瓦努阿圖首都維拉港(Port Vila) ~ 美國領事館(United States Embassy)受不起7.4級地震，地面第一層完全倒塌，整幢大樓中間被扯開，損毁非常嚴重。
2024年12月18日中午12:47，太平洋島國瓦努阿圖首都維拉港(Port-Vila)發生破壞力極強的7.4級淺層地震，地震發生於首都維拉港以西30km外海，震源深度只有10km，持續大約30秒，大量建築物受到嚴重破壞，美國駐當地大使館更加出現倒塌，傷亡嚴重……這場地震對瓦努阿圖造成重大災難和持久影響，被認為是近年來破壞性最嚴重的天災之一。此次地震發生於活躍的澳洲板塊和新赫布里底板塊(New Hebrides Plate)的聚合地帶，地震造成地面劇烈搖晃，大量建築物受到嚴重破壞，十多人死亡。地震引發山泥傾瀉，導致機場關閉，維拉港及周邊地區的交通癱瘓、物資運送困難。隨後兩天再出現三百多次餘震，部分餘震規模更達5.5級，加劇居民和旅客的恐懼與基礎設施的損毀。其中受最嚴重破壞的美國領事館，地面第一層完全倒塌，整幢大樓中間被扯開，地震後瓦努阿圖立即發佈為期七天的全國緊急狀態，並呼籲國際支援。其中以澳洲的支援最積極，極速派出軍機運送物資和安排撤僑，並稱呼瓦努阿圖為家人，至後期還拹助新加坡和歐盟的公民離開，盡顯真正大國的風範，不像那些自稱大國的國民要食自己。回想自己原來多年來去過不少地方也發生過超強地震，包括 尼泊爾加得滿都、紐西蘭基督城、印尼蘇門答臘綿蘭、緬甸曼德勒、日本九洲熊本和宮崎，2024年在秘魯的日子也有強地震，幸運剛剛避得開那位置，最後在瓦努阿圖終於遇上了。
最接近天國之地 瓦努阿圖 – Day 03
行程：維拉港(Port Vila)(天晴)
繼續上一篇Day
03行程。
<<維拉港(Port Vila), 瓦努阿圖>>
在酒店食完早餐無所事事，決定行1.6km去中國領事館，看看可以獲得什麼幫助。
天氣熱到爆，沿着馬路慢慢向前行，車子很少，市面未回復正常。
商店也未開門，想飲支汽水都冇。
10:00去到中國大使館，估唔到建築物原整無缺裂紋都冇條，不似曼谷的豆腐渣國產大樓，相反今次美國大樓就冧晒，亂世出異象呀！
中國大使館今日依然關了門，我表明身份同門口職員講話想見中國領事，職員好盡責，話阿Sir正在外出工作好忙好辛苦喎！阿Sir正在幫其他有緊急需要人呀！阿Sir與民同樂澤心仁厚！阿Sir仙福永亨壽與天齊！阿Sir乜乜物物……咁L多口水留返自己飲啦～意思即係阿Sir唔會幫你哋，你哋食自己囉，明白。
最後我哋都係喜歡玩吓嘢，硬係留下我們的姓名、酒店地址和email，叫佢交俾佢阿Sir，如果今晚食完天九翅呃完蝦條拗完荔枝之後無所事事便覆吓我哋，唔L該晒～
原本以為阿Sir因為我哋來自腥港所以對我哋差一些，那知原來阿Sir好公平架，不久之後遇上一個來自北京為國出心出力在這裡工作的年輕女生，她遲我們一個鐘到，遭遇和我們一模一樣，想阿Sir幫手買張機票返屋企都係NO。身為有最強中國護照的中國人，佢一定好L感恩今日仲未死得，一定好L自豪今朝仲有廁紙抆屎。
探訪中國大使館的結果和預期一樣，感恩事後沒有被追究尋釁滋事，阿Sir真係朝朝做慣大事勁有氣量。
冇咩好做，繼續沿着Main
Road行，不久轉入Elluk Road，比較多商店。
終於見到有雜貨店開門，入去看看。
美極雞湯麵一包約USD0.5，一般市民買個麵都貴過香港，生活艱難。
其他汽水和罐頭的價錢也比香港貴少少，物價和市內所見的發展程度不成正比。
另外一些士多還在執拾貨品中，老闆話全部貨物震晒落地，仲有排執，想要咩自己揾到有就有啦。
油站大排長龍，差點以為今日大減價。
