美國西岸 自駕 • 郵輪(08) – 阿拉斯加郵輪旅程

皇家公主號(Royal Princess Cruise) ~ 阿拉斯加郵輪旅程

今次參加的皇家公主號(Royal Princess Cruise)阿拉斯加郵輪行程共8日7夜，以西雅圖為起點和終點，主要前往阿拉斯加冰河灣國家公園(Glacier Bay National Park)和三個小鎭包括 朱諾(Juneau)、史凱威(Skagway)和凱奇坎(Ketchikan)，沿着阿拉斯加內海航行，航程相對平穩，沿途不少機會見到鯨魚海獺等野生動物和冰川，非常適合作為第一次玩阿拉斯加郵輪選擇。

第1天：10:00-14:00西雅圖登船，15:00啟航，全日在船上吃渴玩樂。

第2天：全日海上航行，沿途欣賞內灣景色，可參加船上免費活動。

第3天：中午到達 朱諾(Juneau)，13:00-21:15停泊在港口。自己乘座公共巴士(每程USD 2)前往Mendenhall Glacier遊覧，之後回到小鎮行街，可以食阿拉斯加皇帝蟹和到古老酒館Red Dog Saloon飲啤酒。

第4天：早上到達 史凱威(Skagway)，06:00 - 20:30停泊在港口。早上在小鎮行街和參觀外圍景點，去古老酒館Red Onion Saloon飲啤酒。下午參加郵輪安排的White Pass & Yukon Route Railway ~ 2.5小時火車旅程(White Pass Summit Excursion)，從Skagway出發往加拿大邊境兜一個圈。

第5天：郵輪早上06:30 - 14:30進入了 冰河灣國家公園(Glacier Bay National Park)，會經過三條冰川包括Margerie Glacier、Reid Glacier和Lamplugh Glacier，在每條冰川停留30～60min，有機會看到冰河崩裂景象。

第6天：早上到 凱奇坎(Ketchikan)，07:00-13:15停泊在港口。落船後自己在岸上報名參加2hr的黑熊捕獵野生三文魚導賞團(Black Bear Express)，然後在鎮內參觀Creek Street和Salmon Ladder Observation Platform，觀看三文魚逆流而上的景象。

第7天：全日海上航行，沿途欣賞內灣景色，可參加船上免費活動。晚上21:00 - 23:59停泊加拿大溫哥華島最大城市Victoria，落船自己參觀附近的景點Fisherman’s Wharf。

第8天：早上回到西雅圖，食完早餐之後，08:30前下船。

美國西岸 自駕 • 郵輪 – Day 07

行程：西雅圖(天陰)→阿拉斯加郵輪海上航行(陰晴不定間中有雨)

繼續上一篇Day 07行程。

<<皇家公主號郵輪>>

12:00攞完房放下所有行李之後，可以輕輕鬆鬆食午餐了，首先上船頂嘆吓先。

SeaView Bar (16/F) – 趁人少少叫幾杯嘢飲先，買了任飲Package真係唔好客氣，見到個個老外都一杯接一杯啤酒當水飲。如果唔買Package，逐杯計都幾貴。

Alaskan White(左)(USD 10) – 來自阿拉斯加的小麥啤酒，擁有柔軟微甜的麥芽氣息和略帶辛香，氣泡豐富；Moonshine Latte(中)(USD 17) – 特色雞尾酒，由可可、蜂蜜、濃縮咖啡和兩款酒包括 肉桂風味烈酒Anchorage Distillery Cinnamon和百利甜酒Baileys Irish Cream混合裂成；Piña Colada(右)(USD 15) – 呢款細個成日飲，起源於 波多黎各的熱帶雞尾酒，帶有濃郁椰子和菠蘿香氣的Rum酒。

Trident Grill (16/F) – 今朝未食過嘢勁肚餓，先在附近叫少少Pizza和漢堡包食。

公主經典漢堡(Princess Classic) – 好好食喎，用料新鮮味美，薯條都炸得又粗又香脆，完全沒有渣流灘；Pizza Pepperoni和Pizza Vegetarian – 兩款Pizza都好食，餅底香脆有質感，用心製作。

只係餐前小食已經覺得好好食，死啦…仲有正餐，今次實變蒙嘉慧。

Allegro Dining Room (6/F) – 食完Pizza和漢堡包，立即又去餐廳食正經午餐。這𥚃的Menu全部任叫任食的，不過美國唔興浪費食物架，食唔晒就唔好叫。

