加拿大 • 瀛寰搜奇(09) – 温哥華島 魚樂無窮

加拿大溫哥華島 三文魚孵化場Quinsam River Hatchery – 正在努力洄游到出生地產卵的三文魚

溫哥華島(Vancouver Island)是加拿大溫哥華市以西約30km外的一個超級大島，由南走至北超過500km，島上有極豐富的自然生態，是觀賞野生三文魚的最佳地點。溫哥華島上有多個三文魚孵化場，由聯邦政府、原住民族社區和保育團體合作營運，用以補充野生三文魚數量和保護生態。三文魚孵化場的運作模式大致如下：在秋季時野生三文魚洄游到出生地產卵，部分亦會被取卵與人工授精，然後在孵化槽中孵化成幼魚，在室內水槽中餵養數月之後，待魚苗成長為小三文魚，便可以放流回河川，小三文魚會自行游出大海，展開其傳奇一生。

加拿大 • 瀛寰搜奇 – Day 12

行程：溫哥華(天陰間中有雨)→溫哥華島(天晴)

<<溫哥華>>

今日早上07:00起身，執齊行李行1.2km去租車公司SIXT。今次租車去溫哥華島玩4日，睇三文魚洄游，去海灘執蜆掘蠔和去森林搵黑熊睇佢捕捉河上的三文魚。

08:00去到SIXT，今次租日本車Toyota Corolla，職員遊說我哋加錢Upgrade一部大少少的韓國車，我當然唔肯啦，我根本揸唔掂大車，點知佢原來係只剩下這部大車，現在不用加錢租比我，我就焗住要揸大車，正式係Loss Loss雙輸。早上冇人攞車，未夠08:15便拿到車匙。

拿到車匙之後自己行去停車場搵車。

找到我部韓國車了，真係比租開的Toyota大部少少，上落車明顯高很多要少少跳上跳落，車尾箱又闊些。用電話詳細錄影車身狀況之後，08:30出發。

一開車未轉出停車場已經十分唔慣，因為車身濶了，成日感覺唔夠位過，只有慢慢揸小心啲。去到路面又係勁唔慣，加拿大城市人揸車都幾燥底，連大巴士都左攝右攝，打燈唔夠半秒就轉線，係又砵唔係又砵，估唔到這程短短22km的車咁難揸。行行吓又發現，原來油缸唔滿(只有364km油)，單據上明明話Full Tank的，還車要我入爆佢否則罰錢，小太熊話中伏了，佢話睇過網上有人留言講過同樣情況，最後交回同樣的油但被屈錢，我只好立即影低所有資料，今晚寫email去投訴。

無風無險行了22km去到Horseshoe Bay，未夠鐘上船，便在小鎮泊好部車，去食個靚早餐先。

馬蹄灣(Horseshoe Bay) – 距離温哥華市中心約22km的小鎮，每日也有7~8班船往返温哥華島的Nanaimo，可以連人帶車上船。

Horseshoe Bay Park – 小鎮內的海濱公園，可以望到碼頭，環境清幽，最適合Hea時間。

海邊已經有海獅游水，加拿大的生熊真豐富，見海獅似在香港見老鼠咁容易。

Goldie’s Donuts & Bakery – 小鎮內相當受歡迎的咖啡店，2024年開業，主打鮮製的烘焙麵包、冬甩和咖啡，現場所見有很多街坊來買外賣，一買便十多個。

店內氣氛悠閒舒適，差不多全店滿座，我們剛剛有張細枱。

Double Baked Almond Croissant(CAD 7.9) – 焗得十分出色的杏仁牛角酥，杏仁味道香脆特出，麵包心加了濃濃甜蜜的椰糖，牛油味爆香好食；Milky Cream Supreme(CAD 5.3) – 口感柔軟有彈性，奶油餡甘香豐富，十分美味的麵包；Cappuccino(右)(CAD 5.5)；Latte(CAD 5.8) – 咖啡的味道一般出色，香濃可口。

食完早餐Hea多一陣間，夠鐘上船。今次在網上訂了12:25 - 14:15去Nanaimo(Departure Bay)的船，首先要揸車去閘口俾錢，然後排隊過閘上船。

