峇里島 潛水假期(07) – 五星酒店Renaissance Bali Uluwatu Resort & Spa

印尼峇里島五星級酒店Renaissance Bali Uluwatu Resort & Spa

Renaissance Bali Uluwatu Resort & Spa 是印尼峇里島南部於2019年開幕的五星級豪華度假村，由萬豪國際集團(Marriott International)管理，擁有壯觀的印度洋海景，房間設有多種類型，由私人泳池套房至面向馬路的客房也有，豐儉由人。即使入住最平的房間，也能享用酒店的特大無邊際泳池、健身中心和開放式餐廳，性價比不弱。

峇里島 潛水假期 – Day 04

行程：Nusa Penida(陰晴不定間中有雨) → 峇里島(天晴)

繼續上一篇Day 04行程。

<<峇里島>>

回到峇里島Sanur Pier之後行了15min去碼頭外圍的Grab站叫車，沿途有不少司機搭訕，話自己係Grab可以車我哋，因為天氣太熱行多步都唔想，便問佢哋咩價，點知個個都係想呃人，車費叫高50%～100%，我都唔想還價，唔理佢哋了。最後5min路程又遇上一個自稱Grab司機，自己打開個Apps報價比我睇，話Grab收幾多佢收幾多。佢都有病，Grab站只是在馬路對面，咁我不如自己叫Grab好過。其實Grab收司機25%行政費，如果司機平10%比我，便Win Win雙贏，不過我未遇過這樣正常的司機。

行到去Grab站還是有類似的司機話收Grab價錢唔洗等，我選擇自己叫車等15分鐘，點都安全啲。

Grab車由Sanur Pier去Renaissance Bali Uluwatu Resort & Spa 距離27km，車費Rp 177,000另加Rp 14,000公路費，因為塞車足足行了90min，我估峇里島的司機應該唔喜歡接長途Grab。

Renaissance Bali Uluwatu Resort & Spa – 13:50去到酒店，可以嘆返日了。

Check in大堂好有氣勢和空間感。職員話執房中，15:00房間才準備好，咁去食午餐先。

R Bar – 酒店大堂的酒吧，坐在這裡飲杯咖啡一定很心曠神怡。

在泳池旁的餐廳午餐，即是最下層的餐廳Clay Craft Restaurant，最高是剛才的R Bar。

Clay Craft Restaurant – 明天早餐也是在這𥚃吃，有室內冷氣或戶外坐位可以選擇。

我見今日幾好風唔會熱到標汗，選擇了戶外坐位。

Bintang細啤酒(Rp 96,800)；Prost Lager細啤酒(Rp 96,800) – 餐廳誠意十足，用冰杯倒出雪花啤酒，望見都涼浸浸。

煙三文魚Pizza (Rp 302,500) – 薄餅底新鮮脆口好好食，煙三文魚亦肥美香口，不過餡料份量略嫌不夠。

Infinity Pool – 泳池超級大而且非常靚，但正午時間實在太曬，黃昏才可以游水。

健身房也有全海景

酒店最底位置有另一較細的Lower Pool，環境一樣好。

Fatimah Celebration Pavilion – Lower Pool旁邊的結婚教堂。

泳池旁邊是Lower Pool Bar

這些是最低價錢的房間，面向馬路和公共走廊，完全沒有私隱和景觀，坐在露台也會被人眼望望，好彩小太熊不是買這些房，見真係間間都有人住緊。

Suite雙人房(包括早餐)每晚HK$1392 – 房間超級大啊，單是浴室已經有日本一間房的面積，原本對面是叢林一片翠綠，近月變了地盤，酒店網頁又唔講要Check in時職員才同客人講，攪到個個客都媽媽叉叉。

坐在露台食飯都好舒服，唔怪之得見很多人客也用Apps叫外賣在房吃。酒店餐廳實冇生意。

黃昏時間到泳池游水，Hea一個下午。

晚上Book了附近的Avisha Wellness & Spa Jimbaran做2hr SPA，經Klook訂每位HK$343，包來回酒店接送。接駁車準時19:00到酒店接我們。

