法國 初夏(2) – 登上國泰頭等機倉 • 衝上雲宵II

法國巴黎 衝上雲宵II場景 – 情人鎖

自2007年的「感受 澳洲」和2011年的「寫意遊踪」之後，和小太熊一起儲了3年里數，再加多幾千蚊買里數，終於換到來回巴黎的頭等機位了。小太熊今次首次到法國，半年前開始佢已很努力地睇了好多資料，精心揀選多處地點編排了14天環遊法國行程，不論食、住和玩，都係非一般的旅程可以比較的。今次亦係第2次從香港乘頭等出發，所以真係登上國泰頭等機倉‧衝上雲宵II架。

一般人第一次去法國，例牌梗係鐵塔凱旋門啦，但小太熊就完全冇興趣，佢話要學Holiday去衝上雲宵喎，唯有帶佢行晒啲拍攝景點啦。

起飛前一日，我哋當然照舊要返工啦，假期少吖嘛。收工後返屋企休息一會，出發去機場。

頭等check-in的櫃位，空姐多過客。

唔駛等就攞到登機証，仲有頭等候機室嘅入場証。

一過完海關就見頭等候機室了，只招待頭等客，唔收商務人，環境只一般亦比想像中多人。

先到頭等候機室的餐廳食晚餐。

先來杯香檳，伙記送上今日的Menu，頭盆和水果沙律是自助的，湯和主菜要Order，最正係有Martell XO Cognac飲。

羅宋湯、煎魚和鴨胸都好普通，自助甜品就唔錯。

紅酒飲得出係靚嘢，唔係舊幾水的貨式。

食完飯入休息室浸了個浴，瞓了半個鐘。

準時23:35已開始登機，頭等和商務分2條隊上，每架機只有6個頭等位，感覺都幾良好架。

嘩！小太陽咁細隻就霸咁大個位，佢第三次坐呢個位了。

一上機就係香檳加小食，唔肥就難。

遲了40min起機，不過遲3hr都冇問題，反正嘆耐啲重好。

法國 初夏 – Day 1

00:35順刋起航了，約02:00左右開飯，空姐Carrie先送來麵包，幾好味架。

魚子醬配香檳(Caviar and Champagne) – 每人要了一盒(唔知有冇得食多盒呢?)，魚子醬是過千蚊的貨式，入口沒有脆卜卜爆開，而是慢慢溶化，咸度適中，香味獨特，好正，配上香檳是完美的配搭。

鮮菌湯(Mushroon Cream Soup) – 菌味香濃，湯濃度適中，口味不重，好飲。

橄欖鮮菜沙律(Mesclun Salad with pitted Kalamata olives) – 一般的菜沙律，唔覺好食，只吃了三分一。

主菜有 香港The Ritz-Carlton意大利餐廳Tosca的米芝蓮星級名廚Pino Lavarra設計的名菜 鱸魚配烤茴香及吞拿魚子(Centre cut Sea Bass “Acqua Pazza” style, baked fennel and bottarga) – 得個名，只係普通唔難食嘅煎魚柳一件。

意大利芝士餛飩(Pesto with cheese tortellini) – 好很難食，皮厚又硬，芝士唔cream又唔香，真係博比懵太投訴。

我成日諗，如果坐頭等時有合益泰豬腸粉和劉森記雲吞麵食，再加件金華蛋撻和廣成冰室紅荳冰，你話幾Perfect呢！！

諗吓諗吓，就咁就瞓諗着咗了。

瞓了6hr，好快又天光了。

機外天色好靚，難得完全見唔到機翼。

食完宵夜冇耐又食早餐，肥死了。

番石榴乳酪和新鮮水果 – 算高品質，醒胃好品。

中式點心(海鮮餃、燒賣、雞扎、牛肉和瑤柱素菜餃) 配香片茶 – 點心估唔到咁好味，有80分，茶就普通。

臨落機，空姐送來一張 機場快速專用通道卡，只巴黎機場有，香港呢條通道只比特權人士。

穿返鞋，要落機了。

<<Paris(巴黎)>>

航班07:35到達巴黎機場，等齊人攞埋行李出得機場攪吓攪吓，約08:30才步出機場。原本plan好打的去酒店，約€65車費，比坐地鐵每人約比多6歐，又快又服，費事團友攞住行李行到死死吓，點知坐了地鐵啦

