馬爾代夫Paradise Island

馬爾代夫Paradise Island Resort and Spa ~ Water Villa

馬爾代夫是由很多個小島組成的島國，每一個小島最多只有一間酒店，首都 馬里(Malé)是個面積只有8.3平方公里的小島。天堂島(Paradise Island)是 馬爾代夫眾多小島酒店之一，位於北馬里環礁North Male’ Atoll，距離馬里國際機場10km，島嶼四周環繞著白色沙灘，度假村內有各種水上活動供住客選擇，包括獨木舟、釣魚和浮潛等等。

<<馬爾代夫Paradise Island >>

很久未跟過旅行團了，今次參加 永安的“馬爾代夫6日4晚團” ，團費加導遊貼士共HK$8500，包4晚Paradise Island Beach Villa、每日三餐自助餐(不包食水)、3hr馬里市導賞遊和一個3hr跳島遊船河，每人加多約HK$1000消費(食水、一次夜釣和坐直昇機)。

報名時講明了要加錢住Water Villa，職員話只需補返每房每晚差價USD 40，但旅行社又唔肯Confirm，話要去到先知有冇房，但多數有喎。第一日去到酒店後，導遊即問有冇人想upgrade間Beach Villa做Water Villa，但要附全費而不是補返每房每晚的差價，即係每upgrade一晚Water Villa要附USD 120，明食我地USD 80價，手段極低劣，全團二十幾人有一對夫婦upgrade了一晚，但就媽媽聲。

這次行程質素甚差(食、住和玩都差)，短短假期已用了差不多一皮野，決定從今之後如非必要，打死都唔再跟團。

 

馬爾代夫Paradise Island – Day 1

中午機由香港飛星加坡，在機場呆等4粒鐘後零晨飛往馬爾代夫。

 

馬爾代夫Paradise Island – Day 2

由於時差，到達馬爾代夫 馬里機場只係零晨02:00。乘 20min快艇便到Paradise Island了，check-in後行到房已經 03:30，導遊叫我地瞓到中午才起身Briefing和食飯。全團人的房位置都勁差，從餐廳要行最少15min才到，房外的沙灘前有個大水霸阻住了海景，這個團的房係全個島位置最差的一批房。

一覺起來已經是中午。

Paradise Island Beach Villa – 今次被永安呃咗，只能住沙灘房。

早午晚三餐也是在這間餐廳食。

中午食第一餐飯，編了個極差的位，又冇View又迫又冇風扇又熱又焗，仲要搭枱(兩啤人坐一張四方枱) ，導遊仲話不可以轉枱，要在這餐廳和這張枱食足5日自坐餐。。。。食物味道一般，第一餐覺得冇乜特別好食，第二餐開始悶，跟住幾日。。唉!! 1 liter水每枝USD 4。導遊又話食完飯要每人放低USD 1 Tips在碟底，否則下一餐會冇义用冇碟用。。第一次見識咁樣的規矩，相信分明又係旅行社冇比足錢酒店，所以要團友們餐餐自己加錢。

食完飯去泳池游陣水，焗陣steam很快又過一日。

用按摩池和焗蒸氣浴要每位USD 5。

日落了，第一日便被旅行社的不良行法激親，好唔高興。

馬爾代夫Paradise Island – Day 3

今日由早到晚全日落大雨，所有活動包括馬里市3hr遊和跳島3hr遊船河一齊取消，只能無聊地焗吓蒸氣又過一天。

黃昏天色才好轉，可以如期出海釣魚。

原本食白果的，幸運地入黑之後有一大羣 東星斑游過，有十多人釣到東星斑，我都釣了3條斤半以上的大東星。

臨走釣多了一條 紅鯛魚(Red Snapper)。

今晚的魚獲非常之豐富

即晚成團人一起宵夜，可惜酒店只係把所有魚用來白烚，油和豉油都冇滴，鹽又冇，嘥晒啲好野，唉!!!

馬爾代夫Paradise Island – Day 4

今日有返太陽，可以在岸邊浮潛和扒獨木舟。中午和我們同枱食飯的團友轉了房去Water Villa，請我們去參觀。

Water Villa – 只比Beach Villa貴50%，但靚幾倍，永安的生意手法真係賤，唔明佢點解唔正正經經訂清楚價錢，報名時Confirm房間的種類。

下午在岸邊浮潛，都有唔少魚。

馬爾代夫Paradise Island – Day 5

今早要執好野check-out，早餐後出發去 馬里(Malé)遊3hr，接着是3hr跳島遊船河和自費坐直昇機。

乘坐快艇，不用20min已經到達 馬里。

馬里(Malé) – 馬爾代夫人口最多的島嶼，位於北馬里環礁的邊緣，面積只有8.30 平方公里，卻是世界上人口最稠密的城市之一。

魚市場內放滿了吞拿魚，魚腥味十分濃列。

遊完 馬里之後，開始跳島遊，3hr會去2個小島。

首先去島上的商店街。

再行行附近的民居

島上居民的墓地，當埋係名勝咁遊覽。

另一個島是無人島，在島上可以浮潛和游水。

岸邊很多魚仔，是水清沙幼的無人島，不過冇淡水沖身，玩完周身又痕又乾好辛苦。

最後個個醃鹹魚一樣走去玩埋直昇機。

原來隻直昇機是超級大機，坐成24人，我仲以為好似格陵蘭嗰架咁坐六個人咁細添，機身太大所以非常之穩定，完全唔好玩。

風景亦冇乜特別，只係附近的小島。

玩到夜晚才返酒店攞行李，因為已經退房所以冇得沖涼，醃住個人乘零晨機返星加坡。團友們都大罵永安的行程安排得超級差劣。

 

馬爾代夫Paradise Island – Day 6(完)

從星加坡返到香港已經夜晚了，整個行程又貴又唔好玩，旅行社安排得甚差。

 

 

 

-----馬爾代夫Paradise Island(完)-----