峇里島 潛水假期(08) – 平民俱樂部Oneeighty Pool Day Club

印尼峇里島懸崖俱樂部Oneeighty Pool Day Club

Oneeighty Pool Day Club是位於印尼峇里島懸崖頂端162m高處的日間俱樂部，大約在2019年開幕，以一個懸崖上的玻璃底無邊際泳池備受矚目，泳池在懸崖邊緣向外再延伸6m並以透明玻璃構建池底，使泳客游水時清楚看到下面的懸崖和印度洋景觀，因此被譽為是 漂浮在天空中的泳池。Oneeighty Pool Day Club的泳池、食物和服務品質高，氛圍悠閒放鬆，每日也吸引大量旅客。旅客可選擇不同時段入場，每節時間4小時，每位入場費Rp 600,000，並有Rp 500,000回贈可於場內消費。

峇里島 潛水假期 – Day 05

行程：峇里島(天晴)

繼續上一篇Day 05行程。

<<峇里島>>

早上在Renaissance Bali Uluwatu Resort & Spa退房之後，乘Grab到附近的水療中心Svaha Spa Bingin Uluwatu by Wonderspace按摩，車程6km車費Rp 80,000。

Svaha Spa Bingin Uluwatu by Wonderspace – 開業只有幾年的水療中心，附設有客房，環境清幽寧靜，提供不同類型的巴里島SPA療程。在大門前落車便是一片流水小瀑布，令人放鬆。

沿着樓梯行上最高處的水療中心，路過幾個供住客使用的層層疊泳池，面向大海和小鎮，景色開揚。

做SPA之前先選擇香薰精油，逐款滴在手背聞一下。

SPA房外是個小型Infinity Pool，可惜今次只訂了特價SPA，按摩完便散，沒有玫瑰花浴和泳池。90min SPA療程在Klook買平一點，每位HK$281。

開始SPA之前先來Welcome Drink，是冰凍檸檬香草茶，消暑又消滯，好正。

SPA房是海景房，清爽又通風，令人完全放鬆。

SPA房外是三層的泳池

按摩師首先為我們做個簡單的足浴。

師傅按摩的手勢很好，力度平均又夠深度，好舒服，下次可以再來。因為師傅的服務很好，原本打算每人俾Rp 60,000貼士，但因為沒有現金，只能俾Rp 40,000。

按摩之後有薑茶行氣活血，口痕可以加點餅乾。

下個節目乘Grab去4km距離的Oneeighty Pool Day Club，車費Rp 56,000。

Oneeighty Pool Day Club – 入口一片綠油油很有特色，今日訂了14:30入場，可以玩到18:30，每位Rp 600,000，其中的Rp 500,000可以在場內消費，足夠食個午餐再加2～3杯飲品。

在入口登記完之後，職員用哥爾夫球車送我們去泳池。

園林泳池好靚呀，雖然係好多人，但個個只係坐在沙灘椅上飲嘢玩電話打卡，泳池很少人。

場內沙灘椅坐位先到先得，越近海越受歡迎，工作人員安排我們先坐在後排，食完午餐之後等到有較前排的位才可以搬過去。

先在會所餐廳食午餐，淨飲真係用唔完那回贈的Rp 500,000。

Bintang Beer (Rp 84,700)；椰青(Rp 84,700) – 飲品又唔算貴好多，比一般餐廳貴30%左右。

炸海鮮籃(Rp 266,200) – 炸得夠香脆，有蝦肉魚肉魷魚和洋蔥圈，味道唔錯，比較峇里一般餐廳好食。

墨魚汁海鮮意大利麵(Rp 278,300) – 呢碟都好食，冇叫錯。

開餐，慢慢食Hea足一個下午。

兩個人還剩Rp 280,000左右，可以一陣再叫嘢飲。

食完午餐換了另一張較前排的沙灘椅，附近個個都不停自拍打卡，蒲士多到想像唔到。

下一個必做的工作就係去Infinity Pool打卡，呢度啲客大多數都冇乜品，唔係影到磨爛蓆唔肯走就係有人影緊都照走埋去。

好彩剛剛冇乜人，快快脆脆影幾張，點知影唔夠3分鐘便被幾個印度肥婆游過來阻住晒。

時間過得好快，食完飯游一陣水已經剩返一個鐘，返自己張枱enjoy一下，用埋啲錢。

Strawberry Lychee Smoothie (Rp 84,700)；Red Dragon (Rp 84,700) – 兩杯奶昔特飲都好甜，勁過台灣啲廢水。

