峇里島 潛水假期(01) – 不一樣的峇里島

印尼峇里Nusa Penida著名景點 ~ Saint Mandrier Twin Rocks

印尼峇里省的小島「Nusa Penida」位於峇里島以東，從峇里島東部Sanur Pier乘50min快船便到，自2010年代中期起開始被背包客發現，逐漸成為峇里島以外的旅遊熱點，旅遊業於2014年後更加迅速升溫，每天也有海量旅客湧進這小島。島上除了擁有絕美海灘和懸崖景觀，沿島的海底也有大量珊瑚礁和各種稀有魚類，不論是浮潛或潛水也很適合。小島現時未有機場，僅有海上交通連通峇里島。島上沒有公共巴士，也沒有手機Apps可以叫車，旅客在島上自助遊只可以租電單車或包車。另外也可以參加旅行團，因為島上的景點分別集中在東部和西部，所以旅行團一般也是東部半日遊和西部半日遊，Klook的價錢可作參考，在當地自己找司機會比Klook平30～70%。

峇里島 潛水假期– 序

今次的峇里島之旅只有一個目的，就是潛水看 翻車魚(Mola Mola)，因此揀了7月這個翻車魚出沒的旺季，再順便去埋檳城食榴槤，那知遇上今年檳城的榴槤季節提早了，我們去到時大部份榴槤園已經停產，今年遇不到最頂級的榴槤，加上原來翻車魚是很難遇見的，今次潛水6次也遇不到一條，有種被騙的感覺。

「峇里島 潛水假期」旅程，詳細行程可點擊到相關文。

日數	行程路線	日程重點
Day 01	吉隆坡→峇里島→Nusa Penida	乘AirAsia早機從馬來西亞吉隆坡飛往 峇里島，下午乘快船到Nusa Penida，連續3晚住在La Beach Penida Villa，潛水店Pure Dive Resort便在酒店對面。
Day 02	Nusa Penida	早上潛水2次，包括到Manta Point睇巨型魔鬼魚，回到潛水店午餐；下午潛水 1次，黃昏包車往返Cactus Beach Club & Restaurant食晚餐。
Day 03	Nusa Penida	早上潛水2次；中午回到潛水店午餐，下午潛水 1次；黃昏在Penida Colada Beach Bar食晚餐。
Day 04	Nusa Penida→峇里島	晨早包車6hr，04:30～10:30遊覧Nusa Penida東部景點，在碼頭散隊後乘船中午回到峇里島；乘Grab往Renaissance Bali Uluwatu Resort & Spa住 1晚，下午留在酒店休息，黃昏到Avisha Wellness & Spa Jimbaran做 2小時SPA。
Day 05	峇里島	早上在Renaissance Bali Uluwatu Resort & Spa食完早餐之後游水，留到最遲才退房；乘Grab往Svaha Spa Bingin Uluwatu by Wonderspace，做90分鐘SPA，然後乘Grab往Oneeighty Dayclub玩4小時，黃昏乘Grab到Kuta Beach行街食晚餐，晚上住在機場酒店Novotel Bali Ngurah Rai Airport。
Day 06	峇里島→新加坡→香港	早機飛去 新加坡，在市內行一日，黃昏機回香港。

峇里島 潛水假期 – Day 01

行程：吉隆坡(天晴) → 峇里島(陰晴不定間中微雨) → Nusa Penida(天晴)

<<峇里島>>

早上在吉隆坡機場出發，乘AirAsia 07:35機往 峇里島，預計機程3hr10min。10:30到達，比原定時間早了15min。排隊入境峇里島用了40分鐘。

峇里島國際機場 – 超過10年沒有來峇里島，機場又完全不同了，大了很多。

機場外有Grab的專用候車室。

叫完車便在Grab Lounge坐低等車，Grab在峇里島發展得唔錯，不過仍然有好多司機接了單又唔來，浪費時間。

乘Grab由機場去餐廳Naughty Nuri’s Warung, Sanur，21km距離車費Rp 191,500 (基本車費Rp 165,500，另加公路費Rp 14,000和機場費Rp 12,000)，車程40min。

Naughty Nuri’s Warung, Sanur – 由一位美國人和他的印尼廚師妻子於1995年創立的品牌，最初只是Ubud的一個小食攤，以Signature Pork Rib打響名堂，最後成長為知名的餐廳，10年前在Ubud的總店試過覺得幾好食，今次在這分店再試。

這分店的位置偏遠，人客唔多，食得舒服。

Bintang細啤酒(Rp 53,100) – 印尼的酒和馬來西亞一樣咁貴，酒稅太高；無糖可樂 (Rp 29,500)