拿着船要慢慢逐架車排隊上船。

上到船職員會逐架車安排泊位，泊好之後便可以落車，上船艙坐。

船艙都坐滿人，呢班船爆滿的，我早兩星期買票。

甲板超級大風，假髮都吹甩，不過有嘢睇架。

睇到了，有鯨魚呀～紅圈果點呀，雖然好遠好細，但真係見到鯨魚囉，唔駛去到阿拉斯加咁遠。

<<溫哥華島>>

船14:25去到Nanaimo，落船之後揸1km便去到酒店，勁方便。

Buccaneer Inn – 溫哥華島Nanaimo市中心的家庭式汽車旅館，清潔舒適，今次連續住3晚。附近的沙灘是掘蠔摸蜆的熱點，位置便利。

雙人套房(不包括早餐)每晚CAD 147 – 面積勁大有廳有房有廚房，像屋企一樣。

廚房有齊所有廚具和清潔用品，但油鹽糖粉要自備。

睡房很大，天然光線也充足。

浴室正常，尚算整潔。

安頓下來已經下午三點幾，只可以去一個近近哋的景點，於是去最近的三文魚孵化場Little Qualicum River Fish Hatchery，距離酒店52km，途經超級市場買了些食物和掘蜆工具共CAD 110。

Little Qualicum River Fish Hatchery – 加拿大的公共三文魚孵化場和產卵水道，建於1979年，主要用作保育太平洋三文魚，維持生態平衡和支援當地原住民發展漁業。透過人工修築的產卵水道(Spawning Channel)調節流速與水量，為成年的三文魚創造最佳的產卵環境，並保護魚卵。

這𥚃的最佳觀賞三文魚洄游季節在9月底至11月，即係今日囉。在夏天便沒有大三文魚，只有數以萬計孵化出來的三文魚幼苗在飼養池中生活。

今日河內有唔少三文魚，佢哋都好活潑。

Little Qualicum Spawning Channel – 沿着產卵水道有條3km左右的自然健行步道，行了一陣人影都冇覺得有點心寒，因為這𥚃有黑熊出沒的，剛才又未買到防熊噴霧，都係唔行了，安全第一砵砵命長久。

揸車52km回酒店，在市內先入滿油CAD 50。

Canadian Tire – 在這裡買到防熊噴霧了，好貴呀，最弱果支都要CAD 72.8。

防熊噴霧(CAD 72.8) – 職員話這支比較弱，不可對付棕熊，只能打發體蹟較細的黑熊。

今晚在屋企自己煮，剛才在超級市場買了晚餐。

車打芝士(CAD 5) – 味道冇乜特出，不過不失；法國麵包(CAD 2.5) – 買了一大條可以食足三日，品質正常；Sparkling Wine (CAD 11.5) – 平平哋味道幾清爽啊，可以分兩餐飲。

加拿大西冷牛扒(CAD 22.5) – 有250g，今次我煎得好靚，五成熟濃香肉嫩，好食過香港買的加拿大牛扒多多；焗薯仔(CAD 6/kg) – 薯仔焗得好香，加拿大的食材好新鮮。

第1日温哥華自駕，行了127km，入油CAD 50。雖然唔係第一日在加拿大揸車，但今日依然唔慣加拿大的道路，温哥華島上的道路系統也沒有預期的簡單，今日算是整個美加旅程最難揸的一日。

加拿大 • 瀛寰搜奇 – Day 13

行程：溫哥華島(天晴)

早上07:00起身，駕車20km去附近的Nanoose Bay沙灘掘蜆。

  07:45泊好車之後，上網買了3日掘蜆License，每人CAD 24。

今日是近月水位最高的一天，最低水位出現在04:09 (0.58m)，至11:56最高4.5m，預計只可以掘到08:45左右。

早上好凍啊，穿起小太熊在淘寶買的便利水鞋套，開始掘蜆～

掘來掘去都冇蜆，啲YouTuber明明話有好多的，但一隻都掘唔到，而且隻淘寶鞋套開始入水，啲大劣貨真係流到嘔。

玩到冇乜癮，08:45揸車離開，走的時候有4個加拿大華人剛剛到而且帶齊裝備，佢哋話第一次來，這𥚃真係掘蜆熱點來的。駕車140km去三文魚孵化場Quinsam River Hatchery睇三文魚和尋找黑熊，10:35去到，可以慢慢睇。

Quinsam River Hatchery – 位於溫哥華島東岸的Campbell River附近，是島上重要的三文魚孵化場，在三文魚產卵季節(9-11月)可以見到大量洄游的三文魚，好精彩架。

