冰天動地(1) – 冰島 有睛天

冰島 黃金瀑布(Gullfoss)

冰島(Iceland)位於北大西洋，貼近北極圈毗鄰格凌蘭，是一個自然、潔淨和舒適的島國。冰島不單止擁有壯觀的大瀑布、奇特的地熱噴泉、雄偉的懸崖、舒適的温泉、不夜的日照和變幻無常的天氣(同一日可見盡晴天、雨天、落雪、彩虹…)，而且人口密度低。冰島是一處不會令人失望的地方，即使在出發前看過很多她的美麗照片和影片，但實地觀看時便發覺永遠比照片和影片更壯麗。

 

冰天動地 冰島 • 格凌蘭 – 序

1997年6月特別多紅假，只需請16日年假便可連續放30日。最初計劃用這長假期到 撒哈拉沙漠走一趟，因此買了來回 西班牙 馬德里的機票，最初的計劃行程是「馬德里 – 直佈羅陀 – 摩絡哥Casablanca –Fez – Merrakesh – 穿越 撒哈拉沙漠進入 阿爾及利亞 – 阿爾及爾 – 乘船往法國南部 – 巴塞隆拿 – 馬德里」。點知出發前一個月其中一個隊友要入廠大修，醫生話佢唔捱得，所以最後改去冰島和格凌蘭休養，個人費用亦由最初預算的HK$20000加到HK$40000。這次行程共30天，去了西班牙、法國、冰島、格凌蘭(丹麥)、法羅羣島(丹麥)0、丹麥和德國，身上帶了來回香港到西班牙的機票(HK$6000)、巴黎至冰島的單程機票 (HK$2200)、7日歐洲火車証(HK$3XXX)、USD 1500和一張信用卡，出發…….

 

冰天動地 冰島 • 格凌蘭 – Day 1

今日返全日工，放工後乘夜機去 西班牙馬德里。

 

冰天動地 冰島 • 格凌蘭 – Day 2

<<馬德里>>

早上到 馬德里機場，乘機場巴士去 哥倫布廣場轉地鐵。

哥倫布廣場(Plaza de Colón)

到火車站訂好今晚通宵火車去 巴黎，Lock好埋大行季後，開始 馬德里半日遊。

阿穆德納聖母主教座堂(Catedral de la Almudena)

馬德里皇宮(Palacio Real de Madrid)

馬德里皇宮外圍的廣場和小鎮

有點似長腿叔叔

馬德里鬥牛場(Plaza de Toros de Las Ventas)

馬幼廣場(Plaza Mayor)

匆匆忙忙遊了一遍大景點，晚上乘通宵火車往 巴黎。

 

冰天動地 冰島 • 格凌蘭 – Day 3

<<巴黎>>

下午到巴黎，發現火車站的Locker全部停用，因為不久前巴黎火車站有炸彈爆炸。大鑊了，今晚才上機飛去 冰島，只有揹着大行李在 巴黎玩半日。

艾菲爾鐵塔(Tour Eiffel) – 今日只去這一個景點，鐵塔正在倒數緊J-937，還有937日便進入公元2000年了。

為了慳幾十蚊，我們決定揹着大背囊行樓梯上去鐵塔第二層，再比錢上第三層，因為行樓梯上第二層免費的，但第二層上第三層塔頂冇得行，一定要比錢。

從鐵塔望返巴黎市

在鐵塔玩了幾個鐘，食埋飯，坐地鐵去機場，乘夜機去冰島。因為時間預得啱啱好，坐地鐵轉車期間上錯了車，攪到要跑返轉頭轉車，同行的女生揹住大背囊跑唔郁，要我一個揹上總共40kg行李跑，好彩係背囊，如果拉喼便麻煩了，差點趕唔切上機。

 

