探索 印尼(1) – 爪哇島(Java) • 峇里島(Bali) • 龍目島(Lombok)

世界文化遺產 世界上最大的佛寺 印尼爪哇島～婆羅浮屠(Borobudur)

印尼爪哇島(Java)是世界上人口最多的島嶼，印尼首都雅加達(Jakarta)便是位於爪哇島的西部。印尼的大部分歷史也是發生在爪哇島，島上也存在多個世界文化及自然遺產，包括活火山 婆羅摩火山(Gunung Bromo)、佛教遺跡 婆羅浮屠(Borobudur)和印度教廟宇 巴蘭峇南陵廟(Prambanan)。這次印尼14天旅程會一次過遊覽這三大古跡。

探索 印尼 – 序

日期 : 1996年02月(共14天)

地點 :  印尼 爪哇島(Java)‧峇里島(Bali)‧龍目島(Lumbok)

14 天全程個人總消費 約HK$ 9500

主要住宿 – 每人HK$ 15 至HK$ 150一晚的平價房

兌換價 :  HK$ 1兌 印尼盾 Rp 1000

1996年2月的農歴年假期展開了14日探索 印尼之旅。這次行程原本和 大通旅運訂了機票去澳洲，但因這間黑店收了訂成個月但遲遲出唔到票，估佢可能要儲夠水魚先出到團體機票，最後在出發前一星期決定攞返訂金。走去學聯問有乜機票在新年出發，職員話只剩國泰來回雅加達或 峇里島的機票，於是選了 香港去雅加達、峇里島返香港的套票，價錢HK$ 5500，佔了整個行程費用的60%。由於太匆忙，這次行程在機上才做Planning。

探索 印尼 – Day 1

今日返半日工，下午到機場。點知機位超賣，地勤話我們一行5人只剩2個經濟客位。點算??我哋未問佢已經話有3位Upgrade了商務客位。攞登機證時---------晴天pig pig，商務客位冇我份。上了機後，3位專貴的商務客不停攞啲生果和酒出來接擠我哋2個死窮L，都好過冇。

<<雅加達>>

晚上到 雅加達，機場外正在落狂風暴雨，的士司機開價都十分之進取，不過都沒有阻礙我壓價的決心，司機們都堅持最少要USD20出市區，最後用了20min討價還價，以USD17成交，都叫做慳了少少錢，贏了氣勢，同行朋友都話接着的行程一定慳唔少錢。

在Lonely Planet揀了間平價旅店Djody Hotel，司機也很老實，直接車了我們去酒店，沒有古古惑惑。

雙人風扇房(連早餐)每晚Rp 35,000 – 即係每人大約 HK$ 18，沒有熱水沖涼。

探索 印尼 – Day 2

晨早起身四圍行吓，旅店的後花園。

穿過陰暗的走廊到酒店餐廳食早餐。

在這裡食早餐，只係多士和奶茶，好過冇啦。

食早餐時估唔到會在這麽cheap的酒店碰到2個香港人，仲要係不超過30歲的情侶，男生個look一睇就知自已去慣旅行，女生就好廋弱，唔似捱得果種，明顯係個男仔想玩，個女仔陪佢玩。嘩，心唸，乜拍拖拍得咁陰公呀，住到咁cheap，我哋5個窮L就話啫。同個男生吹了一陣水，佢話本來報了7天印尼旅行團，但臨出發比旅行社起飛腳話冇位，所以佢才逼住買我那張HK$5500的貴價票……原來如似……但應該住好啲嘛，想捱死個女仔咩。

早餐後由酒店行去火車站買今晚通宵火車票去 日惹(Yoyakarta)。

雅加達條街都好靜，點睇都估唔到這城市的人口密度咁高。

雅加達總統府

雅加達 外國領事館街

雅加達特色電話亭

最後行到 雅加達火車站

去到火車站發現人山人海，我們排了成粒鐘，去到窗口時售票員話已經冇票，Oh！點算呢?正當我哋5個呆呆地眼望望之際，有另一個職員過來話可以幫我哋，但佢話要比少少Jetso佢，OK！最後佢話床位真係冇晒，只有5個硬座，票價要收多一倍(其實只係每張票十元八塊啫)，比錢交收後，佢仲送我哋出火車站，話 “I worked here many year and helped many people like yours”。佢份工都幾好油水喎。

買完票已下午了，在街邊食炭火燒沙嗲，正宗印尼風味，好好食架。

下午去雅加達的 幻想樂園(Dunia Fantasi)玩半日。

幻想樂園(Dunia Fantasi)基本上都係參考迪士尼樂園設計，算係山寨版的迪士尼樂園。

幻想樂園內的機動遊戲其實幾好玩，但印尼人的安全意識好低，我們玩激流旅程時，我剛坐定但都未扣上安全帶，部機已開動，把我從個位“西”了起身，嚇到我立即捉住旁邊個位，好彩轉了灣部機定返啲 ，我才可扣好安全帶，真危險。

