最接近天國之地 瓦努阿圖(05) – 天然海水湖泊Blue Lagoon

瓦努阿圖 埃法特島(Efate)天然海水湖泊 – Blue Lagoon

瓦努阿圖 埃法特島(Efate)東海岸的 藍色潟湖(Blue Lagoon)是個很受歡迎的自然景點，距離Port Vila市中心約32km。Blue Lagoon四周被叢林包圍，環境隱秘寧靜，湖水混合了淡水泉和海水，碧藍清澈，會隨潮汐變化呈現不同的鹹淡程度，湖中有不少熱帶魚，很適合游泳和浮潛。此外，潟湖的四周設有很多木製平台和繩索，很多當地人喜歡從平台盪鞦韆跳入水中，或從樹上直接跳水，非常好玩。湖岸邊也設有很多長椅和草地，當地家庭很喜歡一家人駕車到來野餐遊樂。從Port Vila搭乘巴士到Blue Lagoon每人約VT600，要預留最少1hr等車，因為沒有固定班次；乘的士單程最少VT4000，一般司機開價VT7000，要約定司機回程時間和確認價錢。Blue Lagoon本身是一處公共地方，但四周圍的土地均屬於不同的私人地，因此旅客可以從不同的入口進湖，入場費也各有不同，從VT500~1500，分別只在於岸上的設施。

最接近天國之地 瓦努阿圖 – Day 06

行程： Banana Bay, Efate(天晴) → Blue Lagoon, Efate(陰晴不定間中微雨及暴雨) → Banana Bay, Efate(天晴)

<<Banana Bay, 瓦努阿圖>>

昨晚02:30又有出現6.1級餘震，持續了5秒以上，震感卻沒有前幾晚那麼強烈，但也明顯感覺震動，大家都驚到立即走出房外。

今朝08:30起身食早餐，今日名符其實的碧海藍天。

All day Breakfast (VT 1600) – 每人要了一份，包括有煎雙蛋、多士、香腸、番茄和炸薯餅，味道和份量都比奄列好 ; Iced Coffee (VT 700) - 有點像咖啡奶昔沙冰，很特別；1.5 Liter樽裝水(VT 400)

酒店住了兩位法國人父子，佢哋租了車，出外買了大西瓜放在酒店雪櫃，今朝雪凍了，切開請了幾件我哋食，又甜又多汁仲好清涼。

早上10:30出發去附近6km的Blue Lagoon，酒店話巴士車費係VT 150，不要俾多。在門口等了15min也沒有一架巴士經過，不知為何今日特別少車。等多15min終於有一架「C」字頭的Cargo客貨車，司機開價每人VT 200，我還價VT 150，成交。