脆皮五花肉250g(Crispy Pork Belly)(Rp 147,500) – 帶有濃厚Balinese風味的燒肉，豬腩肉帶有豐富的夾層油脂，層次分明非常吸睛，入口軟嫩充滿肉味和甘香，外皮脆中略硬扣了點分，吃時可加點餐廳特製醬汁，帶點微酸比較開胃消滯，送酒一流，好食。

招牌烤豬肋排600g(Signature Pork Rib)(Rp 270,200) – 豬肋排骨用了峇里島產的香料醃製，再塗上特製燒烤醬，經炭火慢烤至外皮焦香，入口很冶味但豬肉味不太濃，肉質嫩口充滿風味，不是香港Ruby Tuesday那種㷛過湯的肉質，下次可以再食。

原本打算食完飯再叫Grab去碼頭，但附近大塞車，Grab要好耐至來到，而且又驚遇上古怪司機接了單又唔過來，決定行2km去Sanur Pier。

行去Sanur Pier條路都ok，不過天氣又熱又濕，行到成身汗。

Jl Hang Tuah – 穿過這「城門」之後差不多到碼頭了。峇里島常見的這種城門被稱為「裂門」，象徵從世俗穿越到神界，是峇里島宇宙觀裡「人界與靈界」的分隔，即係碼頭位於靈界之內，真玩嘢。

行多一段人車共用的窄巷才到，靈界的環境仲衰過人間。

Axe Stone Fast Cruise – 今次幫襯Klook買船票，要在船公司這𥚃換實體票後才能上船。這𥚃的船公司全部都幾衰，看到很多老外即場問價買票要貴一倍有多，勁搵笨。

換完船票等到夠鐘，船公司便帶我們十多個客一齊行去Sanur Pier。

Sanur Pier只有很少船，全部都係往返Nusa Penida。

乘這艘快船Axe Stone Fast Cruise去Nusa Penida，Klook價錢每位HK$59。事後發現原來幫襯Trip.com買另一船公司The Angkal Fast Boat只係HK$45，而且上落船安排更加好。

只有很少客，剛才船公司Last Minutes都唔肯減價，仲要比Klook賣貴一倍有多。

遲了20min起航，16:40去到去Nusa Penida，但不是在碼頭上岸的，原來Axe Stone Fast Cruise要靠駁艇上落碼頭的，勁唔方便，早知幫襯Trip.com買另一船公司The Angkal Fast Boat，只係HK$45而且可以在碼頭上落船。

大家一齊乘駁艇去岸邊，大行李有員工代勞。

其他船都有碼頭，係我哋冇。

<<Nusa Penida>>

Banjar Nyuh Harbour – Nusa Penida所有去峇里島的船也在這裡上落客。我們上岸後便搵車去3.5km外的酒店。

車比預期少得多，只有一個的士司機主動問我們，但開價Rp 200,000，貴過日本的士，問多兩架都係唔肯減，網上話有電單車比較平，每人Rp 10,000左右，但現場完全唔見電單車的士，在島上過了3日都見唔到，很奇怪。搵車搵了十幾分鐘都冇車，天氣又勁熱，嬲嬲哋不如行路算啦，於是決定沿路行3.5km去酒店。

很幸運，行了5min左右見有個司機在抹車，我眼金金望住佢，佢見我哋攞住行李on99在行路，便問我哋去邊度，我講想去3.5km外的酒店再問佢價錢，佢反問我想俾幾多，我今次唔敢say太平了，Grab大約Rp 30,000，我話Rp 50,000啦，Deal。

就係坐呢部白色車，都好新淨又夠冷氣。

呢位司機開價都幾老實，去到酒店之後問佢攞了聯絡，約定佢下一程車。

La Beach Penida Villa – 在這間小酒店住3晚，附近有餐廳和潛水店。

白色屋便是酒店，靠近海邊環境唔錯。

我們住上層中間房，樓下有個小泳池。

早上可以在池邊食早餐，很好feel的。

海景雙人房(包括早餐)每晚Rp 656,000 – 房間十分窄，放行李也有困難，不過海景就超靚，冷氣熱水也強勁。如果早點到攞到頭尾兩間房會大20%，鬆動得多。

坐在露台也很享受，在這𥚃食早餐也可以。

Pure Dive Resort – 在酒店對面的潛水店，小太熊話評分較高。原本想做預訂潛水，但佢要先俾一半錢才肯Confirm，Cancellation Policy又勁辣，不可以退款，所以現在才報名。其實附近也有幾間潛水店，早一日報名已經可以。

潛水裝備不是太殘，可以接受。

潛完水便把裝備浸在淡水缸。

潛水店附設在酒店內，酒店的泳池經常有人上潛水堂。

Pure Dive Resort的潛水價錢已經包括所有裝備和DM，潛6次或以上有9折。可以選擇每日2潛Rp 1,800,000，時間08:00-13:00，一般會去Nusa Penida較遠的Dive Sites；或者每日3潛Rp 2,400,000包括午餐，時間08:00-15:30，第3潛一般只會去附近的Dive Sites。報名要先俾一半錢，所以我們只Confirm了明天一早2潛，之後再逐次訂下一日。

