 紅色發光的行人天橋，建於1886 年，橫跨克拉碼頭新加坡河。

克拉碼頭(Clarke Quay) – 新加坡河畔的一個古老碼頭和周邊的步行街，位於新加坡河北岸，大量昔日的舊倉庫已改建為餐館及酒吧，是新加坡多年以來最有人氣的地段，餐館及酒吧每晚也坐無虛席，因此物價亦按年急升。

繼續沿着新加坡河往Marina Bay方向行，沿途也是人山人海，同期某些大國仍然日日封城，唔通真係財比人多所以身子比人弱。

愛琴橋(Elgin Bridge) – 橫跨新加坡河的其中一座拱橋，建於1929年，是新加坡河上的第一座橋樑。

駁船碼頭(Boat Quay) – 新加坡的核心商業區，摩天商業大樓糅合戰前舊樓宇，形成一個平衡各方面的小區。

以往Boat Quay步行街大部份是中式餐廳，很多售賣巨形斯里蘭卡肉蟹，但現在最多是日式居酒居，巨形斯里蘭卡蟹不知為何已經完全消失，食唔到唔開心呀，我次次來新加坡都要食架。

行到The Fullerton Hotel回頭行返酒店，到Clarke Quay食飯。

Riverside Point – 新加坡河畔的大型商場，在這裡附近揾食。

李德橋(Read Bridge) – 橫跨新加坡河的一座行人橋，建於1889年。

Clarke Quay – 十幾年前在這河畔餐廳食過巨型黑椒斯里蘭卡肉蟹，不過海鮮店執笠了，換了日式餐廳。

珍寶海鮮(JUMBO Seafood - Riverside Point) – 決定食呢間，好耐之前已經想試，長期都冇位的，現在太晚才開始有位。

生啤500ml(S$12.5)；可樂(S$4.5)

麥片蝦(S$30.4) – 以前在檳城對岸北海市食過一次，香港食唔到呢味。麥片炸得很香口鬆脆，海蝦又大隻又鮮甜，味道和口感出奇地配合，好好食，不過好熱氣啊。

黑椒炒青蟹900g(S$103.2) – S$115/kg，餐牌寫產地是澳洲、越南或者斯里蘭卡，是今日最大隻的蟹了，雖然冇以前食的2kg大蟹咁爽皮，但黑椒汁底炒得十分冶味又不太辣，蟹肉唔黐殼而且是近年少有的鮮甜，差點遺忘這種鮮甜蟹肉味了，好開心可以食返。

很精彩的一餐，今次沒有來錯新加坡。

晚上Clarke Quay不少人坐在河岸飲酒吹水。

沿途行返酒店，雖然温度唔算十分高但都全身濕晒，生活環境和英國完全相反。

補充資料 :

1.     星航機票由 倫敦飛去 檳城，中途停留 新加坡3晚，每位HK$5045。

2.     AXA 365日雙人旅遊保險HK$2816。

3.     新加坡圓S$1 兌 HK$5.742，HSBC網上兌換價。

4.     新加坡地鐵比以前減價了，從機場往 福康寧(Fort Canning)-DT20，車費S$1.94，但必須用 交通儲值票(Stored-Value Smartcard EZ-Link / NETS FlashPay)，單程票會貴20%以上。儲值票每張S$10，沒有按金不可退票，內有S$5儲值，等於比S$5買儲值票，儲值金額亦不可以低於S$1。

5.     上網在KKday買新加坡遊客電話卡(Singapore Tourist Pass STP)，每張HK$77可用一星期，這張STP可以上網和用作 新加坡交通儲值票，再送S$3車費在卡內，等於回贈了S$8，十分抵用，壞處是一定要用FaceID來開卡。

6.     Singapore Tourist Pass (STP) – 把電話卡取出後，剩餘部份可以用作新加坡交通儲值票，可以隨時增值。

7.     新加坡地鐵不可以出閘轉線，否則當重新乘第二程扣錢，因此在Newton轉車唔着數。

 

---待續---