冰天動地 冰島 • 格凌蘭 – Day 4

<<Keflavík>>

零晨01:30便到 冰島，找了一間機場附近位於Keflavík的Hostel 先休息一睌，已經2睌冇沖涼了，沖返夠本，差不多日出至開始瞓。

瞓到中午才起床，Hostel外是一片大草地，陽光普照，而且冰島距離太陽夠遠，唔用太陽油都唔會曬傷，又夠乾爽，令人非常舒服。

Keflavík巴士站 – 位於海旁風景一流，在這𥚃乘巴士往首都Reykjavík。

<<Reykjavík>>

在Reykjavík市中心找了一間Hostel今晚落腳之後，再租了架車準備明天開始沿1號公路環島遊。

下午參加半天團，乘遊艇出海睇 鯨魚。

見唔到鯨魚，海豚就唔少，不過導遊話昨天見到鯨魚的。

晚上在市內餐廳試食 鯨魚肉刺身，原來不論外觀口感和味道都有七分似牛肉。

夜晚21:00仍然像中午一樣，可以繼續在市內遊覽，在這不夜國度令人冇乜時間觀念。

Reykjavík – 條街又靜又乾淨空氣又好，百份百宜居城市。

Suðurtjörn – 市中心的中央公園湖泊，清靜得出奇，只有海鷗和天鵝，完全沒有人。

哈爾格林姆教堂(Hallgrímskirkja) – Reykjavík的地標名勝，像火箭一樣好有特色。

今晚玩到零晨才回Hostel瞓覺，天色已經灰灰暗暗，不過好快又會出太陽。

 

冰天動地 冰島 • 格凌蘭 – Day 5

早上攞車，開始5日環繞冰島一周之旅，今次預算用逆時針方沿 1號公路行走。

由新牌仔司機負責出車，可能因為轉了左軚和唔熟部車，唔夠10分鐘便碰到水撥制，司機想停返水撥時就撞了一駕泊在路邊的車。司機on dog dog冇停車，個個都呆晒唔知點算，考慮想報警Claim保險但又怕阻礙了行程唔夠時間環島，最後決定環完島回來至算。

撞到車身凹晒，車門都幾乎開唔倒，真係大鑊。

唔理得咁多了，換上個熟練司機，玩完先算。我們離開Reykjavík之後沿1號公路逆時針方向行。

出了市區之後，自然風景壯觀到難以形容。

因為風景太靚，我們不斷停車睇風景，攪到行程去得好慢。

第一次見到路邊有雪，加埋遠處山上的白雪，又吸引了我們停車。

<<Geysir>>

終於到達今日預定的第一站～冰島天然名勝Geysir地熱區的 地熱噴泉。

Geysir地熱區 – 剛到埗便發現冇其他人，正呀！如果在美國或中國有這樣的景點，必定人山人海。

在這無人温泉邊寫意地瞓了半個鐘。

地熱噴泉每隔10分鐘會噴一次水，年終無休。現時世上只有冰島和美國黃石公園有這種 地熱噴泉。

<<黃金瀑布>>

在Geysir玩足2hr，車子繼續沿35號公路往前行9km，到達一條壯觀的大瀑布 – 黃金瀑布(Gullfoss)，這瀑布不單止雄偉壯觀，而且又係冇其他人。

黃金瀑布(Gullfoss)

站在 黃金大瀑布旁，絕對能感受大自然的靈氣。

我們在 黃金大瀑布玩了幾個鐘，走上走落，整個過程只遇到少於10個遊客。

上車再起行，臨時計劃繼續沿F35向北行這條穿過 高原的公路，因為在地圖清楚看見公路兩旁全是雪山，景色絕佳，預計向北行多180km(估計3hr)會到達另一小鎮。但我因為冇經驗看漏了，原來向前行多17km便進入次級的Gravel Surface公路，只適合越野車行走。車子在路上不斷遇到大石，有些仲大到刮傷車底，雖然越行越驚，但兩旁的風景真係靚到我們忘記了危險，繼續向前行，如果駕車死火都唔知點算，在這條公路行了幾個鐘都遇唔到另一部車。

Highland Kjalvegur (Track F35) – 進入這一段高原公路之後，景色的壯麗程度是我們見識和想像以外的，令我們都忘記了安全考慮，繼續前行和不斷落車影相。

最後，前面的路被冰水冲斷了，考慮了很久試唔試吓衝過去好呢？最後都係理智地走回頭路，駕車死火真係唔知點算。

回頭又行了幾個鐘，到最近的小鎮Flufir，找到旅店已是零晨01:00了，但仲未天黑。

 

 

--待續--