Avocado and Bay Shrimp – 牛油果細蝦沙律的味道唔錯；Mixed Greens with Cucumber – 雜菜沙律就一般，不過始終食蔬菜有益啲啦。

香草烤牛柳(Grilled Herb-Spiced Beef Tenderloin) – 幾有牛肉味又幾夠腍唔失禮啊，可以話好食。

烤三文魚(Broiled Salmon with Lemon and Dill Sauce) – 三文魚很脆嫩肥美，比平時在香港超級市場買的好食。

反烤蘋果塔(Apple Tart Tatin) – 先把蘋果和糖、牛油煮到焦糖化，再蓋上酥皮烤熟，出爐後整個倒轉上碟的經典法式家常甜品，好食；凍乳酪木瓜Gelato – 有木瓜香欠了點幼滑，有點兒太甜，整體味道OK的。船上的雪糕一般也不算高質，屬於唔吸引類別。

食完午餐之後，趁未開船快快去游水和按摩池，因為開船之後便會很大風和冷，應該不能再游水。

好奇怪完全冇人用按摩池，可以自己浸完一個池又一個池，像發夢一樣，按摩池的水温夠暖，爽～

泳池又係冇人用，個個只在酒吧飲嘢和甲板散步，我包起了泳池，不過池水真係幾凍，剛浸完暖水按摩池才可以捱耐些。

游吓水又浸吓按摩池，再叫兩杯慢慢嘆，郵輪的生活實在太頹廢。

Alaskan Amber (USD 10) – 阿拉斯加生產的豐富麥芽風味啤酒，1988年獲選全美最佳啤酒。濃郁香醇帶麥芽和堅果香氣，很有風格的啤酒；Spank Mint (USD 17) –  以Sláinte愛爾蘭威士忌、青檸、薄荷和薑汁啤酒調製，比較清新醒神。

上船之前買了Princess Plus Packages，除了每日有15杯免費飲品任飲，還有每日2份Premium Dessert。Premium Dessert在5/F的甜品店「Gelato」供應，可以選擇店內的所有甜品。游完水之後去食甜品。

The Leaning Tower(右)(USD 21) – 很吸引的雪糕新地，有Tiramisu和香草雪糕，再加上焦糖醬和朱古力醬，伴上杏仁餅乾同吃，第一次食時覺得OK，再食便覺得太甜和太Heavy，免費都唔敢一日食兩杯；The Lake Como(右)(USD 21) – 是芝士蛋糕加香草雪糕，伴上草莓醬、朱古力醬和棉花糖，味道其實兩杯差唔多。

15:00開船了，回到房間享受一下。

在自助餐廳攞了些水果回房間食，再叫多兩杯Room Service，落Order之後一般會20min內送到，算幾有效率。

24K Gold Rita Pantalones Blanco (左)(USD 17) – 以Tequila和兩款橙酒，再加檸檬和青檸汁調製，帶有金色奢華風格與清新酸澀口感，酒精度較濃；French 75 (右)(USD 15) – 經典的氣泡雞尾酒，主要以軒尼詩VSOP干邑及氣泡酒，混合檸檬汁和糖漿而成，口感清新酸甜帶泡泡。

在露台一邊飲酒一邊食水果，時間過得飛咁快，好快便日落了。

Concerto (6/F) – 晚飯在這餐廳食，看餐牌已經覺得很豐富。點菜之前首先叫些餐酒。

Aqui Red Blend (左)(USD 16) – 產自阿根庭最大酒區 門多薩(Mendoza)，酒體中等偏飽滿展現紫色光澤，帶有草莓和胡椒香氣；Love by Britto Villa Sandi Prosecco (USD 15) – 帶清新果香和微甜平衡的意大利Sparkling Wine。

Princess Shrimp Cocktail (左上) – Princess Cruises主餐廳的經典開胃菜，以熟蝦仁搭配千島醬，蝦肉的肉質唔錯，很醒胃的前菜，下餐可以再叫；法式洋蔥湯(右上) – 湯底充滿洋蔥的濃香，頂部蓋上融化了的瑞士Gruyère芝士和烤法國麵包脆片，好好味的餐湯，可以再叫；House-Made Gravlax of Wild Alaska Salmon(左下) – 是主廚自製的阿拉斯加野生三文魚醃製菜餚，魚肉新鮮肥美，經醃製後更美味，又係可以再叫的菜式；鮮果碟 – 份量太細唔夠喉，一陣去自助餐廳再食。