Quinsam River Trail – 孵化場及周邊的河段設有這條自然步道，沿著走可以觀察自然河道中的三文魚，偶然會見到黑熊添。

這位置在不久之後真係有人見到隻黑熊呀，不過我去到已經走咗。

河內有好多三文魚，買了License的話可以釣魚。

有人擔定櫈仔等黑熊，不過佢哋等到走都見唔到，但走了唔夠2個鐘黑熊便出現了，黑過非洲人。

自然步道掛滿警告牌，真係有熊出沒架，咪on99四圍走，做了熊點心就唔好賴人。

河邊有些三文魚咸魚，似係熊的傑作啊，我在阿拉斯加見過黑熊食三文魚，也是在魚肚咬一啖便掉，死狀極似這咸魚。

那些海鳥最鐘意食這些咸魚，見佢哋個食相簡直津津有味。

今日Spawning Channel落了閘，但三文魚們還𡚒力想跳入去，一條接一條，佢哋跳得好高呀，不過始終都跳唔到入去。

不久之後開閘了，三文魚們逐條逐條跳入去，佢哋真係認得自已的出生地死都要返鄉下，認真神奇。

另一邊的河道又係落了閘，三文魚們不斷逆流而上，好似睇緊礪志片一樣，三文魚天生唔鐘意躺平啊～

牠們不斷游到飛起，真係飛得起呀，勁～

雖然落了閘，但部分Slim的三文魚仍然成功穿過窄窄的鐵支，恭喜恭喜～

十分精彩的三文魚洄游，沒有揀錯温哥華島這地方。

 

 

 

補充資料 :

1.     持有HKSAR護照進入加拿大不須要簽證，但入境前要先在網上申請ETA(Electronic Travel Authorization)，費用CAD 7，每次入境最多可停留6個月。

2.     在HSBC換現金CAD 1=HK$5.713 。加拿大很流行信用卡，今次旅程95%是俾信用卡，Visa Card滙率大約CAD 1 = HK$5.76。

3.     加拿大的電壓是120V，一般使用雙扁直插頭或者一圓雙扁直插頭。

4.     在加拿大餐廳或商店消費也要額外再附政府稅項(每地方也不同，一般收6～12%左右)和服務費(15~25%左右)，有關費用不會顯示在價錢牌上，要到最後附款時才會知道實際數目。一般情況下，把見到的價錢再加30%便是最後需附的費用。

5.     文中列出的價錢已經包括所有稅項和服務費。

6.     今次幫襯SIXT租車Toyota Corolla 4日3晚(08:00出車17:00還車)，車租連保險CAD 531，另加CAD 200按金。全程行了825km，入油費共CAD 98。全部費用總共CAD 629，即平均每1km ~ HK$4.39。

7.     出車時SIXT的單據寫著油缸Full Tank，還車時要入滿油。但出車後發現沒有滿油，入多了約CAD 26才滿油，還車時向職員提出，她爽快地扣了少了我CAD 40。

8.     出車前先要自己檢查車輛，把主要Defects記錄在表格上。還車時職員Check車比日本和英國寛鬆很多，很多Minor Defects也接受。

9.     油站差不多全部接受香港的信用卡。

10.    今次這路段沒有收費公路。

11.    BC Ferries每日各有大約8班船往返温哥華Horseshoe Bay和温哥華島Nanaimo，單程票價CAD 85(私家車連司機)，每個額外乘客加CAD 20，船程約1hr50min。這航線常常爆出，最好出發前2星期網上買票。

12.    溫哥華島不是到處都可以隨便掘蜆和撿蠔，旅客進行有關活動前要先在網上購買許可証，並查清楚當日可以進行有關活動的地點，要確認該海域是否屬於開放採集區，和是否有生物毒素污染而封閉。

13.    掘蜆和撿蠔有規定個人上限，一般來情況，溫哥華島一帶常見的上限是每人每日最多12隻蠔和60隻蜆，其他貝類例如象拔蚌和貴妃蚌的限額會不同，不能混用。貝類採集的尺寸也有嚴格管制，太細小必須放生。

14.    潮汐時間會直接影響你能否下海掘蜆，因此出現發前要先確定是否潮退時段。

 

 

 

---待續---

「加拿大 • 瀛寰搜奇」18天路線和行程重點(詳細行程可點擊到相關文章)