小太熊在網上查到最大機會看見 翻車魚(Mola Mola)的Dive Site是Crystal Bay，但潛水店不知為何唔肯去，早知唔幫襯佢，住在Crystal Bay附近幫襯那邊的潛水店。

安排好所有節目，終於有時間行一陣沙灘。這𥚃的沙灘唔適合游泳。

PS Mart – 酒店旁邊的便利店，買了些小食和飲品。

Penida Colada Beachfront Restaurant and Bar – 酒店旁邊的島上人氣餐廳，今晚海邊位全部訂滿了，決定後日才來。

Tabo Kitchen Beach Bar & Restaurant – 隔離間環境一樣但冇乜客的餐廳，應該冇咁好食但坐位任揀，就食呢間。

全店只有我哋一枱客，食到走時也只有三枱，和隔離全店80%滿差得遠。今次揀了海邊位，晚上很清涼環境超正。

Bintang細啤酒(Rp 52,200) – 價錢和中午的餐廳差不多，又唔太貴喎；椰青(Rp 46,400) – 很多水但唔甜，在東南亞飲的椰青不知為何全部唔甜的。

Ιkan Pepes Bumbu Bali(Rp 110,200) – 用峇里島香料包着香蕉葉烤鯛魚片，配蒸飯、沙律和蔬菜，味道Ok但魚肉唔太新鮮，肉質像雪了幾年，唔怪之得咁少人。

Sate Ayam(Rp 58,000) – 雞肉沙嗲串配白飯和蔬菜，又係味道Ok雞肉唔新鮮，口感有點霉，感覺唔好，只吃了一串，飯和菜就食得晒。

回到酒店訂了明天07:30在泳池邊食早餐，今晚早點休息，預備明天一早潛水。

峇里島 潛水假期 – Day 02

行程：Nusa Penida(天晴)

今朝07:00起身，可以在房間欣賞到日出，唔錯。

07:30落泳池等食，居然過鐘都未預備好，要吹幾次至到，趕時間潛水架大佬。

07:45終於有得食，因為唔敢食咁飽，所以點了水果餐，那知水果餐原來即係American Breakfast減了多士和雞蛋，感覺有點on9。

看着大海和日出食早餐，環境看似好好，但其實太陽一出就熱到標汗，下次都係在露台食好啲。

08:30到潛水店集合，第一站去Manta Point 睇巨型魔鬼魚。

 

補充資料 :

1.     AirAsia航機由 吉隆坡飛 峇里島，單程機票每位HK$502，只可帶7kg手提行李，機程3hr10min。

2.     香港特區護照持有者可免簽進入印尼，最長停留30天。

3.     在香港的找換店 利澳公司 兌換印尼盾現金HK$ 1=Rp 2,031；信用卡簽賬 HK$1兌Rp 2,038，滙率比用現金更好，還有回贈。峇里島大部份地方也收信用卡，只帶少量現金便可以。

4.     峇里島機場的滙率極差，HK$1=Rp 1,300，相差36%。在當地用大額美元兌換比用港幣好，可以換多5%。在Kuta Beach換錢USD 1 = Rp 16,075 (大約HK$1=Rp 2,048)。在Nusa Penida島換錢USD 1 = Rp 15,700 (大約HK$1=Rp 2,000)。

5.     藍十字保險2人13天價錢HK$493。

6.     文章列出的價錢已包括了所有稅項和服務費。

7.     峇里島很流行用Grab叫車，比的士方便價錢亦合理，不用再和的士司機鬥智鬥力。一般車費每1km ~ Rp 6,000-14,000，視乎路線距離和時段，部分路段另加公路費，越短程每1km收費越貴。另外進出峇里島機場要多收Rp 12,000稅項。

8.     峇里島Sanur Pier每小時也有快船往返Nusa Penida，由不同船公司營運，可以即場買票但比較貴，最好是早一日在Trip.com買票，再到現場出實體票，單程價錢最平HK$45，比現場買平一倍以上。在Klook買的船票要乘駁艇才能進出Nusa Penida，Trip.com代理的船可以在碼頭上落船。

9.     Nusa Penida沒有公共交通，如果唔租電單車，便只可以包的士，一般司機叫價超高，要有耐性加運氣才能找到合理價錢的車。

10.    今次在鴨寮街買了這兩款電話卡，分別有15日星馬泰印尼5G無限數據～HK$90 和10日星馬印尼4G 10Gb～HK$30，感覺上速度和接收也差不多。峇里島的網絡大部份時間沒有什麼問題，但偶然會斷線，叫唔到Grab。Nusa Penida的網絡很差，超過一半時間上不到網。

---待續---