最接近天國之地 瓦努阿圖(完) – 從天國回到人間

瓦努阿圖 首都維拉港(Port Vila)海濱酒店 ~ Fatumaru Lodge Vanuatu

維拉港(Port Vila)是島國 瓦努阿圖的首都，位於 埃法特島(Efate)的南部，是大部份去瓦努阿圖旅客的落腳點。精品度假旅館Fatumaru Lodge Vanuatu位於維拉港海旁，步行600m便可到達市中心，位置便利環境優美，旅館附近有大型商場和多類食店，也有巴士站，是很好的落腳點。在上星期7.4級地震發生後，Fatumaru Lodge Vanuatu有一半建築物受到破壞不能再出租，剩下海邊的房間可以租用，我們選擇了在這酒店度過瓦努阿圖的最後一晚。

最接近天國之地 瓦努阿圖 – Day 10

行程： Banana Bay, Efate(天陰間中有雨) → 維拉港(Port Vila)(天晴)

<<維拉港(Port Vila), 瓦努阿圖>>

今日可以離開Banana Bay Beach Club了，好開心。昨晚找老闆娘幫忙打電話7117454給車我們來的司機，司機今朝準時09:00接我們，VT 3000車我們到Port Vila市中心，比一般自己截車平了一半。

Fatumaru Lodge Vanuatu – 09:30便來到酒店，因為冇乜客人，酒店立即安排了房間給我們。

約了司機明天車我們去機場，司機問我哋想俾幾多？我見佢次次都收咁平，今次俾返公價VT 2000啦，返正自己再截車也要這個價錢，大家開心。

酒店只有這兩幢小屋沒有嚴重破壞可以出租，其餘的都要暫時封閉。

泳池的水抽乾了，食水在當地依然極度珍貴，不可浪費。

雙人海景房(不包括早餐)每晚HK$905 – 房間有超大露台加無敵海景，冷氣夠凍海風清爽好舒服，不過地震後留下的碎玻璃未有完全清理，被細少如毛的幼玻璃拮損了腳指。

屋內其實唔少結構裂紋，應該要大維修一下。

立即沖個熱水涼吹爽個身瞓一下，好耐未試過全身乾爽的感覺了。

房間的無敵海景好正呀，屋前就是沙灘，跳出圍欄便可以落海。

今朝未食早餐，休息夠之後便沿着大馬路Kumul Highway行去市中心，短短600m的路程已經見到地震後的慘況。

有屋前的護土牆塌了，幸好大樓頂得住。

路上也有不少裂紋未有修補。

Tanna Russet Plaza – 維拉港的大型商場，距離酒店只有500m，被譽為瓦努阿圖首屈一指的購物地點，擁有多間商店和餐廳，還有美食廣場、電影院水療中心等設施。受到地震影響，超過一半的商舖還未有重新營業。

商場的物價非常之貴，合味道杯麵每個VT 480，60g卡樂B蝦條VT 320，香港只須30%價錢便買到。

美食廣場以快餐店為主，價錢亦很貴。

商場內有間中式麵店，價錢Ok，決定今晚來食晚餐。

StoneGrill Restaurant – 是一家非常受歡迎且獲得2024年Travellers’ Choice旅客評選獎的牛排餐廳，原本打算在這𥚃食一餐，不過餐廳仍然關閉之中，可惜。

CM Store Wholesale and Retail – 行到這超級市場，見有開門便入去買些水和食物。

雲尼拿無糖可樂(VT 130) – 味道非常古怪又似藥水，下次請我都唔飲 ; 1.5 Liter樽裝水(VT 150) – 終於不用再捱貴水，可以盡情地飲。

再向前行便到達禁區，地震後差不多十日還未解封，看來確實損毁嚴重。

美國領事館依然維持當日的狀況。

Moorings Hotel – 美國領事館對面的酒店，原本訂了今晚的房間，因為地震所以取消了，好彩唔係訂了第一日，否則便親眼看見 美國領事館塌樓一幕了。今日來幫襯食個午餐。

Moorings Hotel的餐廳有幾枱客，估唔到還會有其他人未走。

餐廳地下仍然是裂開的，有排執。

今日有Set Lunch供應，每位VT 1600，可以選擇一款主食和一杯飲品，揀生啤紅酒也可以，比Banana Beach平得多。

炸雞沙律白飯 + 大生啤(VT1600) – 份量十足，炸雞味道唔錯肉又嫩，而且跟了大碟沙律醬，飯很大碟，好食。小太熊叫了杯紅酒給我，但已經變酸，早知要多杯啤酒。

炸吞拿魚塊伴薯條 + 紅酒(VT 1600) – 薯條香脆又大份，茄汁和沙律醬夠大碟，炸吞拿魚塊都味道合格，大份到食唔晒。

Moorings Hotel都有好多房，海景房的景觀真係唔錯。

泳池也被抽乾水。

午餐之旅返酒店休息，吹吹海風嘆下冷氣眠一眠，真係舒服。黃昏行去Tanna Russet Plaza想食湯麵，原來麵店今日17:00關門，冇得食了，在街上找了很久也沒有其他餐廳營業，只好去買些杯麵。

Haifeng Supermarket – 酒店附近的超級市場，看Google Map找到這裡，原來已經震散了，已成危樓。

裂得真係好勁，有危險。

行遠些返去CM Store Wholesale and Retail買麵和罐頭吞拿魚，今晚食呢啲。罐頭吞拿魚平喎，只係VT 120。

返到房啱啱日落，今晚天色又係靚到爆，最好用來送杯麵。

Pop Mie(VT 120) ; Kimchi Bowl Noodle(VT 200) – 估唔到兩款杯麵都好食，有驚喜；罐頭吞拿魚(VT 120)