日數	行程路線	日程重點
Day 01	美國 洛杉磯→加拿大Calgary	黃昏乘 美國西捷航空(Westjet)由 洛杉磯飛到 加拿大洛磯山脈的城市Calgary，晚上住機場酒店Park Inn by Radisson。
Day 02	Calgary→Banff National Park	早上在Calgary機場的Alamo租車，自駕去洛磯山脈9日8晚。下午14:00到達 班夫國家公園，遊覽Johnston Canyon和Bow Valley，再前往小鎮Banff，連續三晚住Holiday Lodge Bed and Breakfast。
Day 03	Banff National Park	全日遊覧Lake Louise，在湖畔山徑健行睇冰川，晚上在Banff的餐廳Chuck’s Steakhouse食牛扒。住Holiday Lodge Bed and Breakfast。
Day 04	Banff National Park	早上在Banff租單車，沿着Rocky Mountain Legacy Trial踩車到小鎮Canmore食午餐，然後回Banff還車，全程50km。住Holiday Lodge Bed and Breakfast。
Day 05	Banff National Park→Jasper National Park	駕車到賈斯伯國家公園小鎭Jasper住2晚。沿途遊覧Bow Lake、Peyto Lake、阿薩巴斯卡冰川(Athabasca Glacier)和Athabasca Falls。晚上住Tonquin Inn。
Day 06	Jasper National Park	全日遊覧Jasper National Park景點 瑪琳湖(Maligne Lake)、藥師湖(Medicine Lake)、Maligne Canyon和到Miette Hot Springs浸溫泉，晚上住Tonquin Inn。
Day 07	Jasper National Park →Yoho National Park	駕車到 幽鶴國家公園住2晚。早上遊Old Fort Point、Goats and Glaciers Viewpoint、Sunwapta Falls和Tangle Creek Falls，在Glacier View Lodge食自助午餐；下午到幽鶴國家公園 翡翠湖(Emerald Lake)，入住Emerald Lake Lodge兩晚。
Day 08	Yoho National Park	全日遊覧班夫國家公園Moraine Lake，在湖畔山徑健行睇冰川。下午遊覧幽鶴國家公園Natural Bridge之後回到Emerald Lake Lodge休息。
Day 09	Yoho National Park→Banff National Park	駕車回到Banff住一晚，沿途遊覧Emerald Lake、Takakkaw Falls、Lower Spiral Tunnel Viewpoint、Bow Valley和到Hotel Canoe & Suites浸溫泉。晚上住The Dorothy Motel。
Day 10	Banff National Park→溫哥華	早上到Bow Valley搵熊仔，駕車回到Calgary機場Alamo還車，然後乘飛機往溫哥華；在溫哥華入住Auberge Vancouver Hotel兩晚。晚餐在「皇燕越南美食」吃越南菜。
Day 11	溫哥華	全日在溫哥華市遊覧。早上在Revolver Coffee食早餐，然後去 Maple Tree Square和Gastown Steam Clock。在海旁租單車3小時到Stanley Park踩一個圈。下午在Riley’s Fish & Steak食Happy Hour下午茶，再去Fanny Bay Oyster Bar & Shellfish Market食第二餐下午茶。晚上住Auberge Vancouver Hotel。
Day 12	溫哥華→溫哥華島	早上在SIXT租車4日，駕車到 溫哥華島玩4日3晚。下午參觀 溫哥華島三文魚孵化場Little Qualicum River Fish Hatchery。晚上住小鎮Nanaimo的旅館Buccaneer Inn。
Day 13	溫哥華島	晨早駕車到Nanoose Bay，在沙灘掘蜆、蠔和貴妃蚌。上午駕車到另一三文魚孵化場Quinsam River Hatchery，觀賞三文魚逆流而上的情景；中午在孵化場旁的三文魚河尋找黑熊食三文魚；晚上住Buccaneer Inn。
Day 14	溫哥華島	早上駕車往Gabriola Island ，在島上沙灘掘蜆、蠔和貴妃蚌，回到酒店立即煮來吃。中午往Big Qualicum Hatchery看三文魚和找尋黑熊。黃昏去Stamp River Provincial Park看三文魚和找尋黑熊；晚上住Buccaneer Inn。
Day 15	溫哥華島→溫哥華	早上去Big Qualicum Hatchery看三文魚和找尋黑熊；中午駕車回到溫哥華還車。晚上到米芝連餐廳The Lunch Lady食晚飯。住溫哥華市中心Paradox Vancouver。
Day 16	溫哥華	在酒店食早餐，休息至11:00退房。到海旁租單車6hr，環遊溫哥華市中心景點，包括Granville Island、Stanley Park、Granville Island Brewing飲啤酒和到Earnest Ice Cream食雪糕。還車後去唐人街米芝連餐廳 寶貝(Bao Bei)食晚飯。夜晚乘地鐵去機場。
Day 17	溫哥華→台北	乘長榮航空02:00飛機由溫哥華往 台灣桃園機場，台灣比溫哥華快15小時。
Day 18	台北→香港	05:35到台灣桃園機場，在Plaza Premium Lounge食早餐，乘08:15 - 10:05機回到香港。