法國 初夏(4) – 擁抱山居歲月 • 做個普羅旺斯人

法國第二大釀酒區 – Burgundy(布根地)的葡萄園

Burgundy(布根地)位於巴黎的東南部，是Bordeaux(波爾多)以外法國最大的釀酒區，從巴黎自駕到此約3hr，乘TGV到區內最大的城市是Dijon(第戎)亦非常方便。Burgundy最著名的酒區是Cȏte de Nuits，區內酒莊繁多，包括有Burgundy身價最高的酒莊Domaine Romanée Conti，如想進入酒莊參觀，必須預約或參加當地的試酒團，一般會在Dijon出發。

Burgundy(布根地)的風景如詩如畫，酒區以外亦有很多美麗小鎮、特色修道院和餐廳，昨天玩完小鎮Semur-en-Auxois和修道院Abbaye de la Bussière從，今天特別預留了3hr，自駕過覽Cȏte de Nuits區內的酒莊。

法國 初夏 – Day 3

昨晚瞓得好好，今朝08:00起身。由於酒店的早餐太貴，房價唔包，所以冇食。好彩昨天晚餐的麵包剩了好多，留在今朝做早餐。

和小太熊在這花園食隔夜麵包做早餐

食完麵包嘆多一陣，10:00又要離開趕路了。

<<Cȏte de Nuits, Burgundy(布根地)>>

終於起行，今日又比GPS老點行了條多彎又窄的山路，50min的車程又多了30min。

今日出車遲了15min，車程又慢了30min，原本已緊迫的行程又要cut了，只好驅車直往Cȏte de Nuits的葡萄園區Morey-St-Denis。

Cȏte de Nuits的葡萄園區小鎮Morey-St-Denis

小鎮Morey-St-Denis冇乜人，條街又靜又舒服。

沿路見到的酒莊都關上門不接待遊客的，只有鎮上數間有門市部的酒莊可比錢試酒，但冇得參觀酒桶。

這間Caveau des Musigny有酒試，€7試7款酒，入面試酒的地方都幾靚架，但冇幫襯呢檔。

Morey-St-Denis另一酒莊門市部，入內試酒。

又係冇客，冇乜試酒氣氛喎。

一場來到，我和團友乙試酒，€5可試5款布根地紅酒，價錢由每瓶€15至€45都有。

試呀試呀，我杯杯飲清，但5款都覺得嘛嘛，太酸又唔留香都唔好飲嘅。

試完酒，到附近的 葡萄園兜兜風，風景真係好靚。

由於13:00前一定要離開Cȏte de Nuits，趕在20:00前到達普羅旺斯民宿食住家飯，所以又要Skip景點，直往Burgundy最從一站 – Vosne-Romanee，尋找Burgundy身價最高的酒莊Domaine Romanée Conti。

Burgundy小鎮Vosne-Romanee，比剛才路過的更靜更靚。

找到酒莊Domaine Romanée Conti了，但不對外開放，只能望吓佢個葡萄園。

行返落鎮想再試酒，但全部門市都冇開門，可能今日星期六掛。

準時13:00離開Cȏte de Nuits，驅車直往法國南部Provence(普羅旺斯)小鎮Cruis，足足有450km，全程走公路。

中途停車入油加午餐

我和小太熊吃一份芝士火腿包(€5.2)，搶餞，凍冰冰但唔難食。

車子駛近Lyon時，GPS又玩嘢，原本應該好地地沿Route A6到達Lyon再駁Route A7，但GPS無啦啦跳Fuse，老點我從A6轉入A46，直飛15min後指示要駛離A46，來個大U-Turn又入返A46，行回頭路去返剛才轉入A46的位置轉返入A6至去Lyon，無啦啦冇咗半粒籦加油錢。

仲未夠，去到Lyon又唔直接轉入Route A7，要响市內兜幾個無謂圈至出指示上A7，直係比佢點到on dog dog。

離開Lyon進入南部，耐不耐就見到些雪山，好靚呀。

<<Cruis, Provence(普羅旺斯)>>

19:45終於準時到Cruis了，這小鎮真的很細小。

轉入這小路，便是今晚住的普羅旺斯民宿Vitaverde Le Clau了。

民宿Vitaverde Le Clau – 典型的普羅旺斯民居，內有一小泳池，環境好好架，住响呢度絕對可以體驗普羅旺斯的山居歲月，食埋佢夜晚餐住家飯，做個普羅旺斯人。

大屋附近有很多法國蝸牛架，唔知今晚有冇得食呢。

雙人房含早餐每晚€62，超抵住，晚上聽到水聲和蟲叫，氣温適宜。

屋後的大花園，今晚會在這花園吃一頓普羅旺斯的住家飯，做個普羅旺斯人。

晚飯時有十多名法國人，一起坐在這法國傳统的長枱食飯，非常熱鬧。

晚飯有4道菜包水和餐酒，每位只係€25，抵食呀。

餐酒有新鮮 紅酒和Rośe，好清香架。

頭盆 三文魚批 – 好味呀！我好籦意食。

主菜 雜菜薈羊肉 – 又多菜又多羊肉，好好味道。

餐後小食 芝士拚盆 – 正，一次過試晒所有芝士，好好食，伴埋Rośe更加冇得頂。

甜品 草莓奶凍 – 高水準之作，甜度適中，奶味香濃。

晚上積滿厚雲冇乜星星，明天展開法國南部薰衣草之旅。

補充資料 :

1.         今日駕車500km，用了€40入油，公路費€32.3。

2.         由Burgundy的酒區Cȏte de Nuits自駕到南部Provence(普羅旺斯)小鎮Cruis長450km，多行公路，限速130km/hr。

3.         要進入Burgundy的酒莊需預約，否則只能在門市部比錢試酒，一般€1試一款酒。

4.         如非熱愛駕車，絕對不建議自駕環遊法國，因為油費和公路費均超高，最後交通費即使有4人share亦平唔過公共交通，泊車超麻煩，GPS唔user friendly，準確度只有80%，飲了酒又不宜駕車，夜晚又不宜，加上人生路不熟，司機和帶路的人連風景都唔得閒睇，限制多多浪費遊玩時間。最佳安排係乘TGV到南部才出車自駕三兩Day。

5.         環遊法國自駕遊在行程編排上必須預留大量時間用作行小山路、休息、揾車位和泊車。

---待續---