坦桑尼亞(Tanzania)位於東非洲赤道以南，是人類發源地之一，和北鄰國家 肯雅(Kenya)同屬野生動物的大家園。非洲最高峰 吉力馬札羅山便是位於坦桑尼亞境內。坦桑尼亞先令(Tanzanian Shilling TZS)是境內流通貨幣，但美元也被廣泛使用，大部分酒店和旅遊消費也可以直接用美元結賬。
縱橫 東非洲 – 序
1995年6月共30天的 縱橫東非洲旅程是到目前為止 最吃苦，食和住都最差的一次旅程。但是，這次旅程去的都是世上獨一無二的地方，有非洲大草原及和非洲第一高峯 吉力馬札羅山(Mt. Kilimanjaro)；而且，遊歴東非洲能確實體驗黑人的獨有文化，這不是遊歴北非(主要是阿拉伯文化)和南非(非洲最富裕國家)可感受到的體驗。這次畢業旅行原本預了9日遊歷東非島國 塞舌爾，最後卻因為有一科要補考而取消，有點兒可惜。要去東非洲旅行，必須要打黃熱病和霍亂針，要出示針紙才可入境，衛生署亦建議每天吃一粒瘧疾丸預防瘧疾。出發前幾個月非洲中東爆發 伊波拉病毒(Ebolavirus)，心情有點緊張。
日期 : 1995年6月至7月(共30天)
地點 : 肯雅 • 坦桑尼亞
30 天全程個人總消費HK$18000，包括海灣航空來回肯雅機票HK$8200
主要住宿 – 每人HK$30~50一晚的風扇房，一般都有蚊
主要食糧 – 蛋和薯條，每日最少食2餐
兌換價 : USD$1兌 肯雅先令KES 50、USD$1兌 坦桑尼亞先令TZS 500
縱橫 東非洲 – Day 1
中午乘 海灣航空，由香港啟德機場出發到 東非肯雅的首都 – 內羅比(Nairobi)。
縱橫 東非洲 – Day 2
<<內羅比>>
上午到達 內羅比機場，入境檢查Passport時聽到第一句非洲黑人和我説的話是「How are you?」隨後每天都不斷有人這樣問候我們，感覺上東非人一般都十分友善，只係因為揾食艱難才會對遊客有過份煩擾的行為。
我們一行3人剛出機場便被十多個牛高馬大的黑人圍住，想我們幫襯佢哋包車出市區。由於巴士班次極疏，迫住要包車，經一輪激烈討價還價後，以KES 500 成交。上車後，我叫司機車去Lonely Planet介紹的一間平價酒店，但佢居然把我車到一間Agent，仲叫我落車攞些免費的旅遊資料，又話可以幫我們買車票等等……。我堅持唔落車，No No No No……….No咗十多分鐘，佢見冇我們辦法，唯有死死氣車我到市中心，但兜兜轉轉始終找不到那平價旅店。
我們不想再浪費時間，當車駛到市中心，我在Lonely Planet的地圖可確定自己位置後，立即比錢落車。只係剛剛離開部車，我們又被6～7個黑人圍住，問我哋想去邊，可以帶路又可以做導遊。又糾纏了十多分鐘，為了避開那些黑人，我們進入了附近一間旅店，問完價錢覺得都算平，便決定先住一夜。那旅店名Hotel Gloria，三人房每人USD 7包早餐，衞生環境尚可，有廁所和風扇，沖冰水涼，最好自備有睡袋。
下午在市內逛街。
在東非洲，時間是最唔值錢的，最適合用來浪費。那裡完全沒有夜生活，基本上整個旅程也是每晚20:00前便瞓覺，瞓到早上07:00，相當健康。
晚上住 內羅比Hotel Gloria。
縱橫 東非洲 – Day 3
早餐有奄列、多士和奶茶，仲有牛油和果醬，比預期豐富啊。
在旅店食完早餐後，行去巴士站找長途巴士到鄰國 坦桑尼亞的小鎮 莫希(Moshi)，在那𥚃出發登上 吉力馬札羅山(Mt. Kilimanjaro)。在巴士站等了個多小時，長途巴士過晒鐘都未到。有個老外過來話長途巴士在途中已 拋錨，所以今日冇巴士去Moshi，要自己包車去，佢哋有2人，見我哋有3人，想話一齊包架的士。