我同小太熊當然冇問題啦。就係咁，先從機場乘RER到Gare de Nord，買了飛去入閘時，所有閘口都失靈，十幾人個個眼碌碌唔知點攪，突然見一位黑人從旁邊一處位置唔比飛直入月台，我即時跟上，跟住十幾人又跟住我，就係咁慳了張€10車票，回程時用返。

去到Gare de Nord後，行好遠至轉到Metro Line 4去Montparnasse Bienvenüe，再行好遠轉Metro Line 13去Malakoff Plateau de Vanves，中途上上落落行鑊甘，攪足個半鐘，10:30終於到站了。

巴黎Zone 2地鐵站 Malakoff Plateau de Vanves

從車站行3分鐘便到今日住的酒店Hôtel Patio Brancion了。

Hôtel Patio Brancion

雙人淨房每晚 €85，冇冷氣風扇，只有熱水。

放下行李，立即乘地鐵出發去第一個景點，位於Saint Germain des-Pres的百年老店“Les Deux Magots”，去到剛好11:00。

百年老店Les Deux Magots，價餞比一般咖啡店貴一倍以上仍然人山人海。

點解？飲食男女話， Les Deux Magots是巴黎的百年老店，美國著名小說家 Ernest Hemingway(海明威) 細個時曾旅居巴黎，他說巴黎是世界上他最喜歡的城市，而Les Deux Magots的咖啡就是他最愛的咖啡。看過這樣的評語，怎可以不來喝杯咖啡呢。

海明威係乜水？<The Old Man and Sea(老人與海)> 嘅作者囉。

Cappuccino(€7)、Croissant ou brioche(牛角酥)(€3) – 兩樣都很普通。

三文魚公司三文治(€23.3) – 貴到儍但好好味。

食完Bunch，沿路行去聖母院對岸的Shakespeare & Co.(莎士比亞書店)。莎士比亞書店有咩咁威？又係 海明威囉，海先生細個時窮到褲穿窿，連借書都冇銀用，就係呢間書店的老細，好心免費借啲書比海明威睇，令日後這書店為人熟識。唔止呀，佢仲係 衝上雲宵II嘅拍攝景點，唐亦風就係响呢度溝夏晨架，我梗要响呢度溝吓小太熊啦。

Shakespeare & Co.莎士比亞書店 大門前

莎士比亞書店 2/F

舊書滲出淡淡的紙香

莎士比亞書店 2/F，有點像圖書館。

下一站又係 衝上雲宵II嘅拍攝景點 – 塞納河伴舊書攤，學馬明買吓咸書。响呢度仲有好多童話故事書，但我就只識小王子. . . . .

塞納河伴舊書攤，找來找去都見唔到咸書，唔通法國佬戒咸？

路過 聖母院後門，條橋好多情人鎖啊！

小太熊今日Target了雪糕店Berthillon，好多人話佢係全世界最好味嘅雪糕喎，睇吓點？

雪糕店Berthillon 白朱古力雪糕(€3.6) – 味道係好，但極細球而且有些溶，通街都好過佢啦，唔值咁貴囉。

行過一個街口，試埋另一間人氣雪糕店Amorino。

雪糕店Amorino開心果雪糕(€3.6) – 味道極好，而且大大杯又夠凍，好過正話好多，食得過。

食完行返去 聖母院，太多人排隊了，所以冇入場。

繼續沿塞納河岸睇風景

行到 羅浮宮附近，突然有人拉開小太熊個背包的拉鍊，小太熊發覺後立即彈開再怒目望向後面，發現有三條廿靚歲的女揸住地圖扮晒遊客。後來我地回頭再跟住佢哋，發現佢哋一行十幾人在羅浮宮附近等臘物。

一行十幾人的扒手，就係中閒穿紫白色衫條女拉開小太熊背包的拉鍊。

今次只在 羅浮宮門前影張相就算

跟住行 Pont des Arts(藝術橋)

