縱橫 東非洲(2) – 強攻非洲第一高峰 吉力馬札羅山(Mt. Kilimanjaro)

非洲坦桑尼亞 吉力馬札羅山(Mt. Kilimanjaro)營地 – Horombo Hut(3700m)

吉力馬札羅山(Mt. Kilimanjaro)是 東非洲坦桑尼亞(Tanzania)境內一座睡火山，臨近肯雅(Kenya)邊界，被稱為「非洲屋脊」，最高峰為5895m的 烏呼魯峰(Uhuru Peak)，是非洲最高的山峰。只要擁有一般的體能和充足的保暖和行山裝備，這非洲最高峰不難徒步前往，一般人徒步登山只需要5天。

縱橫 東非洲 – Day 6

<<Mt. Kilimanjaro>>

今天主要係休息和適應高山，在3700~4000m之間慢行2hr，再返回Horombo Hut瞓多一晚。今朝早已經冇咁頭痛，胃都舒服返好多，可能昨天真係高山反應。今天早餐不知為何細份了一半，每人只有半條腸，半份奄列，少量麵包，唔知係咪比Porter食了我們的食物。

今日行山的風景和昨天差不多，都是看到這些奇異的高山植物。

天氣嘛嘛，山頂被濃霧鎖住了。

晚餐的份量又係少了一半，三個人食只係啱啱夠飽，之前2晚都有食剩的。第三晚冇涼沖，有些少身痕。

 

縱橫 東非洲 – Day 7

今日要由3700m高的Horombo Hut行上最高的營地 – 4700m高的Kibo Hut，約需5～6小時。今早又係得半份腸仔和奄列，唯有食多些麵包至出發。

09:00出發，首先穿過Moorland進入一片 寒帶荒莫(Alpine Desert)，我開始深深感受到高山那種稀簿的氧氣，令人步步艱辛的感覺。

超過這高度之後，開始進入寒帶荒莫。

今日天色灰暗，中午也只得3～5℃，在這片荒莫上步行更顯寒冷。

又見Porter用頭來運貨，佢條頸真有力。

這片高山寒帶荒莫十分荒涼，但也有植物可以在這惡劣環境下生長。

今日食午餐時終於頂唔順了，要食自備的福麵，在海拔四千多米的高地上，乾食福麵簡直是人間極品。因為唔夠氧，我越行越慢，反而同行最細粒的女生完全冇問題，仲話我行得太慢，攪到佢好凍。

行吓行吓仲開始落5mm大小的冰雹，更括起大風，超惡劣。

山頂 烏呼魯峰(Uhuru Peak)完全見唔到，明天零晨便要行上去了。

另一方的 馬文濟峰(Mawensi)天氣好少少，可惜不是今次的目的地。

15:00終於到達4700m的營地Kibo Hut，這𥚃只有幾十人的大房，環境很差。

左邊小木屋是Kibo Hut，明天要沿這條山路 攻頂。

晚上導遊只有餅乾和麪包等乾糧食給我們吃，唔夠飽。後悔沒有自備多些朱古力和寶礦力，明天可能唔夠Energy上山啊。

爭取時間休息，睡在床上時我把可以穿上身的衫都穿上，再加個簿睡袋，仍然覺得寒風刺骨，凍到想死，急尿急到爆都唔想起身疴。在完全靜止的狀況下，我量一量自已的心跳….天呀…..每分鐘 120次心跳…..那個晚上極難捱，又冷、又餓、又急尿…..

 

縱橫 東非洲 – Day 8

今日係整個「縱橫東非洲」旅程最重要的一日，昨晚過得很漫長，今天踏進零時便立即起床，導遊給我們每人一杯熱茶暖暖身，我們便提起勁，執拾好行李之後00:30出發攻頂。

把可以穿上身的衣物全部穿上，深呼吸幾吓之後，起行。

今日由Kibo Hut出發，預算用5小時行上海拔5685m高的山峰Gilmans Point，再用1.5小時上非洲最高點，海拔5895m高的Uhuru Peak。Lonely Planet記載，由Kibo Hut上Gilmans Point的一段路是整個登山過程最斜最難行，但由Gilmans Point到Uhuru Peak最後一段路則較平和易行。

這𥚃的氧氣太稀薄了，而且昨晚太少食物唔夠Energy，開始上山後3hr左右已經冇氣冇力，上斜時我每一步只能慢慢踏前一小步約300mm，然後深呼吸數次，再踏前300mm，像老人痴呆一樣，越上得高感覺越辛苦。過了5000m高之後，感到差不多完全冇氣，越行越慢。去到後期才開始掌扼到行高山的方法，就是放鬆全身，把每一下吸氣和呼氣都吸到盡和放到盡，而且把呼吸節奏調較到最快，要快到不能再快，估計當時每分鐘深呼吸最少80次。加快了呼吸後，缺氧的感覺明顯減少了，更加可以加快步速，慢慢向山上行。