烤西冷牛扒(Grilled New York Strip Steak) – 選了Medium Rare，外脆內嫩油花適中，牛味比預期香濃，估唔到免費晚餐也有這種水準的牛扒，絕對可以稱得上好食。薯條也高水準，不會令人失望。

香煎阿拉斯加鱈魚(Pan-Fried Alaska Cod) – 外層酥脆內裡爽嫩，很有鱈魚的魚香，好食。

牛奶榛子朱古力疏乎厘(Milky Chocolate-Hazelnut Soufflé) – 香甜美味好好食；Traditional New York Cheesecake – 味道很傳統的紐約芝士蛋糕，口感綿密滑順，帶有微酸的奶油風味，層次清新，好味。

晚餐比預期好食，沒有揀錯公主號郵輪。

夜晚依然沒有人游水，好浪費啊～

在船上搖下搖下像瞓在搖籃一樣，好舒服。

美國西岸 自駕 • 郵輪 – Day 08

行程：阿拉斯加郵輪海上航行(陰晴不定間中有雨)

今朝晨早06:00又起身食早餐。今次試吓16/F的自助餐廳Horizon Bistro。

Horizon Bistro (16/F) – 早到有窗口位，環境好到冇得彈。

自助餐非常之豐富，而且食物的賣相全部都吸引，連麵包和甜點也靚到想全部食晒佢，水果十分新鮮，今次想唔肥都難。

味道都真係好好，食物完全唔比主餐廳差，有誠意。

食完早餐去Fitness Center (17/F)上一堂愉伽班，Princess Plus Packages包了2堂。

阿Sir啲動作都唔易做，好鬼難跟，剩返一堂送俾佢啦。

The Plaza (5/F) – 早上有百人健身操，肥C9們個個跟着教練揗吓揗吓，跳到滿身大汗相當健康。

百人健身操之後，同一地方有雞尾酒會，不過要收費的，雖然只是USD 20左右，但食物沒什麼特別，只是把自助餐廳的食物搬下來，參加的人唔多。

Vines Wine Bar (5/F) – 見有窗口位，入去這酒吧坐一陣間，叫幾杯特飲嘆吓先。期間小太熊見到有鯨魚噴水。

在隔離的International Café要了一件 沙翁，好有蛋香好食啊，船上的麵包都很高質。加兩杯Green Smoothie 清一清腸胃。

Salted Caramel Swirl (左)(USD 6) – 比較甜的特色咖啡，咖啡味唔夠，船上的咖啡水準都不高；Key West Coller (中)(USD 10) – 口味偏水果系的雞尾酒，以Vodka、椰子冧酒Malibu、熱情果、西瓜、紅莓汁和雪碧調製，清新醒神；24K Margarita (USD 17) – 以Tequila和兩款橙酒，再加檸檬和青檸汁調製，帶有清新酸澀口感，外觀金光閃閃來自食用金粉，杯邊灑以沙糖和金粉混合做裝飾，加添味道層次。

又到午餐時間，Princess Plus Packages包了2餐Casual Dining，今餐試吓其中一間餐廳Ocean Terrace Seafood Bar。

Ocean Terrace Seafood Bar (7/F) – 位於The Plaza上高，船的中間位置，唯一供應日式料理的餐廳。

餐牌比較簡單，只有一款日式午餐，每位USD 19，要自己另外叫杯飲品，買了Princess Plus Packages就全包。

日式午餐(USD 19) – 三款前菜是 枝豆、海藻沙律和漬物，12件壽司包括三文魚壽司2件、吞拿魚壽司1件、熟蝦壽司1件和炙烤芝士鰻魚卷8件，全部都係「爭鮮」的水準，連元氣都好佢多多；Riesling (USD 15) – 加州白酒 ; Prosecco (USD 15) – 意大利玫瑰汽酒。

Retreat Pool (17/F) – 今日天氣很差，整日毛毛細雨，戶外按摩池仍然冇人，浸在暖水內又唔覺得冷。不過我一路浸一路有行過的老外問我凍唔凍，原來佢哋以為係冷水池。