鮮水果盆(Rp 84,700) – 要埋個果盆啱啱用盡啲錢，好過飲太多廢水。睇埋日落便可以走了。

在Day Club門口叫Grab走，叫第一部車個司機神神化化，接完單完全唔郁，迫我取消張單。第二部車開始時好正常，仲有同我Confirm地點，但去到門口特然取消張單，應該是接了其他Apps的單所以放我飛機，就這樣玩了半小時，第三個司機才正正經經來接我哋。

乘Grab往Kuta Beach的Luwak Complexity Coffee，21km距離車費 Rp 165,000，夜晚很塞車，18:45上車行到 19:55才到。

Luwak Complexity Coffee – 峇里島知名的貓屎咖啡(Kopi Luwak)品牌，以印尼東爪哇生產的咖啡豆經過 麝香貓(Kui)消化後天然發酵製成貓屎咖啡，網上話貓屎咖啡口感醇厚順滑且香氣帶有朱古力和焦糖的甜美，味道層次豐富。小太熊好想試吓，不過試完之後我覺得佢係黒店，搵遊客笨的。

臨關門前一個鐘到，全店只有我們兩條水魚，睇格局平時似招待旅行團。

麝香貓(Kui) – 佢係貓屎咖啡的靈魂，見佢冇乜心機好似病咗。麝香貓屬於靈貓科，類似果子狸的動物，肛門附近會分泌一種強烈氣味的「麝香」，可以用作製造香水的原料。貓屎咖啡就是讓麝香貓吃咖啡果，再從糞便中撿出未被消化的咖啡豆，再清洗烘焙製成的咖啡。

呢舊咁L核突嘅屎就係貓屎咖啡的原材料，將佢攪爛之後再蒸餾就可以飲？？其實我真係冇乜興趣試。

試飲的貓屎咖啡分別有Rp 100,000和Rp 50,000兩款，小太熊話一場來到，試晒兩款喎，不過佢勁蠱惑，自己唔飲只係迫我飲屎水。

老闆介紹完 3款咖啡豆之後，便開始製作貓屎咖啡。原來唔係直接攪爛舊屎沖水飲，都冇咁驚。

網上有人鳩噏話，Premium Signature Wild Luwak是野生麝香貓消化後的標準咖啡豆，經過了天然發酵，口感豐富順滑，味道帶有朱古力和焦糖的層次。Premium Signature Wild Luwak Peaberry是從野生麝香貓屎中收集的「Peaberry(圓豆)」咖啡豆，佔總產量僅約5-10%，風味更濃郁口感更細緻。

Bali Golden Kintamani (左 免費試飲)；Premium Signature Wild Luwak (中 Rp 50,000)；Premium Signature Wild Luwak Peaberry (右 Rp 100,000) – 三杯都酸的，而且入口唔覺香滑濃郁，咖啡味道很薄，好難飲，和以前在越南飲的靚咖啡差得遠，樓下太興的咖啡好飲得多。相信呢間係黑店，但小太熊話佢好高分的，卻原來又係搵笨。

飲完咖啡慢慢行去Kuta Beach，10冇來過街道多了舖頭，不過人流少了。

古達海灘(Kuta Beach) – 夜晚的海灘冇乜人，岸上就旺好多，有些餐廳有人表演攪吓氣氛。

Beachwalk Shopping Center – 古達海灘新建了這大商場，入去揾食。

Bebek Tepi Sawah – 峇里島的一家以傳統炸鴨(Bebek Dirty Duck)聞名的餐廳，創立於1999年，當地人的評價很好。就揀呢間。

大把位唔使等，我們揀了室內冷氣位，戶外實在太熱。

Bintang大啤酒(Rp 67,300)；椰青(Rp 46,400) – 都係淡，不過夠凍而且多水。

Tepi Sawah Crispy Duck(Rp 165,900) – 招牌酥炸Dirty Duck飯，鴨炸得脆皮，有鴨肉香，好味，加些伴碟的峇里島醬汁更加冶味。

