小太陽: 自由南美海濶天空(03) – 國泰頭等機艙體驗

2025年1月5日

自由南美海濶天空(03) – 國泰頭等機艙體驗

國泰頭等機艙Signature Appetizer – 魚子醬King's Imperial Caviar

國泰頭等機艙設在Boeing 777-300ER型號的航機上，全機只有6個座位，相對大部分的航空公司，國泰頭等機艙的座位空間非常之寬敞，佔據超過9個經濟客位的空間，同時3人坐在一個頭等機位也不會感覺逼夾，適合二人一起用餐。座椅也能變成空中的柔軟大床，適合現世代喜歡躺平的乘客。頭等機艙的餐飲也是一大賣點，餐酒選用比較高級的香檳、紅白酒和啤酒，菜式也由米芝蓮級數的餐廳設計，包括中菜都爹利會館(Duddell's)、法國餐廳Louise和港式麥奀記雲吞麵。坐上頭等坐位，慢慢地享用2份正餐，再一邊品酒伴以小食地欣賞2套電影，感覺時間過得飛快。

自由南美 海濶天空 – Day 01

行程：香港(天晴)→紐約(天晴)→聖地牙哥(天晴)

繼續上一篇Day 01行程。

晨早在機場頭等候機室玉衡堂(The Pier, First)食完早餐，便登上Boeing 777-300ER航機，正式開始國泰頭等機艙體驗。今次乘09:05–13:15航機由香港飛往美國紐約的甘迺迪國際機場(John F Kennedy International)，飛行時間16hr10min。

08:45上機，坐上寬敞的1A座位，單是一邊位已經可以坐2個人。

另一邊可以坐多一位。

先來一杯Signature香檳。

庫克香檳(Krug Vintage, Champagne, France, 2004) – 有香檳王之稱，味道芬芳中帶苦澀，散發優雅的氣色，每支售價HK$2100；茉莉銀針茶 – 入口清香怡人，好飲。

小太熊唔飲酒，試了2款特飲。

Cathay Delight – 奇異果汁再加少量椰奶和新鮮薄荷葉，清甜有特色，是國泰的招牌特飲 ; 紅石榴汁 – 很真材實料的果汁，有益又好味。

飛機Delay了40min，09:45才起飛，冇所謂囉，遲多3個鐘仲好。

開始食早餐，唔知早餐有冇跌Watt呢，其實都冇乜期望會有驚喜。

鮮果拚盆很新鮮，和香檳王竟然也很匹配，一杯接一杯飲到返本；牛角包和多士焗熱了，配上果醬、蜜糖和牛油，簡單又好味。

希臘乳酪配野莓醬伴乾果穀麥片 – 繼續伴以香檳王，食完有點飽了，胃口細了很多。

點心精選 – 有雞扎、露筍餃、蝦餃和燒賣，比剛才在候機室吃的好味，入口感覺新鮮，但始終沒有從前頭等餐的高水準。

沙田雞粥 – 粥底綿密米粒夠粗，算是靚粥，加了少量雞絲、雞油和薄脆，好食。

西式早餐 – 有煎蛋、豬肉腸、炒杏鮑菇、焗車厘茄、香煎芝士大蔥脆餅和煙肉，質素平穩。

意式蔬菜蛋批伴煙三文魚雜菜沙律 – 又係質素平穩沒有驚喜的最後一道菜，今次伴以稀有法國香檳Rare Champagne，入口感覺有清新的檸檬、酸橙、香草和可可等味道，香氣餘韻悠長。呢支都唔平，每支要HK$1500。

食完早餐之後飽到嘔了，聽了一陣歌看了一套戲有點攰，開床換上睡衣來個午睡。

大床夠晒濶，床褥枕頭也很軟，夠享受。

瞓吓醒吓，完全估唔到時間，因為不停飛越不同時區，日照變得很長。

不知不覺瞓着咗，醒來時有點餓，可以開始嘆埋份午餐。

魚子醬King's Imperial Caviar 20g配香檳Krug Champagne 2004 – 是國泰頭等餐的招牌頭盆，唯一多年來也能保持水準的菜式，魚子醬來自俄羅斯的鱘龍魚，零售價約HK$560。

先飲一小啖香檳，再品嘗一口魚子醬，鱘龍魚子醬入口即化沒有三文魚子那種卜卜脆的口感，魚油味濃香氣四溢，混和了香檳王的芬芳苦澀味，更能提升魚油的美味程度，很Perfect。

另一種食法是魚子醬配薄餅、細香蔥、法式鮮奶油和碎雞蛋，味道是好的，但完全浪費了魚子醬，所以只試了一件之後，還是選擇淨食魚子醬。

食完魚子醬，我選了西餐，小太熊選了中餐，乜都試吓。因為都唔係太肚餓，所以只選了4道菜試吓味，伴上白酒紅酒和甜酒各一款。

椰香南瓜薑湯 – 幾有水準的西餐湯，南瓜味很濃，好飲。但飲完都未送上杯白酒，服務差勁。

煙紅椒鷹嘴豆蔬菜配乳酪醬 – 很難食的冷盆，菜很生硬，豆更生硬，只吃了少量便放棄，原本點菜時選配了烤大蝦，覆了一次一定有落單，但最後漏咗，又上漏杯白酒，相信是太多新人做嘢甩甩漏漏，新不如舊。