Sara是地膽，由她負責找的士。一行5人最後包了架極殘舊嘅細的士，在三十多度高温的列日下，冇冷氣又不可開窗(因為段路太大沙塵，仲勁過入沙漠)，差點焗到缺氧而亡。
<<Moshi>>
前後足足焗了5個鐘才去到Moshi，今次一定輕幾磅了。的士到Moshi後，先車Thomas和Sara到他們的教會，我們道別後叫的士車到市中心，我們要先找酒店落腳。
估唔到的士並冇駛去Moshi的中心，而是駛到Moshi郊區的一間旅店。原來，所有到Moshi的旅客都只有一個目的，就是登上 吉力馬札羅山，所以司機不放過我們這3條水魚，又想分佣。
他介紹那間酒店貴到飛起，遠超Lonely Planet所提及的價錢，我當然唔肯制，和司機及酒店老闆糾纏了個幾鐘，佢哋最後對我們3條窮L冇晒符，因為我哋乜嘢都有，剩係冇錢，司機最後只好車我們去市心Moshi Hotel內的一間駐酒店Agent，又係開天殺價，經過我們3條窮L落地還錢後，最後以每人USD 400合理價錢成交下列Package :
1. 6日5晚 吉力馬札羅山 攻頂之旅，3人成行，包2個導遊加6個Porter，所有攻山用品包括保暖大毛衣、頸巾、皮手套、行山鞋和厚襪等...，5晚山上住宿和每日3餐，國家公園的入場費，來回酒店接送。
2. 頭尾2晚Moshi Hotel住宿3人風扇房連早餐，每人每晚優惠價USD 7(佢話原價每人要USD20喎)。
Agent話導遊和Porter的Tips不是必要比的，完全係自願性。講完數就比錢，安頓後外出食飯。
飯後在Moshi閒逛，始終係第一次去非洲，仲要係東非洲，街上每樣事物也感到很新奇。
夜晚在Moshi Hotel房內煮通心粉吃，19:00就上床瞓了。
縱橫 東非洲 – Day 4
今日早餐後開始攻山旅程，預計會4晚冇涼沖，是對自己的一個重大挑戰。
<<吉力馬札羅山國家公園>>
今次的登山路線叫The Marangu Route，只唯一有住宿的路線，最快可以5天完成行程，但是官方建議多留一天適應高度，增加攻頂的成功率。
第一天行程要由1800m行上到2700m的營地Mandara，全程連午餐時間約4hr。
今日午餐盒有 香蕉、橙、好硬實的生紅籮白條、麵包和雞蛋。在山上每日的午餐都一樣，食物唔係太亁淨，但出發非洲前已打算只要唔係屎，什麽都會放入口，所以把食物全清，無需食自備的美食 --- 福麵。
16:30到達第一晚的營地Mandara Hut，海拔2700m，睌上的温度有4℃。
今日行到滿身大汗，全身臭哼哼。原本打算沖涼，但水實在太泠了，真係冇勇氣淋凍水落身上，最後用濕毛巾抹抹身上的臭汗算了。
晚上瞓得唔錯，第一日行山行程算順利，但冇乜特別風景。
縱橫 東非洲 – Day 5
今天要由Mandara Hut行上3700m的Horombo Hut，連休息時間行程約6小時。
早上08:00食早餐，有奄列、腸仔和麵包、奶茶，相當豐富美味。09:00出發，不久便走出樹林，進入一片 高沼地(Moorland)。
下午15:00便到今晚住的營地。
不知是午餐的食物唔乾淨還是高山反應，或是兩樣都有，我到Horombo Hut後開始出現肚疴、嘔和有點頭痛。睌餐時仍然唔舒服冇乜胃口，但晚餐仍然和昨晚一樣的豐富好味。
晚上氣温只有 -1℃，我帶唔夠衫，又冇暖包又冇朱古力，而且睡袋只係夏天貨太薄，覺得好凍，腳底冰凍，瞓得非常之差。
---待續---
待續
回覆刪除[版主回覆03/16/2013 07:20:32]