峇里島 潛水假期(06) – Nusa Penida經典半日旅程

印尼峇里省小島 Nusa Penida絕景 ~ Diamond Beach

印尼峇里省的小島Nusa Penida除了是世界級潛水勝地之旅外，島上也擁有多處壯麗景點分佈在東南部和西南部。東南部的景點包括：Diamond Beach ～ 被峭壁環繞的白色沙灘，因近岸的菱形岩石得名；Saint Mandrier Twin Rocks ～ 海岸線以外的奇石小島；Rumah Pohon Tree House ~ 島上著名的懸崖樹屋，是非常熱門的影相位置；Thousand Islands ~ 樹屋附近的海岸絕景，從另一角度欣賞Diamond Beach的鑽石。西南部的景點包括：Kelingking Beach ～ 被稱為恐龍海灘，從懸崖頂端俯瞰可以看到形似恐龍頭的峭壁；Broken Beach ～ 天然形成的拱形隧道，海水穿過洞穴流入內湖，景色獨特；Angel’s Billabong ～與其他景點相鄰的天然浴池，水質清澈，陽光下會出現彩虹。島上所有的士司機也會提供東南部半日遊和西南部半日遊，最平的6hr日出包團 2人收費Rp 600,000，Klook賣貴很多，2人收費Rp 2,000,000。

峇里島 潛水假期 – Day 03

行程：Nusa Penida(天晴)

繼續上一篇Day 03行程。

<<Nusa Penida>>

潛完水之後回房沖涼，然後出去食晚餐，今晚要早點休息，因為明早約了司機04:30到東南部睇日出，要04:00起身。

Penida Colada Beach Bar – 2014年開業的海灘酒吧，是島上最受歡迎的餐廳酒吧之一，網上評價極高，現場所見也是咁多日見過最旺的一個場，晚上有拉闊音樂表演。

早幾日冇海邊位，今日16:15便來到，店內比較少人，但晚飯時段真係坐滿人。

職員都話近海坐位全部訂晒，叫我們坐後一排，真過分。其實問清楚原來只係訂了19:00，仲有差唔多3hr，印尼人個腦真係有點問題。

我哋話18:30睇完日落交返張枱，佢至安排其中一張海邊吉枱，環境比其他枱好得多。

Virgin Pendia Colada (Rp 70,800) – 由菠蘿汁、椰奶、青檸汁和香蘭葉溝成，清甜好飲的無酒精雞尾酒，Happy Hours買一送一，抵飲。

Prawn Summer Rolls (Rp 82,600) – 越式鮮蝦冷春卷，把米紙浸軟之後捲入蔬菜、蒜頭、蝦肉、花生和香草，加點辣汁同吃，幾好食。食物質素真係比隔離間餐廳好得多。

手切薯條(Hand Cut Chips)(Rp 53,100) – 好食喎，外香脆內軟有薯味，茄汁又夠多，最啱送啤酒。

炸魷魚圈(Calamari Rings)(Rp 82,600) – 炸粉鬆脆又夠薄，魷魚正常，加些沙律醬好好味。

大Bintang啤酒 (Rp 76,700) – 加支大啤送小食，慢慢嘆。

餐廳有路可以直接行落沙灘，食一陣又落沙灘行一陣，睇埋日落，如果可以見埋Mola Mola就完美。

Napolitana Spaghetti (Rp 88,500) – 最後要多一碟素義大利粉，味道唔錯。

食完飯立即回酒店沖涼瞓覺。

峇里島 潛水假期 – Day 04

行程：Nusa Penida(陰晴不定間中有雨) → 峇里島(天晴)

今日在Trip.com買了11:35回峇里島的船，又約了司機東南部半日遊，早上04:30出發至大約10:30去到碼頭，司機開價Rp 600,000 ～ 2位，價錢只係Klook的30%，完全不用還價。

司機準時到酒店接我們，首先去Diamond Beach睇日出，26km距離車程1hr。到部後要買門票，Diamond Beach加Atuh Beach 門票每位Rp 45,000。

入場之後行10min去到最高處等日出。早到了，去到時仍然滿天星，其實可以瞓多半個粒鐘。

Saint Mandrier Twin Rocks – 等我了好耐，太陽終於出現，不過今日多黑雲，日出的顏色普通。這岩石小島很有型。

Atuh Beach – 從高處看到冇乜特別，所以決定唔行落去了，慳水慳力。

Diamond Beach – 在Jogglo Viewpoint是看這沙灘的最佳角度，清楚見到鑽石兩大粒。

沿樓梯落10分鐘便行到沙灘，沒有預計咁辛苦。

沿樓梯行的景色也好靚，辛苦一點也值得。

沙灘旁邊原本有收費鳥巢給人打卡影相，不過冇生意所以荒廢了。現在變成免費任影。

落到沙灘開始落雨，在大石下避雨等了十幾分鐘，好彩跟住停雨了，天氣好轉唔再落雨。

早上沙灘完全冇人，很隱世的感覺，如果在峇里島出發跟團來就一定人山人海了。

在無人沙灘跑步真係爽。

從沙灘行返上頂只用了7分鐘，天色變藍了，變化很大。

返上車去下一個景點Thousand Islands，其實只在附近，不用5min車。

The Molenteng Clift – 這組景點包括Thousand Islands Viewpoint和Tree House，入場費每位Rp 25,000，如果要在Tree House影相要再加Rp 75,000。門口有兩隻小熊迎賓。