波爾多紅酒Château Montrose, St Estephe, Bordeaux 2011 – 終於記起要上紅酒了。這款酒比較厚身，入口帶有黑莓和鮮花的香味，餘韻濃鬱而帶點苦澀，層次豐富，每支售價約HK$1275。

接下來的主菜是香烤羊扒配番茄小麥飯，國泰話這主菜由米芝蓮一星餐廳，中環名牌法國餐廳Louise供應。Louise的大廚Royer在新加坡經營的餐廳曾經得到米芝蓮三星榮譽。睇國泰介紹的這羊扒吹到咁大，我都係冇乜期望，因為以前吃過6次國泰頭等餐，有4次都係嘛嘛，只有2次滿意。

香烤羊扒配番茄小麥飯 – 咁大舊羊架卻用細碟上枱，切開2件已經冇位放，準備這主菜的人一定有點病態，完全沒有考慮食客的感覺。唯有從外開始慢慢片些肉來吃，開始幾啖還算有羊肉味，和波爾多紅酒幾配襯，再片入多一層…….. 完全生到見血的，有冇攪L錯，比Medium Rare更生，當我係野人食生肉嗎，今次真係有點火，落order時明明話要Medium-Well的。

全隻羊架只片了最外的薄薄一層熟了的肉來吃，吃了應該唔夠10%。空姐收碟時問我係咪生果頭食唔到…一個X字差點衝口而出…算了，國泰都係冇L得救。

吃完失敗的主菜，還有甜品，先來一杯甜酒，是葡萄牙缽酒。

Warre's Otima Colheita Tawny Port, Portugal, 1995 – 入口醇厚濃鬱帶點黑朱古力和玫瑰的蜜糖濃甜香氣，好味，適合伴以甜品，零售價每支要HK$640，都唔平。

法式紅桑子開心果蛋糕 - 由餐廳Louise提供的甜品，質素唔錯，一定比羊架優勝十倍。

我的西餐唔係好掂，小太熊的中餐竟然也好流。

無花果鯪魚燉豬腱湯 – 正常的包裝湯，味道唔錯的。

香蘭青瓜凍鮑魚 – 由米芝蓮一星餐廳都爹利會館(Duddell's)主理供應，鮑魚淡淡的完全冇味，連青瓜也很淡，只是求L其把生青瓜切片便上碟，試完之後我曾懷疑自己是否失去了味覺，但飲啖酒又有味喎，所以應該係個廚師失去了味覺，完全唔知自己主理的食物味道。

砵酒燉牛頰肉；瑤柱雜菜燴琵琶豆腐；咸魚蓉菜飯 – 繼續由都爹利會館(Duddell's)主理供應的三道主食，完全得啖笑，用料下乘，牛頰肉淡而無味，只靠個汁底，好彩入口都算夠腍；咸魚蓉菜飯只得個名，咸魚少得可憐更加係下欄貨；連最普通的琵琶豆腐個汁底都整到杰撻撻，扣晒分，灣仔賣HK$35的兩餸飯一定好食過佢。

黑芝麻撻配豆腐雪糕 – 中餐的甜品由都爹利會館提供，味道唔錯，但豆腐雪糕連維記雪糕杯也不如。

時令鮮果 – 最正常穩定水準的菜式。

精美朱古力 – 軟心朱古力勁正，很夾缽酒的味道。

雖然呢餐飯很差勁，但都有好處的，就係以後食兩餸飯時也會想起比頭等餐更加好食。落機前問了空姐關於在美國轉機去智利的程序，第一個空姐唔識答，要問Senior；跟著過了一會兒另一位空姐識廣東話，話要先排隊入境，自己攞返大行李過海關，過完海關之後便立即見到一條處理過境行李的運輸帶，把大行李直接放下運輸帶送走便可以。

食完飯睇多套戲便要落機了，在頭等艙的16小時過得特別快，試完這史上最長的頭等旅程之後，覺得都夠了，等有新款頭等艙才考慮會否再坐。

航機12:45降落美國紐約甘迺迪國際機場(John F Kennedy International Airport) T8。很快13:05便行到去入境櫃位，排了差不多一個鐘，期間見到有位國泰職員帶了一些乘客走特快通道，心諗可能係趕轉機至可以咁，我哋有7hr轉機，應該冇咁著數的。終於排到了，被入境人員問了幾條無聊問題之後，14:00成功入境。

行到領取行李的地方，發現所有行李已經送到，並被職員放了在地下，慢慢逐件搜尋，但搵勻都唔見自己的兩件行李，開始有點淆底，唔通俾人偷咗？寄失咗？直接寄了去智利？搵多幾分鐘，突然見到剛才的國泰職員行過來，便問問她到底發生過什麼事？佢話因為見我哋咁耐都未入境，所以「應該」已經處理了我們的行李，又話剛才可以和她一起行特快通道。佢check完一輪，又行去行李房搵一輪，跟着便說「應該」已經替我們把行李送過了海關寄了去智利….. 大姐，乜咁唔肯定架，我巧京喎，去到智利見唔到行李點算，乜國泰依家咁Q亂架，有咁好的Service又唔出聲，搞到白白排隊一個鐘。

最後只有懷着擔心的心情由T8行去T4等轉機。

15:20到達T4的登機閘口，今次航機完全準時，入境過程也順利，從航機降落開始足足用了2hr35min才到登機閘口，因此在紐約轉機最少要預4hr，如果要預埋航機正常地delay，最少要6hr。

無無聊聊在機場行了一陣，開始有時差反應，便坐在凳上瞓吓。