旅居英國 • 動態移民(49) – 漫遊Shetland 梅恩蘭島(Mainland)

英國Shetland群島最大型的 史前維京人聚居地 – Jarlshof Prehistoric and Norse Settlement

Jarlshof是蘇格蘭 設得蘭群島(Shetland)最著名的史前考古遺址，歴史可以追溯至公元前2500年，它位於群島中的最大島嶼 梅恩蘭島(Mainland)的南端Sumburgh，被譽為英國最引人注目的考古遺址之一。當時的居民遺留下幾個橢圓形的小房子石牆依然原整保存，古蹟只於每年4～9月開放。

旅居英國 • 動態移民 – Day 69

<<Lerwick>>

今日乘07:54-10:20巴士從Baltasound, Unst回到Lerwick, Mainland。早15min到民宿附近的巴士站 “Police Station”等車，夠鐘時有部私家車駛過並在巴士站停車，司機問我們去那裏，我答佢去Lerwick之後佢便叫我們上車，車上只有4個位，上埋我們剛好滿坐，司機收我們每位£2。這時想到第一日冇巴士有可能係這些私家車唔知我們當時等緊車所以飛站，我又唔知佢係巴士，真係唔知咩玩法，不過算啦，走了。

私家車去到Belmont, Unst的碼頭，司機叫我們上另一部在碼頭等緊的真正 28號巴士，司機是第一天車我們來的司機，這程巴士很奇怪。

巴士上船去到Gutcher, Yell之後，司機和我們又一起移到另一部 24V號巴士，佢再收我們每人£4.4，然後直接去Lerwick，在酒店落車。

Solheim and Carradale Guest Houses – 今次在這酒店住2晚，原來和第一晚住的Eddlewood Guest House是同一家人經營的。

雙人房(包括早餐)毎晚£95 – 房間面積很大，裝飾亦有品味，景觀也開揚，比Eddlewood Guest House抵住少少。

今次會在Lerwick留多4晚，然後乘船回到Aberdeen，未來幾日冇乜特別節目，只係隨意咁行吓。

放下行李之後乘 6號巴士往 Sumburgh(每位£2.9 ~ 每日8班車)，那裏是Shetland官網表示有Puffins和鯨魚出沒的地方。我們在“Sumburgh, opp Hotel Rd End”車站落車之後，行上懸崖頂2.5km，上升70m左右。巴士下一站便是Shetland機場總站。

Sumburgh Hotel – 在巴士站不遠處是一坐豪華酒店，向海鄰近飛機場，好好環境。

Sumburgh Head – 從酒店遠望今日目的地，都有排行，如果揸車就可以直接去到山頂。

Jarlshof Prehistoric and Norse Settlement (入場費£7) – 古蹟在酒店附近，這條維京人村落遣跡少有地大型，好值得入場睇。

外圍只剩下建築物的牆腳，建築用的石塊以前在Orkney Islands的同鄰遺跡也見過。

Wheel House – 是在蘇格蘭發現的一種鐵器時代圓屋復雜建築，在這遺跡內保存得相對地原整。

睇完古跡，原海邊小徑行上Sumburgh Head，沿途的景色唔錯，也有不少海鳥，獨欠Puffins。

海鳩(Guillemot)

黃嘴朱頂雀(Twite)

Sumburgh Head Lighthouse越來越近，最後一段路最斜，只有幾度也行到標汗。

回望落車位置，已經冇影了。

刀嘴鳥(Razorbill) – 密密麻麻數量最多的海鳥。

Sumburgh Head Lighthouse – Shetland最古老的燈塔，於1821年建造，燈塔大樓設有辦公室，負責管理燈塔周圍的鳥類保護區。

山頂燈塔位置極度大風，活動也有點困難，遊客量比預期少得多。

黑板寫滿可以看到的野生動物和鳥類，但大部分都見唔到。

Stevenson Tearoom – 燈塔大樓內有間靚茶室，反正太大風又冇乜Puffins，入去飲杯茶食少少野。

Zupfkuchen(右)(£3.2) – 是一款朱古力和芝士蛋糕組合成的俄羅斯蛋糕，還帶有一點檸檬味，口感濃密較一般英式蛋糕好食；津子朱古力蛋糕(£3.5) - 口感比較鬆散，和在英國食開的蛋糕差唔多，麻麻哋；檸檬汽水(£2)；奶茶(£2.2)

食完Tea風力弱了些少，到附近看看有沒有嘢睇。

暴風鸌(Fulmar)

三趾鷗(Kittiwake)

等了2hr都係得這兩種鳥，又冇Puffins又冇鯨魚有點失望，太凍頂唔住唔等了，慢慢行返去巴士站。

回到海邊都遇到幾款海鳥。

鸕鶿(Shag)

蠣鷸(Oystercatcher)