食完麵沖杯茶，坐到天黑見星星，今晚是來了 瓦努阿圖之後最舒服的一晚。

最接近天國之地 瓦努阿圖 – Day 11

行程：維拉港(Port Vila)(天晴) → Nadi, 斐濟(Fiji)(天陰))

07:30起身，行去Moorings Hotel食早餐，這是唯一的選擇。

半自助早餐每位VT 1000，包括自助水果麵包和一份雞蛋。

自助的多士和水果都夠飽了，第一次在瓦努阿圖食早餐這麽開心。

煙肉煎雙蛋好好食，正過Banana Bay多多。

約了司機10:00車我們去機場，收費VT 2000。

今日有機飛去Tana Island，今日的旅客真幸運，有個完美假期。

首先在內陸機場退機票攞返錢，不過由10:15排到12:15，等足2hr只做了5個客。

12:15夠鍾收工，還有約10個人，但佢啋你都on9，粒聲唔出就關窗趕客。

太過份，怪不得這航空公司會破產，效率超低而且沒有誠信，非常無恥，𠄘諾了可以退票回水，但到今日還未肯退錢，我已經追了佢十幾個月，HK$4000睇清楚佢哋的禮義廉人格。

用剩了VT 3710現金，在機場換了斐濟錢Fiji Dollars F$ 65，滙率蝕了30%左右，不過唔換就變廢紙。

為了重振旅遊業，政府派出土人歡迎到埗旅客。

在禁區內把碎銀捐埋佢，唔好浪費。

今晚乘斐濟航空回香港，在Nadi轉機等9.5hr，單程每位HK$4650，包括23kg大行李。

飛機延誤了2hr15min，幾驚佢會放飛機，好彩有驚無險最後19:20起飛。

19:00上機，終於可以離開瓦努阿圖，以後也不會再來了。飛機餐全部食晒，因為肚餓啊。

<<Nadi, 斐濟>>

22:40到達Nadi機場，原本訂了機場酒店Trans International Fiji一晚(F$137)，因為地震後取消了所有酒店，想再訂時已經貴了一倍，所以決定瞓機場算了，乜嘢未捱過吖。

揀了張靚床瞓覺，可以瞓5hr，慳返幾百蚊。

最接近天國之地 瓦努阿圖 – Day 12(完)

行程： Nadi, 斐濟(Fiji)(天陰)(天晴) → HK

Burger King 05:30開門，昨天換了Fiji Dollars F$ 65，可以用來食早餐。

豬柳蛋漢堡餐(F$13.55) – 每人要了一份，豬柳蛋漢堡味道很怪，包太硬，薯堡炸得太乾太硬，Cappuccino欠了香濃。

08:30起飛回香港，飛機餐食了好少，唔係幾好食。

14:30回到香港，返屋企之後立即落街食好西，香港真係福地，食物的價錢比瓦努阿圖平得多，而且好好味。

燒鵝髀飯好好食，皮脆肉嫩鵝味濃，連餐飲都只係HK$92。

星洲炒米火喉十足，咖哩香口微辣，正。連餐飲都只係HK$58。

香港求其一間平民飯堂已經比瓦努阿圖最高級的餐廳好食，瓦努阿圖永遠不會是我想住的地方。

 

補充資料 :

1.     持有HKSAR Passport入境瓦努阿圖不用簽證，最多可停留120天。

2.     瓦努阿圖的貨幣是 瓦圖(Vatu)，貨幣符號VT，VT100 = HK$6.7，像日元匯率，很易記。

3.     藍十字保險44天(包括32天澳洲和12天瓦努阿圖) 2人價錢HK$1140。

4.     在瓦努阿圖一定要帶備足夠現金，信用卡不是太流行。

5.     瓦努阿圖的電壓是230V，插頭和大陸一樣，三腳扁斜。

6.     瓦努阿圖有不少公共交通，包括巴士、的士和客貨車。巴士的車牌上寫了"B"字，路線沒有固定，車種和的士一樣，只是和其他人共乘，價錢比的士便宜很多，同樣是按行車距離計算車費，見到有車揮手截車再問啱路線和價錢便可以。不過很多時巴士司機會拒載，並向你開出的士價錢，所以想坐巴士一定要有耐性截多幾架。從機場往市區的巴士車費VT150，約4km，如果距離長一倍便把車費加倍。

7.     瓦努阿圖的士車牌上是“T”字開頭，另有一種也可以乘搭的貨車車牌上有“C”字，一般開價和的士差不多，問多幾架才可以找到好價錢。由機場往市區的士VT2000，可以去到10km距離左右。

8.     因為瓦努阿圖航空一直沒有退款給我，於是我嘗試Claim藍十字保險。藍十字表示要收到瓦努阿圖航空不肯退款的回覆才能處理我的申請，於是我又追瓦努阿圖航空，賠不賠也要一個確實的答覆，那知，他媽的極度無恥的瓦努阿圖航空在藍十字給我的最後限期前回覆我，會安排退款，令我不能再追保險公司。瓦努阿圖航空覆完我email之後又再在地球上消失，唔再覆我email，直接今日仍未退款，我會追到佢哋再次破產為止。

 

 

 

 

 

-----最接近天國之地 瓦努阿圖(完)-----