美國西岸 自駕 • 郵輪(05) – 西雅圖的天空

美國西雅圖 香口膠牆(The Gum Wall)

西雅圖(Seattle)是 美利堅合眾國(美國) 50個州之中的華盛頓州最大城市，擁有多元化人口，包括亞裔、歐裔和LGBT(Lesbian女同性戀、Gay男同性戀、Bisexual雙性戀、Transgender變性)社群，非常複雜，在公共地方也常常看到古古怪怪的人，唔習慣都會幾驚。西雅圖市的衆多景點之中，以香口膠牆(The Gum Wall)最經典。香口膠牆是Pike Place Market旁邊的一條小巷，巷內所有牆面和天花板也黏滿遊客𡁻完之後五顏六色的香口膠而聞名。據說牆上的香口膠最早在1993年左右出現，當時Market Theater戲院排隊觀眾無聊之下開始黏貼嚼過的香口膠在牆上，慢慢變成一種風氣，儘管政府多次派人清潔，在2015年便進行全面大清洗，移除所有香口膠，但最後還是敵不過大勢所趨，遊客迅速重現牆上的香口膠，速度更加以幾何級數上升，市政府兵敗如山倒之下，唯有無為放任這被CNN評為「全球最噁心景點」的The Gum Wall世世代代留在西雅圖。

美國西岸 自駕 • 郵輪 – Day 05

行程：三藩市(天晴) → 西雅圖(天晴)

<<三藩市>>

早上06:30起身執行李，離開三藩市。由酒店行700m去最近的車站“Powell Street”，乘07:48-08:20的BART去機場。

BART由“Powell Street”去機場，車費USD 11.15。

今日乘11:30 - 13:45的Alaska Airlines航機去西雅圖，機程 2hr15min，單程每位HK$789包括了大行李。

落車之後行了好耐好耐之才去到內陸機場Terminal 1，我找了一張冇人的坐位包好大背囊準備寄艙，小太熊放下行李喼替我紮實個背囊，然後一齊行去航空公司寄倉。

行了5分鐘左右，小太熊特然發現自己忘記了攞行李喼，遺留了在剛才的座椅旁邊，由於行李喼已經離開了我們視線範圍，我便立即快步跑向剛才的座椅，這時見到剛剛還是冇人坐的座椅被2個人企了在旁邊，他們身邊放了很多行李。我的行李喼呢？第一二眼也未能即時找到，有點兒飆冷汗，再定神細心看…原來被那班人的大堆行李圍得好貼好實，遮住了一半，好有古怪，我要推開他們的行李才能拿回自己的，離開時那2人竟然和我怒啤了幾眼。

事後回想，這2人九成係賊，正常人怎會這樣用自己的行李包圍別人的行李，而附近是沒有人的，大把地方企大把地方放行李，更加不會別人攞返行李之後便怒啤人，美國真係好L多賊，同智利一樣咁L賤。今次好彩沒有損失，未來行程要加倍小心。

在航空公司自助寄出行李Print埋登機證，便到候機大堂集合。

候機大堂都幾舒服，有面向跑道的大班椅，瞓覺都冇問題。

飛機不知為何Delay了75min，12:45才起機，好彩唔使轉機，否則便麻煩。

機上都派了花生和可樂，好過AirAsia。

<<西雅圖>>

飛機14:30降落 西雅圖國際機場(Seattle-Tacoma International Airport)，今日其實冇Plan節目，所以遲啲到都冇乜所謂。

LRT車站在機場隔離，可以用ApplePay買票，乘Lightrail Line 1 (Green)出市中心每位USD 3。

在“Symphony”車站落車，行500m上斜路便到酒店Coast Seattle Downtown Hotel by APA。

Coast Seattle Downtown Hotel by APA – 位於西雅圖市中心鄰近鐵路站和巴士站，今次連續住2晚。

雙人房(不早餐)每晚HK$1157 – 面積非常大亦夠乾淨，天然光線充足整體上好舒服。

窗外景觀像中環一樣。

酒店健身室很大，早晚時段也多人用，內有免費飲用水供應。

安頓下來便出去搵食，原來已17:00差唔多日落了。AI提到的禁區 ～ 市中心3rd Ave(尤其在Pine和Pike之間)就在酒店附近，順路行過在外圍看看，街上真係好L多喪屍呀，個個都似食飽K仔一樣，令人想起中華英雄的萬毒戰神，好L恐怖。

