旅居英國 • 動態移民(50) – 蘇格蘭 鳥的天堂Sumburgh Head

蘇格蘭最北群島Shetland的燈塔 ~ Sumburgh Head Lighthouse

Sumburgh Head Lighthouse位於英國最北方群島 Shetland的最南端懸崖上，建於1821年，是Shetland最古老的燈塔。燈塔的四周均是鳥類保護區，在燈塔大樓內設有專屬辦公室負責管理該保護區。此外，燈塔內有一間環境超贊的咖啡店，值得一試。

旅居英國 • 動態移民 – Day 71

<<Lerwick>>

早上打電話看看Noss有沒有船，又係冇，因為冇車很難去其他景點，所以會再去Sumburgh Head看看有沒有Puffins。

08:00食早餐，又係同一款食物，好在環境舒適

今晚會換酒店，早餐先寄存行李，後再乘 6號巴士(£2.9)去Sumburgh Head。

Sumburgh Head Lighthouse – 今日天陰陰，風勢卻沒有昨天大，海鳥也比昨天多，最衰有微雨。

歐洲椋鳥(Common Starling)

有少少puffins，懸崖上大風加細雨影相影得好辛苦。

今日數量係少，但佢哋很活潑，表情多多。

有些Puffins不停飛來飛去。

呢隻最衰，做壞事痾屎落樓下。

呢隻野個咀好紅，一定又係想做壞事了。

呢隻Puffin仲得意，吹脹自己個身吹到肥嘟嘟，轉頭又放返氣瘦返，真趣怪。

睇了差不多2hr，總算近距離見到Puffins，但這𥚃有圍牆隔開，沒有在Unst那樣可以貼住佢哋玩得咁開心。又係凍到要走了，在Shetland實在很難長時間活動，除非有車可以上去暖暖個身。

乘6號巴士回到Lerwick(£2.9)，攞返行李行10min去民宿，今晚租了Airbnb民宿。

Airbnb民宿 1/F, 61A Burgh Road, Lerwick – 單位在Lerwick一幢民居的1/F，紅色門對上一層左右兩個窗便是我們間屋，會連續住2晚。

Airbnb民宿(每晚HK$807) – 距離碼頭只有900m，方便乘船回Aberdeen。大廳超大，火爐可以用的，屋主供應埋柴和炭精，很細心。

雙人睡房整潔舒適。

浴室也很大和乾淨。

廚房又係超大，又有大雪櫃，今晚可以買雪糕食了。

Check in後屋主立即去超級市場買了食物送給我們，有牛奶牛油咖啡茶和麵包。

剛才在TESCO買了餸，今晚小太熊煮飯。

頭盤(£2.2) – 有巴馬火腿、英國藍芝士、白汁蝦和茄汁蝦，全部都係超級市場即食貨，味道不過不失；白酒(£4.5)

煎三文魚腩(£2) – 甘香脆嫩味美，伴上西蘭花冇咁滯。

大蝦蘑菇蕃茄意粉(£1.45) – 呢碟我炒的，當然好食啦，唔知點解小太熊死都唔肯炒意粉。

TESCO蘋果批¼個(£0.3) – 又平又好食，我哋成日幫襯TESCO的，只有佢的蘋果批咁平。

麥提莎雪糕 1 Liter(£2.75) – 中伏，估唔到唔好食的，朱古力太細粒唔鬆化還有點硬，雪糕太甜奶香味不足，早知食返蘇格蘭雪糕。

今餐每人£8.9，很豐富。

旅居英國 • 動態移民 – Day 72

今日早餐我煮，每人£3很豐富

巴瑪火腿煎雙蛋(£0.7)，多士奶茶是屋主送的。

鯖魚辛辣麵 (£1.8)

¼蘋果批+麥提莎雪糕+白酒 (£1)

早上打電話問問Noss今日有冇船，又係因為大風所以冇船，日日都係咁。冇地方好去，唯有再去Sumburgh Head，希望有鯨魚啦。

上6號巴士買票時，司機問我哋是否來回，是的話介紹我哋買一張儲值票Local Bus Service Card，£10出卡，不用按金，可以多人使用同一張卡，車費有8折，今次二人車費原本£5.8，現在只扣£4.64。司機真係好人，如果第一程巴士就用這卡就慳唔少了。

