英國倫敦 白金漢宮(Buckingham Palace)
白金漢宮(Buckingham Palace)是英國皇帝位於倫敦的寢宮及辦公室，也是國家慶典和皇室活動的主要舉行場地，現在更成為倫敦的主要旅遊景點，宮外每天都會進行禁衛軍交接典禮開放給遊客參觀，因此每日也吸引無數旅客專程前來觀看。
歐洲 萬里行 – 序
今次歐洲自由行共53天，用有限的暑假時間走馬看花地遊遍西歐、東歐和南歐共15個國家，包括英國(3日) • 法國(6日) • 摩納哥(1日) • 瑞士(3日) • 列支敦士登(1日) • 盧森堡(1日) • 荷蘭(2日) • 比利時(1日) • 德國(7日) • 捷克(2日) • 奥地利(4日) • 匈牙利(3日) • 意大利(6日) • 梵帝岡(1日) • 希臘(9日)。歐洲的來回機票最平要HK$6900(孟加拉航空)，第2平是海灣航空HK$8100，跟住係星航HK$9400，國泰要過萬。因為旅費只有HK$30000，當然係選最平的 孟加拉航空，可以順便去埋 孟加拉見識吓。2個月二等歐洲火車証一張HK$5500，未出發已用了$12400，仲剩HK$17600分53日用，每日的食、住、入場費和交通加埋只有HK$332，一定要好慳住用，所以帶備了大量福麵去煮。這是自已第二次自由行，出發時有些緊張。因為交通和入場費冇得慳，為了慳錢，饍食會盡量平和盡量自己煮，住宿只可以選擇每人HK$200以下的旅店和盡量乘通宵火車。
外幣兌換價 : ￡1兌HK$ 12.1、法國法郎1兌HK$ 1.5、瑞士法郎1兌HK$ 6.2、德國馬克1兌HK$ 5、意大利里拉2000兌HK$ 1
歐洲 萬里行 – Day 1
黃昏乘機由香港出發，飛機要分別降落孟加垃首都 達卡、印度 孟買、杜拜和 意大利羅馬上落客，最後才到 倫敦。
歐洲 萬里行 – Day 2
<<倫敦>>
在英國倫敦會停留3日2夜，預算在倫敦市四圍行3日 ~ 唐人街、SOHO區、大英博物館、動物園、泰晤士河、倫敦塔橋、海德公園等等….
早上到達 倫敦，人生路不熟，於是在火車站找了間Agent幫手租房，Agent很快便找到最平價的床位，位於地鐵Bayswater站的Leinster Hotel，六人房的床位連早餐每人只需￡10，平到笑，決定連續住了2睌。
Leinster Hotel
放下行李便立即開始玩，先在附近行吓街，Bayswater是倫敦市的一個小區，許多不同國家和民族的人在區內生活。
Bayswater大街
倫敦地鐵站
柯芬園市集(Covent Garden Market)
倫敦蘇豪區(Soho) – 原本是當地的紅燈區，後來色情事業式微，加上位置緊貼倫敦的金融區，每天下班時候都有很多人飲酒消遣，使這區漸漸雲集很多時尚酒吧和小店。倫敦唐人街就在附近。
倫敦唐人街(China Town) – 條街好多人，去旺記食了些東西，伙記啲態度都唔係好差啫。
在Soho行夜街，不過都唔捨得坐低飲杯野。
晚上住 倫敦。
歐洲 萬里行 – Day 3
今日繼續在倫敦市內行街。
倫敦電話亭 - 表面上冇乜特別，原來裡面好多嘢睇架。
好精彩的傳單，貼滿電話亭內。
英國 白金漢宮(Buckingham Palace)
早上是禁衛軍交更時段
倫敦古董的士 – 雖然冇錢坐，不過司機叔叔好好人啊，仲肯同我影張相。
英國 國會大廈(Houses of Parliament) – 英國國會包括上議院和下議院的所在地，1987年被列為世界文化遺產，鐘樓就是著名的大笨鐘。
西敏寺(Westminster Abbey) – 英國君主安葬和加冕登基的地點，1987年被列為世界文化遺產。
泰晤士河(River Thames) – 英格蘭最長的河流，全長346km，是倫敦的地標。
英國 首相府 – 唐寧街10號
由於冇乜錢，動物園和大英博物館都冇買門票，從後門入，慳好多。
大英博物館(British Museum) – 世界上規模最大的博物館之一，成立於二百幾年前，館內很多文物都是英國通過戰爭從中國、希臘、埃及等國搶回英國的，所以大英博物館可能是 世界上最大的賊窟。由於冇乜錢，所以冇買門票從後門入，慳了唔少。
在博物館居然遇到一位大學同學，真係邪門，在香港都未響街上撞過佢囉。
聖保羅大教堂(St Paul's Cathedral) – 英國聖公會倫敦教區的主教座堂，建於17世紀。
倫敦塔橋(Tower Bridge) – 橫跨泰晤士河的一座高塔式鐵橋，倫敦市的地標。
晚上住 倫敦。
歐洲 萬里行 – Day 4
今日會離開英國。日間繼續在倫敦市內行街，乘地鐵站站出去望吓。晚上乘船到法國，再轉通宵火車去 巴黎。
溫布頓區(Wimbledon Village) – 是倫敦市的豪宅區，溫布頓網球錦標賽便是在這裡舉辦。
