旅居英國 • 動態移民(46) – 英國之極北 安斯特島(Unst)

英國最北島嶼 安斯特島(Unst) ~ 維京船

安斯特島(Unst)位於蘇格蘭Shetland群島北部，是英國有人居住地的最北端，Shetland群島中僅次於Mainland和Yell的第三大島。Unst島內主要是草原，北部沿海有很多懸崖絕景，島上的常住居民少於1000人，最大的村莊是Baltasound，村內有英國最北的郵政局、民宿和酒店。小島擁有很多“英國最北端”的銜頭：位於Unst東北部的小村莊Skaw是英國最北端的定居點；Haroldswick是英國最北端教堂的所在地； Muckle Flugga 燈塔是英國最北端的燈塔，英國行山徑最北端盡頭位於島內的Hermaness National Nature Reserve。島上巴士班次疏落，而且天氣變幻無常經常刮起強風，沒有車在島上自由行比較困難。

旅居英國 • 動態移民 – Day 66

<<Unst>>

今日會全日出去玩，由於沒有揸車，要靠每日只有三、四班的巴士和自己對腳了。

早餐我煮，每人£2.2。

這份巴瑪火腿雙蛋加奶茶要£1.3。

餐肉出前一丁雞蓉麵(£0.9)

早上巴士開10:37，早餐後先在民宿附近行吓。

郵政局 – 佢唔係普通的郵政局，係英國最北的郵政局來的，大景點添架。

郵局賣很多精品和紀念品，似商店多過郵局。

今日打算乘10:37-10:54的 Bus No.28 從民宿外的巴士站 “Baltasound, opp Springpark Rd End”到“Saxa Vord, opp Nordabrake Rd End” ，然後步行10km左右到四圍遊覧。

巴士每日來回只有各一班車，回程在17:15，路程有7km，勉強可以行路。

早15min到站等車，但過了20min依然冇車，攪咩呀，今日冇車最多唔去玩，如果走果日那唯一一班巴士又係咁樣點算？？開始有點餚底。

在這冇站牌冇蓋的巴士站“Baltasound, opp Springpark Rd End”食住西北風等了35min，小太熊話這個根本不是站，佢話要去有蓋的站才會有車喎，我其實唔同意。

今日陽光普照，決定行多7km路去，然後碰碰運氣有冇巴士返。

Shetland Pony見我哋咁慘都好無奈，佢好乖呀，送我哋離開。

沿着A968公路不斷向北行，沿途都很多風景睇。

小羊在吃奶。

私人買下的倫敦雙層巴士。

Bobby’s Bus Shelter – 村莊Baltasound附近的一個巴士站，位於A968公路上，是Unst的大景點。車站的名字是為了紀念一位名叫Bobby Macaulay的同學，當地議會曾計劃在1996年拆除這巴士候車亭，但當時在7歲的Bobby同學給議會寫了一封信，要求取消計劃，並解釋說候車亭一向用作他上學時存放接駁單車往返巴士站和屋企的地方，議會最後接納他的建議保留這候車亭。現時當地居民每年都會為其佈置不同的主題。

今年的主題是士頭婆登基70周年慶。

繼續行都是荒蕪地帶，只見風力發電機和草仔。

Final Checkout Café – 英國北方最後一個油站，個個自駕都要入滿油才繼續向北行。

這裡也是咖啡室，覺得太凍便可以入去飲杯熱飲。

還有超級市場，價錢冇特別貴。

咖啡(£1.4)；奶茶(£1.4)；雲尼拿雪糕(£1.1) – 這款Local雪糕很香滑好味，價錢又夠平。

繼續沿A968行，如果有巴士就唔駛食住西北風行馬路啊。

路過一個牧場，很多不同款的小馬Shetland Pony走過來問我攞嘢食呀。

The Skidbladner – 這是一艘展出的維京船全尺寸彷製品，真正那艘維京古船在1880年挪威一個維京墳墓中發現。

Viking Longhouse – Unst是北大西洋維京人的第一個立足地，是世界上維京人居住遺址密度最高的地方。

繼續行進入Unst其中一條小村莊Haroldswick，這𥚃有3個景點。

Unst Boat Haven – 要比£4入場費的小型博物館，唔入了。

博物館外放了一隻咬住條魚的Puffin，小太熊話要我影張一樣的相喎，好，立即影。

Victoria’s Vintage Tea Rooms – 英國最北的茶室，一定要入去食啲嘢的，點知呢間店唔老實。

剛剛有張枱近窗口，好環境。

Capacinno (£2.6)；伯爵茶(£2.2)；Scones (每件£6.5) - Scones唔好食，咖啡茶亦冇特別。

這間舖很多食物包括Scones都冇標價錢，因為在英國食過很多次Scones也是£3左右，而英國餐廳的物價一向很接近，英國人亦很老實，故一向也沒有問價錢便叫，那知佢收咁貴非常唔老實，對這黑店很失望。這是唯一一次在英國餐廳食嘢有被搵笨的感覺。