浸完又去食下午茶，真係有點兒過份。Main Dinning Room會不定期供應英式下午茶，要早一日才知道，今日在「Allegro」供應，去試吓。

Allegro (6/F) – 下午茶 15:00開始，職員會拿着不同款式的包點蛋糕三文治問客人想要乜嘢，其實食物的選擇比自助餐廳更加少，這些下午茶不會再來了。

每人一杯奶茶加幾件麵包糕點，其實都幾好食，只係自助餐廳更加好食和好環境。

回房間享受一下休閒，返去之前先去自助餐廳攞些水果和蛋糕，再去「Gelato」要兩份Premium Desserts。

開心果雪糕伴Chocolate Brownie (左)(USD 5) – 價錢最平的Premium Desserts，貪佢冇咁多Cream冇咁肥，不過開心果雪糕冇乜開心果味只有甜味，Chocolate Brownie就正常好食；The Da Vinci (USD 21) – 香草雪糕作主打，加上OREO餅乾、朱古力薄脆和朱古力拖肥糖，卡路里高到爆標，免費都唔可以再食了，命都冇；墨西哥啤酒Corona (USD 10)

The Plaza (5/F) – 18:00開始船長主持的Welcome Party，所有高層人員全部亮相，最後是玩香檳山，有興趣可以逐個上台倒酒和影相。因為太花時間，冇等到最後派香檳便去食晚餐了。

Allegro (6/F) – 又係這Main Dining Room，今次坐近窗口。

餐牌每日也有些不同，唔覺得悶。

Morpho Helena (USD 14) – 智利Merlot釀造的平價紅酒，簡單易飲；Gran Araucaria Reserva Rosé (USD 15) – 智利Syrah釀造的桃紅酒，風格優雅果香清新，酸度均衡。

阿拉斯加蟹餅(Alaska Crab Cake)(右上) – 以蟹肉混上蛋黃醬、芥末醬、檸檬皮、西芹和芫荽等等，用麵包糠炸至金黃，食落鬆脆味道唔錯；麵包籃 – 麵包都是新鮮焗製好好食，通常會問你要幾多個，郵輪上雖然是不停食，但也習慣不浪費食物；生牛肉甜菜根韃靼(Steak and Beet Tartare) – 結合了生牛肉的肉香和甜菜根的土根香氣，味道層次豐富，有驚喜，和桃紅酒的風格很配合；Crab & Corn Chowder – 味道唔錯的蟹肉粟米周打湯。

Seared Wild Alaska Salmon with Cold Water Shrimp – 三文魚腩非常之肥美好食，今日超水準。

廚師經典橘香烤鴨(Chef’s Classic Duck à l’Orange) – 鴨肉嫩口有肉味，今日的主菜都很有水準。

法國焦糖布甸(French Vanilla Bean Crème Brulée)配 朱古力咖啡(Café Mocha)(右) – 布甸濃甜焦脆奶味濃郁，極高水準，咖啡就得個甜字冇咖啡味；Chocolate Pistachio Dome配葡萄牙砵酒(右) – 唔覺有開心果味，不過當係朱古力蛋糕也算好食，配砵酒的濃甜酒味好正。

回去房間嘆海風，今晚的月亮特別圓。

Princess Theater – 21:30去劇院看一場音樂劇，咁樣又一日了，宵夜真係食唔落。

因為cruise.com和郵輪的回贈要上船之後才可以用，所以上船之後才報名參加White Pass & Yukon Route Railway火車團，要排Waiting List，剛剛Confirm成功了，2.5 小時旅程每位原本USD 160，現在每人減了USD 100回贈，即係最後每位USD 60。

 

補充資料 :

1.     持有HKSAR護照進入美國必須簽證，最長每次可以停留約180日。

2.     在BOC換現金 USD 1=HK$7.88。美國很流行信用卡，今次行程99%是俾信用卡，滙率大約 USD 1 = HK$7.96。

3.     文中列出的價錢已經包括所有稅項和服務費。

4.     原本打算直接在船公司網站買房，但因為官網不斷加價，最後決定幫襯網站cruise.com買房，8日7晚Royal Princess Alaska Cruise的Mini-Suite with Balcony每位USD 1987，另加USD 420買Princess Plus Packages。每間客艙可享USD 150船上消費額度，cruise.com再每房回贈USD 50船上消費。我們用了來買岸上火車團。

