自遊泰國 布吉島

泰國南部小島 Ko Phi Phi Don ~ 海灘Loh Dalum

布吉島(Phuket Island)位於泰國南部 安達曼海(Andaman Sea)，是泰國最大的島嶼。島上旅遊業發達，尤其是 芭東海灘(Patong Beach)一帶，基本上完全為旅客而設，海灘旁邊全部是旅行社、酒吧、夜店、餐廳、酒店和各類商店。布吉島的外圍也有很多適合旅遊的小島，例如 Ko Phi Phi Don，島上旅客不多，在海灘上可以見到少量旅客作天體浴。

自遊泰國 布吉島 – 序

上月去完長江三峽之後，覺得要跟著人唔係幾好玩，趁還有假期，便自己Plan去一次布吉島，第一次自已攪旅行，機票都未買過。到康泰出張 布吉島的機票，收了我HK$ 2900，只比張團體票我，要出發當日才可到機場找康泰領隊攞票，回程日期仲冇得改。乜都唔識，同康泰買了張貴機票都唔知。這次布吉島的行程只有8日，會去泰國 布吉島和P.P.島，全程個人總消費HK$5000，主要活動是 浮潛、釣魚、游水和Bungy Jump。HK$1兌 泰銖Baht 3.3。

自遊泰國 布吉島 – Day 1

上午到機場成功找到康泰領隊攞機票，黃昏到布吉島。我們一行5人，和另 2外個同機香港人一齊包車出 布吉市，在On On Hotel住兩晚，然後去附近一間Agent安排了明天 攀牙灣一日遊和後日 PP島一日遊。晚上 7個人一起在 布吉市 食泰式火鍋。

自遊泰國 布吉島 – Day 2

晨早出發到 攀牙灣(Phang-Nga Bay)，這個是普通鴨仔團，包午餐和酒店接送交通，原來冇得爬獨木舟深入 攀牙灣的紅樹林和洞穴，儍仔了，貪平報錯了團。

乘機動船遊 攀牙灣，摩打聲很炒耳。

晚上回到布吉市，再到同一間舖食火鍋晚餐，因為幾好味。

 

自遊泰國 布吉島 – Day 3

今日幫襯同一間 Agent，參加 PP 島一日遊。坐這隻遊船遊 P.P.Leung燕子洞，再去P.P.Don午餐，第一次食兔肉。

午餐後在P.P.Don自由行，行到海灘Loh Dalum，發現有間平房式酒店P.P. Princess Resort，感覺好舒服啊，而且Walk in也有房，於是立即問導遊可否暫時離團，四日後再跟船回布吉島，導遊話Ok冇問題，就這樣決定在 P.P. Don住3晚，4日後才跟船返布吉島。沒有預定行程的彈性真大。

P.P. Princess Resort – 環境清幽面向海灘Loh Dalum，第一次住這種平房式酒店，感覺很開心，連續住3晚。

Check in完之後在Loh Dalum游水，沙灘雖然好靚但泳客不多，有少部分遊客天體浴。

很快游到黃昏，天氣轉差，好似想落雨。

黃昏退潮後Loh Dalum岸邊露出一片珊瑚潮間帶，可以在硬珊瑚上步行，而且很多海膽、海星、細魚和貝殼等海洋生物，非常之有趣，第一次見到這樣豐富的海洋生態。

在Tom Sai Beach的大街食晚餐，每間餐廳也很有氣氛。

食飯中途見到條 大劍魚，話係今日漁民捉到的，勁呀！

晚上找了一間Agent，想明天出海Game Fishing釣大劍魚，可惜Game Fishing因安全問題每船最多4個客，我們5個人只可以玩Fun Fishing釣細魚，冇得釣大魚添，下次啦。

自遊泰國 布吉島 – Day 4

今日全日在島上玩 浮潛、游水、食飯、飲酒、曬太陽………好Hea的生活。

Charlie Beach Resort – 是平價的風扇茅屋，雙人房只係HK$50左右，在P.P. Princess Resort隔離，餐廳和酒吧都很好氣氛，呢幾日會時常幫襯早午餐。