日落了，向Pike Place Market方向睇吓有冇啱食。

黃昏的Pike Place Market唔係好多人，因為大多數商舖已經關門。

有港式麵包賣，店舖叫「美心餅家」，仲要排隊添，過去看看。

菠蘿包USD 5.44；煎堆USD 4.08；咖喱牛肉包USD 6.34，仲未計額外的30%稅和服務費，即係一個普通菠蘿包賣HK$55，係咪儍架。

因為物價太高我呢啲窮L食唔起，只好去超級市場買食物，點知原來西雅圖的一般物價比三藩市貴30%以上，買到好L肉赤。

黑辛辣麵(USD 2.99)；乳酪(USD 1.39)；薯片(USD 1.99)；2 Liter牛奶(USD 3.89) ; 出前一丁麵(USD 3.5) – 在三蕃市見過只係USD 1.99，西雅圖的物價好癲。

都係即食麵最啱食，其實真心覺得幾好食的。

食完晚餐又係瞓覺，覺得已經習慣了時差，沒有頭兩日咁辛苦了。

美國西岸 自駕 • 郵輪 – Day 06

行程：西雅圖(天晴)

今日只在市內行吓街食吓嘢，行程完全唔趕，又係瞓到安樂醒，07:30才起身。首先去Pike Place Market食早餐。

Piroshky Piroshky – 由俄羅斯移民於1992年在Pike Place Market創立的俄羅斯麵包店，專賣手工製作的東歐傳統麵包Piroshky，經常要排長龍。小店曾獲很多媒體介紹，並評為「美國20大最具標誌性美食地點」。

Smoked Salmon Pate (USD 8.83) – 小店最受歡迎的煙燻三文魚醬烤包，咁細個麵包賣呢個價錢係唔習慣，不過美國乜春都咁貴，而且真係幾好食，三文魚醬很甘香麵包亦鬆軟有咬口，值得一試。

星巴克創始店 – 1971年開業的全球第一間Starbucks咖啡店，位於美國西雅圖派克市場(Pike Place Market)，今日已經是在全世界擁有超過3萬家分店的跨國企業，令這元祖店成為了西雅圖必到的旅遊景點，吸引無數喜歡咖啡和平時唔飲咖啡的人前來朝聖。

好彩早到，只係排了廿幾人，等了差不多半個鐘。

店內面積狹小而且無座位，企位也只有不足10個，主要以外賣為主。

Latte (USD 6.35) – 這杯是Medium Size，唔係特別好飲咋喎，同平時飲開的根本冇分別，可以話差少少添，排咁耐隊買杯咁嘅咖啡純粹屎忽痕趁下熱鬧，不過都值得嘅。

Pike Place Market Sundeck – 買完咖啡可以穿過街市行到海邊這公共空間慢慢嘆，幾舒服架。

Sundeck對出是 海濱公園(Waterfront Park)，一邊飲咖啡一邊望着這個景觀。

Beecher’s Handmade Cheese – 於2003年在Pike Place Market開業，是西雅圖唯一的手工芝士工廠，製作的芝士沒有人工添加劑，店內供應的奶油芝士通心粉被譽為「全球最佳」。