終於行到海拔5685m高的山峰Gilmans Point，這裡的温度是 -20℃，由於行得太慢，當時已差不多07:00，太大霧看不到日出。從身內拿出相機影了幾張相，相機便凍到停了。

非洲第二高峰Gilmans Point – 5685m

好彩影了一幅到此一遊相

始終都係對面的 馬文濟峰(Mawensi)天氣比較好。

正想繼續向前行時，導遊話今日天氣太差，再向前行可能會雪崩好危險，要我們沿路落山。太可惜了，無緣上非洲最高峰。可能我在上山時已用盡了Energy，又冇浦充，落山時我整個人軟晒，完全冇力行。

導遊和另一位一同行落山的瑞士朋友見我就死得咁樣，便一左一右抽起我，從這斜泥坡跣住落山。瑞士朋友話自己玩開滑雪，咁樣跣落山好Easy喎。

我用了6小時上山，落山卻不用1小時。

同行的2個朋友真壯健，自己行落山，唔似我咁水。回到Kibo Hut竟然冇早餐食，唯有食埋身上最後一包福麵。食完後，起行落山。落山比上山輕鬆百倍，

很快便落到Horombo Hut，今晚在Horombo Hut瞓多一晚，明早落山。

晚上的食物連一半份量也沒有，連那幾罐好立克和樂口福也失踪了，前晚明明還有大半罐的。只係剩下奶粉和茶包。

 

縱橫 東非洲 – Day 9

早上09:00出發，下午13:00回到起點。到埗後導遊問攞小費，佢話我們每人要比USD 96 (2個導遊，每人每日USD 5，即USD 60。6個Porter，每人每日USD 1，即USD 36)，但係……報名時明明話小費是自願的，我哋3條死窮L那來多餘錢，比完USD 96小費我哋要瞓10晚街架，最後3個人加埋只比了USD 22佢班友，本來友善的導遊立即變面，兇神惡煞，但對住我哋3條窮L始終再攞唔到錢。原本我們上到Gilmans Point會有一張錄色的登山証書(上到Uhuru Peak有金色的登山証書)，但個衰導遊冇比我哋。

<<Moshi>>

回到Moshi Hotel，導遊居然屈我哋遺失了一對登山鞋。真乞兒，我們的行李全部由那6個Porter搬上山落山，即使遺失也是Porter遺失，我於是大發雷霆，要見佢哋老細理論，佢話安排我哋明早和佢老細和旅行社負責人見面。導遊真衰格，始終冇比証書我們，明明見到回程時佢已經在國家公園管理處替我們攞了証書。

 晚上大家商量好，決定放棄那張 登山証書，不再浪費時間理論，明天乘最早的巴士離開。

 

縱橫 東非洲 – Day 10

今日酒店早餐都冇食，乘06:00的長途巴士離開Moshi，到坦桑尼亞的首都 – 三蘭港(Dar Es Salaam)，車程10小時。

早上在Moshi長途巴士站上車。

坦桑尼亞的長途巴士非常殘舊，玻璃窗和坐位都破舊不堪，而且又迫又焗，好彩在總站上車有位坐，但中途停站休息都唔敢落車疴尿，驚返上車位都冇埋。

<<Dar Es Salaam>>

捱了10個鐘終於到達總站 三蘭港(Dar Es Salaam)。三蘭港 是坦桑尼亞最大的城市，擁有超過 600 萬人口。落巴士後按Lonely Planet的地圖行去搵旅店，但最後發現地圖的方向坐標扭轉了90度，北方變了東方，行多了60分鐘冤枉路都找不到平價酒店，有房的酒店郁郁都要成HK$200一個人一晚，太貴了。最後，終於找到間平嘢，每人只需HK$13，三人房有風扇用公共厠所。

三人房(每人HK$13)

門口的走廊很像70年代的公屋。

走廊尾是公用痞廁，沖涼也是在痞廁內沖，但個公共厠所環境超級極度可怕，啲嘢四圍地下牆邊都係，離遠見到都唔敢入。

間房門外望到 三蘭港(Dar Es Salaam)的舊區

天黑之前出街行吓，順道去碼頭買船飛去 桑吉巴島(Zansibar)。

三蘭港(Dar Es Salaam) 街景

三蘭港 平治車廠

三蘭港 火車站

聖約瑟天主教堂(Saint Joseph's Metropolitan Cathedral)

陣亡戰士紀念碑(Askari Monument) – 紀念碑為祭奠一戰期間陣亡的非洲將士而建立。

三蘭港 港口碼頭 – 黃昏到港口買船飛去桑吉巴島。

三蘭港 雖然是 坦桑尼亞的首都，但大部分馬路也沒有瀝青，每當有車經過便吹起地上的沙塵，環境極差。而且滿街都見到崎型的人，有些全身骨骼變形，手腳和身不能分開，像球一樣……太可憐了，但真係有啲驚。

在街上買了幾個橙和大芒果，但農药味極重，完全不能入口。

晚上在酒店開唔到大，開細用膠樽，個身臭到暈又冇涼沖，要做忍者，忍忍忍忍忍……睌上瞓得很差。

 