歐洲椋鳥(Common Starling)

夾啱時間乘Bus No.6 回到Lerwick (每位£2.9)，在Viking Bus Station落車，在巴士站的中餐館買些外賣今晚食。

長城(Greatwall Restaurant) – Viking Bus Station上層的中式餐廳，外賣比堂食平好多。

星州炒米(£7.5) – 比預期好味，米粉好靚而且有咖哩味和叉燒蝦肉，算係合格；紅酒半支(£2.75)

鯖魚罐頭(£0.8)；辛辣麵(£1)

今餐每人£6.5，冇廚房係冇咁好。

旅居英國 • 動態移民 – Day 70

今日節目好Hea，可以慢慢食早餐。

08:00才有早餐食，趕時間就唔應該買包早餐的房。

Full Scottish Breakfast – 雖然很精美，偶然食一兩餐都幾好，朝朝食就幾嫌。

食完早餐到市中心碼頭乘船到對面小島Bressay，每小時有船，船票上了船才買，每位來回£6.2。

今日目的地係Noss National Nature Reserve，果度非常之自然，話有好多Puffins唔怕人架。

在Bressay西岸登島，要行5km到東岸再乘小艇才能到達Noss，如果有車就可以唔駛行。

今日又係風大到頭髮都吹甩，行得勁辛苦。

風大到牛尾都吹起。

又係羊仔食奶，好得意。

落船之後有2位東歐旅客和我們一樣向Noss方向行，估唔到會有人去。

Noss National Nature Reserve – 自然保護區就在對岸的小島Isle of Noss，小島只有2km長和2km寬，無人居住，是野生鳥類的天堂，網上很多關於這裡的靚相，絕對係好嘢。

來往Noss和Bressay的渡輪票價為成人£5

原來這橡皮艇只在5～8月期間營運，遇上大風浪時會停航。出行前可以致電 Noss Ferry Line 0800 107 7818了解最新信息。大鑊，今日咁大風可能冇船喎。

行去碼頭的一段路又見破屋古蹟。

在碼頭見到兩位東歐朋友，佢哋話啱啱打完電話，今日太大浪冇船了，大家都十分失望。

一對 歐絨鴨(Common Eider)叫我哋下次再來喎。

不過Shetland日日都咁大風，之後幾日朝朝打電話去，都係冇船，真係要十分有緣才可以登島啊。

Bressay冇景點的，只好坐船返Lerwick ，真On9。

小太熊話又凍又餓，去COOP買了條熱狗(£2.25)，之前食過覺得好食。

食完返房休息了，太大風都唔想四處行。

Fort Cafe & Take Away – 今晚又食外賣，小太熊話呢檔最高分，又真喎，16:00開門15:50已經有人排隊等。

阿根廷紅酒(£5.25)

炸蝦寳(Scampi)(£3.6~5件) – 味道一般啦，都有蝦味炸得夠脆。

Fish & Chips (£9.1) – 焗到腍晒出晒水，味道亦都係一般，下次唔買。

辛辣杯麵(£1)；鯖魚罐頭(£0.8)；牛奶473ml (£0.68)

熱情果乳酪450ml (£1.5) – 好夠杰味道酸甜適中，正。

今餐每人£10，唔抵食。

補充資料 :

 

1.     £1兌HK$10.66 (HSBC網上兌換)

2.     英國電話卡Giffgaff可以網上預訂，出發前寄到屋企，再Download 官方Apps，到埗後可以立即開卡用。有1個月£10 (包15GB上網加超平打長途電話和Local call)的Plan十分抵用。

3.     在英國餐廳食飯不可以主動揮手叫職員過來，會被視為不禮貌，只能乖乖坐定定等職員主動上前才落Order，或者用眼睛望住佢哋，等佢哋注意到再自己行過嚟。之後在全英國食過很多餐廳，留意到又真係冇人主動揮手叫職員落Order的，真係佢唔講都唔知。

4.     在英國生活基本上可以完全唔帶現金，99%的消費也可以用信用卡或Applepay附款，包括所有交通工具、餐廳和超級市場。

5.     英國天氣變化極大，經常落雨，而且不時會括狂風，所以不方便用雨傘，最好全身衣物都要防水。

6.     Shetland巴士班次疏落，由Lerwick乘巴士到Sumburgh，可乘Bus No.6在Viking Bus Station站上車，在“Sumburgh, opp Hotel Rd End”站落車，每日只有8班車，單程車費£2.9。落車之後行2.5km左右上Sumburgh Head。

7.     Lerwick在星期一至六每日有一班車往返Unst，單程車費£6.4，車程2hr45min。

8.     Shetland有一款巴士儲值卡“Local Bus Service card”，乘巴士有8折優惠，張卡免費也不用按金，可以多人使用同一張卡，首次出卡必須買£10儲值。

 

---待續---