泰國南部的天氣陰晴不定，時常忽然落雷雨，但15min後又放晴。

自遊泰國 布吉島 – Day 5

今日租了隻小艇，到 P.P.Don附近的無人島 釣魚。

一落鈎便有魚上釣，不過釣到的全是魚仔，但第一次釣魚便不斷有魚上釣，覺得釣魚冇難度和好好玩。

釣到一條 石斑仔。

釣到差唔多走時突然之間刮起狂風暴雨，成班人個個變晒落湯雞。

啲魚多到徒手用膠袋都捉到幾條。

回程了，這釣魚活動非常之好玩。

5個人釣了 1hr的收獲，交給Charlie Beach Resort的餐廳，一半咖喱一半清蒸，味道一般好。

餐廳話這些魚最適合在沙灘開爐BBQ，不過今日會經常落雨，所以唔能夠BBQ，唯有廚房煮埋給我們吃，有點可惜。

自遊泰國 布吉島 – Day 6

今日乘船回布吉島，叫Agent車我們到 芭東海灘(Patong Beach)，在 芭東海灘的Seagull Cottage住2晚。

Seagull Cottage – 屬於區內較平價的酒店，有冷氣和熱水，三人房Walk in價(不包早餐)每晚HK$400。

芭東海灘 是布吉島上的主要旅遊勝地和購物中心，擁有眾多酒店，在1980 年代後期，海灘開始受到西方遊客的注意。 芭東海灘以其精彩的夜生活和3km的日落海灘而聞名。

晚上在芭東海灘行夜街食海鮮。

龍蝦 – 只係冰鮮貨，不過用芝士焗都好鮮甜香口。

仲有新鮮爽甜啲的 生蠔；鮮甜嫩滑的 清蒸石斑；鮮甜美味的咖哩蟹，全部都係頂級味道，每人只係HK$150左右，今餐食得好高興。

自遊泰國 布吉島 – Day 7

早上玩Bungy Jump，只有50m高，跳落一個人工湖。第一次玩，相信亦應該係最後一次，太刺激了。

要上升降機了，已經驚到標晒汗。

最驚是跳前的幾秒，教練叫我唔好向下望，只可以平望住當面個山，因為一向下望便會唔敢跳。

教練最後倒數大叫Ready…. Three…… Two…… One…… Bungy 跳呀

在半空中的感覺良好，已經唔再驚了。

落到湖面要濕一濕水

在半空吊吓吊吓都幾好玩。

最後工作人員幫手固定個人，然後解開彈繩。

玩完之後覺得個人散晒，中午回酒店睡覺，黃昏再出動。

芭東海灘日落

晚上再行夜街，在同一間舖食海鮮，今晚啲海鮮明顯冇昨晚咁靚，應該係昨晚賣剩的貨，石斑魚和龍蝦的肉質和鮮美度也失色了，好彩今日冇生蠔，原來布吉海鮮都唔係一定好好食的。

自遊泰國 布吉島 – Day 8(完)

今日中午乘機返香港，早上乘Tuk Tuk去機場，收了Baht 80。路過 女英雄紀念碑，司機給我們落車影相。

女英雄紀念碑(Two Heroines Monument) – 兩位布吉島的女英雄Chan和Mook，在二百多年前曾經一同抵抗緬甸的入侵。

今次是第一次自已攪旅行，第一次食兔仔肉，第一次在潮間帶睇海洋生物，第一次在珊瑚礁玩浮潛，第一次釣魚，第一次住沙灘平房酒店，第一次見天體沙灘，第一次玩Bungy Jump，覺得新奇又好玩。因為完全冇訂酒店，所以見到特別的地方可即時更改行程，想食乜就食乜，跟團完全冇得比，即使價錢較跟團貴仍覺值得。

 

-----自遊泰國 布吉島(完)-----