再踏菲律賓Boracay – PADI高級潛水員課程

菲律賓 長灘島(Boracay)

長灘島(Boracay)是菲律賓中部 班乃島(Panay)西北海岸外圍的小島，擁有4km長面向西方的白色沙灘(White Beach)和面向東方的Bulabog Beach，水清沙幼碧海藍天，小島的四週均滿佈珊瑚礁，是一處上佳的潛水和度假地方。White Beach是島上最主要的觀光海灘，海灘旁有許多度假酒店和酒吧餐廳，深受歐美旅客喜愛。1996年10月初到Boracay便深深被這小島吸引，決定一定要再來潛水。1997年2月終於信守自己承諾再次踏足Boracay，並完成PADI高級潛水員課程，這次行程共6日。

再踏菲律賓Boracay – Day 1

今日要返整日工，放工後一行4人夜機去 馬尼拉，去到馬尼拉機場已經23:00。我們明早07:00會乘內陸機去菲律賓中部 班乃島(Panay)的城市Kalibo。因為4個都係窮L，慳得就慳，所以決定當晚上在馬尼拉機場瞓地下。

再踏菲律賓Boracay – Day 2

因為地下又污糟又硬，我最後都係坐响度瞓。零晨01:00機場特然關了冷氣，變得又熱又多蚊，難頂到極點，辛苦到想死，下次都係決定要窮得有骨氣，住酒店。

07:00乘1hr內陸機去Kalibo，轉1乘.5hr巴士去Caticlan，再轉小船去Boracay。

Kalibo機場 – 在機場有Agent安排交通往Boracay。

由Caticlan去Boracay的小船，落船時要澗水。

Boracay位於White Beach的公共碼頭。

Queen’s Hotel – 位於White Beach碼頭附近，位置方便價錢合理，上次也是住這間，有冷氣和熱水沖涼，今次住3晚。

White Beach旁有一條小徑，餐廳、酒吧、平價旅館、商店、潛水店….什麽都有。

Boracay White Beach – 第一時間去沙灘游水曬太陽。

下午到潛水店報名參加了一個 高級潛水員課程(Advanced Open Water Diver)，幫襯華人 韋福龍和台灣人 李永祥開的潛水店，貪佢識廣東話，每位USD 185全包。

晚上立即開始課程，第一堂Night Dive(Dive Site – Friday Rock)，好多細魚。

 

再踏菲律賓Boracay – Day 3

早上07:30到Boracay一個極佳的潛點Yapak，第一次Deep Dive。Yapak的水流很急，下水時必需放盡BCD的氣，坐在艇邊用背部落水，落水後立即90度極速向下潛，直達40米深的海床。假如動作不夠快，會被水流沖到岸邊，便不能落到40米深的海床，淺水區冇嘢睇。

第一次Deep Dive，我依足指示，放盡BCD的氣，坐在艇邊用背部落水，落水後立即90度極速向下潛。開始時很順利，當潛至20至25米水深時，我吸到幾滴海水入喉嚨，當時個腦腍，氣樽入面的Gas有少少水？覺得唔妥，想找Buddy，但Buddy在我下面(比我潛深1米左右)，我便加把勁追佢，一加勁向下潛，即刻吸入一大啖海水，嚇到我魂飛九宵，冇辦法之下，我忍住耳痛和冇氣，用盡最後的兩大腳踢水，追上了Buddy，一手搶去了佢口上個吸嘴，自已大口吸了兩吓，Buddy被我嚇到儍，幸好佢反應快，拿自己的後備吸嘴用，最後我們慢慢上水。

上水後，我一邊嘔出大量海水和胃氣，個Buddy就小爆我，問我點解唔用自己個後備吸嘴，或佢個後備吸嘴，要搶佢口嗰個………係喎，點解呢?應該係反射作用。

最後，潛水店話可能係啲客上水時把吸嘴放到沙灘上拖住行，個吸嘴入了沙，所以在深水高水壓時便入水。頂，唔check清楚就比人用，差啲死人，真係離普，今次真係嚇破膽。

下午繼續出海潛水2次。

再踏菲律賓Boracay – Day 4

全日3潛，其中一次係Drift Dive。

 

再踏菲律賓Boracay – Day 5

早上再去Yapak Deep Dive，今次成功潛到40米深海床，在一懸崖上停了10分鐘，勁多大魚，第一次潛到40米深，感覺新奇。

早餐後到島的中部睇 鬥雞，好多人圍觀。

雞隻入場之前會繞場一周，被觀眾下注。

原來每次鬥雞過程只有5至10秒已可殺死對方，精彩。

下午乘內陸機返 馬尼拉。由於潛完水未夠24hr便坐飛機，我出現了頭痛情況，另一位女生重大鑊，頭痛、背痛加手指頭出小氣泡，嚇到佢儍，但有其餘2個人冇事。原來上機前24hr真係唔可以潛水架，更加唔可以Deep Dive，這是非常危險的事，好彩只係內陸機飛得唔算高，最後都平安無事。

晚上4個人為了慳一晚房錢，在馬尼拉酒吧飲通宵，4個人order了一大木桶的生啤，在街邊食了隻鴨仔蛋，最後唔知係飲得太多還是我唔受得隻鴨仔蛋，還是兩樣都有，嘔到PK。

 

再踏菲律賓Boracay – Day 6(完)

04:00坐的士去機場。早上07:00起機，08:30返到香港後立即返工。今次差點冇命，以後潛水都要萬分小心。

 

 

 

 

-----再踏菲律賓Boracay(完)-----