村莊Haroldswick只有很少屋，全部疏疏落落。

Unst Heritage Centre – 又係£4入場，慳錢唔入了，離開Haroldswick繼續向前行。

行多1km去到坐巴士的目的地Saxa Vord，這小村莊以前有酒店，有租單車，有朱古力店，現在全部結業了。

Saxa Vord Distillery – 村莊唯一的景點，是Gin酒釀造廠，可以預約參加早上試酒團，現在已經散團冇得玩。陶傑在2星期之後也來了這裡試酒。

試酒團在這𥚃試飲，今早也有團啊，睇住職員還在執拾中。

要試飲只能夠買成支。

Saxa Vord Resort – 從前的大型度假村，包括自炊式房屋、旅館和餐廳，但已經變了死鎮。

繼續向北行去英國北方最後一間房屋，不過天氣越來越差，開始落毛毛雨和括強風，唯有見步行步。

經過村莊Norwick和英國最北的郵箱。

Norwick Cemetery

繼續前行又要上山，可以唔夠時間趕巴士回程了，又落雨，決定去埋前面的小屋便回頭。

黑面羊仔都叫我們不要再行了。

英國北方最後一個巴士站“Village”，在這鋰裡回頭返Saxa Vord Resort等巴士。

按照巴士站內的時間表，16:15有巴士No.28回到Final Checkout Café，現在還有90min，因為外面又風又雨又凍，只能在巴士站等，好彩有候車亭。打算如果冇車便要行7km返屋企。

遲了10min，等到16:25終於有部巴士停在巴士站，但唔似坐開的巴士，車頭又冇巴士號碼。

上車後司機問我們去邊，我便講出地址，他便叫我們上車，但冇收錢。

這班車按Schedule是在Final Checkout Café為總站的，但司機車到我們去民宿位置，可以行少2.3km。最後落車時司機也沒有收錢，我們只講了聲Thank You。究竟這部是不是28號巴士呢？我實在不能肯定。

回到民宿天色變返藍色，真係吹到啤一聲。

早點沖涼食飯，要認真諗諗明天的行程，如果又冇巴士點算。

油鹽水生菜(£0.46) – 雖然有些食到嫌，但一定好過炸魚薯條。

白汁青口(£2) – TESCO買的即食青口，味道唔錯的，抵食。

蜜糖焗雞髀(£1.6) – 英國的雪雞高質又平又有肉味，焗到少少脆好正。

咖哩鯖魚飯(£1.2) – 用TESCO牌的咖哩鯖魚，價錢最平但和貴一倍的其他牌子一樣味，好食的。

飯後又見滿天烏雲，只有耶蘇光。

今晚瞓得唔好，整晚擔心走那一天的巴士會唔會冇車，如果冇車點算。

 

補充資料 :

 

1.     £1兌HK$10.66 (HSBC網上兌換)

2.     英國電話卡Giffgaff可以網上預訂，出發前寄到屋企，再Download 官方Apps，到埗後可以立即開卡用。有1個月£10 (包15GB上網加超平打長途電話和Local call)的Plan十分抵用。

3.     在英國餐廳食飯不可以主動揮手叫職員過來，會被視為不禮貌，只能乖乖坐定定等職員主動上前才落Order，或者用眼睛望住佢哋，等佢哋注意到再自己行過嚟。之後在全英國食過很多餐廳，留意到又真係冇人主動揮手叫職員落Order的，真係佢唔講都唔知。

4.     在英國生活基本上可以完全唔帶現金，99%的消費也可以用信用卡或Applepay附款，包括所有交通工具、餐廳和超級市場。

5.     英國天氣變化極大，經常落雨，而且不時會括狂風，所以不方便用雨傘，最好全身衣物都要防水。

6.     Unst島內只有一部28號巴士於星期一至六行駛，星期日及公眾假期冇公共交通。28號巴士班次極疏落，每日只有一至兩班車，但配合步行勉強也可以到達島上的大景點，因客量更少很多時巴士也是空車往返。有些巴士只收現金，要帶備足夠零錢。

7.     Shetland有一款巴士儲值卡“Local Bus Service card”，乘巴士有8折優惠，張卡免費也不用按金，可以多人使用同一張卡，首次出卡必須買£10儲值。

 

---待續---