去到Blue Lagoon竟然冇開門，但司機話行前幾步便可以入場。

落車之後沿着馬路向前繼續行，這段路也受地震破壞了。

Whikatom Blue Bay – Blue Lagoon的另一入口，入場只係VT500，連名字也不同，剛才的入口收每位VT1500。

這𥚃的設施比較簡陋，但勝在夠平，同樣有木平台和跳水繩索。

湖水翠綠得太過份，忍唔住立即跳落去游個夠。

原來條繩索好難玩的，不過又真係幾好玩。

當地人全部都好勁啊，爬樹跳湖，玩得好癲。

浮潛都有些魚仔睇，蝦虎魚(Goby)不是一般在海中見到的樣子，品種比較奇怪。

潟湖四通八達，游三分鐘便可以登陸對面平台，是VT1500入場費的Blue Lagoon入口，因為今日關門了，所以冇人。

Blue Lagoon的設施真係比VT500入場費的Whikatom Blue Bay豐富和整潔得多。

還有其餘的入口也可以去到，設施也不如Blue Lagoon，但一定有跳水繩索。

回到Whikatom Blue Bay，跳水繩索已經被當地人霸住玩了，佢哋好勁架，由好高跳下水。

其中一個當地人不斷和我們吹水，好煩呀，其實佢只係想練習英文，不斷講無聊野，煩到爆阻住我哋玩。

特然之間刮起狂風暴雨，放在岸上的背囊都濕晒，真麻煩。

附近只有一個避雨亭，不過有一家人正在野餐，無辦法之下只好迫迫哋行入去避雨。

佢哋好客氣呀，不單止冇嫌我哋阻住晒，仲請我哋一齊食嘢，小太熊上次在帛琉就係咁樣食到腸胃炎，今次死都唔肯食，不過唔食唔比面喎，我唯有入鄉隨俗唔客氣了，多謝～

有雞肉有烤香蕉和菠蘿，味道其實幾好的。

大雨下了成個鐘，停雨之後都冇心機再玩，返回馬路上等車走，但等了50min都冇車，連還價的機會都冇，嬲嬲哋沿着馬路行6km返酒店算了，如果唔係等車已經差不多行到返去。

沿着馬路行了不遠見到一檔路邊小販，大木瓜只係賣VT 100相當抵食，買了一個。

仲有些新鮮菜又平又靚，最衰冇廚房煮食。

連蟹都有，全部生猛的，食唔食得架～

買生果時老闆娘話佢哋有巴士，可以VT2000車我哋返酒店，我話唔好了，如果係每位VT150巴士價就可以，佢又Ok喎。

巴士每位VT 150車我們回到Banana Bay Beach Club。

15:00返到酒店，今日好多街客入來游水，排隊跳水不知幾開心。

17:00早點食晚飯，餐牌的選擇唔多，盡量試些新菜式。

Ham and Pineapple Pizza (VT1400) – 今日食返菠蘿火腿Pizza，始終有菠蘿才好食 ; Tusker Beer (VT 600)

Thai Beef Salad (VT 2500) – 牛肉比預期中好食，有牛肉味醬汁亦好味道，番茄和沙律菜都新鮮，只係貴了些。

呢幾晚日日都咁靚天色，如果房間有埋冷氣就好了，唔駛瞓得咁辛苦。

日落之後又開始積雲，今晚沒有星星了。

補充資料 :

1.     持有HKSAR Passport入境瓦努阿圖不用簽證，最多可停留120天。

2.     瓦努阿圖的貨幣是 瓦圖(Vatu)，貨幣符號VT，VT100 = HK$6.7，像日元匯率，很易記。

3.     藍十字保險44天(包括32天澳洲和12天瓦努阿圖) 2人價錢HK$1140。

4.     在瓦努阿圖一定要帶備足夠現金，信用卡不是太流行。

5.     瓦努阿圖的電壓是230V，插頭和大陸一樣，三腳扁斜。

6.     瓦努阿圖有不少公共交通，包括巴士、的士和客貨車。巴士的車牌上寫了"B"字，路線沒有固定，車種和的士一樣，只是和其他人共乘，價錢比的士便宜很多，同樣是按行車距離計算車費，見到有車揮手截車再問啱路線和價錢便可以。不過很多時巴士司機會拒載，並向你開出的士價錢，所以想坐巴士一定要有耐性截多幾架。從機場往市區的巴士車費VT150，約4km，如果距離長一倍便把車費加倍。

7.     瓦努阿圖的士車牌上是“T”字開頭，另有一種也可以乘搭的貨車車牌上有“C”字，一般開價和的士差不多，問多幾架才可以找到好價錢。由機場往市區的士VT2000，可以去到10km距離左右。

8.     乘的士由Port Vila到Banana Bay Beach Club，32km路程收費VT 3000，一般司機開價VT 6000。

9.     Banana Bay Beach Club用太陽能發電，電力很弱，不可以用風筒。

10.    Blue Lagoon距離Banana Bay Beach Club只有6km，可以從Port Vila出發一日遊兩地。

 

 

 

---待續---