斯里蘭卡 全接觸(完) – 告別 斯里蘭卡的微笑

斯里蘭卡的微笑

今次旅程只有短短6日，留在斯里蘭卡的時間更加只有4天，但是過得十分充實，每朝05:30便起身睇日出，一直玩到深夜睇埋星星才瞓覺。在這短短4天時間接觸到的斯里蘭卡人，都很友善並且好客，雖然位處印度附近，但斯里蘭卡人完全沒有印度人的狡猾，遊斯里蘭卡，不須要像去印度那樣，處處提防。希望16年後再來斯里蘭卡時，這裡會變成另一個新加坡，人民生活富裕。

斯里蘭卡 全接觸 – Day 5

<< Haputale >>

繼續上一篇行程。

回程時路過這間黃色小屋，Tuk Tuk司機主動停車。

原來對面有一座涼亭，茶姑們正在把收成拿到來交貨出糧。

先地茶葉秤一秤，再放在地上打包。

睇完茶葉交收，司機繼續開車往前行，來到這裏又見到更多茶姑在交收茶葉，於是叫司機停車比我影些相。

茶姑們辛勞了整個早上後，便把摘到的茶葉拿到這裡交收，出糧。飲食男女話，佢地每摘1kg茶葉只有USD 1，真係辛苦錢。

回到Dambatenne Tea Factory後，入去參觀。

參觀茶廠入場費每位Rs250，有專人講解整個制茶葉的過程，參觀大約20min。

大形的吹風機正在風乾新鮮的茶葉，再拿去磨碎和烤焗。

參觀完茶廠仲早，便叫司機停在Haputale，可以落車行一會。

Haputale這小鎮很細，只有一條馬路加幾間商店和街市，半個鐘乜都行晒。

鎮內不少平價旅館，環境同樣開揚。

公共巴士站

Tuk Tuk亦係主要交通工具。

馬路和火車軌道交滙處

Haputale街市，主要賣日用品和蔬果。

Haputale火車站

沒有火車時，個個人都鐘意响鐵道上面行，很有feel啊。

13:40離開Haputale，直接行180km回到Colombo食晚飯，這程車預算行5至6hr，然後在斯里蘭卡最Top的餐廳 Ministry of Crab食2.5kg的斯里蘭卡肉蟹(價錢和新加坡無招牌一樣咁貴)，令今次斯里蘭卡之旅變得完美。

開始的100km非常暢通，只用了2hr，心諗可能17:30便到Colombo了。誰知，跟著段路開始多慢車頂住，而且落瀑雨，令車速只有30km/hr。

差不多18:00時車到去Kaduwela，最後20km路程，諗住19:30乜都到啦，起碼有2.5hr食飯。㸃知去到一個路口.....明明應該繼續向前的，但司機卻向右轉(轉錯路可能要行多大半粒鐘，好浪費時間麻)，我立即提佢行錯路喎，點知佢居然答話冇行錯，佢識路.....唔通我的GPS錯？定係改了路？

司機在Kaduwela(星星位置的路口) 轉向TO AIRPORT方向

架車方向不變繼續行了20min，越來越唔對路，這方向是去機場的，我覺得條友想直接車我地去機場，然後收工。我便問：「呢條路唔係去Colombo架喎！」司機：「Colombo?好塞車，唔入得去架，入了去便趕唔切去機場。」我：「唔係吓話？我今晚01:20機喎？咁早去機場做乜呀？一早Plan好去Colombo食蟹架喎！」

架車越行越遠，現在返Colombo可能真係趕唔切了，我唯有話：「咁車我去Negombo食飯啦，我食完飯至去機場。」司機：「Negombo?好遠架！你想食蟹，我車你去附近一間支那菜館食啦，好正架。」

其實Negombo離機場只有10km左右，遠佢條毛，我開始覺得司機想提早車我去機場早啲收工，在玩嘢。不過佢完全拒絕去Colombo和Negombo，我又擺明唔要咁早去機場(咁早去做乜春啫？坐5個鐘咩？白痴。有病。)，只有同佢繼續遊車河。

架車又行多20min，司機又問：「你們想去Negombo?」我：「係呀！」司機：「你肯定夠時間去機場至好喎。」我：「一早plan好時間啦。」如此，司機便轉往Negombo方向，但條粉葛有Highway唔行行大路，塞車到爆，最後20:10才去到Negombo的沙灘餐廳。

