日本 關西(完) – 天神泉源 有馬温泉

竹取亭円山4號私人金銀湯露天風呂

竹取亭円山 除了兩個公共溫泉浴場「帝の湯」和「妃の湯」提供金湯和銀湯外，還有7個私人金銀湯露天風呂。每間房的住客check-in時都可選擇一個私人露天風呂，免費預訂45min時間，想再加時或試多幾個私人露天風呂便要加錢了。

飄櫻幻景•温泉醉鄉 日本關西 – Day 7(完)

<<有馬>>

今朝06:30就醒咗，點知唔見了隻小太熊。唔通佢夢遊响間大房走失咗？？呀！佢梗係又走咗去浸金湯，要盡最大努力嘆盡間房啦，瞓著覺實在太浪費了。果然，小大熊啱啱浸完行返出來了，輪到我浸lur。

晨早浸金湯，人都零舍夾。

昨日check-in時book了今朝07:30 – 08:15一節4號私人金銀湯露天風呂，內裡有一個圓金湯池和一個圓銀湯池，小大熊覺得係7個私人露天風呂最靚的。

7個私人露天風呂位於天台連接山邊，穿過這條走廊便到。

竹取亭円山4號私人金銀湯露天風呂，只可嘆45min。

浸完温泉行返落大堂，見到蒸緊年糕呀。每朝08:30師傳都會响大堂做年糕架。

一到08:30年糕已蒸熟，師傅們立即起戰鼓，拿起木槌Pang Pang聲樁落舊年糕果度，樁到佢有咬口為止。

唔駛五分鍾就攪掂，師傅快手快脚把年糕上碟。

竹取亭円山 年糕 – 極有咬口，水準超强的年糕。每人可以分到三碟。

食完年糕都飽了一半，但都要正式食早餐了。今日我order了日式早餐，小太熊就要西式。

日式早餐 麵鼓湯 – 都幾好味

日式早餐 蛋卷加牛奶 – 牛奶又濃又甘香，蛋卷都好香蛋味。

日式早餐 六小碟 – 唔難食

日式早餐 煎三文魚 – 普通啦

日式早餐 魚生沙律 – 都係普通

日式早餐 豆腐雜菜鍋 – 夠健康

西式早餐 麵包 – 新鮮軟熟好味

西式早餐 粟米湯 – 好濃粟米味，有新鮮感。

西式早餐 火腿沙律 – 火腿唔錯，有吉之島買的巴馬火腿質素。

西式早餐 煙肉腸仔煎蛋 – 有太興啲水準架。

西式早餐 水果奶凍 – 最好食呢味，唔太甜又夠奶香。

西式早餐整體上好味過日式早餐。

食完早餐要執嘢走了。。。。真係唔捨得。

昨天冇正式行過 有馬，今日揹住行李(我一個揹晒，小太熊只係揹個背囊仔)，由酒店開始行返落火車站，沿途參觀吓這裡的名勝。

有馬温泉 炭酸泉源 – 我試了一口泉水，真係好重炭酸味架。

有馬温泉之 銀の湯 – 在酒店試過了，冇入去幫襯。

有馬温泉 極樂寺 – 呢度算幾靚架

有馬温泉 金の湯 – 過門而不入，再浸怕要甩皮了。

金の湯門口有免費足浴，永遠都人山人海。

正宗金の湯 – 我又試了一口泉水，真係好重鐵銹味架。

有馬温泉 玩具博物館 – 冇入場了，慳返少少。

有馬温泉 炭酸餅 – 味道唔錯架，不過冇買。

有馬温泉 天神泉源 – 昨晚來過了，日景靚啲。

有馬温泉 有馬川 – 太人工化了

慢慢行都用足個半鍾才行到火車站，走了。

乘11:40班車，直住 新開地。

<<神户>>

到新開地駅後，Lock好大行李，行足25min便到 蔡蘭推介，一間位置好很遠的炭燒神户牛店「三田牛飛苑」。呢間嘢自從比 蔡蘭推完之後，好多好似我一樣的港燦專程老遠來試，攪到老細寫了張中文餐牌，可惜同日文唔夾。

炭燒神户牛店 三田牛飛苑

日本熱清酒￥450

特上牛肋骨(一人前，約150g)(￥3500) – 價錢幾貴，但品質算上乘，牛肋骨上加了特選醬料，燒熟時更覺香口冶味。

牛舌薄切(￥1000) – 比想像中差好遠，唔夠香口，口感亦嘛嘛，唔試仲好。

三田牛西泠厚切100g(右邊一件)(￥3500)；特選三田牛簿切(左邊4件)(￥2500)

放在炭火上燒，比鐵板燒更香口。

三田牛西泠厚切 – 不屬最頂級神户牛，和昨日中午那件神户牛明顯有距離，2011年石垣島食的美崎牛西泠亦比呢件好，但呢件仍屬好嘢，只係响日本好多地方都有這質素，用老遠到來試。這些牛還是留返給蔡蘭吧，佢鐘意食。

特選三田牛簿切 – 和西冷差不多味，抵食好多。

<<大阪>>

食完飯又行25min返 新開地駅，乘阪急電鐵(特急)返大阪城，再賞吓櫻花。誰知只差三日，已見櫻花樹上長多很多綠葉和落了很多花，比三日前差好多了。

櫻花綠葉 大阪城

行程最後一擊，遊 黑門市場。

先買一盒兩包士多啤梨(￥1000)，清甜多汁，但始終比不上和歌山新鮮摘的貨式。

黑門市場「玄品」食全河豚宴

門口養了一大缸 河豚，這間店的外觀算係黑門市場最好的河豚店。

其實中午餐神户牛都未消化晒，於是2個人只點了份￥8700的一人全河豚宴8味。原來個餐的份量足夠2個人食到飽，件頭好大。8道菜包括：

1.)  白灼河豚皮

2.)  河豚刺身厚切

3.)  炸河豚拚盤

4.)  烤河豚肉

5.)  河豚壽司

6.)  河豚火鍋

7.)  河豚湯泡飯

8.)  雪糕

180ml純米大呤釀(￥780) + 白灼河豚皮 – 支酒幾純，河豚皮夠脆口，但冇乜味。。。

河豚刺身厚切 – 只食到鮮味和伴菜的味道，沒有魚味。

炸河豚拚盤 – 有些椒盬咸咸地，肉質幾有口感，幾好味。

烤河豚肉 – 依然淡口

河豚壽司 – 淡、淡、淡、好淡呀

河豚火鍋 – 河豚有頭腩、白子和膠原蛋白，都係好淡口，小太熊話唔好味唔肯食了。

河豚湯泡飯 – 用火鍋湯底再加蛋煮的泡飯，都係淡呀。

杏仁雪糕 – 全餐飯最美味

食到18:45，急急脚行去 難波駅，緊緊趕得切上19:00的南海電鐵去機場。

難波駅 南海電鐵

返到屋企零晨01:30了，瞓4個鍾又要返工，唔like呀。

補充資料 :

1.        乘神户電鐵有馬線，從有馬溫泉駅去 新開地，車費￥650，車程約40min。

2.        從新開地駅行去 三田牛飛苑約25min，新開地駅有Locker，收￥300。

3.        乘阪急電鐵(特急)由新開地駅 去大阪梅田駅，車費￥430，車程約35min。

4.        乘南海電鐵由難波駅去關西機場，車費￥1390，車程約30min。

-----飄櫻幻景•温泉醉鄉 日本關西(完)-----