藝術橋又係 衝上雲宵II嘅拍攝景點泥架，當日Holiday就係响度留底佢同舊菜隻手鈪，仲錫咗隻鈪一啖添。

整條橋鎖滿了情人鎖。

我梗係自備了一把鎖啦，繼意大利五漁村後，又鎖住小太熊响巴黎了。

下一站，乘地鐵到始創Macaron的元祖餅店“ Laduree”朝聖。

嘩！人山人海排長龍，唔係小太熊鐘意我真係唔會排。

有人吹水話“Laduree”的玫瑰味Macaron，那種獨有的玫瑰甜是戀愛的味道，令一眾女生們趨之若鶩，今日終於可以一試戀愛的味道了。

買了8件Macaron(€15.2) – 玫瑰、咖啡、竹炭乎芒果味，我就覺得只有甜味唔好食，但小太熊就話好香杏仁味好正喎。

回程時在機場買了幾件玫瑰味比公司的女同事試，佢哋個個都話好好味勁鐘意食，看來呢味嘢只啱女生啊。

今天最後的景點 凱旋門

只在外圍行了個圈，冇上頂，行完都16:30，要去攞車了

在地鐵見到整隊樂團，勁阻人行但冇人投訴的，不像香港乜春都投訴。

租車公司SIXT位於Metro的Mairie de Montrouge站，距離酒店Hôtel Patio Brancion約2km。今次租車是團友甲負責的，佢e-mail比Agent租了架自動坡私家車連全保，唔駛墊底費，11天車租連全保共€946。攞車時，職員話免費upgrade了，比了架只落地2000km的BMW比我哋，都唔錯喎。

租車公司SIXT和今次租的BMW

職員簡單講解了一般運作，便發出單據，正式交架車比我們。因團友甲有廿幾年駕駛經驗，我又係認路天才，順理成章佢坐司機位，我坐隔離負責帶路。

Set好GPS去今晚食飯的餐廳La Regalade，出發。

一出大路，GPS説now turn left ，但條路唔轉得左架喎，唯有轉右。GPS繼續㸃紅㸃錄，成日响不可右轉的路口叫now turn right，轉極都係在兜圈，最後我唯有開了i-phone地圖，用衞星定位揾路，終於在18：35去到餐廳了，行路只需30min，但自駕就用了35min，死未。未算，到了餐廳，見街上泊滿車揾唔到車位，好彩啱啱有架車走，才有位泊車，否則都唔知㸃算，後來的旅程真係試過冇位泊車而要pass那景點。

巴黎人氣小店 La Regalade

飲食男女話，有傳La Regalade是全巴黎最難訂枱的餐廳，有傳她的菜式比米芝蓮餐廳好食，又有傳她的大廚曾是Hotel Ritz的名廚，整粒糖都要求多多，總之有讚冇彈。所以，小太熊揀了呢間小店，放棄了在巴黎鐵塔食晚餐。

 嘩！坐到像沙典魚，出入座位放水都要拉開張枱左借右借，但價錢其實好貴架。

先開支白酒(€21)，味道清香，最襯海鮮。

免費餐前麵包，香軟新鮮好食，配自家制的豬頭肉醬，非常香口。

我們㸃了三道菜晚餐，有湯、主食和甜品，每位€37，主食改煎魚又要加€9，加埋酒和樽裝水(€6)，埋單每人都要€48，咁嘅環境都算幾貴。

鵝肝醬鮮菌湯 – 好香味道好濃郁，上等貨式。

主菜 烤焗豬骨 – 豬肉味濃，燶燶哋很香口。

主菜 煎魚(要再加€9) – 好鮮味魚肉好脆嫩，西餐魚甚少咁好食。

甜品 原味疏乎厘 – 味道清甜，比一般疏乎厘更有質感，有驚喜。

食完餐飯都算滿意。

駕車回酒店，因GPS又老㸃，兜了去好遠，攪到我又要開i-phone自己塭路，行路30min的路程，駕車用足一個鐘才回到酒店。回到酒店後問題又來了，冇街位泊車，又兜了15min，最後在500m外才找到停車場，€12一日。

返回酒店沖埋涼都23：30了，明天要06：45早起。

補充資料 :

1.         國泰航空 香港來回巴黎頭等機位 每位HK$121133，或可用180000里再加HK$2833稅換取。

2.         €1兌HK$10.58 (滙豐換現金)，信用卡€1兌HK$10.8。

3.         巴黎CDG機場乘火車(RER)加地鐵(Metro)到市中心(Zone 1) 每程€9.75，車程約1hr15min，要在Gare de Nord轉Metro。如車票未用，14日後還有效。

4.         巴黎乘Metro可在售票機一次過買10張票Carnet(€13.7)，可遊走Zone 1和Zone 2。

5.         在法國租一架4人自動坡私家車連全保(唔駛墊底費)，11天(11 x 24hr計)車租連全保共€946。整個旅程駕駛了約3200km，公路費共€240，油費共€151，泊車共€53，即全部車費每人約HK$3800。

---待續---