5.     Princess Plus Packages包括每日15杯飲品(可選酒精類和樽裝水)，每杯飲品在未計算8%稅和18%服務費之前不可超過USD 15；免費兩堂瑜伽班；免費2餐Casual Dining；免費Wi-fi；每日2份Premium Dessert和每日USD 18的強製小費。

6.     海上完全不覺得有大風浪，船身的搖晃程度沒有預期的劇烈，帶去的暈浪丸也不需要吃。

7.     起航之後沒有預計的大風和冰冷，仍然可以用戶外的凍水泳池。

8.     曾經傳聞在郵輪食晚餐要穿Formal Dressing，郵輪亦建議了乘客有幾晚在餐廳要Formal Dressing，所以帶了西裝和皮鞋。點知，原來現在連美國人也不守這規則了，入餐廳的人90%也穿得勁普通，少部分衰到 T裇短褲都有，反而穿上Formal Dressing的感覺很On9，所以只穿了一次就冇再穿了，白白浪費了行李的空間。

9.     上船之後預訂了高級收費餐廳Crown Grill，打算如果火車團冇位，便把每房USD 200的回贈用在Crown Grill。現在火車團有位，便立即取消Crown Grill訂位，那知被扣了每人USD 10 Cancellation Fee。

 

 

 

---待續---

「美國西岸 自駕 • 郵輪」31天路線和行程重點(詳細行程可點擊到相關文章)