呢間士多好多人呀，入去八卦一下。
雪碧(VT140)
– 冰凍架，大熱天氣下飲一口真係感動到喊，即係開始有返電啦，希望酒店今晚有冷氣。
原本想試的餐廳L
Houstalet，應該冇機會了，下世再見。
金港酒店(Golden
Port Hotel) – 位於Port
Vila的主要公路Lini
Highway上，是一家大型經濟的酒店，有五十多間房，一眼睇出係乜人起架啦，所以仲繼續營運。
Iririki Island Resort
– 瓦努阿圖Port
Vila著名的私人島嶼度假村，估據了市中心對出的整個小島，只需僅3分鐘渡輪便到達，小太熊話唔住都可以俾少少錢上島玩，有餐廳沙灘泳池獨木舟SPA，好適合消磨一天半日。
繼續向Main
Market的方向行，街上好似又冇乜特別。
Grand Hotel and
Casino – Port Vila市中心的大型酒店，設有賭場方便把黑錢洗白。地震後多處地方出現裂紋變了危樓，被封閉了。
大門口的玻璃頂篷可以捱過地震，沒有偷工減料啊。
行到Main
Market位置了，有警察看守着，表示Main Market一帶會封閉最少七日，而機場就封閉最少72小時，我們要在這裏回頭。
警察就站在守着，唔比人接近禁區。
禁區另一邊就係今次地震破壞最嚴重的大樓 美國駐瓦努阿圖大使館。
美國駐瓦努阿圖大使館 – 於2024年7月才正式開設的大使館，樓高4層，地震之後左邊部分的最低層倒塌了變成只剩下3層，大樓中間被硬生生扯開。大使館已成危樓，不可以進入。
最低一層的石屎強度很弱，碎得像餅乾，龬筋也欠缺應有的韌性。
最初觀察我還誤會是2座大樓，小太熊卻一眼便看出是同一座大樓被扯開，小太熊有料到。
在外圍行一個圈，看到最低一層已經完全粉碎，傷亡慘重啊。
外圍地上也裂開了～
近一點看，很多玻璃也爆了，冷氣機跌落在地上。
連窗框也變型，玻璃怎會不爆。
Crown Royale Hotel
& Lounge – 位於美國大使館附近的酒店，外牆嚴重損毀裂紋處處，同樣被圍封了。
再前行見整條大街也被封鎖，行到冇咩好行了，在街上見「B」字頭的巴士便截停問價，截了多架車都唔肯VT150車我返Nasama Resort，全部當自己係的士開價～VT2000~VT1500，還佢哋價都on9。
Parliament House of
Vanuatu – 瓦努阿圖的國家立法機關的所在地，位於Port Vila的議會大樓。瓦努阿圖於1980年才自英法聯合殖民統治下獨立，當年同時在這𥚃成立國會。現時的建築由中國政府協助建造。
行到Parliament
House終於裁到巴士了，司機當的士開價VT1000車我們去Nasama Resort，4km路程算是合理公價，我話想坐巴士，兩個人俾VT300佢，司機又肯喎，不過沿途都兜唔到其他客，只車我們。攞了司機的電話 7117454，約了他明天10:00車我們去Banana
Bay，單程兩位收VT3000，32km路程比一般開價VT6000平了一倍，成交。
這司機很老實，所以接下來所有長途車也約他接送。在車上遺下了熊大雨傘，被其他人攞咗揾唔返。
12:15回到酒店，職員又問我們要不要午餐，我仲係以為免費，咁要啦。
又係每份收VT1500的 菜肉無酵餅，今日胃口好啲，食得晒喎～
飲埋酒店送的Welcome
Drink，只剩返熱啤可以揀，用嚟送午餐啦。
在酒店呆呆滯滯on99過了半天，從未試過旅行的日子這樣不充實。
17:45食晚飯，今晚自助餐(每位VT2000)很豐富，有兩款餸 咖哩雜菜和粉絲炆豬肉，味道幾好，一次過要一大碟，食到飽。