Gurami Bumbu Bali Tepi Sawah(Rp 127,600) – 賣相好但條魚唔新鮮，肉質差，唔好食，只吃了一半。

乘Grab去機場酒店Novotel，4km距離車費Rp 70,000，另加機場稅Rp 12,000。

Novotel Bali Ngurah Rai Airport – 有天橋直接連到機場，不用3min便可行到航空公司櫃位。

雙人房(不包括早餐)每晚HK$739 – 房間基本上都合格，只係風筒壞了，只有細冷風。

房間送的精美點心，不過在房間焗了成日怕唔乾淨唔敢食。

今晚只瞓 3hr，明天要04:00起身，乘07:10機往新加坡。

 

補充資料 :

1.     香港特區護照持有者可免簽進入印尼，最長停留30天。

2.     新加坡航空單程機票由 峇里經新加坡到香港，每位HK$613，包括25kg寄倉行李和 7kg上機行李。

3.     在香港的找換店 利澳公司 兌換印尼盾現金HK$ 1=Rp 2,031；信用卡簽賬 HK$1兌Rp 2,038，滙率比用現金更好，還有回贈。峇里島大部份地方也收信用卡，只帶少量現金便可以。

4.     峇里島機場的滙率極差，HK$1=Rp 1,300，相差36%。在當地用大額美元兌換比用港幣好，可以換多5%。在Kuta Beach換錢USD 1 = Rp 16,075 (大約HK$1=Rp 2,048)。在Nusa Penida島換錢USD 1 = Rp 15,700 (大約HK$1=Rp 2,000)。

5.     文章列出的價錢已包括了所有稅項和服務費。

6.     峇里島很流行用Grab叫車，比的士方便價錢亦合理，不用再和的士司機鬥智鬥力。一般車費每1km ~ Rp 6,000-14,000，視乎路線距離和時段，部分路段另加公路費，越短程每1km收費越貴。另外進出峇里島機場要多收Rp 12,000稅項。

  

---待續---

「峇里島 潛水假期」旅程，詳細行程可點擊到相關文。

日數	行程路線	日程重點
Day 01	吉隆坡→峇里島→Nusa Penida	乘AirAsia早機從馬來西亞吉隆坡飛往 峇里島，下午乘快船到Nusa Penida，連續3晚住在La Beach Penida Villa，潛水店Pure Dive Resort便在酒店對面。
Day 02	Nusa Penida	早上潛水2次，包括到Manta Point睇巨型魔鬼魚，回到潛水店午餐；下午潛水 1次，黃昏包車往返Cactus Beach Club & Restaurant食晚餐。
Day 03	Nusa Penida	早上潛水2次；中午回到潛水店午餐，下午潛水 1次；黃昏在Penida Colada Beach Bar食晚餐。
Day 04	Nusa Penida→峇里島	晨早包車6hr，04:30～10:30遊覧Nusa Penida東部景點，在碼頭散隊後乘船中午回到峇里島；乘Grab往Renaissance Bali Uluwatu Resort & Spa住 1晚，下午留在酒店休息，黃昏到Avisha Wellness & Spa Jimbaran做 2小時SPA。
Day 05	峇里島	早上在Renaissance Bali Uluwatu Resort & Spa食完早餐之後游水，留到最遲才退房；乘Grab往Svaha Spa Bingin Uluwatu by Wonderspace，做90分鐘SPA，然後乘Grab往Oneeighty Dayclub玩4小時，黃昏乘Grab到Kuta Beach行街食晚餐，晚上住在機場酒店Novotel Bali Ngurah Rai Airport。
Day 06	峇里島→新加坡→香港	早機飛去 新加坡，在市內行一日，黃昏機回香港。