縱橫 東非洲 – Day 11

<<Zanzibar City>>

中午乘船去 桑吉巴島，黃昏到埗。

桑吉巴島(Zansibar)是位於坦桑尼亞東部的島嶼自治區，雖然同屬坦桑尼亞這國家，但是從 三蘭港進入 桑吉巴島也要通過當地入境處並在Passport蓋上入境印。桑吉巴島融匯了非洲傳統黑人文化、伊斯蘭文化及印度文化於一島，首都是 桑巴市(Zanzibar City)，古城區是世界遺產Stone Town。

按照我們原定計劃，今天會即晚乘4hr車到Zansibar東部的沙灘Jambiani Beach。

船剛泊岸便有2隻local烏蠅跳上船纏着我們，話自已係導遊，要給我們介紹住宿、交通...我哋當然唔肯比佢抽佣啦，但他們苦纏不休，死跟往我們行到公共車站，當我們想找車去Jambiani Beach，佢立即和司機講土話，司機便答我們話冇車，2隻烏蠅不斷攪破壞，我用極兇的語氣大聲喝佢哋都唔肯走，冇晒辨法，唯有先入餐廳食飯。2隻烏蠅死心不息，在餐廳門口等我們。

吃到一半，有位友善的local人走過來，話自已係Zansibar人，問有甚麽可以幫到我們。我問佢 “Is it possible to Jambiani Beach today?”那朋友答我 “My friend, nothing is impossible. It just depends on how much you can pay.” 這位朋友開的價錢比Lonely Planet的資料貴一倍，而且佢死都唔減，話因為現在已天黑，自已去到Jambiani Beach要過一晚夜，所以一定會貴啲，如果我們明早才出發，可以收半價。我們覺得佢都很合理，而且為了啖氣，我們決定幫襯佢。上車前2隻死烏蠅還要跟往，最後見我們上了車才肯死死氣行開。

<<Jambiani Beach>>

車子向東駛足4小時，接近零晨才到Jambiani Beach的酒店，中途天色全黑又沒有街燈，都幾可怕，司機試過幾次停車和路上的人吹水講土話，都有點驚佢哋唔係好人，好彩只係我錯。酒店位於沙灘上，行出房門便是沙灘，向正東面，可看見日出。當晚第一時間沖個靚涼，瞓個好覺。

 

縱橫 東非洲 – Day 12

晨早自已一個起身睇日出，Jambiani Beach的環境寧靜，有種與世無爭的感覺。但由於當地村民不懂處理家居污水，令部份沙灘已經開始受到污染。

Jambiani Beach的日出

從海𥚃可以望到我們的酒店

我們的房間是獨立屋，踏出門口便是沙灘，有種活在伊甸園的感覺。

酒店的餐廳，供應Zansibar出產的龍蝦，半隻只賣約HK$25，但只係用清水煮熟，味道一般。

食完早餐之後到附近的村莊行吓。

今日全日Hea玩，在沙灘游水，曬太陽，再出海浮潛，不過又冇魚又冇珊瑚。

在沙灘曬太陽時，有幾個小朋友主動走過來和用英文和我們吹水，佢哋真係勤力，見到外國人便把握機會學習英文。我說我們來自香港，他們卻第一次聽到香港這地方，還問香港是否日本的首都，因為他們只識得日本，以為像我們的樣子都是日本人。我便向他們解釋，香港是中國一個城市，想不到他們也是第一次聽到China這國家。

Jambiani Beach的黃昏。

在Jambiani Beach瞓了兩晚，明早要離開了，約了昨晚的司機來接我們。

縱橫 東非洲 – Day 13

<<Stone Town>>

早餐後包車返回Zansibar的西部古城Stone Town，找了間平價旅店，3人房每人每晚USD 6連早餐，不過風扇都冇，用公共廁所和浴室，沖凍水涼。

Stone Town旅店的老板

旅店食早餐的地方，早餐有奄列腸仔奶茶和牛油多士。

每人USD 6一晚的3人房，落了蚊帳焗到像蒸籠，但冇可能唔用蚊帳。

安頓後在Stone Town四圍逛逛。

Stone Town舊城街道

桑吉巴古堡(Old Fort of Zanzibar) – Stone Town最古老的建築，從前用作防禦外敵入侵桑吉巴島。

和平紀念博物館(Peace Memorial Museum)

桑吉巴大教堂(Anglican Cathedral Stone Town) – 教堂位置曾經是桑吉巴島最大的奴隸市場，而大教堂的建造也是為了慶祝奴隸制的結束，內𥚃依然保留了從前的遺跡。

桑吉巴島傳統 阿拉伯帆船(Dhow)

Stone Town貨櫃碼頭

晚上還是十分之熱，房間又冇風扇又多蚊，完全瞓唔着，要每個鐘起身淋凍水後才可瞓一陣，但不夠半個鐘又頂唔順，全身濕晒汗，真大鑊。

 

 

 

---待續---