原來玩完激流旅程後，會全身濕到透，痴L線。

晚上到火車站月台等上火車，月台上又係人山人海。

在月台上可以看到 雅加達獨立紀念碑。

在火車站又碰見早上的情侶，原來佢哋又係坐這班通宵火車去 日惹，真係有緣。

這班火車是慢車，全晚站站停，啲座位又直又硬又熱，每次停站後立即很多人叫賣，大叫「瓜瓜瓜瓜瓜瓜」唔知講乜，總之全晚都嘈到瞓唔倒，個人好燥。

探索 印尼 – Day 3

<<日惹>>

火車早上到達 日惹(Yoyakarta)，步出火車站就見到間Agent，幫襯佢安排了一個Package 給我們，包括：

1. 今天 日惹一日遊，去 婆羅浮屠和 巴蘭峇南陵廟；

2. 今晚日惹的酒店住宿；

3. 明天的交通去 婆羅摩火山；

4. 明天 婆羅摩火山上的一晚酒店住宿；

5. 後日從 婆羅摩火山去 峇里島的交通。

由於價錢合理，那對情侶join我們這個Package一齊玩幾日。Agent首先車我們到 日惹的旅店。

日惹七人大房 – 只有2座風扇仔，好焗呀，沒有熱水沖涼，夜晚熱到出晒粒粒好辛苦。

估唔到這樣cheap的旅店都有個泳池。

今天先到 世界文化遺產 – 婆羅浮屠 (Borobudur)參觀，第一次看這些大型的佛塔，感覺很新鮮。婆羅浮屠位於 日惹(Yoyakarta)的郊區，與中國的萬里長城、印度的泰姬陵和柬埔寨的吳哥窟合稱為「古代東方四大奇蹟」

婆羅浮屠 (Borobudur) – 有接近1200年歷史，是世界上最大的佛寺，內裡有很多佛像被石鐘罩着，鬼斧神工。

跟住去 巴蘭峇南陵廟(Prambanan)，有些似曼谷的鄭王廟。

巴蘭峇南陵廟(Prambanan) – 印尼最大的印度教建築廟宇，也是東南亞最大的印度教廟宇，同樣有接近1200年歷史。

探索 印尼 – Day 4

<<泗水>>

早上離開日惹，開始整日坐車去 婆羅摩火山(Mount Bromo)。

婆羅摩火山是印尼爪哇島東部的活火山，海拔2,329m，於80萬年前形成，目前是爪哇最大的旅遊目的地之。

去到山上的酒店已經黃昏。

酒店的Reception

雙人房 – 只有公共浴室和公共廁所，房間一眼睇晒，沒有熱水沖涼。晚上氣溫很低，沖了個好激嘅凍水涼。

探索 印尼 – Day 5

零晨 03:00起身，自費騎約1hr馬仔上火山口等日出。

04:30山頂上已經人山人海，估計最少70%人是香港旅行團，嘈之巴閉非常之炒耳。

這裡可近距離看 活火山口，看見白煙不斷噴出，好像隨時會火山爆發。

下山後，乘巴士到爪哇島的東部碼頭。

坐這艘船去 峇里島，我們的Tour包了的最後一程交通。

船上全是印尼人，很地道的旅程。

<<峇里島>>

很快到達峇里島，在碼頭已經有巴士等緊客，這程巴士要自費了。

到 峇里島後，乘5hr公共巴士到東部的 庫塔海灘 (Kuta Beach)。

黃昏在 庫塔海灘找到一間平價酒店過夜，是風扇房，有浴室冇熱水。酒店的泳池都唔錯。

探索 印尼 – Day 6

早上在Kuta Beach行街時，看見很多Agent門口介紹了 峇里島附近的島嶼，例如有 龍目島(Lombok)、科莫多島(Komodo)和佛羅列斯島(Flores)，第一次認識這些島嶼上的景點，覺得都相當有趣，決定日後一定要逐一到訪。今次首先選了較近的 龍目島，立即出發。由 峇里島到 龍目島，乘飛機只需20分鐘，慢船要4hr。我們決定乘船去，乘飛機返，試多D嘢。

乘巴士到碼頭，中午15:30有一班客貨船出發。

坐這艘又慢又舊又迫人的客貨船從 峇里島去 龍目島。

艘船不知為何行得非常之慢，已經起航4hr了，好似仍然有好遠。

<<龍目島>>

船程比預計慢了4小時，即係坐了足足8小時，接近零晨才到 龍目島。

碼頭有司機兜客，車了我們去龍目島首都Mataram一間平價旅館，晚上住這個印尼行程最cheap的房。

雙人房(不包早餐)每人Rp15,000 – 平到得人驚，有風扇和浴室，沖凍水涼，都算幾乾淨，不太多蚊。

沖完涼瞓得覺都03:00了，好攰。

探索 印尼 – Day 7

個個都瞓到差不多中午才起床，起身之後大家一齊諗諗有咩節目。

旅店的老細不足30歲，走過來和我們吹水，介紹吓這個島。

老細話佢個friend過2日就結緍，邀請我們去觀禮，我們返正冇乜特定節目，便決定留多2日，去埋婚禮至返峇里島。之後老細帶我們去附近一間他開的餐廳食午飯。

龍目島午飯的餐廳，啲菜式全部都辣，但真係又平又好味。

下午到附近的Agent安排了未來幾日的行程和交通後，買埋返峇里島的機票，行吓街好快又過了一日。

明天會去Gili Meno住兩晚，大後日去完Gili Nanggu回來Mataram住一晚。最後一日

上午參加婚禮，之後即日下午飛回 峇里島，總共在龍目島留5晚。

 

 

 

 

 

---待續---