未開店已經有幾十人排隊等幫襯，小太熊最怕執輸行頭，立即排埋一份。

芝士製作過程非常乾淨，在街上隔著透明玻璃看得清清楚楚。

10:00準時開始營業，個個立即入去大買特買。

店內有兩款免費芝士試食，味道香濃純厚，好正架。

煙三文魚芝士通粉(Smoked Salmon Mac & Cheese Pasta 8Oz)(USD 12.12) – 這就是被譽為全球最佳的通心粉，真係好濃郁甘香好好食，三文魚香嫩肥美，芝士陳年醇厚冇得彈，美中不足是三文魚太少和芝士太鹹。

派克市場(Pike Place Market) – 美國歷史最悠久的市場，成立於1907年，以販售新鮮農產品、海鮮和手工藝品聞名，市場內有超過200個攤位，被視為西雅圖的心臟。

市場入口的金豬「Rachel」在1986 年市場 79 歲生日時正式豎立，是派克市場的吉祥物，Rachel背上有投幣孔，每年也收到接近10000美元，相當肥仔。

市場內有很多花店、水果店和醬油店，全部價格不菲。

市場的主打還是海鮮，雪藏龍蝦尾每兩也要HK$40，雪藏帶子肉每隻HK$55，真係好貴。

這條鮟鱇魚樣子有趣。

唯一賣香料的商店，內有過百款香料。

門口有免費香草茶試飲，味道似印度神茶，勁難飲。

The Gum Wall – 位於街市旁邊的斜坡小巷內，𡁻定片香口膠先。

真係誇張，香口膠多到呢～見到都起雞皮。

有些遊客玩晒嘢，把香口膠拉長了才貼在牆上，又幾有趣吖。

𡁻完的香口膠就貼在牆上，要好小心架，稍有大意便會掂到旁邊的香口膠，隨時無啦啦On99染上愛滋就唔好啦。

補充資料 :

1.     持有HKSAR護照進入美國必須簽證，最長每次可以停留約180日。

2.     在BOC換現金 USD 1=HK$7.88。美國很流行信用卡，今次行程99%是俾信用卡，滙率大約 USD 1 = HK$7.96。

3.     在三藩市乘坐交通工具可以使用Clipper Card，在Apple Wallet可以免費加卡，用ApplePay TopUp便可以，增值最少USD 1，要齊頭，卡不可以扣至負數。

4.     從三藩市機場來往市區可以乘捷運BART (Bay Area Rapid Transit)，單程約USD 11.5，有4個人的話乘Uber比較划算。

5.     三藩市和西雅圖的公共交通系統連接了Google Map，用Google Map便可以找到適當的交通工具，價錢和時間也可以找到，十分方便。

6.     Alaska Airlines由三藩市飛到西雅圖，單程每位HK$789包括大行李，飛行時間2hr15min。

7.     西雅圖的公共交通卡叫ORCA Card，沒有三藩市和洛杉磯的交通卡那麼方便，每張要收USD 3出卡。因為只停留2日，所以沒有買ORCA Card，逐程車俾現金或信用卡。

8.     在美國餐廳或商店消費要額外再附政府稅項(每地方也不同，一般收6～12%左右)和服務費(15~25%左右)，有關費用不會顯示在價錢牌上，要到最後附款時才會知道實際數目。一般情況下，把見到的價錢再加30%便是你最後需附的費用。

9.     文中列出的價錢已經包括所有稅項和服務費。

10.    西雅圖治安較差的區域包括市中心3rd Ave(尤其在Pine和Pike之間)、Chinatown以東，以及Pioneer Square的2nd和3rd Ave，這些地方的流浪漢和吸毒者較多，AI不建議前往。我在其中一區實地視察過環境，係堅的，勁多流浪漢。

11.    來了美國才幾日，覺得不論食和住的性價比也是全世界最低，駛錢駛得勁唔爽，買個普通麵包都要香港5倍價錢，買碗忌廉湯貴過北歐30%，普通三流酒店的房價在日本已經可以住溫泉旅館包埋晚餐。

 

 

 

---待續---