浪遊摩洛哥(7) – 古城 菲斯(Fez)的味道

摩洛哥古城 菲斯(Fez) – 世界上最古老的皮革染廠

菲斯(Fez)是 摩洛哥第四大城市，擁有世界上最古老的皮革染廠，皮革製造業一直以最早期的方式運作。皮革染廠裡佈滿了圓形的石頭容器，裡面裝滿了白色化學液體和天然的彩色染料，用於軟化皮革及染色。今天，菲斯 的製革業是主要的旅遊景點，每個進入古城 菲斯的旅客，都是為了參觀這世界上唯一的皮革染廠，感受世上獨有的 臭味和人味。

浪遊摩洛哥‧細味西班牙 – Day 8

<<菲斯>>

早上在酒店天台食早餐，早餐有香蕉奶昔、雞蛋、麵包、蛋糕和奶茶。

食完早餐後，到菲斯古城外的長途巴士站買票明天早上去藍色山城Chefchaouen。然後在迷宮一樣的古城內逛街。

菲斯古城 - 今日係星期五阿啦日，大部份舖頭也關門，冇乜嘢睇。

向着皮革染廠方向行，開始感到有啲臭味之際，街上有人走過來話帶我參觀 皮革染廠，話每位收Dh 10。OK，都預咗比錢啦。跟佢入了間皮具店，上了天台，Oh!

原來距離染缸好遠，但見到工人在天台曬羊皮，都幾得意。

工人們把染了黃色的羊皮逐塊逐塊舖在屋頂曬太陽。

遠距離看七彩染缸都有好處的，就係冇咁臭。

之後又入了一間較近染缸的商店，又係Dh10一位。

睇完行出舖冇耐，又有人話帶我去近距離參觀染缸，又係每位Dh 10。這位人兄帶了我直接行入 染廠內，零距離好正啫。

近距離看見工人在染缸內開工，由於距離近，屎味很濃列。

這個染缸的屎味最濃列

原本我打算學啲工人在染缸上行吓，但最後都係唔敢，跌咗落去就大鑊了。

呢位亞哥怒啤着我，好似嫌我影相阻住做嘢好不滿。

很可愛的騾仔，幫手搬運染濕了的皮去曬太陽。

近距離在地面參觀完之後，又入了間皮革店從高一點的角度睇，收Dh 10。

這店舖的角度高一點，而且幾近染缸。

在其中一間皮革店遇上了高材生，見咁有緣於是一起行一會啦。

睇完染廠之後開始在古城內的窄街穿穿插插，看看當地民生。

接著沿着窄街不斷向高處行，去到一個露天市場。

穿過露天市場之後到達目的地 ～ 酒店Fez Sofitel。

Hotel Fez Sofitel – 在這裡可見到整個 菲斯古城。原本想試一試這裡的Hammam，但Full了。只可黃昏時在這裡飲嘢等日落。Lonely Planet 話要在這山上嘆下午茶。

古城 菲斯(Fez)全景

決定黃昏再來飲嘢睇日落，現在先去吃午飯，然後回酒店休息。

回到古城都好多人，很多商店都開始做生意了。

揀了一間餐廳，三個人一齊食午餐，可以試多啲野食。

在摩洛哥食飯，不論早午晚餐都必定有硬麵包。

羊肉雜菜Tajine – 味道一般，其實摩洛哥菜一般情況都不會特別好吃，但也沒有很難食。

燒雞伴薯條和炒飯 – 都係上面嗰碟好食啲，雞肉好鞋而且冇乜雞味，薯條唔鬆脆，黃姜飯亦有點硬。

Bastilla – 摩洛哥的傳統脆批，餡料分成數層包括羊肉、洋蔥、香料和雞蛋，頂層撒上糖粉、肉桂粉和碎杏仁，味道很特別和地道。

食完飯回酒店沖涼再休息一下，下午時酒店外的小巷冇咁恐怖，但點都估唔到呢度冇門牌的門就係酒店的大門。

休息1hr後又再出動，途經一間皮革店El Haj Ali Baba，位於最近染缸的2/F，在店舖的露台可近距離見到大染缸，今天進入的第四間舖。

El Haj Ali Baba老闆首先給我們一些薄荷葉，用來癖臭味的。

這間舖的位置和角度最好，但可惜中午的陽光已經照不到大染缸了，如果是早上來就好了。

老細好詳盡介紹了菲斯的皮革工業，包括工人們的人工(工作一個早上有USD 15)、染製皮革的程序、天然染料的成份(綠色係簿荷，紅色係玫塊，黃色係硫磺…)，白色缸就加了化學物質例如石灰，用來軟化皮革，因為有腐蝕性，工人要穿着全套保護衣物才可以落白色缸，反之彩色缸就不用保護。

吹了半粒鐘，臨走時我照舊比Dh 20佢(每人Dh 10)，但佢笑笑口話要收Dh 50……仲話自已成日睇Jacky Chan啲戲，乜乜物物.......我見佢都介紹了成半粒鐘，Dh 50都值得嘅，當係導遊費都要。

Casablanca啤酒(Dh 60) – 17:30又再去Hotel Fez Sofitel，今次嘆啤酒等日落。

古城 菲斯(Fez) ~ 一支啤由日落坐到天黑，抵到爛。

夜晚行一行夜街，感受古城 菲斯(Fez)的人味，估唔到夜晚的古城仲係好旺，連街市都未收檔。

Chez Rachid – 城門附近的露天餐廳，見到氣氛很好所以幫襯。

牛扒飯伴薯條(Dh 40) – 味道真係好一般。

奄列蛋飯薯條(Dh 40) – 味道都係一般，絕對唔係好食，但係又肯定唔係難食。

今晚早點瞓，明天晨早要離開菲斯了.................早到酒店早餐都食唔到。

 

 

--待續--