Shetland的儲值車票Local Bus Service Card

今日天色很藍，冇早2日咁大風。

Sumburgh Head Lighthouse

今日有點失望，只有2隻Puffins。

北極海鸚鵡(Atlantic Puffins)

暴風鸌(Fulmar)

野兔 – 原來格蘭很多野兔仔，之後的旅程也不斷見到。

吹了3hr西北風，沒有鯨魚，便乘6號巴士回民宿煮飯。

即食青口(£2)；西蘭花(£0.8)

焗羊扒(£2.4) – 肉味比較弱，唔係太好食，下次唔買。

番茄蘑菇意粉(£0.9) – 今次冇蝦，但我炒得依然好食。

晚餐每人£6.2。

旅居英國 • 動態移民 – Day 73

今日黃昏乘船離開Shetland回到Aberdeen，民宿屋主話可以Check out後把行李放在屋內，上船前自己上去攞返便可以。

早餐每人£0.9，包括出前一丁豬骨湯麵，巴瑪火腿煎蛋多士和奶茶。

退房之後屋主上去執屋，我哋就在Lerwick市內四圍行吓。

Shetland Museum & Archives – 免費入場的博物館，可以認識一下當地人的文化和生活。

No 88 Kitchen and Bar – 午餐食好西，是Lerwick最高分的海鮮餐廳，好Full架，最好訂定位。

可樂(£2) – 很奇怪這間餐廳冇酒賣，所以相信食物一定超贊。

叫了兩份Today Special Seafood，每份送薯條和沙律各一客。

蘇格蘭麵包蟹(£14.9) – 蟹肉很鮮甜，比平時食開的麵包蟹少膏，蟹膏甘香廚功好，抵食。

牛油焗龍蝦500g (£29) – 蝦肉又爽又鮮甜，好耐冇食過咁甜的龍蝦了，好好食，近年食的龍蝦大多數都很淡。

薯條和沙律都好食。

NorthLink – 下午15:30上船，17:30準時從Lerwick出發，預計明早07:00到達Aberdeen。天氣還是藍天加超強風，海面大浪。

Inside 2-berth cabin (雙人房£137) – 回程買到冇窗房，慳返幾十磅，不過派了間最差的起角船尾房。

Bressay Lighthouse – 經過Bressay的景點，唔揸車都幾難去到。

去船頭酒吧坐吓Hea吓食啲零食。

啤酒500ml (£4.25) – 船上飲啤比其他地方平足£1，抵飲。

客船很快駛了出大西洋，大浪到好似坐海盜船，海水一盤一盤咁噴落個窗，好刺激呀，拋到坐隔離個鬼妹不知幾興奮。

拋到有點想嘔，都係返房早些瞓覺。小太熊被拋到食唔落野，我只好自己食。

咖哩鯖魚(£0.8)；辛辣杯麵(£1)；奶茶房間包埋

美極牛肉麵(£0.3) – 重用隻杯泡多個麵食，美極麵一向唔多好食，只係貪平。

船拋到半夜去到Orkney Islands為止，接着進入了The Great Britain範圍，唔再拋了，最後緊緊頂得住冇嘔。

 

補充資料 :

 

1.     £1兌HK$10.66 (HSBC網上兌換)

2.     英國電話卡Giffgaff可以網上預訂，出發前寄到屋企，再Download 官方Apps，到埗後可以立即開卡用。有1個月£10 (包15GB上網加超平打長途電話和Local call)的Plan十分抵用。

3.     在英國餐廳食飯不可以主動揮手叫職員過來，會被視為不禮貌，只能乖乖坐定定等職員主動上前才落Order，或者用眼睛望住佢哋，等佢哋注意到再自己行過嚟。之後在全英國食過很多餐廳，留意到又真係冇人主動揮手叫職員落Order的，真係佢唔講都唔知。

4.     在英國生活基本上可以完全唔帶現金，99%的消費也可以用信用卡或Applepay附款，包括所有交通工具、餐廳和超級市場。

5.     英國天氣變化極大，經常落雨，而且不時會括狂風，所以不方便用雨傘，最好全身衣物都要防水。

6.     Shetland巴士班次疏落，由Lerwick乘巴士到Sumburgh，可乘Bus No.6在Viking Bus Station站上車，在“Sumburgh, opp Hotel Rd End”站落車，每日只有8班車，單程車費£2.9。落車之後行2.5km左右上Sumburgh Head。

 

---待續---