食飽飯之後小太熊收到偉大的中國領事覆email呀，立即下跪高呼萬歲萬萬歲，然後可以慢慢學習了。
好L感動呀，原來偉大的中國領事勁關心我哋，唔止問候我哋，仲話我知受了傷可以去醫院架，佢唔教我真係唔識架，阿Sir仲話我知機場會關閉72小時，真係好內幕消息囉～睇完封信，簫都俾佢吹孿，阿Sir咁好問候我哋，攪到我都想問候佢媽媽。
今晚黃昏日落好靚，市內已經有電，但這𥚃還是停電，今晚仍然要繼續捱熱。
晚上房間滴風都冇，焗到周身汗。
晚上睡覺時的震動沒有昨晚那麼厲害，但整個晚上都非常之翳焗，睡覺的時候滿身大汗，頂唔順開門涼一下，但很多蚊飛了進來，仲大鑊～
最接近天國之地 瓦努阿圖 – Day 04
行程：維拉港(Port Vila)(天晴) → Banana Bay, Efate(陰晴不定間中微雨及暴雨)
今朝又係07:30食早餐，昨天來了些新客，從附近酒店搬來的，其中一位是北京來工作的女生，佢話昨天早上也去了中國大使館尋求協助回中國，但領事又係叫佢食自己，要食飽啲喎。
今朝的水果好靚又甜又多汁，有多士炒蛋，但欠煙肉火腿。
早上09:30退房，埋單計數，這時才知道每日的午餐和晚餐都要收錢的，簡單午餐每人VT1500一餐，簡單晚飯每人VT2000一餐，房間計貴了，每房VT15000包早餐，小太熊很不滿，因為貴過自己上網買，而且冇電冇冷氣，唔應該計我們正價。另外可口可樂每罐VT150，1.5Liter水每支VT180，又收得平喎。
司機10:00仍然未到，等到10:40都未見人便叫酒店幫忙打電話給他，因為落大雨市內大塞車，等到11:50司機才到，在瓦努阿圖冇人會認為時間很寶貴，等2hr是閒事。
11:50-13:15乘車到Banana Bay Beach Club，32km路程的士收費VT3000。
補充資料 :
1. 乘維珍航空由澳洲中部Ayers
Rock(Uluru)飛往瓦努阿圖首都 維拉港(Port
Vila)，單程機票每位HK$2850。包括23kg大行李。
2. 持有HKSAR Passport入境瓦努阿圖不用簽證，最多可停留120天。
3. 瓦努阿圖的貨幣是 瓦圖(Vatu)，貨幣符號VT，VT100 = HK$6.7，像日元匯率，很易記。
4. 藍十字保險44天(包括32天澳洲和12天瓦努阿圖)
2人價錢HK$1140。
5. 在瓦努阿圖一定要帶備足夠現金，信用卡不是太流行。
6. 瓦努阿圖的電壓是230V，插頭和大陸一樣，三腳扁斜。
7. 瓦努阿圖不在香港政府的外遊警示國家名單上，即是香港政府不會評估瓦努阿圖是否可以安全旅遊，所以瓦努阿圖發生地震之後香港也沒有發出任何旅遊警示。
8. 瓦努阿圖有不少公共交通，包括巴士、的士和客貨車。巴士的車牌上寫了"B"字，路線沒有固定，車種和的士一樣，只是和其他人共乘，價錢比的士便宜很多，同樣是按行車距離計算車費，見到有車揮手截車再問啱路線和價錢便可以。不過很多時巴士司機會拒載，並向你開出的士價錢，所以想坐巴士一定要有耐性截多幾架。從機場往市區的巴士車費VT150，約4km，如果距離長一倍便把車費加倍。
9. 瓦努阿圖的士車牌上是“T”字開頭，另有一種也可以乘搭的貨車車牌上有“C”字，一般開價和的士差不多，問多幾架才可以找到好價錢。由機場往市區的士VT2000，可以去到10km距離左右。
10. 有巴士從Port
Vila環島順時針或逆時針一週載客，但有時等一個鐘也未必有車。
11. 瓦努阿圖航空由Port
Vila飛往Tanna Island，來回機票每位VT35190，包括5kg
+ 10kg行李。
---待續---
沒有留言:
張貼留言