在山頂向下行落10分鐘便Thousand Islands Viewpoint，即是最遠的山頂平台。

Rumah Pohon Tree House – 入去影相又要Rp 75,000，我哋孤寒唔入了。

門口有阿姐守住，想影相就磅水啦。

俾完錢之後個個都Model上身咁，幾十個鋪士影幾百張相至肯走，所以好容易等個幾鐘至排到。

Thousand Islands Viewpoint – 是在另一角度欣賞Diamond Beach，有完全不同的景像。

回到落車的位置仍然有40min剩，可以去餐廳食點早餐。

Warung Molenteng – The Molenteng Clift入口旁邊的餐廳，面向大海涼風陣陣，唔食都應該坐低飲杯嘢。

冰茶(Rp 10,000) – 原來加了糖，小太熊仲以為係無糖茶，印尼人和馬拉人一樣唔興無糖的；椰青(Rp 30,000) – 夠凍又多水但唔甜，消暑解渴。

雜菜雞蛋即食麵(Rp 25,000) – 平平哋味道又ok喎，好過那些唔新鮮的魚和肉多多。

09:10離開The Molenteng Clift，10:20回到碼頭。很幸運今次遇上這司機，在潛水店遇上的一對香港潛友就冇咁好彩，坐了幾日貴車，不過我哋已經介紹這司機俾佢哋，唔洗再捱貴車了。

昨天在Trip.com買了The Angkal Fast Boat的船票返峇里島，每位只係HK$45，全世界最平，而且可以在碼頭上落船。去到碼頭首先搵船公司出實體票。

The Angkal Fast Boat在最左邊的舖位，現場所見，有老外即場買票又係收貴兩倍，好離譜。

快船11:35-12:15由Nusa Penida去峇里島Sanur Pier，船到之後職員會叫上船，大家便排隊上船，今次班船滿座，所以早一兩日買票才可以買到理想時間。

<<峇里島>>

很快回到峇里島Sanur Pier，在碼頭叫Grab非常之貴，所以決定行15min出碼頭外圍才叫車，慳返啲。

補充資料 :

1.     香港特區護照持有者可免簽進入印尼，最長停留30天。

2.     在香港的找換店 利澳公司 兌換印尼盾現金HK$ 1=Rp 2,031；信用卡簽賬 HK$1兌Rp 2,038，滙率比用現金更好，還有回贈。峇里島大部份地方也收信用卡，只帶少量現金便可以。

3.     峇里島機場的滙率極差，HK$1=Rp 1,300，相差36%。在當地用大額美元兌換比用港幣好，可以換多5%。在Kuta Beach換錢USD 1 = Rp 16,075 (大約HK$1=Rp 2,048)。在Nusa Penida島換錢USD 1 = Rp 15,700 (大約HK$1=Rp 2,000)。

4.     文章列出的價錢已包括了所有稅項和服務費。

5.     峇里島很流行用Grab叫車，比的士方便價錢亦合理，不用再和的士司機鬥智鬥力。一般車費每1km ~ Rp 6,000-14,000，視乎路線距離和時段，部分路段另加公路費，越短程每1km收費越貴。另外進出峇里島機場要多收Rp 12,000稅項。

6.     峇里島Sanur Pier每小時也有快船往返Nusa Penida，由不同船公司營運，可以即場買票但比較貴，最好是早一日在Trip.com買票，再到現場出實體票，單程價錢最平HK$45，比現場買平一倍以上。在Klook買的船票要乘駁艇才能進出Nusa Penida，Trip.com代理的船可以在碼頭上落船。

7.     Nusa Penida沒有公共交通，如果唔租電單車，便只可以包的士，一般司機叫價超高，要有耐性加運氣才能找到合理價錢的車。

 

 

---待續---

「峇里島 潛水假期」旅程，詳細行程可點擊到相關文。

日數	行程路線	日程重點
Day 01	吉隆坡→峇里島→Nusa Penida	乘AirAsia早機從馬來西亞吉隆坡飛往 峇里島，下午乘快船到Nusa Penida，連續3晚住在La Beach Penida Villa，潛水店Pure Dive Resort便在酒店對面。
Day 02	Nusa Penida	早上潛水2次，包括到Manta Point睇巨型魔鬼魚，回到潛水店午餐；下午潛水 1次，黃昏包車往返Cactus Beach Club & Restaurant食晚餐。
Day 03	Nusa Penida	早上潛水2次；中午回到潛水店午餐，下午潛水 1次；黃昏在Penida Colada Beach Bar食晚餐。
Day 04	Nusa Penida→峇里島	晨早包車6hr，04:30～10:30遊覧Nusa Penida東部景點，在碼頭散隊後乘船中午回到峇里島；乘Grab往Renaissance Bali Uluwatu Resort & Spa住 1晚，下午留在酒店休息，黃昏到Avisha Wellness & Spa Jimbaran做 2小時SPA。
Day 05	峇里島	早上在Renaissance Bali Uluwatu Resort & Spa食完早餐之後游水，留到最遲才退房；乘Grab往Svaha Spa Bingin Uluwatu by Wonderspace，做90分鐘SPA，然後乘Grab往Oneeighty Dayclub玩4小時，黃昏乘Grab到Kuta Beach行街食晚餐，晚上住在機場酒店Novotel Bali Ngurah Rai Airport。
Day 06	峇里島→新加坡→香港	早機飛去 新加坡，在市內行一日，黃昏機回香港。