日數	行程路線	日程重點
Day 01	香港→台北	早上乘長榮航空去 台灣桃園機場，在台北玩一日，住 天雲旅棧台北開封分館。
Day 02	台北→三藩市	早上乘 長榮航空去美國 三藩市，今日在市內行街，包括唐人街、Union Square、Ferry Building和Salesforce Park等等，下午回酒店早點休息，適應時差。住Union Square區Kensington Park Hotel。
Day 03	三藩市	早上買One Day Visitor Passport，全日任坐市內的古董交通工具Cable Car和Historic Streetcars，遊覽Lombard Street、漁人碼頭、Coit Tower、The Painted Ladies，晚上在三藩市最難訂位的House of Prime Rib食美國牛扒。住Kensington Park Hotel。
Day 04	三藩市	遊覽金門大橋和藝術宮(Palace of Fine Arts)，在美式快餐店Shake Shack食晚餐。住Kensington Park Hotel。
Day 05	三藩市→西雅圖	上午乘Alaska Airlines由三藩市飛往西雅圖，在巿內的Coast Seattle Downtown Hotel by APA住2晚。
Day 06	西雅圖	西雅圖步行之旅，遊覽市內景點包括Pike Place Market、星巴克創始店、The Gum Wall ； The Seattle Great Wheel、Starbucks Reserve Roastery、Space Needle等等。下午在Taylor Shellfish Oyster Bar食海鮮餐。
Day 07	西雅圖→阿拉斯加郵輪8日旅程 第1日	開始阿拉斯加郵輪8日旅程，乘坐Royal Princess Cruise，上午10:00上船；下午15:00起航。
Day 08	阿拉斯加郵輪8日旅程 第2日	全日海上旅程，在船上嘆世界。
Day 09	阿拉斯加郵輪8日旅程 第3日	中午13:00到達阿拉斯加的小鎭Juneau，停留約8hr，落船自由行，乘USD 2當地巴士遊覧冰川Mendenhall Glacier，再在小鎭逛街，21:15再次起航。
Day 10	阿拉斯加郵輪8日旅程 第4日	晨早06:00到達阿拉斯加的小鎭Skagway，停留約14hr，早上自由行，在小鎭行街飲酒；下午經郵輪公司參加White Pass & Yukon Route火車遊，20:30再次起航。
Day 11	阿拉斯加郵輪8日旅程 第5日	早上郵輪進入Glacier Bay National Park範圍，09:30到達冰川Margerie Glacier，停留約60min，再駛往冰川Lamplugh Glacier，停留約30min，然後全日繼續海上旅程。
Day 12	阿拉斯加郵輪8日旅程 第6日	早上07:00 到達阿拉斯加的小鎭Ketchikan，停留約6hr，落船後首先在碼頭報名參加一個 2hr的觀賞野生黑熊捕食野生三文魚的旅行團，然後在小鎭行街，13:15再次起航。
Day 13	阿拉斯加郵輪8日旅程 第7日	全日海上旅程，晚上21:00到達加拿大溫哥華島的大鎮Victoria，停留3hr，自己落船行街。
Day 14	阿拉斯加郵輪8日旅程 第8日→西雅圖→Leavenworth	早上07:00回到西雅圖，08:30落船後立即乘巴士回市中心的租車公司Alamo，攞車開始11天美國自駕遊。10:30出發，首先駕車往德國小鎮Leavenworth住一晚。下午在小鎮行街，食德國香腸飲德國啤酒，晚上住LOGE Leavenworth。全日駕車210km。
Day 15	Leavenworth→Missoula	駕車往小鎮Missoula，晚上住Super 8 by Wyndham Missoula/Reserve St.。全日駕車630km。
Day 16	Missoula→黃石公園	駕車到達黃石公園，遊覧Mammoth Hot Spring和Lamar Valley，晚上住公園東口外的酒店Grizzly Lodge，連續住2晚。全日駕車550km。
Day 17	黃石公園	遊覧黃石公園景點，包括Lamar Valley、Grand Canyon of the Yellowstone、Mud Volcano、Tower Fall。全日駕車230km。
Day 18	黃石公園	遊覧黃石公園景點，包括Lamar Valley、Norris Geyser Basin ;   Old Faithful Geyser，黃昏入住黃石公園西面小鎮West Yellowstone的酒店Yellowstone Country Inn，連續住2晚。全日駕車260km。
Day 19	黃石公園	遊覧黃石公園景點，包括Grand Prismatic Spring、West Thumb Geyser Basin、Fountain Paint Pot和 Firehole Falls。全日駕車114km。
Day 20	黃石公園→鹽湖城	離開黃石公園，全日駕車603km去鹽湖城，住Springville-South Provo Area by IHG。
Day 21	鹽湖城→Page	駕車前住羚羊峽谷，途中遊覧景點Toadstool Hoodoos、Glen Canyon Dam和Horseshoe Bend，晚上住Super 8 By Wyndham Page/Lake Powell。全日駕車554km。
Day 22	Page→大峽谷南緣	早上09:00 – 10:00遊覧 下羚羊峽谷(Lower Antelope Canyon)；11:15 – 13:15遊覧 上羚羊峽谷(Upper Antelope Canyon)；駕車前往大峽谷南緣(Grand Canyon South Rim)看日落，晚上住大峽谷內酒店Bright Ange Lodge。全日駕車238km。
Day 23	大峽谷南緣→Kingman	全日遊覧大峽谷南緣；下午15:30駕車往Kingman，住Western Plus A Wayfarer's Inn and Suites。全日駕車272km。
Day 24	Kingman→拉斯維加斯	早上遊覧大峽谷西緣(Grand Canyon West Rim)，駕車去拉斯維加斯，沿途順便遊覽Hoover Dam。17:00前在拉斯維加斯機場還車；連續2晚住市內酒店The Venetian Resort。全日駕車324km。
Day 25	拉斯維加斯	全日遊覧拉斯維加斯，下午在Wynn Las Vegas食自助餐。
Day 26	拉斯維加斯→洛杉磯	早上在拉斯維加斯行街，下午15:30 - 20:05乘長途巴士往洛杉磯；連續3晚住 好萊塢星光大道Orange Drive Hostel。
Day 27	洛杉磯	全日遊覧 好萊塢環球影城(Universal Studios Hollywood)。
Day 28	洛杉磯	早上遊覧 環球影城；下午去唐人街、Grand Central Market等等市內景點。黃昏去Santa Monica，在Bubba Gump Shrimp Co.食晚飯。
Day 29	洛杉磯	早上遊覧 好萊塢星光大道，下午乘巴士往 迪士尼樂園。連續兩晚住園外的酒店Kings Inn Anaheim at The Park & Convention Center。
Day 30	洛杉磯	全日遊覧 迪士尼樂園Part 1；迪士尼樂園Part 2
Day 31 (完)	洛杉磯→加拿大Calgary	早上乘巴士和鐵路去洛杉磯機場，18:05 – 22:10乘西捷航空(Westjet)去加拿大Calgary。