溫布頓區公園Cannizaro Park
溫布頓火車站
午餐去麥當勞吃 巨無霸餐(HK$30)，香港賣$17咋。
海德公園(Hyde Park) – 倫敦市最大的公園。
倫敦動物園(London Zoo) – 發現可以從後門入，為了慳錢所以又冇買門票，窮學生係咁架啦，有錢邊個想做呢啲衰嘢吖。
Victoria
Station – 黃昏在這𥚃出發，先乘火車到港口Newhaven Ferry Port，再轉船往法國Dieppe Ferry Port。
通宵從倫敦往巴黎。
歐洲 萬里行 – Day 5
零晨到達法國Dieppe Ferry Port，要立即轉火車去巴黎，要開始用 歐洲火車証了，不過火車站Counter未開，火車証開唔到，只好照上車博一博，好彩火車上冇人查票。
<<巴黎>>
火車早上到巴黎，落車即有個人用廣東話問我是否找地方住，佢介紹了火車站附近的平價旅店給我，雙人房價錢每人只係HK$150，交通又方便，成交。
太早未可以Check in，要先放下行李。在 巴黎會停3日，連續住2晚，今天 巴黎市一日遊。巴黎的地鐵和傳聞一樣，好多人唔比錢入閘架，貼住人背脊跟尾入閘又有，跳閘又有，在出閘口衝入去又有，總之就各式其式，連巴士都可以走票架，我們當然要入鄉隨俗啦，慳返唔少車錢，今晚可以買多罐午餐肉送通粉了。
巴黎歌劇院(Opéra de Paris) – 120年歷史的建築，與聖母院和羅浮宮同為巴黎的地標建築。
凱旋門(Arc de Triomphe) – 拿破崙為紀念1805年打敗俄羅斯聯軍，於1806年興建。中途因拿破崙政權被推翻而停工最後到1836年才能正式竣工。
比錢上了凱旋門頂部，遠望 艾菲爾鐵塔。
另一方向遠望 新凱旋門(Grande Arche de la
Défense)。
繼續行街～
協和廣場(Place de la Concorde)
小凱旋門(Arc de Triomphe du
Carrousel)
夏樂宮(Palais de Chaillot) – 鬼仔踩Roller跳高，好似奧運咁勁。
艾菲爾鐵塔(Tour Eiffel) – 巴黎市最高的建築物，高312m，建於1889年。1991年被列為世界文化遺產。
投卡德侯花園(Jardins du Trocadéro) – 今日時間充裕可以慢慢行，主力玩巴黎鐵塔，先在這些外圍地方慢慢欣賞。
耶拿橋(Pont d'Iéna) – 橫跨塞納河，連接夏樂宮和巴黎鐵塔。
上鐵塔有2個方法，一係比錢買票乘升降機上，或者免費行鐵梯可以上到第一層及第二層觀景台。自已只係個窮撚，邊有得選擇吖，可以有機會用腳行上去已經好好啦。
凱旋門
投卡德侯花園(Jardins du Trocadéro)
回到酒店攞房，估唔到景觀唔錯喎，巴黎街道很井井有條。
晚上住 巴黎。
歐洲 萬里行 – Day 6
今日09:00至22:00會去 狄士尼樂園(Disney Village)一日遊，非常之大雨。但大雨也有好處，就係人少，加上樂園面積細，玩了大半個樂園的遊戲。
大雨下的 狄士尼樂園，機動遊戲都很少人排隊，最耐也只是排30min左右。因為入場費要三百幾，住又要百幾，今日已經嚴重超支了，所以早午餐加埋只乾爭爭吃了2個由香港帶去的福麵，深夜回酒店才再煮通粉，實減到肥了。
晚上住 巴黎。
歐洲 萬里行 – Day 7
日間繼續 巴黎市一日遊。
羅浮宮(Musée du Louvre) – 門口的 羅浮宮金字塔(Pyramide du Louvre)就是由建築師貝聿銘設計的入口，於1989年建成後立即為巴黎市的地標。羅浮宮展出的展品數量達35000件，當中包括很多從東方、埃及和希臘巧取豪奪回來的古代文物。
蒙羅麗莎畫像(Mona Lisa)- 文藝復興時期畫家 達文西的代表作，世界上最著名的油畫作品之一，畫中笑吟吟的Lisa姐被稱為「神秘的笑容」。
巴黎市 世界時鐘
巴黎市 性商店
午餐又去麥當勞吃 巨無霸餐，法國比英國貴，要HK$45。
塞納河(Seine) – 流經巴黎市中心的法國第二大河流，全長780km，巴黎的塞納河沿岸地區於1991年被列為世界文化遺產。
巴黎聖母院(Cathédrale Notre-Dame de
Paris) – 巴黎最有代表性的歷史古蹟和觀光名勝，好像長期都維修之中。
黃昏開始乘通宵火車住法國南部 蔚藍海岸的小鎮 尼斯(Nice)，又可以慳返一晚房錢，唔係咁樣會唔夠錢食飯囉。
白金漢宮(Buckingham Palace)是英國皇帝位於倫敦的寢宮及辦公室，也是國家慶典和皇室活動的主要舉行場地，現在更成為倫敦的主要旅遊景點，宮外每天都會進行禁衛軍交接典禮開放給遊客參觀，因此每日也吸引無數旅客專程前來觀看。
沒有留言:
張貼留言