Avisha Wellness & Spa Jimbaran – 外觀都幾豪華，覺得價錢幾抵。

首先在大堂飲杯薑茶，再揀按摩油的味道。

SPA房幾乾淨，2個鐘HK$343這個價錢確實係抵，下次可以再幫襯。

師傅的手勢唔錯，做之前預備了些現金，每人俾了Rp 50,000貼士。不過有問題，因為現在太少用現金交易，明天已經唔夠現金俾貼士。

做完SPA唔只有薑茶，仲有小食，係炸番薯、肉鬆糯米雞和鹹煎餅，味道出奇地好。

食完之後印尼經理走過來用廣東話同我哋吹了幾句水，佢好叻啊，話自己英文日文國語廣東話都吹到幾句，仲話點心食完可以再加，見咁好食咁唔客氣了，要多一Set當晚餐。

回到酒店冇晒人十分清靜。

泳池夜晚唔開放的，不過落水玩都應該冇人理。

今晚池畔有Private Dinner，氣氛唔錯喎。

這酒店很舒服。

峇里島 潛水假期 – Day 05

行程：峇里島(天晴)

06:00起身，發現睜唔開眼，原來對眼起晒眼膠黐實了，而且很腫，唔知係咪早幾日酒店的沖涼水唔清潔所以感染細菌，還是潛水店的Mask唔清潔。今次這細菌好毒，個多月才徹底好返。

06:30在Clay Craft Restaurant食自助早餐，早上坐在室外很清涼，不過太陽一出就熱到標汗。

全部食物放在室內有冷氣的地方，個場好大非常多嘢食。

單是鮮榨果汁已經有6款。

還有鮮製的健康特飲～

水果很新鮮吸引

麵包和芝士種類繁多，真想每款試吓。

熱食有高水準的煙肉和炒蛋，點心都唔錯。

魚香茄子見到都想食～

炒飯炒麵的賣相一流，一定要試試。

首先食一大碟又甜又多汁的水果，再加椰青水和鮮橙汁。

再食麵包和布甸，味道很好。

煙肉煎蛋是早餐必食，質素很高。

雪糕只係一般，口感滑但只有甜味，其餘味道很弱。

食完早餐又去游水，10:30 退房。

 

 

補充資料 :

1.     香港特區護照持有者可免簽進入印尼，最長停留30天。

2.     在香港的找換店 利澳公司 兌換印尼盾現金HK$ 1=Rp 2,031；信用卡簽賬 HK$1兌Rp 2,038，滙率比用現金更好，還有回贈。峇里島大部份地方也收信用卡，只帶少量現金便可以。

3.     峇里島機場的滙率極差，HK$1=Rp 1,300，相差36%。在當地用大額美元兌換比用港幣好，可以換多5%。在Kuta Beach換錢USD 1 = Rp 16,075 (大約HK$1=Rp 2,048)。在Nusa Penida島換錢USD 1 = Rp 15,700 (大約HK$1=Rp 2,000)。

4.     文章列出的價錢已包括了所有稅項和服務費。

5.     峇里島很流行用Grab叫車，比的士方便價錢亦合理，不用再和的士司機鬥智鬥力。一般車費每1km ~ Rp 6,000-14,000，視乎路線距離和時段，部分路段另加公路費，越短程每1km收費越貴。另外進出峇里島機場要多收Rp 12,000稅項。

 

---待續---

「峇里島 潛水假期」旅程，詳細行程可點擊到相關文。

日數	行程路線	日程重點
Day 01	吉隆坡→峇里島→Nusa Penida	乘AirAsia早機從馬來西亞吉隆坡飛往 峇里島，下午乘快船到Nusa Penida，連續3晚住在La Beach Penida Villa，潛水店Pure Dive Resort便在酒店對面。
Day 02	Nusa Penida	早上潛水2次，包括到Manta Point睇巨型魔鬼魚，回到潛水店午餐；下午潛水 1次，黃昏包車往返Cactus Beach Club & Restaurant食晚餐。
Day 03	Nusa Penida	早上潛水2次；中午回到潛水店午餐，下午潛水 1次；黃昏在Penida Colada Beach Bar食晚餐。
Day 04	Nusa Penida→峇里島	晨早包車6hr，04:30～10:30遊覧Nusa Penida東部景點，在碼頭散隊後乘船中午回到峇里島；乘Grab往Renaissance Bali Uluwatu Resort & Spa住 1晚，下午留在酒店休息，黃昏到Avisha Wellness & Spa Jimbaran做 2小時SPA。
Day 05	峇里島	早上在Renaissance Bali Uluwatu Resort & Spa食完早餐之後游水，留到最遲才退房；乘Grab往Svaha Spa Bingin Uluwatu by Wonderspace，做90分鐘SPA，然後乘Grab往Oneeighty Dayclub玩4小時，黃昏乘Grab到Kuta Beach行街食晚餐，晚上住在機場酒店Novotel Bali Ngurah Rai Airport。
Day 06	峇里島→新加坡→香港	早機飛去 新加坡，在市內行一日，黃昏機回香港。