Negombo的沙灘有很多餐廳，但我們找不到有新鮮斯里蘭卡肉蟹賣，只有海死，而且冇乜邊間睇得上眼，最後只有㨂間最多人的算了。

<< Negombo >>

Your Family Restaurant 人氣最盛的餐廳

我和小太熊坐出沙灘，食燭光晚飯。

招牌Seafood Platter(Rs 3500) – 有龍蝦一隻，大蝦2隻，吞拿魚一塊，細藍花蟹2隻，魷魚和薯條。

全部死貨，龍蝦又淡又硬，大蝦冇乜蝦味，吞拿魚完全唔掂，蟹肉...酶的，魷魚一般啦，最好食係薯條，賣成200港紙，離晒普。

 炒飯(Rs 800) – 唔講得好食，但都食了半碟，因為另一碟海死太難食。

食完呢餐更加憎個司機，無啦啦發神經破壞了這次完美的旅程。原本佢這幾天又準時又好態度表現唔錯，只係耐唔中行錯路和有些on9，小太熊今早還叫我比USD 80 Tips比佢，我現在扣起了，慳返。

食完難食的一餐，22:00車我們到機場，PK，太早航空公司的櫃位都未開呀，check in唔到on99，條司機正咸蝦，攪到我又唔高興自己又賺少USD 80，虎頭蛇尾，何必呢。

22:30才能check in，大把時間，可以去候機室沖個身飲啲嘢。

Lotus First Class Lounge (Colombo)

自制玻蘿橙汁冰，很多年未飲過了。

斯里蘭卡 全接觸 – Day 6 (完)

飛機準時01:20起飛，07:40到達新加坡。

<< 新加坡 >>

小太熊好心急話要食黃亞細肉骨茶，於是乘的士出去，08:15便到達。

黃亞細肉骨茶   今日極少人，上次人山人海啊！

招牌肉骨茶(S$9.1) – 湯底冶味，豬骨亦很夠肉味，小太熊話肉骨茶都係最鐘意呢檔。

豬皮(S$2.7)好好味。油炸鬼(S$2.1)和油菜(S$5.4)就普通，而且很貴唔抵食，但浸完湯後又好好食。白飯(S$0.7) 羅漢果冰(S$2.7)

食完肉骨茶，行25min來到小印度附近的Swee Huat Eating House，尋找飲食男女介紹的神級叻沙店 結霜橋叻沙(Sungei Road Laksa)。

結霜橋叻沙位於27座地下Food Court。

附近就係 小印度

等了30min終於開檔，都有幾個遊客拿着旅遊書來幫襯。

黃大姐專注地做好每一碗炭火叻沙

羅漢果冰和薏米水，清熱解暑。

結霜橋叻沙(S$ 2) – 血蚶非常鮮甜，但除此之外，只算是碗普通好味的Laksa，比不上檳城愉園茶室的Laksa，不值得專程老遠來吃。

跟著坐的士(S$ 6.6)去567 Balestier，飲食男女介紹的 流落凡間的海南雞飯My Rice，㸃知去到已經...執笠了。

慘...唯有周街行睇吓有咩食。

小太熊入了間老餅店買豆沙餅，幾好味架。

最後在附近一間 黎記食海南雞飯。

海南雞飯餐(S$ 7) – 普通一餐，肯定冇天天海南雞飯咁好食。

鯇魚生(S$ 8) – 幾特別，很鮮味。

無無聊聊食了2餐麻麻地，好像白來了新加坡。

乘的士返機場，今次完全冇附加費，S$ 15便返到機場。

Sats Premier Lounge (Terminal 3) 

這候機室又大又舒適，仲有OTO按摩椅，好舒服啊。

飛機17:05回到香港，好少咁正常的時間回家。

小太熊又要忙下次葡萄牙之旅了。

補充資料 :

1.        乘星航經星加坡來回斯里蘭卡，每位HK$5703。

2.        S$1兌HK$5.73(滙豐價)。

3.        從星加坡機場乘的士往黃亞細肉骨茶跳錶S$ 16，加埋早上繁忙時間附加費等等，共需車費S$25，車程25min。

-----斯里蘭卡 全接觸(完)-----